ترددت كثير إني أكتب لأني بديت اتأكد مشكلتي مالها حل!
بس اللي شدني حصلت كمية هنا من العقول الحكيمة واللي ترد بإخلاص..
فقررت أسجل وإن شاءالله يارب الاقي رد يفك حيرتي ويريح قلبي ويفهمني وضعي لأني صرت ماعاد أفهم!

فكرة عن حياتي/
متزوجة من 20 سنة...
متزوجة وعمري 17
زوجي يكبرني بـ 12 سنة..
عندي اطفال

فكرة عن زوجي
بحكي عن مميزاته
كريم معي ومع الاولاد مايقصر مادياً
معطيني حريتي اطلع أروح اجي حتى من غير أذنه( طبعاً لمن يكون مو بالبيت مايحتاح استأذن)
محافظ على صلاته يخاف ربي لكنه غير ملتزم بشده
مركزه مرموق /إجتماعي بقوة
تهمه العادات والتقاليد بشده
سمعته وبرستيجه مهمه عنده لو على حساب نفسه..

عيوبه (سبب مشاكلي)
عصبي
حمقي
ناقد
ينصح كثير كثير ويحب يوجهني دايماً
نصح بنقد وذم شي ممل
مايبي حوار يبي يقول كلمته وخلاص قفلي الموضوع
مايبي يسمعني ولا يفهمني ولا يناقشني أبداً
مع إنه مستعد يتكلم ساعة بس مايبي أرد بكلمة!
لسانه لاذع مستعد يدعي علي 24 ساعة يذم ويسب وينتقص مني بكثرة

أنا
عيوبي/عصبية حساسة عاطفية مووووووت مزاجية عنيدة

ماراح أحكي عن مميزاتي بس جاية بالحكي

طبعاً حياتي مرت بمراحل وكان نتيجتها طلاق وماراح أدخل بتفاصيل أكثر
بس بوضح الطلاق صار بسبب كثر نقده شي يطفش
لمن أرد عليه أبرر أو أوضح يزيد غضبه ولمن أسكت مايرضى أو يهجد
يعني كأن فيه طاقة غضب لازم يفرغها وماهو حاس بتصرفاته اللي حتى الاولاد ملوا منها
يغضب على أي شي ينتقدني ويذمني وانا باذلة قصارى جهدي
مايفكر بالجنس معي يادوب بالشهر مره وبالدف
ويجي يطالبني بمثالية
لمن يضيع له شي على طول بوجهي يقول أنتِ مو مهتمه فيني مو مراعيتني مايهمك انا
لمن أنسى شي أو طلب شي وراعيته بس مانفذته لاي سبب يانسيان ياعدم إقتناع
أنتِ تتحديني تبين تطفشيني مو أنا اللي ببالك!
حياتي معه تدور بالدائرة هذي لدرجة كرهت قعده معه
سوالفنا ماتتعدى الترتيب والتنظيم وليش نا تراب وليش هنا مادري ايش
مع إني مرتبة ونظيفة وبيتي أتحدى أحد يدخله ويعيب فيه بس يدور أي زله علي كأنه يبي يسبب مشاكل

طبعاً زي ماقلت محرومة من الجنس الآن لي 6 شهور
اصلاً نومه معي في الفراش ماينام
بتقولون وش السبب بقول والله صار فجأة مايقدر يمارس يصير معه ضعف
وهالشي له سنين تقريباً 6 سنوات صبرت وتحملت وبينت إن هالشي مو مهم إذا علاقتنا متينة وفيه موده ورحمة
وإنه إشباعي العاطفي يكفيني عن الإشباع الجنسي مع إنه عارف إني ميالة للشي هذا ومايحتاج أوضح أكثر

شهر مالمسني فيه مع إن علاقتنا كانت ماشية كويس
و3 شهور فترة طلاقي
وشهرين الآن بعد رجوعي أصلاً طوال هالاشهر ماينام معي بالفراش

اسايسه واحاول أرضيه واوفر حاجته والبي طلباته وأبعد عن مسببات المشاكل
بس كانه محلوف عليه يخاصم ويهاوش وينتقد


المشكلة اللي تقهرني يحور الأمور على كيفه

- الجنس مو اساس الحياة الزوجية!
- الجمال مو كل شي أنتِ مغترة بجمالك!

والله ماقد أغتريت انا شرق والغرور غرب
وانا بصراحة مافيني عيب أبداً وملفته بس سبحانه اللي يدور حتى ع المميزات ويعيب فيها!

آخر مره قهرني لمن قال شوفي الحريم كيف يعاملون رجالهم
ممكن شينات بس ريقهم حلو

بكيت من أعماق قلبي
لأني أدري إني مظلومة
من وين ريقي حلو مع واحد ملامحه مختلطة من العبوس!
رجال مالمسني وجسمي برد أتقلب ع الفراش بروحي
كيف يكون ريقي معه حلو!
المصيبة كلامي معه ذرب ومؤدب بس ماعدت أقول يابعد هالدنيا
ماعدت اقول نظر عيني
ماعدت أقول حبيبي
كسرني بطلاقي صرت أشوفه غريب
حسيت مالي قدر عنده كيف اماديه حبيبي وهو يبي فرقاي!

معروفه بدلعي وغنجي ولساني يقطر عسل
بس هو مايشوف هالشي

قايمة ببيتي وبعيالي وماشية زي الالف ويقول عني فاشلة
كيف وحده تسمع مثل هالحكي وتكون هادية مستكينة مطمئنة!

اصلاً لمن أضحك ويا العيال يتحمد ويتشكر يقول كل شي يضحكم!
وش يبي بالله من الحياة!

اصلاً غسلت يديني منه لمن مره مسك اللاب حقي يتصفح
وجيت أنا وقمت أدور على صفحة كنت فاتحتها وشيكت على المحفوظات ولقيته فاتح صفحة الوفيات
وربي طارت عيوني شيئ لايصدق!

علاقتي مع عيالي يارب لك الحمد
فاهمين بعض وجوي من جوهم هبال ووناسة ومزح
موب مدرسة ليلية نهارية سهرانية قصدي حتى الساعة 2 ممكن يلقي علينا كم كلمة ياصبر الأرض بس

شخصيتي قوية ظاهرياً وصايرة هشة داخلياً بسبب زوجي المصون
تغيرت شخصيتي
صح مدلعه روحي
بس أحس ماعدت أنا الرايقة المتواصلة مع الناس

صرت أحسد اي زوجين رايقين مع بعض
وش ينقصني عن الحريم بالعكس دلع وأناقة وهبال وسعة صدر ولا يغركم وقت الجد عن الف رجال
وماخذه طبع الحريم الأولات اللي همها رضى زوجها ولا يشوف منها عيب
صح ماني مالك واكيد مني تقصير بس ما أستاهل الفتور والبعد الروحي اللي عايشته
معطيته حريته ولا اسأل ولا أعاتب ولا أطالب بشي
وفجآة يقول ناشبة لي
أجل وش يسمي روحه!


صرت اشك إن زوجي يبي يعيش دور الضحية
الزوج المتنكد
اللي زوجتها تهز وسطها وتقول قاتك الآرف إنت وكرشتك ماتيقي توكل العيال وتلبسهم وتنيمهم وأنا حروح لصحبتي أصل قوزها منيل عيشتها حطبطب عليها ساعتين وراقعه

وربي إني مظلومة
وحده في عمري
متهنية مرتاحة مطمئنة حياتها هادية

موب تردد اللهم اكفنيه بما شئت ولمين لزوجها!!


سامحوني لارتبت حكيي ولا راح أرتبه لو أرجع أقرا بستحي وبمسح خربطتي
واستروا ماواجهتوا!
إن وجد فهم وإستيعاب لمشكلتي بكون ممنونة
وإن لم يوجد مثلي بتؤجرون إن دعيتوا لها...

الله يفرج همك ويسخر زوجك لك

جزاك الله خير وبارك الله فيك حبيبتي..

الله يصلح لك زوجك ويهديه بس حاولي تكوني انتي الهادئه وتمتصي هالعصبية والعناد الي فيه لانه واضح
ان هذا طبع متعودعليه وبعدين افضل حل تلجائي لربك بالدعاء والاستغفار

بعدين المشكله الجنسيه اللي عنده حاولي تقنعيه يروح لطبيب او اذا صعبه عليك في حل ثاني انك تخليه يقرا مقالات عن الضعف الجنسي وسرعة القذف ومن هالناحيه او عبر المنتديات عن المشاكل الجنسيه اللي يعاني منها والحلول يعني ثقفيه بطريقتك

وتوكلي على الله واكثري من الاستغفار بنيته.

__________________

آمين
الله يسعدك حبيبتي
ونعم بالله ياقلبي أنا مؤمنة بربي وأحاول أتقرب أكثر عشان بس راحتي النفسية
بس مليت وصرت أخاف من الأيام وش مخبيه لي..

بخصوص مشكلته الجنسية ماقد صار حوار صريح الفترة الأخيرة
عشان أحكي ولا أبي أحكي من نفسي وتتأزم نفسيته ويكرهني أكثر
مع إنه يحاول مابين فترة وثانية إنه يجرحني ويقول عفت الجنس من مشاكلنا
وإني عفتك ومن هالحكي مع إن المشاكل هو يخلقها
والا أنا هادية مستكينة أتمنى يمر يومي بسلام ماأبي منه شي غير الهدوء وبس

وبخصوص اكون هادية
حاولت أكون هادية
حاولت أمتص غضبه
حاولت أقول أبشر مالك إلا اللي يرضيك
بس جد
حامت كبدي منه
مستفز بقووة
اوقات مالي قدرة أمسك أعصابي!

خليكم مني أنا
طيب أولادي وش دخلهم
زلزلهم بغضبه وهواشه ونصحه صاروا يتأزمون نفسياً منه
ويتظرون طلعته!

نصيحه عليكي بالسحر الحلال تري له اثر عظيم علي
الحياه الزوجيه واياكي والعناد وافشاء اسرار كم لكل من هب ودب حتى ولو لامك
واشغلي بالك عنة لا تفكري فية الان و اشغلي نفسك باي شئ حتى يفقدك ويبدء هو الي يدور عليك والله يوفقك

__________________

والله يالغلا
مافاد معه أي أسلوب
صدقيني
ماكتبت موضوعي عبث
أو لحظة غضب
أنا تعبانة ومرهقة نفسياً بشده
من ناحية أفشي
أنا بحني الكتمان ومالي غير مثلكم وشرواكم يساعدوني ويوجهوني
الله لايحرمكم الأجر

اختي اسال ان يعوض صبرك الجنه
وانتي قمتي بهذه التضحية من اجل الاطفال
اسال الله لك الثبات
موفقه اختي

__________________

فديت قلبك على دعواتك ياطيبه
عشانهم
وعشان مالي أحد يحتويني راح سندي ربي يغفر له ويرحمه..

اتوقع انه دايم ينتقدكي ويذم ويسب ويطلق بسبب ضعفه الجنسي
هو عارف المشكلة ومسويه عليه ضغط ......... ومتضايق حيللللللل ........... وتظهر عليه على شكل عصبيه وعبوس
اذا انحلت ........... تحسنت اخلاقه وهدأت نفسه

__________________