انقذوني زوجي خائن - منتدى عالم الأسرة والمجتمع

01-08-2010, 09:25 AM

ام-وقاص

عضو نشيط جدا

تاريخ التسجيل: May 2008

المشاركات: 252

انقذوني زوجي خائن

السلام عليكم و رحمة الله .. هذا أول موضوع/ مشكلة خاصة بي اطرحها .. دائما اكون ارد للناس .. لكن اليوم جاء دوري اني اطلب الحلول و الاراء =((
عمري ما حسيت اني راح اكتب أو راح امر بمشكلة كبيرة ما اقدر احلها بنفسي .. كل مشاكلي كنت ابلعها و اطنشها , و اعيش كان حياتي عادية جداااا .. و اصدق كذبتي ..

انا مالي غير الله و غيركم .. اهلي ما اقدر اعلمهم بالموضوع .. ما ادري .. خوف , و لا خجل , و لا .. ما ادري .. قاعدة ارجف =(

صارلي سنتين و نص متزوجه .. و عندي ولد و الحمدالله عسل , عمره 7 شهور .. زوجي و انا انخطبنا لمدة عشر سنوات و بعدين اتزوجنا .. من انا في المرحله الاعدادية .. سافر يكمل دراسة في امريكا و انا رحت بريطانيا و رجعنا بعد ما درسنا , و بعدين اتزوجنا .. اهله اموت فيهم و يحبوني و يحترموني جدا - اهو البكر - و اهلي يحبونه موت و يعملوله الف حساب ( و هذا من الاسباب اللي خلتني ما اقولهم اي شي .. ما ادري- كاني اخاف يطيح من عينهم ) .. احنا من نفس الطبقة , الحمدالله من العوائل المعروفة و الغنية و المثقفة .. انا موظفة في شركة عالمية و راتبي و الحمدالله عالي جدا مقارنتا مع اللي في سني لاني درست أكثر من شهادة - اكاديميا و مهنيا .. زوجي شغله عدل و الحمدالله .. حبينا بعض مووووت ( على الاقل انا متاكدة من حبي له , اهو ما ادري عنه ) ..

شخصياتنا كثير مناسبه .. اللي يشوفنا يقول عنا صحبه مو ازواج .. دوم سوالف و ضحك , و طلعات , ووناسه .. الحمدالله اهو ما مقصر معي في الطلعات و زيارات اهلي , و يجلس معي ..

مزاياه , طيب , حنون , يهتم فيني و في ولدنا , يهتم كثييير في امه و اهله .. يحب يصرف علينا و على غيرنا .. دائما يشتريلي هدايا و تلفونات وووو .. يحب يساعد الناس .. يصلي و محافظ و الحمدالله و في المسجد ..

انا , و اعوذ بالله من كلمة انا - بشهادة الجميع , و مو مدحا بنفسي : جميلة جدا و الحمدالله ,طالعه من الاوائل, في المدرسة و في الجامعه, مثقفة جداااا , مسليه و بشوشه , و دوم الابتسامه على وجهي .. احب الضحك و الفرفشه , و كل اللي حوالي يشيد اني اونس الجلسات , و حبابه كثير , و ما عندي اعداء ابد .. الكل يحبني .. اكشخ دائما عالاخر , بشهادة الكل .. خصوصا في البيت .. ادلع زوجي عالاخر - اهله دايما يقولولي ان ماحد مخرب ولدهم الا انا و دلعي الزايد له .. و ربي اللي يشوفنا ما يتوقع ابددد ان نعيش في مشاكل .. انا كتومه جداا , و ما اطلع اي شي برع جدران بيتي - احنا ساكنين في فيلا مستقله عن اهله ..

زوجي دايما يمدحني و يقولي انه محظوظ اني زوجته , و اني مو مقصرة معاه و انه يحبني .. و فعلا لما الاجواء تكون صافيه و حلوه - احس انه يحبني .. و هذا السبب اللي خلاني استمر , او من الاسباب ..

المهم وووووين المشكله ؟؟

زوجي خائن =((((

لكن مو مرة مرتين ثلاث اربع - انا صادته بدلائل أكثر من 12 مرة .. في فترة الخطوبه , في فترة شهر العسل , و انا حااامل , و انا في الاربعين , و انا والده , و قبل كم يوم .. يعني ما شاء الله ابو الشباب شغال ..

ما راح اتطرق لكل خيانه لاني ما راح اخلص .. لكن كل ما اصيده , ينكر نكر تاااااااااااام مع انه واضح وضوح الشمس!! لكن لو الدليل مرة قاتل - راح يبكيييييييي و يعتذر و يقول انه ما عنده غيري و من هالكلام , و انا اسامح , و انسى - أو اتناسى =(

اكيد راح تسألوني هل وصل الموضوع الي علاقه جنسية ؟ - راح اقولكم اييه ="((((
قبل يومين شفت تحت كرسي سيارته واقي (كوندوم) و جل لوبريكانت .. و احنا ما نستعمل الواقي ابدااا .. و لما سالته وواجهته , قالي : هذا كنا احنا نستعمله و لانك ما تبيين قلت ارميه احسن .. والله ان عمرنا ما استعملنا واقي .. لكن حصل مرة تنازعنا لاني شفت واقي في درجه و هالكلام من سنه , فعلى اساس انه الحين و بعد سنة قرر يرميه, و نساه في السيارة !!!!!! - و الجل ؟؟؟ يقول صاحبه سافر مدري وين و اهداه !!!!!!!!!!!!!!!!!!!!!!!!!!!!!!!!! هل هذا يعقل ؟؟!!

المهم .. انا ما يعطيني حقي في الفراش , يعني في الشهر يمكن مره .. دائما اتعدل و اتلبس و انتظر , في النهاية يقول باكر دوام !! - هو كانت عندنا مشكلة بداية زواجنا ان الدخول حصل بعد 4 اشهر و اعتقد هذا أثر فيه كثير و صار ما يباني =( ..

عنده هووووووووووس العادة السرية .. يمكن يوميا هو عليها .. و اهو معي عالفراش راح يقولي باكر دوام ما ابا اتعب, لكن الله يعزكم يمارس العادة و انا معه !!!!!! و لما اقوله ان ما يعجبني ابداااا يقولي هذا انا اتزوجتيني مدمنها !! ما راح تغيريني .. تريديني كذا اهلا و سهلا .. طبعا مواقع ايباحيه و ايميلات و سوالف ما تخلص .. مع انه يصلي في المسجد لكن سبحان الله ..

و الله مستحيه منكم , لكن عشان تفهموا مشكلتي لازم اسرد التفاصيل: اهو يلمح انه يبا يدخل من موقع حرمه الشرع .. و لما اقوله ما يصير, يزعل و يتم يكمل بالعادة - داااااااائما يذكر هالشي , انه نفسه يسويها .. مع اني متاكدة انه يسويها برع البيت ..

اسفة طولت كثييير .. لكنه مد ايده علي مرتين , مرة دزني عالحيط , و مرة شنقني ( يعني لف ايده على عنقي ) ..

عصبي كثييييييييييييييير و عصبيته معروفه عند الكل .. مستحيل اتفاهم معاه .. مستحيييل اقول اللي في خاطري قدامه و احنا في نزاع .. دوووم اسمع و ابلع , و بالليل ابكي و اكتبله في ورقة كل شعوري .. و اهو يقرأ فاليوم اللي بعده .. مرات يتأسف .. مرات يطنش ..

لي عوووددة .. ثواني بس

المهم .. امس طبعا كنا بعدنا نتناقش عن موضوع الواقي اللي في سيارته .. لكن فجأة و كالعادة - قلب القصة , و قالي ان لساني طويل و اني مو محترمه انه اهو ريال البيت , و لازم ما ارد عليه .. و ربي , و ربي اني ما اطول لساني على اي مخلوق . خصوصا اهو .. انا اخافه اصلا ..

و قالي : سمعيني - لو ما تتدعدلي , انا ما مستعد اكمل معك !!!!!!!

انا استحملتك , و سترت عليك , انت تنام برع و تكلم , و تخون , و تمارس , و تسبني ( يا حمارة يا زفته ) و تمد ايديك .. و في النهايه تعاملني كذا ؟!؟!

والله اني تعبت .. انا 26 سنه , و اهو 28 سنه ..

طبعا في مشاكل ما ذكرتها و تفاصيل ما ذكرتها لكن هذا اللي طلع مني الحين .. قاعدة ارجف و مو عارفة كيف اتصرف ..

دلوني تكفوون .. تعبانه نفسيا .. مو قادرة مو قادره =((((

التعديل الأخير تم بواسطة وردة بين الثلوج ; 01-08-2010 الساعة 09:14 PM السبب: دمج المشاركات

01-08-2010, 09:38 AM

ღ яαω3αђ ღ

عضو نشيط جدا

تاريخ التسجيل: Jun 2010

المشاركات: 205

أول شي حابه أسـألك ياعمـري
مستعـده تكمليـن معه و تحافظين على بيتـك
رغم كل عيـوبه إللي ذكرتيـها أو لأ ..؟؟

__________________

أفــتقدُ ح‘ـَـبُ الحيــآة

01-08-2010, 09:41 AM

ام-وقاص

عضو نشيط جدا

تاريخ التسجيل: May 2008

المشاركات: 252

والله ما ادري حبيبتي .. لو سألتيني هالسؤال السنه الماضيه كنت راح اقول اييه .. لكن .. الحين تعبت ... و عندي ولد .. كنت استحمل لولدي .. لكن الحين ما ادري =(

01-08-2010, 09:53 AM

ღ яαω3αђ ღ

عضو نشيط جدا

تاريخ التسجيل: Jun 2010

المشاركات: 205

اقتباس:

المشاركة الأصلية كتبت بواسطة ام-وقاص

لأ هذي حيـاتك أنتي
لازم تـدرين يا قلبي
أجلسي مع نـفسك و فكررري بـ كل شي

شوفي ياعمـري
إذا تبين تـحافظين على بيـتك و زوجـك بـجد
أصبرررري عليـه
لا تفتشيـن من وراه
أنتبـهي من كلامك له
بطلي كلـماتك (( أنت خاين .. ماعندي ثقه فيك ))
تدريـن كلماتك هذي تزيده أكثر و أكثر
أنتي بها الشكل تخليـنه يستمر على ماهو عليـه
الحلو في الموضوع كله إنه ينكـــر .. هذا إذا هو خاين بـ جد
تدرين ليش ينكـر خيانـاتـه
عشانه يحبك و يبيـك مايبي يخسسسرك
عشان أكيد لو أعتررررف لك بـ تتركين له البيت و تروحين لأهـلك
أكسبـيه ياقلبي
غيري طريقة تعاملك معـه .. أعطيـه الثقـه حتى لو ما يستاهلها بـ نظرك
صدقيـني إذا حـس إنك تثقيـن فيه بـ جد راح يأنبـه ضميـره
الثقه مسؤوليـتها كبيره كبيره على أصحاب الضمائر
إن شاء الله راح يحاسب نـفسه بـ نفسه و يبطل كل شي يضايقـك

أما إذا ماتبيـن تحافظين على بيـتك و زوجك و ولدك
تبيـن تتركيـنه لـ غيرك للي مالهم حق فيـه
قولي لأهـلك كل شي و تأكدي بعدها مسسستحيل ترجع حياتكم مثل قبل
الله يفرررج همـك و يكتب لك إللي فيـه الخير
طـمنيـني عليـك

__________________

أفــتقدُ ح‘ـَـبُ الحيــآة

01-08-2010, 09:48 AM

الورده زينب

موقوف

تاريخ التسجيل: Jun 2010

المشاركات: 379

أول شي صلي على النبي أختي ..

:/ مافيه شي إلا وله حل ،

آآنه راح اتحجى لو آآنه مكانج

انتي مو دايماً تتعدلين وتتكشخين له ؟

هَـ المره اقلبي الآيه ..

إذا دش البيت لا تستقبلينه ك العاده خلج بارده معاه

وإذا سألج ليش قوليله مابي اتحجى وفي النهاية بتطلعني غلطانه

اذا بتسمعني باخبرك كل شي ..

وإذا حب يسمعج قوليله اللي في خاطرج

وقولي له ان مثل ما اهو ولد ناس انتي بعد بنت ناس

واللي مايرضاه حق خواته لا يرضاه حقج

ألحين يرضى ريل اخته يسوي حق اخته اللي يسويه فيج ؟ طبعاً لا

ف قوليله آنه ب شنو امقصره معاك عشان تسوي جذي ؟؟

لا تفكر إنك اتخوني .. إنت اتخون ربك وتخون اهلك واتخون نفسك قبل لا تخوني

وانت عندك ياهل باجر يكبر ويعيرونه ب ابوه

إذا انت مو مرتاح معاي خبرني ... يمكن نتفاهم بس لا تروح ل الحرام

:/ والله يعينج والله

وعلى فكره ... إذا الشي امتعبج ومنتي مستعده اتكملين لا تكملين

لا تقولين راح اكمل عشان ولدي

باجر يا حبيبتي ولدج يكبر ويفهم ... ويعيش بينكم في بيئة غير سوية

ويشوف ابوه شيسوي ويشوفكم كل يوم اتناجرون

في هالحالة يكون ولدج عندج بروحج احسن لج

او حتى لو اضطريتي اتخلينه عنده يتحمل مسؤوليته

ولا إنه يظل عندكم اثنينكم يشوف الاشياء اللي اتصير بينكم

ترى حتى الياهل يتعقد وقتها

01-08-2010, 09:51 AM

فيتووو

عضو نشيط

تاريخ التسجيل: May 2010

المشاركات: 112

كان الله بعونج برد عليج بوقت ثاني

01-08-2010, 09:54 AM

ام-وقاص

عضو نشيط جدا

تاريخ التسجيل: May 2008

المشاركات: 252

الوردة زينب , حبيبتي انا سألته انا بشنو مقصرة معك شسويت فهمني , دلني , يقولي ابد مو مقصرة . .انت فيك كل الخير, و انا محظوظ , لكني مريض .. قالها مره و بس .. المرات الثانيه ينكر و يقول انه مو قاعد يخون !!

لكن راح اجرب سالفة اني ما اتعدل, و لو صعبه علي هههه ..

فيتوو مشكورة حبيبتي و في انتظار ردك

01-08-2010, 10:00 AM

ام-وقاص

عضو نشيط جدا

تاريخ التسجيل: May 2008

المشاركات: 252

حبيبتي روان ... سبحان الله بني ادم مصيره ينكشف .. انا عمري ما نبشت وراه .. كل الخيانات اكتشفها بالصدفة .. السيارة كنت ادور على موبايلي كان طايح .. و في اكثر من 4 مرات يرسلي مسجات بالغلط اتصوري !!!
و مرات يرسلي مسج حب فورورد , لكن تحت المسج يكون مو منتبه, لكن يكون مكتوب عليه " احبك يا فلان " !!

لكن فعلا ما راح انكر , انا انبش في موبايله مرات .. نادرا اصلا يكون عندي فرصة , لكن فعلا اسويها ..

بخصوص الثقة - كل ما ننتهي من مشكله اقلب الصفحه و ما عاد ارد اذكر السالفه .. لو بشوري كنت اعيدها , لكن زوجي عصبي و ما يعطيني فرصه .. يقولي سامحتيني ما عاد تذكريني .. اقوله حاضر و فعلا ما اذكرها .. اخاف .. لكن تضل في قلبي , منحوته بجدار قلبي .. كل اسامي البنات =((

و فعلا انا اقوله اني ما عاد اثق فبه .. راح اتغير و ما اقولها .. لكن لو اقتنعت اني ابقى وياه .. ما ادري =(

01-08-2010, 10:13 AM

ღ яαω3αђ ღ

عضو نشيط جدا

تاريخ التسجيل: Jun 2010

المشاركات: 205

اقتباس:

المشاركة الأصلية كتبت بواسطة ام-وقاص

روعــه = ღ яαω3αђ ღ
إذا تبين تحافظين عليه و على بيتك
ضروري تثقيـن فيه من جديد و تحسنيـن الظن فيـه
وش البنـات إللي يعرفهم !!
كلهم لا راحـوا و لا جـوا با النسبه لـه
لو يهمونـه البنات كان أقل شي أعترف بـ وجودهم في حياته
هو ما أعترف فيهـم و لا يشرفـه يعتـرف فيهـم
صدقيـني الرجال لو يبي يتـزوج عليك كان تزوج من زمـان
لكن دامه ينكر معناها واضح يحبك و يبي يحافظ عليك و على بيـتكم
لا تخلين ها البنـات يخربون بيتـك
أكسبيـه
نسيـه كل إللي حولـه
الله يفرررج همـك

__________________

أفــتقدُ ح‘ـَـبُ الحيــآة

01-08-2010, 11:50 AM

#10

أنا مندهش

كبار شخصيات المنتدى

تاريخ التسجيل: Sep 2003

المشاركات: 1,127

أحي فيك أختي رجاحة عقلك باحتواء مشاكلكم داخل عش الزوجية وعدم البوح بها لأحد فهذا في حد ذاته بادرة حل لها لأن خروجها يعقد المسائل أكثر ودخول أطراف خارجية حتى لو كانت من أهلك يوسع من دائرة الخلاف ويخلق حاجز بينكم.

وأعوذ بكلمات الله التامات أختي من كل شيطان وهامة ومن كل عين لامة أصابتكم .. فالعين حق، لكن علينا أن نحكم عقولنا عند مواجهة بعض المشاكل والحياة لا تخلو منها والزوجة الفطنة العاقلة التي تخاف على بيتها من الهدم هي من تمسك بزمام الأمور في مثل هذه الحالات وهي التي تدير الدفة نحو بر الأمان ..

العناد لا يأتي بنتيجة سوى العناد .. والمواجهة الزكية والدبلوماسية في المعاملة هي التي بنتيجة والله لا يضيع الصابرين .. والله يمهل ولا يهمل .. وهذا في حد ذاته اختبار لقوة صبرك وتحملك .. واختبار لإيمانك .. وأن تقولي الحمد لله على ما أبتلاني لهي في ميزان أعمالك حسنات خير ألف مرة من النزاع في حلقة مفقودة.

لكن ما يتبادر لذهني الآن .. هو ما ذكرتيه بأن دخولكم تم بعد عدة أشهر وأن هذا الشيء قد يكون أثر في نفسياته .. وهذا كله أختي راجع للثقافة الجنسية وأهميتها وكيفية تخطي هذه المرحلة في بداية الحياة الزوجية والواجب على كل زوج أن يكون ملم تماماً مشاعر واحاسيس الطرف الثاني خاصة لمن يجد الحرج في مثل هذه الأمور .. وهي فترة وتعدي بسلام طالما كانت النفوس قريبة من بعض، فما بالك وعلاقة الحب التي بينكم ليست عابرة وإنما متأصلة جزورها ..

أنا في رأئي بأن ما يصدر من زوجك على الفراش .. ربما يكون بادر من شيء نفسي أو خوف أو مشكلة لها علاقة بالأمراض الجنسية من عدم إتمامها على الوجه الأكمل مع شخصك في حين أنه يتلذذ ويجد المتعة مع أخريات ولا يواجه نفس المشكلة التي يواجهها معك على الفراش فيتحجج بما يريد ويستمتع بالممارسة..

أنا في رائي بأن زوجك يحتاج منك لأن تشعريه بالثقة وأنك خير عون له في مثل هذه الأمور .. وأنك أبرع من أي واحدة يبحث عنها ليقضي ما يواجهه معك .. ربما تقصير منك، أو شيء في نفسه يحتاج لأن يخرج .. أو مريض نفسياً يحتاج للعلاج .. فالزنا مرض ضعاف النفوس.. لكن زوجك كما ذكرت يصلي ويعرف الله ويحبك..

يا أختي أبحثي في دواخلك ستجدي الإجابة.. فاثنان بدأت حياتها بالحب ووضعهما ممتاز ولا يوجد ما يعكر هذا الجو.. أكيد بل أجزم بأن زوجك في نفسه ما يريد أن يقوله ولا يقدر البوح به.. ولنضرب مثل "عملك مثلاً" أنت تعملين ووضعك ممتاز ولست في حاجة لهيمنة زوجك المادية وسيطرته فراتبك يكفيك .. أقول ربما وربما يكون هذا واحد من العوامل فبعض الرجال يحب أن يشعر بالهيمنة والسيطرة وأن الأمور بيده يحركها متى يشاء .. يحب أن يأتي من العمل يجد زوجته في انتظاره تمد له يدها بابتسامة، وتكون على أهبة الاستعداد متى ما أرادها وليس متى ما أرادت هي.. هذا نمط بعض الرجال.

أختي طولت عليك.. لكن العلاج بيدك..

طولي بالك ولا تهدمي حياتك وأبحثي عن الحلول المنطقية

نعم لا ترضي بتاتاً بالخيانة وضعي لها حل فوري وجزري

خوفاً من الأمراض وما شابهها وخوفاً من غضب الرب

وهذا كله أيضاً بنوع من الحكمة والعقل والتدبر

كوني أقرب أكثر من ذي قبل من الله

أجعلي علاقتك معه وثيقة في أبسط أمورك

أشكي له همك .. صدقيني هو خير منصف وخير عدل

وفقك الله وطمئنينا عنك..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه