السلام عليكم ورحمة الله وبركاته
انا مصدومه مره من زوجي امس قبل فترة النوم بقليل غيرت ملابسي وتعطرت مثل عادتي ولكن زوجي صدمني يوم قال لي وش ريحت العطر هذي كانها ريحت بف باف المهم زعلت وسكت وبعدين حبيت ابين له اني زعلانه من كلامه طنشني وسوى نفسه انه نام بكيت من القهر قلت انت جرحتني وليه تسوي كذا امس تمدح ريحت العطر واليوم تسبه ومن هذا الكلام تركني وراح الغرفه الثانيه انا قمت وقلت له لا تقوم انا اللي بروح المهم قفل الباب بوجهي وحلف انه لو ما اروح ان يسوي شيء انا ما احبه المهم قلت له تعوذ من الشيطان انت اللي بديت وانا ابكي المهم قال لي ياحيوانه يا جزمه انقلعي اطلعي براء قالها ولا ما قالها انا انفجرت من البكاء وقفلت عليه الباب ودعيت عليه من كل قلبي وطنشني ولا كانه سوى شيء المهم اليوم الثاني قمت وسويت قهوته وغداه وما قصرت رغم اني كنت زعلانه وهو يكلمني ما كأن شيء حصل المهم اليوم كلمته وقلت له انت امس غلطت علي وقلت انا حيوانه وجزمه وليه تقولها انا زوجتك لازم تحترمني وما تقولي مثل هذا الكلام قال لي ما غلطت ولا شيء انا دائما اقول كذا والله ثم والله انه اول مره يقولها لي وانا اسمعه يمكن انه يقوله لي في السر وانا ماادري المهم قلت له انت ترضى اقولها لك قال ايوه عادي قلت اصلا انا ما ارضى على نفسي اني اقولها لزوجي المهم قلت له اعتذر انت لي لانك غلطت بحقي قال ماراح اعتذر وانا ما قلت شيء سكت وهو خرج .... وانا مقهوره إلى الآن وما ادري وش اسوي معاه كيف افهمه انه غلط علي ... ياليت آرائكم ....

ابغى رايك يا اختي أم جمانه وبقيت الاخوات

حبيبتي زوجك فعلا غلط عليك بس كبرياءه يمنعه يعترف
انا لو كنت مكانك راح امشي هذه المره واسكت وكانه ما صار شىء "اعطيه فرصه"صدقيني لو هو حاس بغلطته ما راح يكررها
لكن اذا كررها مو تبكين وتكلمينه لا تزعلي ولا تكلميه ابدا الا ان يعتذر سوي له كل اللى عليك ولا تقصري عليه بشىء بس اعطيه الطناش بالكلام حتى لو كلمك ردي عليه بدون نفس لانه اذا كررها معناها انه قاصدها وفعلا قلة ادب منه لا يتمادى فيها عليك
انت قريب متزوجه؟؟؟

شكرا لك يا اختي العروسه على ردك وجزاك الله خيرا ......... ولكن اخاف اني لو مررتها له هذي المره يكررها وانا ما احب الرجل اللي يسب زوجته وكأنها جارية عنده مالها اي كرامها...... وانا لي الحين سنتين متزوجه .....

اختك أم رفا

أختى الغلط منك إنتى

تعرفى ليه ؟؟؟؟؟؟

المفروض يوم قال هالكلام تزعلى عليه (((زعل يهد جبال )))مش تزعلين وتجين تكلمينه فلان ترى أنا زعلانه منك وأنا ماخذه بخاطرى عليك وأنت غلطت على وإنت 000وإنت 000000كانك تشحذى منه الإعتذار

هو اللى غلط هو اكيد يعرف غلطته مش محتاج توضحى له بالعكس بطريقتك هذى بينتى ضعفك له

يعنى هو يقدر يلم الموضوع بكلمه ((آسفه ))

بس وش الفايد دامه يجرأ يقول مثل هالكلام لزوجته

المفروض تحسسيه بغلطته وتخليه لمى يعتذر يعتذر من قلب مش يعذر على شانك تشحذين منه الإعتذار

شكرا لك يا اختي نورة على ردك وجزاك الله خيرا ....ولكن الذي لا تعلمينه اني لو ما تكلمت معه ووضحت له اني فعلا زعلت من كلامه ماراح يجي ولا راح يعتذر ولو تركته وانا زعلانه فربما جلسنا فترة طويله ونحن متزعلين .... ولو لم احاوره واقول له ما ازعلني لما سأل وانا اعرف زوجي وشخصيته ورجل عن رجل يختلف .... اعتقد فهمتي قصدي يا اختي نورة .......

أختك أم رفا

والله مدرى عنك يأختى !!!!!!!

بس ترى بطريقتك هذى زعلك ورضاك واحد مش مهم عنده دامك تزعلين وبنفس الوقت تركضين وراه على شان يراضيكى ؟؟؟

بتقولى لو ما كلمته ماراح يعرف ولا راح يراضينى ؟؟؟؟ لا حبيبتى راح يعرف بدون ما أكلمه راح يعرف من معاملتى له


لو إنى فى مكانك كان زعلت ولا كلمته بس إنتبهى بنفس الوقت واجباتك لا تهمليها الأكل واللبس فقط يعنى لا تخليه يمسك عليك إهمال


حتى لو جلسنا ما نكلم بعض شهور دامه هو الغلطان مو مشكله أتحمل وصدقينى الازواج ما يتحملوا زعل زوجاتهم وهجرهم لهم

بس وش النيتجه بعد هالشهور ؟؟؟؟؟؟؟؟



يتووووووووووووووووووب يقول مثل هالكلام



حبيبتى خلى زعلك غالى تصيرى غاليه ولك قدر عنده


على العموم الله يوفقك ويهدى زوجك

اختي نورة ومن قالك اصلا اني ما زعلت انا زعلت وبعدين حتى يوم صار يكلمني كنت اكلمه وانا زعلانه ولكن لابد من مناقشة الموضوع وبدأت انا وناقشت الموضوع علشان احسسه انه غلط علي ...

أختك ام رفا

الاخت العزيزة أم رفأ ..

عزيزتي .. بدأت المشكلة بقول زوجكِ ان عطركِ لايعجبه !

ثم ببكائك واحساسك بانه جرحكِ ..

ثم بشتمه لكِ

ثم بانفصالك عن النوم معه تلك الليلة ..

هل بداية المشكلة تتطلب مثل هذه النهاية عزيزتي ..

المرأة في الزواج يجب ان تكون هي الكبيرة اذا رأت زوجها هكذا..

ربما الزوج كان بمزاج عكر تلك الليلة ..او زعلان من شي معين .. او انه تعبان ومرهق
او توقع شي وووو

اعذريه على كلامه .. وقولي له انك سوف تغيرين نوع العطر عشانه .. (وانتِ خشيه وبعد فتره طلعيه) .. يعني اخذي رايه على محمل الاهتمام وانك تبنين له انج تشترين راحته .

لكن لما شتمك هو تخطى حدوده معكِ .. واذا اخطأ عليكِ احد فهو يدين لكِ باعتذار
ولكن هذا زوجكِ عامليه باللين وهو سيشعر بالخجل من نفسه ..
لكن انكِ تبتعدي عنه وتجافيه وتزعلي ...هذا سيبني بينكِ وبينه جدار يوماً فيوم.

نصيحتي لكِ اخيه .. اقبلي له بوجة بشوش والبسي له اجمل الثياب
وجهزي له الاكل ..ولو استطعتي جهزي له الحمام ليأخد حمام دافئ معكِ
تدلكيه وتشعريه بوجود حنانكِ حوله .. وصدقيني
بعدها سيعتذر .. اذا فتحتي الموضوع بطريقة لبقة (مهم جداً الطريقة) ..
مثلاً لو مدح فيكِ شي .. قولي له بدلع يوووووه في ناس يقولوا اني جزمه واضحكي وقربي من احضانه .. واكييييد راح يعتذر ولو مااعتذر راح يحس بالتقصير ..


عزيزتي .. زوجكِ يحبكِ وانتِ تحبيه
فلتكن المحبة دافعاً لكما للاستمرار بالمودة

تحياتي لكِ

سبحان الله المشكله كبرت من لاشئ
لو انا مكانك وقاللي انو العطر بف باف كان ضحكت ضحكه
فرفوووشه وطنشت وقلت احلى من عطرك من هالمزحح يعني انتي بسرعه اختي قلبتيها نكد
وهوا الظاهر ماهو رايق فتنكد مثلك بسرعه لدرجه تلفظ
عليكي الفاظ ماتنقال لزوجه او حتى ولده ماالمفروض يتلفظها عليه
انا رايي مثل راي الاخوات طنشيه بس لاتهملين حالك ابدا
يعني نظفي بيتك وقومي بشغلك وبنفس الوقت كوني انيقه جدا
اكيد راح يتقربلك من نفسه في هالوقت بشوي دلع بينيله انك زعلانه منه وبينيله غلطه حتى لايكرره

والله انا اكتشفت رجال هالزمن يبون ام مايبون زوجه ، يبغالهم صبر ومسايسه تهد الجبال
والوحده تلاقيها من اولادها ولا من زوجهاا هههههههههههه
معلش
لايزعلون الرجال مني بس هاد الواقع

اختي كلمه اخيره
اذا بتحطين ببالك كل حركه وكل قول يسويه زوجك بتتتعبيين
الاشياء اللي تقدري تعديها عديها بس اذا حسيتي ان نفسيتك راح تتعب صارحيه وقولي كل اللي عندك وطبعا باسلوب
اول شي راح ترتاحين وثاني شي هوا بيعرف على شو زعلانه وبيحاول مايكرره
لااني كنت قديييييما اشوف الشي المزعلني واسكت وزوجي يشوفني زعلانه ومايدري اش القصه تعرفي شو يقول الله يجازي الهرمونات اللي تخرب مزاجك
ههههههههههههههه مسكين حط البلا بلهرمونات ،،فتعلمت اتكلم واقوول صحيح مو بكل شي ادقق واشياء كثييره اعديها
يابنت الحلال
هالدنيا كلها بلاوي ومصايب واللي يشوف مصايب غيره تهون عليه مصيبته
اتوجهي لربك هو رفيقك والشفيق عليكي ادعيه يهدي زوجك ويصلحه
شكل زوجك يحبك بس هم كداالرجال يتصرفون تصرفات حتى الوحده تتيقن انه ماعندهم ذرةحب بداخلهم

انا طولت عليكي بس شفت منطرقةالكتابه انك زعلانه مره

الله يوفقكم

غاليتي أم رفا ..

تعليقات الرجال المؤلمة ليس لها حد ..

لست متزوجة لأحكم .. ولكن لي أخ تعليقاته بديعة ..

بف باف او فليت .. لم تكن هذه القصة .. ربما لم تغضبك الكلمة بحد ذاتها ولكن الاسلوب الجارح ..
لا اعتقد ان زوجك او حتى انت او انا سنقبل ان نعتذر بهذه الطريقة مهما كان الجرم الحادث ..
اذ انك تطلبين منه ان يعتذر منك ..
غيري الطريقة ..
مثلا .. اخبريه انك تحبيه كثيرا .. وانه نور عينيك ولهذا فإن أي كلمة جارحة تصدر منه ستحدث جرحا عميقا في داخلك ..
غيري من اسلوبك في التعامل معه ..

تكيفي مع طبعه ..
انتقدي اشخاصا يتلفظون بهذه الكلمات السيئة .. حاولي ان تغيريه وان تكسبيه ..
امتدحيه عندما يمحدك مثلا .. ياريت لو كنت كل الايام مثل اليوم ..

صدقني حتى لو وضعتي بف باف .. سيشمه على انه ارقى العطور الفرنسية ..

لست هنا لألومك فزوجك مخطيء .. ولكن نحن هنا لنحاول ان نحل المشكلة فلدينا طرف واحد فقط ..

تمنياتي لك بالسعادة .. وكل عام وانتي بخير ..

__________________
-قاطع المنتجات الدنماركية والصحف التي تنشر دعايتهم ..
-ادعي على اعداء الاسلام والمستهزأين ..
- لابد ان نرفع قضية ليحاكم رئيس الوزراء - الملكة - الصحيفة ..
-لابد أن ينشر في نفس الصحيفة سيرة الرسول صلى الله عليه وسلم ..
-أن يفرد التلفاز الدنماركي برامج عن الرسول صلى الله عليه وسلم..
-والى متى يا امة المليار .. يارب متى نصر الله يارب احرقهم كما حرقوا قلوبنا على رسولنا وديننا