السلام عليكم ورحمه الله وبركاته

مساء الخير جميعا ..

كالعاده العائله مجتمعه كلها ... بدينا بالسوالف عن الديون وبلاويها ...وتكلمنا عن بنك التسليف حق الزواج

وزوج اختي ما اخذ السلفه هاذي ... ابوي كلمها وقال لها خلي زوجك ياخذ السلفه وانا ادفعها ..وراح اعطيه

منها 12 الف ريال ..سكتت شويه وردت على ابوي (اخاف ماتدفعها ويصير زوجي هو الي يدفعها ) انا جلست

اناظر فيها وش تقول ... استغربت منها كيف تقول كذا وابوي ماقصر عليها بعرسها بشي ..زوجها اعطاها

المهر وبس ... حتى بعض اثاث بيتهم من فلوس الوالد ... وابوي الله يحفظه ولا عمره قال انا سويت ولا

هات فلوس الي اعطيتك ياه...زواجها برضو مثل ماقلت.. القاعه الي صار فيها الزواج ابوي الي دفعها فوق

الـ5 الاف .. والطقاقه فوق الـ 3 الاف .. والعشا فوق الـ 10 الاف ... كل هاذا تقول ابوي ماساعدها بزواجها

مع انه مهرها ماكفى اغراضها كلها .. وباقي تجهيزها ابوي كمله لها من فلوسه ولا طالب زوجها بشي

وحتى بعد زواجها .. صارو متضايقين شوي من ديونههم .. وصارت مصاريفها على الوالد كلها .. وابوي

الله يحفظه ولا تكلم ولا حتى قال لها انتي عندك زوج ...ومع هاذا يجي ردها كذا على ابوي ...

انا شفت ابوي اول ماقالت هالكلمه انصدم وتغيرت ملامحه بسرعه .. بس قال لها براحتك ..بس والله ابوي

حط في خاطره ...وش فيها لو اخذها ... وبعد يحمد ربه انه ابوي الي راح يدفعها وزياده راح يعطيه منها

كم الف ...جا يوم ثاني .. وكلمتها بالموضوع ردت علي تقول .. حتى فلان مو راضي الي هو زوجها

انا قلت لها انتي يعني تشوفين ابوي ياكل فلوس حرام ؟؟؟ .. ابوي قادر انه يدفعها راتبه حلو ماشاء

الله .. لكن ابوي يبيها حتى يسدد ديونه .. ويكون عليه هاذا الدين بس .. قالت لي مابغى اخاف مايدفعها!

لسه حاطه ببالها انه ابوي يلعب عليها او بيورطها ... والله ياخواني انه هي كل يوم بالبيت ما كانه عندها بيت

وبعد زوجها يجي وياخذ سياره ابوي ويطلع فيها على كيفه .. لانه هو ماعنده سياره .. والله يمكن اكثر من 5

حوادث بسياره ابوي .. وابوي ولا مره تكلم او قاله هات ثمن تصليحها.. وياليت الحوادث خفيفه الا يكسر

السياره تكسير .. وزوجته تدافع عنه تقول ما يسرع ولا هو الغلطان...كم مره كلمناها مافيه فايده

اذا قلنا لها خلي زوجك مايسرع تقول هو مايسرع .. تعودت على سرعته علشان كذا ماتشوف انه يسرع

واذا رجعنا كلمناها مره ثانيه .. تقول انتو تعايروني وتذلوني اني ماعندي سياره وشافيني دايم احتاج لكم

والله ياخوان زوجها اخذ سياره ماجلست عنده شهر سوى حادث وكسرها وطلع هو الغلطان وغرم 13 الف

ريال .. وكل هاذا زوجها مايسرع وتزعل ... ابوي متضايق اول شي من كلمتها وثاني شي من اخذها

للسياره.. مايرجعها الا وفيها طعجه من كل جهه .. وش نسوي لها .. ابغى مشورتكم من ناحيه :

1_ جيتها كل يوم بيتنا ما كانه لها بيت .. ياخوان احيانا تجيب زوجها ينام في البيت .. حتى مره قام بيروح

الحمام اكرمكم الله (دخل داخل البيت وهو دايخ من النوم ) وصارت وحده من خواتي بوجهه ..واذا كلمناها

تزعل تقول انتو تطردوني

2_ ابغى طريقه اعاتبها على جرحها لأبوي .. لانها تشوف انها ماقلت شي غلط !! بس مابي اجرحها

وخصوصا انها مع زوجها بالهكلام مع انهم يقرو انه ابوي مو مقصر عليهم !!

اختكم ... هموووم

__________________
"رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ "

والله بصراحه اختك ماعندها ذوق .. شكلها من البنات الي اذا تزوجت نست ابوها واهلها ..

قلة ادب صراحه وانتو ساكتين لها ..

لا تسكتين على قلة الذوق اذا الموضوع كذا .. ردي وعطيها في وجهها عجبها والا ماعجبها ..
المفروض في نفس المجلس لما ردت على ابوك وقالت اخاف ما تدفع الفلوس المفروض قلتي .. ايش الكلام هذا احترمي ابوك .. وردي زين .. ابوي مو بحاجه لكم عشان ياكل فلوسكم ..

يعني المفروض ما تسكتون لها حتى لو هي اختكم او حتى لو كانت اكبر منك بعشرين سنه الغلط غلط ..
وما ينسكت عليه ..

انا اختي اكبر مني بس اوقات تنطل عيالها عند امي .. وتروح تتمشى والا تتركهم عندنا بالايام عشان تنام وترتاح في بيتها من ازعاجهم وامي هي الي تصاليهم ..
تخيلو اوقات تجيب بنتها عند امي وامي صاحيه من الساعه 7 وتخليها عند امي عشان هي تروح تنام العصر وترتاح وامي بلاش ترتاح
ماسكت لها قلت لها خذي عيالك الله لا يهينك امي مو متكفله فيهم تراعيهم وانتي مرتاحه ..
تقول لي مو شغلك .. اقولها تعالي خذيهم والا طلعتهم الحديقه وصكرت عليهم .. طبعا تهديد بس هي عارفه اني ممكن اسويها

او مثلا نكون معزومين في مكان وتنطل بنتها الصغيره على امي عند الناس وهي ترتاح وتسولف وامي ماتاخذ راحتها من بنتها ..
اقول لها قدامهم .. شيلي بنتك عن امي

يعني اوقات الحاجه احنا نعاونها ونكون معها بس انها تاخذ وجه هذا ماينسكت عليها ..
تنوم رجلها في بيتكم .. ورجلها ياخذ السياره ويخربها .. هذا غلط

حتى لو قالت لك مالك دخل ماعليك منها ..

انا اختي تقول لي دايم مالك دخل بس ماتهمني الغلط غلط وماينسكت عليه يعني عشان اهلك يجاملونها تقوم تستغلهم..

انا نفس وضعك حبيبتي .. اختي مستغله امي وابوي بزياده وليت عندها تعامل لطيف معهم ..

بس اوقفها عند حدها ..

اذا شفتها مستغله اي حد فيهم .. ما اسكت لها ..اذا هي ما ستحت من تصرفها مع اهلها انا ليه استحي منها ؟؟؟؟؟؟؟؟؟؟

__________________
********

وعليكم السلام ورحمة الله وبركاتهـ ,,

تصدقي عاد نفس مشكلة اختي مدري البنت هالايام على بالها ان زوجها بيغنيها عن اهلها !!

انا كم مرهـ كلمت اختي لكن مافي فايدة ,,

ابوي طلب منها مرة عشرهـ آلاف وهي موظفة ماشاءالله راتبها 9 آلاف ,,

قالت ولو ما رجعتها انت تعرف انا بملكة وورايا زواج ,,

مع ان مهرها مثل ماقلتي ماكفاها واخذت من ابويا 15 الف عشان تكمل عفشها ,,

واختي اسواء بشيء انها تعطي زوجها وما تعطي ابويا مع انهـ طلب السلفة منها عشان ملكة اختي الثانية ,,

هي الآن ماراح تحس وراح توقف مع زوجها بكل شيء ضد اهلها لكن راح يجي يوم تبوس رجل ابوكـ ِ وتقول لهـ سامحني ,,

انتي تبغي طريقة ماتجرحيها اجرحيها عشان تحس هذا ابوها اللى صرف عليها من وهي طفلة ولا بخل بيوم ,,

قولي لها لو كان عندكـ ذوق ماكان رديتي هذا الرد على الاقل تقول مايقدر زوجها ياخذ سلفة ,,

وقولي لهـا اذا انتي مو مستأمنهـ ابوكي لا تاخذي منهـ شيء وحتى السيارة دام زوجكـ صدم زوجكـ يدفع ولا مايخذها !!

ويوم يحتاج زوجكـ لا يجي يستلف من ابوكي لأننا نخاف مايقدر زوجكـ بيوم من الايام يرد الفلوس ,,

وقفيها عند حدها دام ابوكي طيب ومارد عليها الا بكلمة براحتكـ الله يستر علينا من هذا الزمن بس ,,

والله يوفقكـ ويسعدكـ دنيا وآخرهـ ويسكنكـ الفردوس الاعلى انتي ومن تحبي ,,

اختي ياربي لا تحرمني واختي رود .. انا لو اكلمها ماراح تجي البيت نهائيا ادري عنها تسويها .. انا ابيها

تعقل شويه والله تصرفاتها ماكأنها بنت عمرها 29 سنه .. كانها مراهقه .. كل شي تقوله للناس .. ماتمسك

لسانها ابدا .. حتى اسرارنا تطلعا عند اهل زوجها وعند صديقاتها ... يعني لو اقولها بوجهها بتقول اهلي

كذا وكذا ..

__________________
"رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ "

يادانه ياختي اخاف تفلت لسانها عند الناس والله ماتمسكه ابدا

__________________
"رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ "

عادي حتى اختي .. تخيلي انها مره كنا عند ناس وانا كنت معها وهي تقول الحمد لله تعاقدت مع سواق بالأجار يوديني لمشاويري احسن لي ولا منية احد .. ولا انك تتطلبين اهلك واخوانك وتاخذين سواقهم يوديك ..

تخيلي مع انه احنا في حياتنا ما منعناها عن السواق وفي حياتنا ما سالنا عن السواق اذا هو معاها
و يوديها الصبح قبل ما يودييني للشغل ويتأخر علي .. واخواني لو تطلب نفذو لها وتحت امرها ..بس وش تسوين قلة ذووق..

انا ماسكتت لها يعني تطلعنا قدام الناس مقصرين معها لا واحنا موجودين بعد ..
رديت عليها قلت لها عاد بذمتك فيه يوم منينا عليك فيه والا يوم منعناك عنه ..

اذا هي بتحكي لا تهمك تحكي مثل ما تبغى وتزعل مثل ما تبغى اخرتها ومردها على اهلها ..

انا عندي حكمه في الحياة ( قلة الذوق دواها العصى)

__________________
********

اختي ياربي ... انا بشوفها وبكلمها لمن تجي .. لانه مايهون علي ابوي تربيته لها وتعبه وبعدها تقول ماراح

يدفع ...المشكله انها احيانا تسد اذنها ولا كانها تسمع وتفسر الكلام براحتها .. وزوجها بعد ما كانه رجال

يعني هو المفروض مايرضى ينام بالبيت بدون سبب ماكانه كبير تصدقون عمره 40 سنه يعني ناضج وفاهم

بس وش نقول .. الله المستعان

__________________
"رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ "

لاحول ولا قوة إلا بالله هذي يبيلها عين حمره تكسر راسها هي وزوجها يبيلكم توقفونهم عند حدهم يعني أكيد ماراح تعيشون كذا طول عمركم الزوج ياخذ ويخرب والزوجه ساكته والأبو يجي ويصلح من وراهم

صراحه شفنا وسمعنا عن ناس مثل كذا بس قصة اختك بزياده حيييييل كلموها وفهموها حتى لو تزعل مصيرها راح تعرف انها غلطانه وانتو ماقصرتو عنها بشي

__________________

حبيبتي السموحه منك بس ما يصير تقولين لاحول لله

أرجو من المشرفين الافاضل تصحيحها ب : لاحول ولا قوة إلا بالله

وحذف ردي هذا وشكرا لكم ..

__________________

والله سالفة أختك تبط الكبد ..
أنا مع الأخت باربي لا تحرمني وباقي الأخوات ..
لا تسكتي عنها ..
وإذا زعلت وقاكعتكم ماراح تقدر وبترجع صدقيني ..
لأنها معتمدة على الوالد أعتماد كبير ...
وزوجها هذا عمره 40 سنة ويتسبب بحوادث ..؟؟
لا حول ولا قوة إلا بالله .. طايش ومتهور ..
الله يخلي لك الوالد .. ويحفظه من كل شر ..