الصراحة يا جماعة وضعي صار مرة مو محتمل ،،

انا تعبت ،، ضغوط الدنيا فوق راسي

مشاكل الأهل ومشاكل العمل ،، نفسيتي خلاص تعبت

ومالي غير حبيبي وزوجي ( خطيبي معقود قراني ) اشكي له ،، احياناً يرفع ضغطي بكلامه

واتحمل ،، أحياناً يجرحني واتحمل ،،

المشكلة اللي صارت الحين ،، اني كنت متضايقة من تصرفاته معاي وكلامه اللي يرفع الضغط وجلست اتفاهم معاه على التلفون ،، وهو ما يحب الأنترنت ويعتبره مجرد شات وماسنجر وسوالف مالها داعي ،، وانا عندي دبلوم في البرمجة ونظم المعلومات ،، وعملي كله على الكمبيوتر ،، فجلست افهمه انه مثل ما الانترنت فيه سلبيات فيه إيجابيات وجلست اقول له على المواقع اللي أدخلها والاشياء اللي اسويها

على فكرة هو ماله دراية بالكمبيوتر ابد ،، وماخذ فكرة انه شي سلبي بالمرة

المهم قال لي انتي كذابه ،، وانا متأكد اصلا انك تدخلين على شات وماسنجر وعندك مليون واحد تعرفينه على الشات والماسنجر

حلفت له اني هذا كله كذب ،، وقلت له اسأل اخواني اننا ماعندنا لا شات ولا ماسنجر في الجهاز ،، اصلا مايشتغلون

وتطورت المسألة واتهمني بأشياء والله استحي اقول لها

انا قلبي الصراحة انجرح من كلامه كثير ،، قفلت جوالي وجلست مع نفسي

وفكرت ،، لو اتزوجته وكملت معاه ،، وتخانقنا سوى كل مرة بيجلس يتهمني فيها بأشياء مالها وجود

وهذي بحد ذاتها بتخرب العلاقة بيننا ،، وكثر الجرح في القلب مو كويس

يمكن اكرهه من كثر الاشياء اللي جالس يسويها فيني والالقاب المشينة اللي قاعد يعطيني اياها

يا عالم انا بصير زوجته ،، او صرت زوجته معقوله كل هذا الشك

انا ما اقدر اعيش معاه وهو كذا

فكرت بالطلاق ،، بس المشكلة اني خلاص ليلة دخلتنا انتهت وش بيكون منظري قدام اهلي لما اتطلق وانا توني مخطوبة ودخل علي

انا محتارة ،، وربي دموع عيني ما وقفت

ياريت تساعدوني وتنصحوني ،، نصايحكم والله تساعدني

محبتكم// المصرقعة

السلام عليكم ورحمة الله

اختي المصرقعه ماعتقد ان هذي سبب مقنع للطلاق تره صدقيني كل الرياييل جذي واكيد هذا من حبه لج وغيرته عليج بس على فكره اللي يقهره زود ويخليه يقول هالكلام هو جهله بأمور الكمبيوتر

تره حالتي نفس حالتج ومن ايام الخطوبه واحنا هواش على هالسالفه خصوصا ان دراستي It

والف شرط حاط لي لدخولي الانترنت

من عقب ما كان الكمبيوتر في غرفتي طلعه وخلاه في الصاله وشرط علي ماقعد الا اذا احد معاي ومادخل في الليل على الانترنت ووووو وصج كنت انقهر لان احس ان مافي ثقه بس بعد مالومه لانه مايعرف حق الانترنت ولا الكمبيوتر

شوفي اختي حاولي تعلمينه على الكمبيوتر قعدو مع بعض فتحي له المواقع اللي هو يحبها او المواضيع اللي تحسينها تجذبه

انا متأكده بإذن الله انه مايقصد الكلام اللي قاله في حقج بس من كثر حبه وخوفه عليج + جهله لاستخدام الكمبيوتر يخليه يشك اكثر وبعد لاتلومينه اكيد سمع قصص وسوالف عن الانترنت والشات وماكثرهااااا هالايام

انا علمت زوجي على الكمبيوتر وعلى الايميل والمسنجر وارتاح اشوي عنده الباس وورد ويدش وقت ما يبي ويجيك وعلمته على المنتديات على فكره دايما نقعد مع بعض نتصفح هذا المنتدى بس طبعا اكون مسويه خروووج حق اسمي

عزيزتي المصرقعه .. انشالله بعد العرس بتخف هالمشاكل بس انتي هونيها وتهون ولا تكبرين السالفه والله يكون في عونج على هالضغوطات وهالمشاكل ..

اتمنى اني افدتج بهالكلمتين وسامحيني على الاطاله..

اختج .. صوت الفجر

اختي الغالية صوت الفجر ،، تسلمين يا قلبي

وإن شاءالله ،، ربي يهونها يارب

انا ماودي تتأزم السالفة لاني بعد احبه ،، مهما كان زوجي وإن شاءالله ابو عيالي

بس اللي مجنني هو كلامه اللي على القلب مثل السكاكين

ياربي ليش مايحسون بكمية القهر اللي نحسها

صدقيني يا اختي ،، انا ودي نتزوج اليوم قبل بكرة ،، سنة كاملة وانا اعاني يا اختي ،، هو في ديرة بسبب انه معلم وانا بالشرقية ،، وكنت كل ما اكلمه احس بكمية البهذله اللي هو متبهذلها وما تتصورين شكثر انا تعذبت على شانه

كنت لما اكلمه اقعد اصيح بسكات ،، واتمنى اني اكون يمه ،، اساعده واهون عليه غربته

تعذبت سنه كاملة معاه ،، وما انكر انه تعذب معاي في بداية خطوبتنا لاني وقتها كنت مريضه مرض عضال وكانت وقت ازمتي

لكن ياريت يفهم ان المرأة لها احساس بدال ما يقعد يطعنها في شرفها ويبهذلها الكلام

يارب يسهل امري يارب ويكتب لي اللي فيه الخير

لاني من جد خلاص تعبانه

ابيه عون صار علي فرعون

تسلمين على التعقيب حبيبتي صوت الفجر ولا عدمناك يارب

انا اريد ان اعرف كيف يدخل عليك وانت في فترة ملكة اي الخطوبة من اجل ان تتعارفوا مش يدخل عليك وحتى ولو كان كاتب عليك
انت استعجلتي وتحملي ما يقوله لك لانك اصبحتي تحت رحمته والله يوفقك معه وعليك بسماع نصيحة الاخت صوت الفجر

صوت الفجر ما قصرت ... اسمعي منها .

السلام عليكم..
اختي تم نقل موضوعك لعالم التقافه والتوجيهات..
لتجدي الفائدة الاكبر..
تحياتي..

__________________

صحيح ........
انشغلي لان بس على تخصصكي ......
وبعد الزواج دخليه بعالم النت شوي شوي ...... ألين هو مايقتنع بنفسه .
وأتمنالك كل خيــــــــــــــر

اختي انتي تقولين انه جاهل بالنيت ... وانا كذلك حصلت معي المشكله لصديق لي خلال عام كامل احاول اقناعه بان النيت فيه فوائد وعلوم وايضا سيئات لكن بكل اسف لا زال حتى كتابة كلماتي هذه يصر بان الانترنيت فساد .
فاسمعيني هداك الله .. الزم ماعليك زوجك ولا جا وقت الله الله مايبقى لك غير ابو عيالك واتركي عنك النيت وخرابيطه اذا فيها مسالة مشاكل مع زوجك صدقيني امامك حياة واطفال و و و و ... لن تجدي وقتها متسعا من الوقت للنيت .. فاحرصي من الان على امتلاك زوجك وطرد الشكوك من مخيلته وخلك بنت حمووله

اقوووول انا متأكد99.9%انو ميت فيكي...
الغيره نار
شكله مغيار
احنا يا الرجاله طبعناأقشر
لكن
في شئ أسمه الكرامه
لا تسمحي لكرامتك أن تجرح
كمان كل شئ له حدود
لا تسمحي له بأن يمس عرضك
أبدي له أستيائك
حاولي توقفيه عند حده
صدقيني أنا متأكد أنو يحبك بس ابليس شاطر
صدقيني إذا كان يعني كلامه كان من زمان اعطاكي خامس وسرحك من حياته
مهمتك صعبه بس مش مستحيله
ذكريه بعهود الحب
جددي له البيعه
لاطفيه بالكلام
اقنعيه بإحترام
بيني له مدى الألم الذي يسببه لكي بتصرفاته
ذكريه انكم لسه في بداية المشوار وبأن الأيام كفيله بأن تبين مدى إخلاصك ووفائك
أخبريه بأنك مازلت تختزنين له أعذب المشاعر وأصدقها
ذكريه بالله وبأنه بينك وبينه

أحسمي الموضوع من الأن
ولا قوللي عليكي وعليه السلام
تجنبي مايثير شكوكه
انصحيه بتعديل سلوكه
بيني له أنك تعلقين عليه أمال كبيره
اخبريه أنك تريديه عونا على طريق الرحمن
اكدي له ان اكبر أمنيه لكى أن تموتي على صدره وفي حضنه
أنا قلتلك صدقيني يحبك
وبيدك كل شئ
الله يصلحك له ويصلحه لكي
سلام