السلام عليكم ورحمه الله وبركاته

صباح او مساء الخير

خلونا ندخل بصلب المشكله على طول...!

تقدمت لبنت من اقاربنا البعيدين بتوصيه من اهلي ومباركه من الله ثم منهم .. وصار اول خطوات الخطبه هو ان اهلي اتصلوا على اهل البنت وفاتحوهم بالموضوع ووافقوا تقريبا وماهو اكيد لكن تقريبا .. طبعا اخوي راح لابو البنت وكلمها وجلس معه وقال ابو البنت والله مانقدر نرفضكم بالعكس هذي الساعه المباركه لكن ابغى اشوف الولد انا بعدها بثلاثه ايام رحت لابوها وجلست معه وفي نيتي ان المسأله ان شاء الله انتهت وانهم وافقوا !!طبعا هالاجتماع الصغير كان بحضور بعض اخوانها وقريب لهم المهم دارت الجلسه بكلام ماله اي دخل بالزواج نهائيا يعني كأي جلسه من الجلسات واستمرت الجلسه حوالي 3 ساعات وبعد الغداء بربع ساعه انا استأذنت طلع معي ابو البنت وقالي ياولدي شوف انا ماعندي مانع والبنت والام والاهل ولكن المشكله في البنت تبغى تكمل دراستها !! قلت انا ماعندي مانع انا الي راح اسعى لها بتكميل الدراسه ولا راح اوقف واصير حجر عثره بالعكس انا ابغاها تكمل .. قال الاب طيب البنت لك ان شاء الله بس تبي تصبر سنه !!؟؟ قلت انا لا والله انا ماعندي استعداد اني اصبر انا مليت من العزوبيه وابي اتزوج باسرع وقت سنه يابو فلان طويله قال هذي المشكله بس بالدراسه لكن بكلمهم (يعني البنت وامها) وارد لك .. قلت اوكي ماعندي مشكله طبعا الكلام هذا كله كان امس .. بس انا ضايق صدري وللعلم هذي ثاني خطوبه الاولى كانت برفض من الام وهالمره تقريبا من البنت عشان الدراسه وللعلم الحمدلله مابي امدح نفسي انا مالي لا بالدخان ولا الطلعات ولا غيره وموظف والحمدلله راتبي يكفيني وفوق هذا كله الحمدلله حريص على الصلاه لكن وش سبب هالمشاكل انا كل ماتقدم اروح لابو البنت وبعدها بكم يوم يقولون ماعندنا لك نصيب وش الحل ياجماعه انا مليت ودي اكنسل فكره هالزواج من الاصل مادري هل البلا مني ولا من غيري انا ضايق صدري ان مارد علي هالمره انا بتحطم صراحه ولو كان فيه رفض اكيد برضوا بتحطم مادري ياجماعه لو لم يكتب الله لي نصيب مع هالبنت هل النصيب الى الان ماجا ولا كيف ...!! وعساها خيره يارب

تحياتي

الاشراف : لفظ المشيئة يكتب إن شاء الله ,بالتوفيق .

اخي عساها تكون خيره لك
استغفر الله
ترفض الزواج من اجل دراسه
اخي عساها تكون خيره لك
استخير الله ان كنت تستطيع الصبر عن البنت
اوممكن تملكون وبعد سنه تتزوجون
واذا لم يوافقو
لاتحزن ،ادعي الله بالزوجه الطيبه اللي تسعدك
الله يرزقنا من فضله يارب

__________________
سبحــــــان الله وبحمده ,,,, سبحــــــان الله العظيم

لا اله الا الله العظيم الحليم ربي اني لما انزلت اليي من خير فقير
دعائكم الصالح لي بالرجل الصالح

وعليكم السلام ورحمة الله وبركاته

أنت قلتها عساها خيره يارب ,,, والله يكتب لك الزوجه الصالحه اللي تسعدك وتهنيك ويرزقك منها الذريه الصالحه

لكن لاتستعجل الأمور وانتظر ردهم بإذن الله

اتمنة لك التوفيق يارب

__________________

مدام انها من الأهل ممكن توسط احد يقنعها
لان في بنات يتخوفون من عدم التوفيق بين الدراسه ومسؤوليه الأرتباط من كثر اللي يسمعونه حواليهم
اذا فيها خيره لك هالبنت الله ييسر امرك معاها وان كان شر الله يرزقك بمن هي افضل

__________________
سبحــــــان الله وبحمده ,,,, سبحــــــان الله العظيم

لا اله الا الله العظيم الحليم ربي اني لما انزلت اليي من خير فقير
دعائكم الصالح لي بالرجل الصالح

وعليكم السلام ورحمة الله وبركاته


يا هلا والله بوليد يا هلا والله ببني عمي...


موضوعك وقته كتابته 1:49 AM يعني نقول صباح الخير...

شكل الهواجيس والأفكار ما خلت تنام ....

على أني أنا ما عندي خبره في هالأمور لكن أحب أعلق على ما كتبته من باب التعاطف
وإلا أعضاء المنتدى لن يقصروا معك بأرائهم واقتراحتهم

أحب أقول تعليقاً على ما كتبت


بالنسبة لتضايقك و لتضجرك وأنها الخطبة الثانية ، أقول ما جاء نصيبك حتى الأن ويمكن بعد كم يوم
توافق البنت وأمها على الزواج ...فلا تخلي الهم يجعلك تفكر أنك تتخلى عن فكرة الزواج...(تعلب على مين.؟)


أخوي بالنسبة لكلامك مع الأب أتمنى أنه توضح لهم وضعك وحالتك ثم هم يردون عليك

والأخوة والأخوات ما يقصرون معك في مشاركاتهم

الله يرزقك الزوجة الصالحة الحنونة ويرزقك منها الذرية الصالحة


أخوك


عزوبي بس رجل

دمتم بحفظ الرحمن

__________________

يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين

اختي نايت ماشاء الله استفدت منك الكثير وجزاك الله خير طبعا ممكن اني ادخل بمعرفات قبل واكتب مشاكلي لكن ماتروح المشكله الا وانسى معها المعرف وكل شي ^_^ واضطر اني ادخل بمعرف جديد

المهم انا الى الان مادري هل هو يبني بصدق ولالا .؟؟ ولو كان البنت تبي تكمل دراستها ليه ماقال لاهلي من قبل ليه بناديني ويعزمني ثم يقولي هالكلام مع ان انسان تقريبا كبير بالسن ومادري وش الحل انا عاشرت كبار بالسن واعرفهم لازم التدقيق وخاصه بالشباب

اختي روز السعوديه شكرا لك وماقصرتي
تحياتي

اقتباس:

المشاركة الأصلية كتبت بواسطة وليد الروقي اختي نايت ماشالله استفدت منك الكثير وجزاك الله خير طبعا ممكن اني ادخل بمعرفات قبل واكتب مشاكلي لكن ماتروح المشكله الا وانسى معها المعرف وكل شي ^_^ واضطر اني ادخل بمعرف جديد المهم انا الى الان مادري هل هو يبني بصدق ولالا .؟؟ ولو كان البنت تبي تكمل دراستها ليه ماقال لاهلي من قبل ليه بناديني ويعزمني ثم يقولي هالكلام مع ان انسان تقريبا كبير بالسن ومادري وش الحل انا عاشرت كبار بالسن واعرفهم لازم التدقيق وخاصه بالشباب اختي روز السعوديه شكرا لك وماقصرتي تحياتي

مساك الله بالخير يا عريسنا

اخوي وليد الف مبروك والله يكتب لك اللي فيه الخير

اخوي الكريم انا خطبتي والله استمرت فترة طويلة من رمضان الماضي

وزوجتي ملكت عليها قبل تقريباً 3 شهور :14:

بس فيه بنات يفكرون انهن تعبن طول هالسنين والزواج بالنسبه لهن مثل العسل

وزوجتي على كلامها تقول بنات متفوقات ازواجهم يحاولون فيهم يكملون ولا كملوا وتركوا الجامعه

واعتبرها فترة انك تجمع فلوسك زوود على اللي معاك علشان تنظم امورك

انا كان معاي مبلغ للزواج والحمد الله مع الانتظار سنه صار معاي فوق ميزانيتي بكثير والحمد لله السنه هذي اعطتني احساس بالمسؤولية وامساك المصاريف والتحكم فيها بشكل جيد

اما بالنسبه لأبوها وانه عزمك وجلس يسولف معاك مو شرط يسولف معاك عن الزواج

انا لما خطبت البنت ابوها سأل عني بالحارة وامام المسجد والعمل والدخان وكل هالامور

بعدها بأسبوعين قال حياك الله ودي تتغدا معي ونسولف شوي

وجلست انا وابوها وعمها نسولف بشوارع الرياض وزحمتها والحفريات ولا جبنا طاري الزواج الا لما جيت اطلع

قال بنرد لك خبر ان شاء الله بس البنت تعبت بالجامعه وودها تكمل دراستها وكلها سنه

وافقت صراحه لاني شفت البنت النظرة الشرعيه وعجبتني وتعلقت بأهلها وطيبتهم

اهم شئ تفكر بنفسك هل انت مبسووط انك بترتبط بهالبنت واهلها ناس طيبين ؟

والبنت طيبة واخلاق توكل على الله وانتظر

صدقني لو تدور بسرعه بس تبي تتزوج ومستعجل على العرس ماراح تختار زين

العجلة بتعميك عن عيوب كثيره

خذ وقتك وخذ راحتك وخل البنت تخلص جامعتها

وبكره ان شاء الله تتخرح بتقدير حلو وتساعدك بالبيت وتتوظف وتكون معاها حياتك وبيت العمر

والله يوفقك ابعد عنك الشيطان الرجال يبي يضمن مستقبل بنته والشيطان يوسوس لك انهم ما يبونك وان شرطهم ماله دااعي وانك مستعجل

صدقني بتاخذ وقت اطول وانت تدور على غيرها وبيخلونك تنتظر اقل شئ 6 شهور

فشوف انت اذا مرتاح للبنت وشفتها توكل على رب العالمين

تدري ليش طرش عليك لانك ما تنرفض وهم متمسكين فيك وكان يتمنو انك توافق على الصبر لمدة سنة

فلا داعي لاخذ الموضوع بحساسية زيادة لو كنت انت السبب كان رفضو من اول مو يعزموك و يطلبو منك توافق على شرطهم البسيط واخي الكريم اذا كانت البنت كويسة اصبر عليها

خلي الخطبة طويلة اعقد على نص السنة وجهز كل شي على نهاية السنة تكون هي عندك

"تفائلو خيرا تجدوه"

اتوقع بما أن الاب مقتنع فيك وارتاح لك ممكن يأثر على قرار بنته
وفي النهايه الله يكتب لك الخير ويرزقك بالزوجه الصالحه وبالحياة السعيده

سبحان الله الله وحده هو العالم بالخير وما يندرى وين الخير فيه توكل على الله واسع في موضوع الزواج ولا تقول الناس ليش ردوني انت رجااااااال وما يضرك شيء تخيل لو ان البنت ترد اكثر من مره كيف راح يكون شعورها وطبعا البنت اكثر حساسيه من الولد غير كذا نظرة الاهل لها والناس واللي عرفوا بالخطبه يا اخي عادي جدا وكثير تحصل والحمد لله انك شاب صالح ترى هذا ما يعيب الرجل انه يرد ويرفض طلبه

الله يرزقك بالزوجه الصالحه

__________________
استغفر الله العظيم لي وللمؤمنين والمؤمنات والمسلمين والمسلمات الاحياء منهم والاموات