السلام عليكم اخواني واخواتي

كيف حالكم ان شاء الله بخير

ياغالين انا من زمان اتابع هالمنتدى وماشاء الله مره عاجبني واحس اعضاءه ناس عقلاء وناصحين

لبعضهم ويحبون الخير لغيرهم جزاكم الله خير

اول حاجه انا عضوه جديده اتمنى تتقبلوني معاكم

وثانيا مثل مو باين من العنوان

بقول لكم قصتي كاملة انا متزوجة من اكثر من ثلاث سنوات من واحد مايقرب لي بس من الجماعه

في البدايه كنت رافضه اتزوجه مااادري ليه بس مارتحت لهالزواج لكن اهلي طمنوني انه رجااااااااااااال بمعنى

الكلمه وهذا الي واضح للناس من برىفتوكلت على الله وتزوجنا وربي رزقنا بنوتتين الله لايحرمني منهم

من بداية زوجي لاحظت عصبية زوجي على اتفه الاسباب وتحسسه من لاشيء وعندما احاول

تهدئته يعصب ويتلفظ بأقبح الالفاظوانا اصبر واقول مصيره يتغير

كان يبيني اكون عبده عنده مو زوجه مالي اي راي باي شي لا بالبيت ولا بالبنات ولا حتى بنفسي

يتحكم بكل شي وحاولت اغير هالطباع فيه موراااااضي يتغير

لما يصير بيننا سوء تفاهم لو بسيط والله والله يذوقني الويل ويقهرني ويحرمني من الطلعة حتى اهلي يحرمني

منهم انواااااع العذاب النفسي بدون مااكون تسببت بهالشي ويعلم الله تحملته قد مااقدر بس تعبت وتعبت نفسيتي

من تصرفاته واسلوبه واهانته وتحقيره لي باقبح الالفاظ وكل هذا تحملته لعيون بناتي واذا تناقشت معه بكل هدوء عن تعامله معي والمفروض يحترمني ويعاملني بالحسنى قال انقلعي يامنحطه يامتخلفه يابزر

كلامك وجع راس وكلام بزران وانتي ماتربيتي وانا الي بربيك وربي احس معاه باهانه بحياتي ماحسيت فيها

وصبرت وتحملت وتمنيت انه يتغير بس ماطرى عليه يبي يهين ويغلط ويظلم ويبيني اضحك له ومااقصر معاه بشي وربي شاهد علي ماقصرت معاه بشي رغم كل الي يسويه

وكنت اقول مو مشكله زوجي وبتحمله عشان بناتي ومن سنه صارت بيننا مشكله على شي تافه ومد يده

واهانني وجرحني ورحت لاهلي وعلمتهم وزعلو بس حاولو يهدون الامور ولان اهلي يحسبونه رجال

رجعوني له بعد مافهموه انه مايهيني ولا يجرحني ولايظلمني مادمت مو مقصره بشي

ومن ذاك اليوم الي رجعت فيه بدت معاناتي الجديده وهي قوله ( انا مابغيتك ولابغيت ارجعك بس انحرجت لما اهلك طلعو عن المجلس ويوم طلعت لقيتي طالعه بوجهي تبيني اخذك وانا اخذتك محرج من اهلك فقط والا انا ماابيك) وربي حسيت باهانه وحاولت كم مره انتحر استغفر الله نفسيتي تدمرت من حياتي معاه

وتحملت حتى هالاهانه ولاعلمت احد عنه وعن استهتاره فيني وحاولت اكسبه بس يرضى دقيقه وطول اليوم

ينكد والله انغثيت بس دعيت ربي اقدر اصبر عشان بناتي وهو مابين بعينه شي وفوق هذا كله ماكان معطيني راحتي ببيتي يعني لما يزوروني اهلي بالسنه حسنة يقول اعزمي اهلي وكنت دايما اضغط على نفسي واعزمهم عشانه بس رغم انهممايحترموني ابدا وغلطو بحقي كثير الا اني سويت الي يرضي

ضميري وتعاملت معهم بالاحسان كانو يغلطون ويجرحوني قدام سلفاتي وانا ابتسم واسكت وفيني غصه

والله يتعمدون اهانتي وجرحي دون ادنى سبب دائما اهدى لهم واتصل عليهم وازورهم واعزمهم واذا مرض احد

فيهم انا اول من يتصل ومابين بعيونهم تدخلو بتربيتي لبناتي وتدخلو بلبسهم وتدخلو حتى باموري الخاصه

بيني وبين زوجي وهو طبعا ماقصر ماعنده خصوصيات كل شي عند امه

وفوق تحملي له هو واهله واهاناتهم المتكرره امه خربتها لما طلعنا استراحه وعزمو سلفتي العروس واهلها

وسمعت من الاهانه مالله به عليم حتى الناس اول مره يشوفونا انصدمو وطلعو من الاستراحه

من الصدمه من تصرفاتها والله كل مااتذكر وش سوت اتمنى اموت ولا اتذكر وش الاهانات الي تعرضت لها\\

المصيييييييبه ان تعاملهم مع سلفاتي غييييييييييير ليش انا الي انغث وتاكلني نارهم وربي ذبحون تجريح ومغثه

وعقب كل الي سوته تمسك ولدها من بكره وتقوم تسبني وتقول عني كلام ظلم وربي بكيييييييت

بغيت اموت من القهر والظلم والي قهرني ان زوجي مارد عليهم بولا شي حتى اخواته الي اصغر

منى يتطاولون علي ولاهمه كرررررررررهنته وكرهت اهله قبله

وبعد كل هذا يقول دقي على امي اعتذري؟؟ عن وشو وربي ماادري

يمكن عن اهانته وظلمها لي

تخيلو بنات دقيت عليها قلت ياخاله لاتزعلين علي انا مضايقتك بشي قوليلي

قالت انتي من يومك ماتادبتي؟؟ وبس تسبين ولدي؟؟

قلت لهنا وكافي مااذكر بحياتي ذكرت ولدك بالشينه على قشره معي الا اني امدحه دوووووووم

عشاني اقول عصبي؟؟ هذي مو مسبه وانتي ياخاله بنفسك تقولينها عنه قدام سلفاتي

قالت انتي ماعرفتي الصح من الخطا و يلا بس مع السلامه وسكرت بوجهي

طبعا سكت وعديتها قلت خلي الامور تهدا شكلها ودها تخرب بيتي حسبي الله عليهم كلهم

بعدها باسبوعين ضغط علي لين بكيت من القهر اني ادق على امه واترضاها مره ثانيه قلت يالله عشانك

ولجل عين تكرم مدينه يمكن يبين بعيونهم

وادق عليها واقول السلام عليكم وترد تقول وش تبين بدون حتى رد للسلام وكل المكالمه كذا ترد بزجر يعني كانها تهاوش وانا سكرت وقلتله ارجوك ياقلبي احفظ كرامتي انا ماابي اهين نفسي اكثر

اهاناتك وتحملتها بس اهلك ماعاد اقدر اتحمل وربي تمرمطت قال اهم ماعندي كرامة امي وانتي ولا شي ولااااااااااااا شي ومهما تغلط عليك وتظلمك وماتقدرك ولاتوجبك غصبا عليك تعطينها حقها تعزمينها وتروحين لها غغغغغصصب والله لمسح بكرامتك الارض هذي امي اهم منك ومن الي جابك

قلتله وانا وكرامتي واهانة امك وخواتك قال مااااااااااعلي هذي امي غصب عليك تحملين قلت طيب

انا مسامحتهم على الي صار بس خلاص ارجوك ابي اعيش براحة شوي ماابي اجتمع معهم خلاص تعبت والله تعبببببببت ارحمني قام يتلفظ وشد شعري قدام بناتي وبنتي الكبيره قعدت تبكي من الخوف

ومو اول مره يمد يده قلتله خلاص والله كرهتني فيك وبالعيشه معك قال مع السلامه ماني متحسف على هالاشكال الي ماتربت

صرت زي المجنونه اصرخ واصيح لين وداني لهلي والا قبل كان يقول والله لاهينك وامسح بكرامتك الارض وروحه لاهلك مافيه بغيت اموت والله بغيت اموت من القهر

وجيت لاهلي وعلمتهم بكل الي صار وابوي واخواني غلى الدم بعروقهم وقالو ماعاد ترجعين له كذا الا بشروط

ولما جاهم ابوي رفض يقابله لانه مريض بالسكر وممكن يرتفع عليه قابلوه اخواني وقالوله مالك حق تسوي فيها كذا وتهينه وتجبرها على اهلك الي هم بعد اهانوها

حنا ماعطيناك بنتنا تمرمطها حنا نبيك تعزها وتسترها وتكرمها مادرينا هذي علومك

قام يكذب ويقول انا ماقلت وانا ماسويت كالعاده قالوله اذا ماتبيها لاتعذبها اتركها وانتهينا قال خلاص ابشرو

بكره انهي كل شي لكنه ماطلقني وحاول يرجع العلاقه بالرسايل بس اهلي زعلو وقالو مستضعفك

عشان كذا قام يرسل بس ماراح نرخصك هالمره وماترجعين الا بشروط وكلمه اخوي وقال يافلان

اذا انت شاري اختي تعال نتفاهم بس بشروط ماعاد نبي مرمطه اكثر قال مو انا الي تشرطون علي

ماابي شورط لاتكبرون راسها علي قال اخوي ماارجعها لك على حالك الاولي تبي بشروطنا والا وش رايك

قال لاااااااااااااااااااااااااا خلوها عندكم اجل ماابيها

بالله وش رايكم وش اسوي نفسيتي جدا جدا تعباااااااااااانه

أختي مادام الأمر وصل للرجال خلاص يبقى عليك انتي الدعاء والاستعفار بنية هداية زوجك,

خلي الموضوع بين زوجك واخوانك وهم ان شاء الله يتولون الأمر, واخوانك باين عليهم عقلاء..

أختي حذاري أن يستعطفك زوجك بالرسائل من وراء اخوانك..

الله يربط على قلبك..

__________________
ستذكرني إذا عاشرت غيري ,,, وستبكي عِشرتي زمناً طويلا ...

أخــــوكــــم/ تعـــانــــدني ..

انا تاركة الامر بينهم وادعي ربي يفرج كربتي

والمصيبة الاكبر انه الحين مطنش مسوي نفسه عنده كرامه وزعلان حسبي الله ونعم الوكيل

يبي اخواني يردوني له منذله او يطلبونه الخلع

اعرف كيف تفكيره الله يشغله بنفسه

العيشهاللي مثل كذا

الانفصال افضل وربي الا اذا انحل الامر بين الرجاااااااااااااااال

اما تصبري تصبري الئ متى؟؟؟؟

انقهرت وربي انقهرت ؟؟؟

وش هلعيشه الله لايردها يابنت الناس
اهانات وعدم احترام

والله ماانقهرت الا عليك وعلئ بناتك تقطع قلبي عليهم كم اعمارهم ؟؟؟
لاتقولين صغار ابموت قهر .

يعلم الله اني صبرت لين مل مني الصبر

اساسا ابوي لما عرف اني متحمله كل هذا زعل وقال ليه ماعلمتيني من الاول

اللي يهينك يهيني انا واذا مو رجال وماتسنع حنا نسنعه واذا مايبي السنع يطلق ماعليه حسوفه

وبناتي هم الي قاطعين قلبي لسى صغار الكبيره سنتين والصغيره 6 شهور

الله يخليهن لي ويقدرني اعوضهم عن كل شي

الحين بنتي الكبيره نفسيتها مره تعبانه بس تبكي وتضرب الي قدامها لانها بسم الله عليها

تفهم وتشوف تعامل ابوها معاي وخاصة اخر مره لما شد شعري للحين ياقلبي تذكرها وهي خايفه

وتقول ماابي بابا وع بس يهاوش ماما ويضرب ماما وربي قطعت قلبي

كفاك الله الهمّ والغم اختنا وفرج عنك ما تجدين
وإن لصبرك أجرا عند ربك، وبئس هذا الزوج وبئست العشرة عنده
يقول الله تعالى: (وَإِنْ خِفْتُمْ شِقَاقَ بَيْنِهِمَا فَابْعَثُواْ حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلاَحًا يُوَفِّقِ اللّهُ بَيْنَهُمَا إِنَّ اللّهَ كَانَ عَلِيمًا خَبِيرًا) وعسى أن تجدي حلا يؤازرك بما ان المسألة وصلت مع أهلك.
وأنا أنصحك بالاستخارة وعليك بها وعليك بها وهي أن تصلي ركعتين بخشوع وخضوع ثم تدعين بهذا الدعاء( اللهم إني أستخيرك بعلمك ، واستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب . اللهم إن كنت تعلم أن بقائي في عصمة فلان بن فلان خير لي في ديني ومعاشي وعاقبة أمري وعاجله وآجله فاقدره لي ، ويسره لي ، ثم بارك لي فيه . وإن كنت تعلم أنه شر لي في ديني ومعاشي وعاقبة أمري عاجله وآجله فاصرفه عني واصرفني عنه ، واقدر لي الخير حيث كان ثم أرضني به). واصلحي الذي بينك وبين ربك يصلح الله لك أحوالك مع زوجك.

جزاك الله خير على ردك واهتمامك اخوي البندول وانا استخرت والله يكتب الي فيه الخير

فعلا ربي يعينك حياه صعبه مع مثل هالرجل
الله يعينك اختي
اكثري من الاستغفار والاستخاره
وربي يوفقك ويفرج همك

__________________
يارب عوضني عاجلا غير اجل واجعل ابني شفيعا لنا واحفظ زوجي لي وارزقنا من حيث لانحتسب

جزاك الله خير على ردك ودعائك لي اختي

أختي كافي عذاب أسعدك الله ووفقك لكل خير

الله يحفظك وينهي عذابك

أختي أنا حالتي جزء من حالتك انا في بدايت الطريق من الاهانه


لذالك سئلت الله الخير

وانا مثلك على مشارف الطلاق


إذا انا ابتليت برجل لا يريد التفاهم ويحب الذيتك ماذا تريدين منه الصلاح والتغير لا يا أختي هذا قد عميت بصيرته ولا هدي له الا الله


لا تحزني لطلاقك ارضي به

انا الان على مشارف الطلاق ولدي بنت احزن لاني سوف ابعدها عن والدها

لكن إذا رئيت الاهانه اقول تعيش بعيد عن والدها أفضل من ان اعيش مهانه و وهي ترىة امها مكسوره


أختي انا وانتي ضعيفات لا نعلم أين الخير لنا

ربما الخير في الطلاق

قوله تعالى : وإن يتفرقا يغن الله كلا من سعته وكان الله واسعا حكيما )



أعلم حبيبتي انك تحزنين وتخذك الهواجس و الأفكار لكن سرعان ما تذكري انا لاحول ولاقوة لنا الا بالله
هو حسبنا ونعم الوكيل

قال عمر بن الخطاب رضي الله عنه: ما أبالي أصبحت على ما أحب، أو على ما أكره، لأني لا أدري الخير فيما أحب أوفيما أكره


عن ابن عمر رضي الله عنه أن رجلاً قال يا رسول الله: " إن الدنيا أدبرت عني وتولت، قال له: فأين أنت من صلاة الملائكة وتسبيح الخلائق وبه يرزقون، قل عند طلوع الفجر: سبحان الله وبحمده سبحان الله العظيم واستغفرالله مائة مرة تأتيك الدنيا صاغرة. فولى الرجل فمكث ثم عاد فقال: يا رسول الله قد أقبلت علي الدنيا فما أدري أين أضعها




أختي لنسئل انا وانتي الله الخير فإن كان لنا خير في هذا الزوج ان يرده لنا ويصلح لنا وأن كان لنا الخير في الأنفصال فييسره لنا ويرزقنا الخير حيث ماكان ويرضينا به


اسئله بمنه وتوفيقه أن يوفقني واياك لكل خير




سؤال يحيرني هل مثل تلك الازواج يعيشون بلا قلوب وعقول

__________________
يارب أحفظ لي طفلتي ولا تبتليني بفقدها