السلام عليكم ورحمة الله وبركاته. .
انا طرحت مشكلتي سابقاً. .
http://www.66n.com/forums/showthread.php?t=261099

http://www.66n.com/forums/showthread.php?t=261823
......................
انا ماصرت ادخل هناء كثير بسبب ظروفي ..
لازلت في مشاكل مع زوجي والسبب أهلة. .
رجعت بيت اهلي اكثر من مره وراجع لمه وحياتي ( رايحه جايه)
والمشكلة هو الي يطردني او ينزلني لبيت أهلي...
طبعاً في آخر مره رجعت له اشترط الوالد عليه انه مايلزمني بشي لاهله يعني زيارة مكلامه مناسبه ابد مايلزمن. . وافق زوجي..
وانا اصلا قطعت علاقتي فيهم نهائي بسبب المشاكل وقلت احترامهم لي وكلامهم علي حتى السلام يرفضون يسلمون علي ..
المهم وفي مره من المرات زوجي كان عند امه طبعاً لازم يمر عليها الصبح والظهر والمغرب والعشاء والعصر ينام ... هذا جدوله طبعاً.
كان عند امه الظهر وانا بالبيت دق جوالي اتصال من زوجي ..
رديت الوالو الو مافيه احد يرد علي وكنت اسمع صوته وصوت امه واخوه الكبير فعرفت انه الجوال انضغط بدون قصد..
وقفت انا هنا اتسمع لكلامهم .. لقيت امه تحرضه علي وتقوله ادبها وقفها عند حدها. .
انت تمشي ورا مرتك مثل الخروف ليه تلبي لهاكل طلبتها. .
قالزوجي يمه وش يرضيك قالت امه تكسر راسها قال شلون وش اسوي
كل شي تبونه سويته لكم .. قالت طلقها...!!
قال يرضيك يمه اطلقها وبناتي طيب .. قالت محد ضايع ولاهي اول وحده ولااخر وحده
والمصيبه اخوه الكبير مع امه ويحرض اخوه علي بعد....!!!!!!
سكرت التلفون عشان لايدري اني سمعت شي ..
كنت اتمنى لو انامسجلة كلامهم..
طبعا اشوفه كالعاده يدور الزله فيني ويحاول يلاقي شي يهاوشني عليه...
انا اشتغل بقدرتي وبالي اقدر عليه وهو ليش هذا غبار وليش وليش ووو
ابوي دور لي على وظيفه و توظفت براتب الف ريال ... الحمدلله على كل حال
وهو كل يوم يحاول يكرهني بالوظيفة. . احرجني جدا وكثير يتصل ويهاوش ويناقش وانا اكون مشغوله. . ولما اقول انا مشغوله يقول مافيه شي اهم مني ...
سكت وماقلت لأهلي شي ابدآلاني ادري واعرف انهم ملو وتعبو مني ..
وكل يوم موال .. حتى الصبح اقول ياله صباح خير ..
طبعاً غير هذا يسافر شهر شهرين ويتركنى عند اهلي ويتحججمره امه تعبانه ومره يقول بشوف اخواني من ابوي .. مره يقول شغل مولازم تعرفونه.. يادوب اكمل اسبوع بالكثير اسبوعين في بيتي الا وهو مسافر وانا اروح بيت اهلي ..
المشكلة ماهي هناء وبس .. حتى وهو مسافر يحصل خلاف بيني وبينه ..
المره هاذي اخذ امه وخواته وسافرو بحكم انه بيعالج امه انا طبعاً رحت بيت اهلي وكالعاده ..
طبعاً هو مايتصل ولا يسأل انا الي اتصل واسأل عنه واذا ما اتصلت ياويلك. ...
ويقول انا اتصل اسأل عن بناتي بس تسمعيين ..
وانا كل هذا حاطه اذن طين واذن عجين.. وامشي اموري ولا اقول لأهلي شي نهائياً
المهم اتصلت كالعاده وكان ينافخ علي .. سالته متى تجي .. قالمالك دخل وبعديز وش عندك بس تسألين عني والا شفتيني مع أمي بس انت لو بك خير تسالين عن امي
قلت له انت تقول امي خط احمر لاتتكلمين فيها لابالزين ولابالشين ..
قال انقلعي واقلبي وجهك عني مرأه ماتسنع كلامي ماتلزمن اجلسي بيت اهلك واورقتك تاصلك انشاالله. .
سكرت التلفون رحت عند أمي منهاره يدوب كلمتين قلتها وماسمعت باقي الكلام ثارت بوجهي
وقالت .. انتي الغلط وانتي الغلطانه وانتي ماتفهمين كلمي امه و اسألي عنها و اذا صار يعني قلت لأمي حرام علي يايمه لاتخليني اجرم بنفسي من القهر نسيت وش سوت اجي اسلم عليها وتدفعني بقوه وتقول لاتسلمين ولا تقربين اجي اسلم على بناتها يمشون ويخلون اتصل اسأل عنها وتقول مانبي منك شي لا تسألين احشمي اولدي بس.. و و و و و
طلعت لغرفتي منهاره ..
امي راحت لأبوي وبدت تعبي راسه علي وتقول مانلوم الولد بنتك راسه يابس وبنتك وبنتك ....!!!
انا عارفه ليش امي تسوي كذا عشان هي الي جبرتني اتزوجه وكانت وحده من صديقاتي تقولي يخسارتك عليهم تري امه وحده متسلطه وخواته متكبرات وطبعهم غريب الله يعينك .. ولما قلت لأهي هالكلام .. عصبت علي وقالت اقطعي علاقتك بصديقتك و و والمشكلة مو بس صديقتي ناس كثير قالو لها بس ماتبي يصير الوم عليها.. مع اني كنت صغيره لاكن مادري ليش استعجلت علي ..

المهم الوالد جاني لغرفتي وجلس يحاول يكلمني .. قلت له انا سمعت كل كلام امي لك
من كلمتين ثارت علي .. وشرحت لأبوي كل شي من رجوعي آخر مره ..
بينت له اني انا تعبت ومليت من حياتي معاه..
طبعا زوجي طلع متصل بأهلي قبل كل شي وقايل لهم بنتكم عاصيه ولاتسمع كلامي وانا ما ابيه المرأه الي ماتسمع كلامي مالي بها لزمه وانا ابغى اطلق ..
وصار يتصل علي ولا ارد نهائياً. .
راح اتصل على امي وقال بنتك ماترد و و و
جاني ابوي قالي كلميه كلمته المهم يهاوش ويتهم ويقول انتي تكذبين علي قدام اهلك و و و سألته انت تبي اكلمك وش المطلوب ...
قال لاتقلين ادبك واحترميني و وانا بطلق اذا منتي متعدله قلت الي تبيه سوه..
قال بأخذ بناتي معاي و اورقتك تاصلك .. قلت سو الي تبي
عطيت الجوال ابوي وقلت خلاص انامالي كلام معاه تعبت ..
كلمه ابوي وقال انا الاثنين انشاالله ارسل اورقته..
يحسبني ميته عليه انا اكرهه ومابيه لاكن اتحمل واصبر عشان بناتي..
ابوي يقولي فكري بالعواقب فكري زين ..
اي عواقب ياناس اذا انا ما اجلس بيتي الا اسبوع وباقي الايام عند اهلي وين الاستقرار
حتى الاسبوع الي اجلس فيه ببيتي يجبرني اروح لأهلي. . ليه طيب مادري .. ويسهر ومايجيني الا نص الليل.. واذا قلت ليه تجبرني يقول ابي بناتي يغيرون جو وانا بنتي بالروضه اضطر اخليها تغيب واحيانا تروح مواصلة. ..
واذا على الزواج انا مابي رجل بحياتي وقضيت وانتهيت انا اذا تطلقت مارا افكر بالزواج نهائي
وبعيش حياتي كلها لبناتي ..
والمشكلة الثانيه ... اني حامل. ..
عندي بنتين وحامل الحين .. كنت اخذحبوب مانع لاكن كان يرفض يجيبها لي وكنت ادبر روحي من اشتري لما اطلع... والشهر الي فات كان ماجاب لي حبوب وعصبت عليه وعقب ماخلص جاب الحبوب ورمها بوجهي ....
لما عرفت اني حامل حاولت انزله بأي طريقه .. ظربت بطني بقوه عشان ينزل شلت سرير الغرفه ابغاه ينزل رميت نفسي بالارض كل شي اخر شي شربت اعشاب وقرفه بس مانزل ..
رضيت بالامر الواقع استغفرت ربي يارب لاتؤخذني يارب ..
اعصابي كانت تعبانه وماتحملت..

(مستجدات الرد41)
http://66n.com/forums/showpost.php?p=3355723&postcount=41

اعتذر عن الاخطاء الأملائيه كثير كنت اكتب من الجوال ..

لو فرضا قررتي تتطلقين :

- اهلج بيستقبلونج مع بناتج ؟
- احتمال بعد فترة تصير له الحضانة هل بتستحملين بعدج عن بناتج ؟
- من بيصرف عليج وعلى البنات ؟


هذي اسأله فكري فيها .. عشان ما تكونين في وضع وتصيرين في وضع اسوأ

__________________

حاجة الناس إليكم من نعم الله عليكم ، فـ لا تملوا النِعم ☁✨

اشكرك على ردك أولاً. .
اختي اكيد اهلي بيستقبلوني مع بناتي .. انا بنتهم وابقى بنتهم ولو ضايقهم وجودي لن يطردوني من البيت .. واظن هذا اختيارهم لي زوج لم يكن لي اي قرار غير اني رفضت الزواج انا ادرس اصرت امي على زواجي تركت كل شي على رغبتهم لاني اعلم ان اهلي لن يخدعوني ويريدون مصلحتي .. فهذا نصيبي وقدري والحمدلله على كل حال...
.........
بالنسبة للحضانه و ان اخذ حضانت البنات فأنا على يقين تام انه لن يتحمل مسؤولية البنات هذا غير امه الي ترفض وجود بناته عندها ساعات معدوده انا لذهبنا مستوصف او غيره فما بالك الحياة كلها فهي تكره بناته سبحان الله مع انهم بنات ولده .. من الي راح يربي بناته له لاتقولين هو مايقدر يجيب لنفسه كوب مويا عشان يتحمل مسؤليتهن..
...........
بالنسبة للمصروف اكيد بدور لي وظيفه افضل بإذن الله يارب.. و بناتي اكيد بيكون لهن حق النفقه من ابوهم ..
.........
هذا ما افكر به وانا لم اقصر بشي معاه وتعبت وانا صابره والصبر نفذ..

لا حول ولا قوة الا بالله

فكري بما يجب وبما سيكون مثل أهل زوجك لن يتحملو البنات ووظيفتك وان كان الراتب محدود ولكنه يغنيك عن العالمين
دع الطلاق يأتي من جانبه واتركيه لضميرة ولقصاص القدر وسيعلم أي هاوية ألقى نفسه فيها بظلمك وتعديه هو وأهله
أكرر أجعلي الطلاق يأتي باختياره هو وحاولي أن تستعيدي نفسك وترسخي لك قوة وابحثي عن وظيفة افضل والحمدلله أن أهلك متقبلين وجودك وصغيراتك فالأمور في صالحك

اشكرك على ردك. .
الطلاق من يأتي ويتكلم به هو .. ويتهمني اني انا من يريد الطلاق .. كل كلمه وكلمه بطلق وبطلق ونقلعي بيت اهلك ..
والدي يقول تفاهمي معه لاكن لا اعرف على ايش اتفاهم معاه ... هو بشخصيته كذا مشكلجي معاي وكاني خادمه تحت رجوله ..
نعم انا معك اختي قلت ان اراد الطلاق فليطلق ..
الله يكتب الي فيه الخير لي دائما..
الله يجزاك خير الجزاء

اذا اخترتي الطلاق اول شيء رتبي امورج
من الحين ابحثي عن وظيفة افضل

__________________

حاجة الناس إليكم من نعم الله عليكم ، فـ لا تملوا النِعم ☁✨

هذا الي احاول فيه ... الله يكتب لي الوظيفه الي تسر خاطري
الله يجزاك خير الجزاء

ياختي خلاص خلك ببيت اهلك واعطيه بناته واذا قالك بطلق قوليله يلا طلق وابي ورقتي باسرع وقت
وانا متاكده مراح يتحمل مسؤليتهم وبيرجعهم لك
وروحي شوفي نفسك وتوظفي وتزوجي بعد ما وقفت الحياه عليه
والله حرام تضعين عمرك مع واحد كذااااا

لاحول ولا قوة الا بالله

معقولة ام تخرب حياة ولدها و تشتت بناته ؟ مافيه خوف من الله
مافيه ضمير !!

وانا اختك زوج زي كذا ماعليه حسوفه اول حاجه تسويها
1- قفلي جوالك ولا تردين عليه ابد اذا يبي يتفاهم خليه يتفاهم مع ابوك
2- الجئي الى رب العباد العزيز القوي و الحي بالدعاء بما فيه خير لك و لبناتك
3- الطلاق خليه يجي من طرفه انتي لا تطلبينه عشان مايجي العيب منك

الله يسهل امرك و يفرجها عليك