كيف حالكم أعضاء المنتدى الأعزاء .................

ودي أفضفض مالقيت غيركم أفضفض له أرجوكم أعزائي أفيدوني وعطوني حل لمشكلتي جزاكم الله ألف خير .

بأختصار بتكلم عن مشكلتي ، زوجي قبل أسبوع كان معزوم وطلع في عطلة نهاية الأسبوع ، مع بداية الشهر أيضا كان معزوم مع الربع طبعا يرجع متأخر وأنا أنطره بالليل ، قبل ثلاثة أيام جاء وقالي بعد في عطلة هذا الأسبوع أيضا بيطلع مع الربع مع العلم إنه في كل ليلة من شهر رمضان يطلع ويروح مجالس القرآن والصلاة وأنا أشجعه على ذلك لأن هدا شهر العبادة ، لكني لما قال لي هذا الأسبوع بطلع بعد مع ربعي وبتأخر قلت وأنا ولعيال مانطلع طول الأسبوع ماعندنا إلا هذه الإجازة طلعنا ودنا نطلع معاك نروح نزور الأهل ودنا نشرى للمناسبات فمو كل أسبوع طلعات مع الربع وحنا بالبيت عصب زوجي وزعل وصار له ثلاثة أيام مايكلمني عشان قلت له طلعنا نبي نطلع ، مع العلم أنا ما أمنعه من طلعاته مع ربعه بس قلت له إن حنا لنا حق بعد وخصوصا طول اليوم أنا مزحومة بالصبح بالدوام المتعب جدا تعرفون التدريس ومتاعبه وأرجع أطبخ وأنظف وأكوي وأدرس الأولاد مع هذا كله مالاقي اللي يوقف معاي أو يقول لي كلمة شكر أو حتى يعطيك العافية ، هل أنا غلطانة معاه ؟ على فكرة أنا أحبه وايد وماأقدر على زعله عشان شدي تلقوني تعبانة وايد وهو صامت لا يتكلم زعلان مني وأنا دايما إذا زعل مني أشعر بألم في رأسي .

وسامحوني على فضفضتي ويمكن أخطائي في الكلام نتيجة تعبي من المشكلة .

حبيبتي هذي مومشكلتك انت بس حتى انا زيك علما اني انا توني متزوجه وللحين الله مارزقني الاولاد ياعند اهله اقضي يومي او في البيت لحالي سويت زي اللي انت سويتيه عصبت تكلمت وصحت ومافي فايده كل يوم بيطلع وصارله فتره كل يوم سهر للفجر خلاص سلمي امرك لله وإن شاء الله يارب يحنن قلوبهم علينا ويقدرونا وادعولي بالشهر الفضيل الله يرزقني الذريه الصالحه ويلهيني ويقضي وقتي علي والله يهديلي زوجي ويرجعه لي زي ماكان

وانا مثلكم كلنا في الهوا سوا اول شي كنت ازعل واعصب وصار الحين عندي الوضع عادي اقعد طوووووووووووووول الوقت لحالي ولا عندي اولاد ولاشي وش نسوي الشكوى لله

__________________


تسلم اليدين اللي سوت التوقيع
أختي ROod يااااااااااااامال العافية