بسم الله الرحمن الرحيم


السلام عليكم و رحمة الله و بركاته



هذا أول موضوع لي معكم بهالقسم

و كان ودي يكون خاص فيني مع إختلاف المضمون لكن تجري الرياح بما لا تشتهي السفن



القصه ومافيها أن لي زميله في الدراسه صرحت لي بقصتها وماعرفت بأيش أنصحها بالضبط

خبرتي في العلاقه بين الزوجين صفر ... فمالنا غيركم طبعا بعد الله


البنت كانت تحب ولد خالتها وهو كمان يحبها لكن مشكلته غير ملتزم الله يهديه وهي مستقيمه الله يثبتها

المهم أنخطبت من أول سنه جامعه من شاب ثاني أفضل من الأول قبلت فيه لدينه

أول ماسمع بالخبر ولد خالتها جاء و خطبها

خطبها تقريبا 6 مرات و أبوها يرفض لأنها مخطوبه

لكن قدر الله الخطبه ألي استمرت سنه من ذلك الشاب ما تتم و أنفسخت لظروف حصلت بينهم

المهم

ولد خالتها أول ماعرف بخبر إنفصالها خطبها بعد سنه وحصلت الموافقه من أهلها

أستمرت خطبتها سنه مثل سابقتها ثم تملكت

كان دائما يكرر عليها أنا خطبتك من أبوك 6 مرات وهو يرفضني

فتقولي كأنه حاقد علي و أبوي ويبي ينتقم منا

و بعد ما مر على الملكه ثلاث شهور الولد تغير وقاطعها فتره طوييييييله تصل لـ6 شهور

و بالأخير قال ما أبيها .. ماتصلح لي !!


ثم بعد فتره غير رأيه في وقت هي كانت تبي تطلب الإنفصال لأنها تعبت معاه

لكن لما شافته تعدل قالت يمكن عين أو مثل كذا خلاه يتغير

أستمرت معاه ثم حددوا موعد الزواج كتحديد مبدئي

لكن بعد مرور شهرين من رجوعه بدأ يطنشها هي و أهلها مره ثاااااانيه وهي مره متضايقه منه

تقولي خلاص كرهته ما تأمن نفسها معاه بعدين

تخاف من تصرفاته


نهائي مو معتبرها زوجه .. إذا اتصلت عليه يا يطنشها أو يسكر السماعه بوجها

و احترامه لأهلها مو مرررره


و للعلم طباعهم مثل ما قالت لي مو مثل بعض هي شرق وهو غرب

و أمه ماكانت تبيها له لكن الولد ألي أصر أنه ياخذها لأنه مثل ما كان يقول يحبها

وفي الأخير هذي سواياه !!


لها الآن وياه سنتين ونصف كان عندها أمل تنتهي مأساتها قريب لكن تصرفه الأخير خلاها تفكر تنفصل

النفس عافته


بصراحه ما تنلام لكن الطلاق أحسه قوي على بنت بعمرها 24 سنه

أنا نصحتها لا تتعجل لأن من الواضح أنها متعلقه فيه .. لكن من جد حالتها صعبه




بصراحه قصتها غريبه هل معقوله الرجال ينتقم لأنه رفض بالسابق !!

طيب وين راحت الموده ألي كان يدعيها قبل !!



انتظر نصايحكم الله يعافيكم

الصراحة انا احس بغرابة

و احس انه يلعب وهو مو مستعد للزواج ابد

حسيت انه مومتحمل المسؤولية

بس انا ما اقدر احكم

انا انصح ان تفكر جيدا خصوصا ان من صفات الزواج الناجح ان تكون في تقارب بالفكر والمستوى التقافي والإجتماعي والديني والإقتصادي

خليها تستخير ربها وتدعي له بالهداية وتفهمه عن استيائها وتكلمة بهدوء علشان يقدرون يحلون المشكلة...

ما ينفع يكون زوجها

لان الزواج يكون مبنى على الموده والرحمه وهذا الشئ مفقود بينهم

الله يوفقها (الطيبون للطيبات)صدق الله العظيم

__________________
الحمدلله علي أنعم الله الظاهره والباطنه

بصراحة اي احد مكانة كان بيثأر لكرامتة وبذات لوكان يحب ولو كنت مكانها ماكنت افكر ارتبط فية بعد مافضلت غيرة علية ولو كنت احبة لان هذي النتيجة طبيعية

عليكم السلام ورحمة الله وبركاته

من قال إنه الإنفصال في هذا العمر صعب !

وش الأفضل تنفصل قبل الملكة أو بعده ؟

مادامها عارفه كيف صعوبة الإستمرار مع بعض والمؤشرات كثيرة للمشاكل المستقبلية

عدم إحترامها .. عدم إحترام أهلها .. عدم إحترام المواعيد بينهم الأهم إحتـرام المشاعـــــر

أكيد إنه الإنفصال أمر صعب لكن خليها تشوف بنظرة أوســع

إذا قادره تستمر على كل مافيه وراح تتحمل الله يوفقها

لكن إذا متضايقة من الآن وماأعجبها الحال الحل تستخير ربها وتختار الطريق اللي راح ترتاح فيه .

الله يوفقها .

اختي االغاليه عبير الله يعطيج زوج يحبج وما يشقيج ولا تحتاجين تاخذين راينا
عن صديقتج خلها تستخير الله
وهي تحاول تجرب منه
اهو لأن يحبها فمصدوم من رفض ابوها
خلها تدعي الله ان يحنن قلبه ويسخره لها
وخلها اهي تتصل وتطرش مسجات حب وشوق وتسوي له مفاجأه تعزمه مثلا على العشا
وخلها تصبر
وخلها تحرص على قراءة سوره القره ماتدرين يمكن البنت محسوده
انصحيها قبل لا تفكر بالطلاق

__________________
سبحــــــان الله وبحمده ,,,, سبحــــــان الله العظيم

لا اله الا الله العظيم الحليم ربي اني لما انزلت اليي من خير فقير
دعائكم الصالح لي بالرجل الصالح

يمكن كان يحبها وكان عنده دافع انه يحصل عليها ولا صارت عندهم خلااص انتهت رغبته فيها ومل منها حاب انه يملكها وفي نفس الوقت لا .. رغبة تملك لشي كان نفسه فيه ..

__________________

	ادعوا لي ان الله يرزقني بالذرية الصالحة

اختي عبير الرياض ودي ادلو بدلوي معكم بحكم اني رجل وافهم بعض الشباب هداهم الله ..

قرأت القصة بتمعن وتوصلت الى الحقائق التالية:

( صديقتك وخطيبها الثاني يحبان بعضهما (قبل) خطوبتها من الاول ثم حدث ان رفضت صديقتك ابن خالتها لسبب الدين واختارت الاول )

هنا : اقول لك وبالتأكيد ان ابن خالتها رمى الحب من النافذة وحط في راسه الانتقام وكفى ..
بدليل تصرفاته بعد ما املك عليها ..

(انفصال صديقتك من الخطيب الاول حقق نوع من النصر المؤقت للثاني ..ولكنه اراد ان تكتمل فصول المسرحية بزواجه منها ثم (مرمطتها) كيفما يريد لاسيما وانه (قليل دين) والله المستعان . )

(قد يكون هناك اثار للحب القديم الذي (كان) بقلبه نحوها ولكن ..رغبة الانتقام بسبب الرفض السابق هي المسيطرة على مشاعره حالياً واصبح يتسيد الموقف بتوجيه الاهانات وابداء رفضه لها الآن ..)

(كل مااخشاه ان يمعن في انتقامه منها ويستغل ضعفها وانوثتها وحبها له ليمعن في اذلالها اكثر واكثر ..بل ربما وقع منه ماهو اشد من ذلك في وجود خلوة او ماشابه) .

الغريب ان امها وامه اخوات !!!!

ورغم ذلك فإن امه لم تكن تريدها له ..وهذا مؤشر قوي لأمر يجب ان تفطن له صديقتك بأن هذا الزواج غير مبني على الاتفاق بين الاسرة ..

سؤال : هل يوجد من يقاطع خطيبته بعد 3 اشهر من الملكة لمدة 6 اشهر كاملة ؟؟؟؟؟؟؟

باختصار : حال صديقتك و ابن خالتها مثل قول الشاعر :

(كل مااقفيت ناداني تعال #####وكل مااقبلت عزم بالرحيل)
(الحقيقة غدت مثل الخيال#####هو عدوي وهو اوفى خليل)

ولكن الزواج لايقوم على مثل هذه المشاعر المضطربة ..فسيتزوجها بعد شهرين ثم ...للأسف سيقع الطلاق لأن الرغبة بالزواج لم تكن الحب ..بل الانتقام .

نصيحة الى صديقتك بأن تطلب الانفصال ..وأسأل الله ان يوفقها الى من هو خير منه..

ولكن لدي سؤال فضولي ..

لماذا انفصلت عن الخطيب الاول اذا كان رجل صاحب دين وخلق كما ذكرت ؟؟
لأن ذلك اوحى لي بأن لدى صديقتك مشكلة بالتأقلم مع خطابها ..

__________________
الفضاوة إما تصنع مبدع أو مريض

والله كلامك عين العقل أخوي
أنا من رأيي أن تنفصل الأن لأنه لايحمل بقلبه إلا الإنتقااااااااااااااااااااام لها ولأهلها
نصيحة تطلب الطلاق بأسرع وقت قبل مايكمل مسلسل الإنتقااااااام ولو لم يكن إنتقام فهو لايحترمها وهذا يعني بأنه لايحبها وزجوين بدون إحترام مشاكل في مشاكل.
الله يوفقها ويعوضها خير منه
(وأنت الله يوفقك يارب ويرزقك الزوج الصالح اللي يسعدك ويقدرك )

اختى الكريمه ..

لو فى توافق بينهم فى التفكير والعقل مقارب , اوكى تصبر ..

لكن قلتى هى فى الشرق وهو فى الغرب , يعنى صعب يتفاهموا ..

لكن برأى المتواضع جدا , انه لو كان صح يحبها ما يسوى كذا معاها , طيب وش ذنبها هى المسكينه ..؟؟

بعدين البنت ملتزمه دينا , وهو لاء , ما يصح أعتقد ..

خله تستخير الله عزوجل , وتاخذ قرار بسرعه ..

الوقت يمر , ولو كان يحبها صح كان تجوزها ..

الله يسعدها يارب وكل بنات المسلمين ان شاءلله ..

دمتى بخير .

__________________
رب أغفر وأرحم وأنت أرحم الر احمين..

سبحان الله والحمدلله ولاأله الا الله والله أكبر..

اللهم أغفر لى ولوالدى والمؤمنين والمؤمنات الأحياء منهم والأموات..

وللهم اغفر لى وللمسلمين والمسلمات الأحياء منهم والأموات يارب..

اللهم لك الحمد والشكر حمدا كثيرا طيبا مباركافيه..

دمتم بخير.