السلام عليكم ورحمة الله وبركاته

في موضوع لفت انتباهي الفترة الأخيرة أغلب النساء لديهم جوالين بحجة واحد بدون كاميرا للمناسبات اللي تمنع الجوالات الكاميرا وأحياناً الثاني بكاميرا بس موديل ثاني

أنا لا أظن بأحد شئ حتى ما أحد في الردود يتطرق لهذا الشئ

أنا أشوف ما له داعي لو كنت شخصية عادية بس لو أنا كنت مسؤولة ومركزي يحتم كثرة الاتصالات ما يمنع يكون عندي جوال خاص للمقربين فقط والثاني مفتوح للكل

أغلب الموظفات معي عندهم جوالين إلا أنا وكم وحدة يعني شئ انتشر وأنا أشوف إنه اسراف

أنا عن نفسي ما أفكر أغير جهازي مع إنه كاميرا عادي وشوي قديم من العصر اللي بعد الحجري وتنقصه خدمات كثيرة بس تعودت عليه ولو فكرت أغيره بآخذ واحد عادي أحدث شوي

والكل يقول غيريه حطي الواتس أب بس أنا ما تستهويني هذه الأشياء لا واتس أب لا بي بي لا ماسنجر

في مرة من المرات أختي المخطوبة بتغير جوالها وأخذت بنتي معها المحل المهم اشترت جالكسي تاب بنتي رجعت زعلانة تقول أبغى زي خالتو أنا جوالي يفشل وصار اليوم متنكد قلت لها أنتِ صغيرة قالت أنتِ ما تحبيني ( صار مقياس الحب جوال )

اتصلت بأبوها وقالت له خالتو اشترت جالكسي أبغى زيها وسايرها بالكلام بس ما اشترى لها ( خير بنت في ابتدائي وش لها بجالكسي )

والحمد لله أبوها صارم بهذه الأمور هو معطيها جوال عادي بدون كاميرا للتواصل معي لو راحت له ومسجل لها أرقام المقربين من أهلي وأهله فقط ويتابعها وما يخليه بيدها على طول ولو جاتني رفعته عنها ولو طلعنا مكان عام أعطيتها إياه لا قدر الله أحد يضيع في تواصل

واللي أصغر منها تقول أنا أبغى آي فون ( كملت )

لا أنا ولا أبوهم جوالاتنا آي فون أو حتى جوال حديث

المشكلة يشوفون أطفال حولهم الايبود والآي فون عندهم وهذا يصعب علي الأمر ومهما أقول لهم أنتم صغار تقول ليه فلانة عندها وهم في سنهم والغلط من أهاليهم وإلا عمر ابتدائي ينعطون آي فون ؟؟؟

بصراحة دخلت مع بنتي محل بعد ما أزعجتني وسألت عن الايبود وقال لي تقريباً 1000 ريال الله لا يخسف بنا يمكن راتبي قيمة آيبود

قريبتي عندها بنت تقول لها أبغى آيبود وسوت لها هليلة قالت لها إذا اشتغلت اشتريت لك ( تسكتها )

وعمتي ولدها عمره 5 سنوات جاء وقال لها بأذنها ماما ترى الآيبود بـ 700 ريال أبغى واحد

بالله وش نقنع هالأطفال ما دامهم ما يحسون بقيمة الريال

يا ليت نتناقش في هذا الموضوع الهام

مشكورة على سرعة ردكِ

فعلاً التربية صعبة ما دام اللي حولهم عندهم أكيد بيقولون حنا مو أقل منهم وهذا اللي أعاني منه

ما تدرين يمكن أنا يصير عندي جوالين بس أنا قلت لو حسيت في ضرورة يعني أنا مو رافضة الفكرة بس لازم أولويات

أنا طلعت جوال بالكلية مو الحين يمكن الجوال ينعطى المولود يتسلى فيه ( ليه هو أقل من غيره )

أعجبني توقيعكِ فعلاً اشتقنا للدراسة ( الحين وحدة تدخل وتقول اختبري بدالي بدل ما تتمنين )

ردكِ أسعدني

الظاهر لو تشوف بنتي ردكِ تقول شوفي الناس الفاهمة
وبتفتحين علي باب ما صدقت سكرته
الله يعين بس

مثل ما قلتِ فترة يعيشونها

في مقولة لعمر بن الخطاب رضي الله عنه أذكر جزء منها ( أكلما اشتهيت اشتريت )

شكراً على تشريفكِ لموضوعي
فعلاً كلامكِ كل أم وأب هم المسؤولين عن تربية أبنائهم
في مقولة ( لا تغرك كثرة الهالكين وقلة السالكين )
أنا أحاول قدر المستطاع ولكن العالم الخارجي مثل التسونامي

المشكلة في هذه الأعمار التقليد مرة بنتي شافت عند بنت عمها دفتر استيكرات وسوتها سالفة أبغى زيها
هذا مقدور عليه واشتريت لها ولما ترجع من المدرسة أقولها وين الاستيكرات تقول وزعتهم على الفصل
يعني السالفة وما فيها حب المظاهر ليه بنتي عمي أحسن مني في ايش ؟؟؟؟؟؟

شكراً على تشريفكِ لموضوعي

أنا ما اشتريت لهم بس من زمان كان عندهم جيم بوي بس تكبروا عليه صارت موضته قديمة على قولهم
أبوهم من فترة اشترى لها آيباد بس شكله مو من الأصلي يعني يمشي الحال وجابته لي ( يعني ترى بابا اشترى لي )
بس كان يبغى له برامج ووداه محل ومن عقبها زهدته وما عادت تجيبه أقول لها وين الآيباد تقول في البيت يعني كان عندها رغبة تملك مثل اللي حولها ولما حصلت عليه ما صار يستهويها

بس مرة شافه ولد قريبتي أكبر منها شوي وقال لها جهازكِ مو أصلي سوتها سالفة وزعلت قالت بابا جايب لي أصلي
راحت لأمه تقول ليه يضحك عليّ قالت لها لأنه ما عنده مثله ومنقهر منكِ ما عنده حتى التقليد
قلت لها يا ماما أصلي وإلا تقليد وش يعني ؟؟؟؟؟

أنا ما أعجبني إنه اشترى لها بس ما بيدي حيلة
وأختها اشترى لها شبيه للآيباد يعني سايرها هو كأنه لعبة بس يوم يومين وأشوفه ممشخ وقاطته يعني بطر وفشخرة
أنا بناتي يتقوون بأبوهم لو قلت ما في هالشئ قالوا عادي بابا يشتري لنا
أبوهم يحبهم بس ما تعجبني موافقته لأي شئ
صحيح يتابعهم بس ليه من صغرهم ما يحسون بقيمة الريال