السلام عليكم انا فعلا تعبانة من مشكلتي مع زوجي وابغى اشخاص واعين يوجهوني لني كل مرة اتصرف تصرف احمق وينقلب الموضوع على راسي

بقولكم على مختصر حياتي الزوجية عشان تحكمون على شخصية زوجي وشخصيتي

انا متزوجة من عشر سنين وبعد زواجي بخمس شهور وكنت حامل صارت مشاكل مع زوجي يوم عرفة ونزلني في بيت اهلي وبعد العيد لمن فتحت المحاكم جاب لي ورقة الطلاق

تخيلو لسه عروس وحامل وكنت متحملته خلال الاشهر الخمسة جتني صدمة كنت بموت اعرف الناس تصير بينهم مشاكل بس مو اول مشكلة طلاق

انا ماقدرت اتحمل ابدا فكرة اني مطلقة
تخيلو اكبر غلطة سويتها صرت ارسله رسايل الله يخليك رجعني انا اسفة بسوي اللي تبغى مع انه يعتبر هو الغلطان اه على نفسي بس كارهة لقب مطلقة
طبعا بالاخير رد علي بعنجهية وغرور وقال برجعك بس لازم كلن يدري انك انتي اللي طلبتي وتعذرتيلي قلت اوكي
بعدها للاسف رجعت

وصارعندي فوبيا الطلاق اي مشكلة تصير بينا لو الغدا مايعجبه اجل ابكي اقول بتطلقني عشت برعب معاه
بعد فترة جته دورة لدولة عربية كم شهر وقال باخذك معي انبسطت بعدين قال لا بسكن مع شباب
انتي تعالي اخر شهر
طبعا انا سمعا وطاعة شخصيتي ضعيفة وعندي مشكلة اخاف ازعل يطلقني ولو ماطلقني يحقرني وانا ماتحمل

المهم بعد ماراح قال تعالي عشرين يوم وفعلا جيت والرجال مرة متغير لانه كان متحسن معاي وكنه وراه شي ماله خلقي بعد اسبوع قال عندنا تدريب خارج المدينة لازم ترجعين ورجعني وفعلا
المهم الغبي دق علي مرة من تلفون الشقة وسجلت الرقم بعدها بكم يوم دقيت وردت علي وحدة قلت من انتي قالت صديقة فلان اللي هو زوجي قمت اهاوشها سحب السماعة وقان يهاوشني ليش اتلفظ عليها
طبعا انا خفت انه يطلقني كالعادة
المهم بختصر رجع وحاول يقلب الموضوع على راسي وانه بنت صاحب العمارة جاية تاخذ الايجار واني فشلته واني واني
المهم رحت معاه البيت وماقدرت صرت بس ارمي عليه كلام
قام طلقني شفهي كلمت اهلي جو خذوني
طبعا كالعادة بعد كم يوم دقيت عليه قلت تعال رجعني

المهم رجعت ةاستقرت حياتنا نوعا ما وصار عندي احساس بالامان شوي وحملت بطفلي الثاني طبعا فيه شي انا واثقة منه زوجي مايخوني ابد بالرياض ولا برا بس ذيك المرة اصدقاء السوء هذا من طيبتي
زوجي بدا يتغير يطلع من الاربعاء الظهر ولا يرجع الا الجمعة بالليل ويقفل جواله

اذا واجهته وحسيت انه عصب انسحبت خفت انه يطلقني

لحد مامرت سنة كاملة وتهاوشنا هوشة كبيرة وجو اهلي ياخذوني وجلست عندكم ثلاث شهور غير انه مد يده علي وبهذلني واكتشفت انه على علاقة مع بنات من اللي بالي بالكم لقيته مطلع جوال ثاني وفتشته
كالعادة بديت ارسله رسايل يرجعني بديت اكلم اهله اقول تكفون شفتو ذل اكثر من كذا حتى اهله قامو يتغلون علي وفهموني انه بيطلقني
بعدين من كثر ماحنيت عليه كلمني بوقاحة قال ارجعي ماصدقت رحت البيت طيران ولا جا الا الفجر وحاقرني




بعد فترة ترك الطلعات وتحسن مرة احسن من اول ماخذته بس صرنا اذا بغينا نسافر يودينا شوي ويقول الباقي لي انا مانبسط معكم عشان العيال قلت اوكي نخليهم عند اهلي ونروح انا وياك قال لا
المهم سافر لدولة من دول شرق اسيا اللي مشهورة بالخرابيط وانها رخيصة

طبعا انه صدقت انه قصده المتعة بس

صار كل سفرة كذا
طبعا هو كان عنده غرفة مقفلها واذا بغى يسافر يرتب شنتطه فيها وانا مستحيل اشوف الشنطة حتى اذا جا من السفر الملابس يوديهم للمغسلة
في مرة نسي المفتاح وصحيت الصباح وش لقيت يالشنطة كيس مليان مقويات جنسية ومضاد حيوي ضد الامراض الجنسية والباقي انتم تعرفونا
لمن صحى واجهته قال مب لي واحد موصيني

وصياح ونياح وحالة طبعا زوجي بالعادة يقلب الموضوع علي هالمرة تفجأت انه يحاول قد مايقدر يراضيني
وراح وبعد مارجع شرشحني شرشحة وحط الموضوع على راسي

المهم سافر بعدها مرة وقرر انه يصير ذكي قال بروح الصين يدري انه مافيها خرابيط طبعا ماصدقته وتهاوشنا


وتعبت مرة قلت الى متى بسكت على خرابيطه طول ماهو مسافر اتخيله مع احد غيري ماقدر ماعندي قدرة اتحمل
بعدين زوجي مب مثالي ومدلعني عشان اقول ماعليش
وزيادة على كذا اذا سافرنا انا اتكفل بنصف مصاريف الرحلة
وهو يقدر يسفر نفسه

قبل كم يوم قالي بيسافر السفرة المعهودة بعد خمس ايام طبعا هذا تكتيك جديد انه مايقولي الا قبل السفرة بكم ويوم
وتكون بنص السنة مو بعد سفرتنا الصيفية

سكت ماعلقت بس حس اني متضايقة
يوم جا الصبح قلت له طلقني على اساس بنتناقش قالي خلاص بكرة اروح المحكمة اطلقك
بس علمي اهلك لاينقدون علي

طبعا هذا ردة فعل غير متوقعة مني اول مرة اكون شجاعة

هالكلام من يومين وانا في البيت ومانتكلم مع بعض

لااعرف كيف اتصرف وانا بداخلي لااريد الطلاق ولكن ماتحمل الخيانة
والطلاق طلبته وخلاص وماقدر زي كل مرة ارجع اقول لاتطلقني

لااريد ان اتصرف تصرف احمق يقلب الموضوع على راسي
ارجوكم ساعدوني

فعلا احتاجكم

اختي الفاضلة
زوجك بيفعل افعال لا ترضي الله ولا ترضي احد
وهو ابو عيالك وانتي تبغيه وادري كيف شعورك من حيث الخيانة
لكنه للاسف هذا مرض
حاولي تنصحيه وتخوفيه من رب العالمين بحكمة
واصبري وادعيله بالهداية لانه على كلامك طلقك مرتين وللاسف هذا الصنف متهور لانه حوالينه بنات فما بيقدر يحس بقيمتك
لكن اصبري وذكريه بالله وانه عنده اولاد وانه وش سوى لاخرته
وان شاء الله تكسبي الاجر فيه وفي عيالك
ولا تقعدي تتعبي نفسك وتوتري نفسك من ناحية الخيانة خلاص انتي سوي اللي عليكي انصحيه واتركيه يعني لا تعاتبيه كل شوي والثاني
يمكن يوم يشوفك كذا يشاور عقله ويبدا يفكر في بيته ومستقبله
ويحس بفقدان قلبك يقوم يراجع نفسه
طبعا بدون ما تتركي البيت وتاخدي مواقف تازم الموقف وفضايح
لازم من الصبر واخرتها ربك يفرجها
والله يهديلك اياه

شكرا على ردك
انا نصحته كثير بي يثور ويعصب يقول من قايلك اني راعي هالامور
زوجي مرة ذكي ويعرف انه الاعتراف هو سيد الادلة لكن هو يظل ينكر ويحط نفسه شريف
مشكلتي اللحين مابي الطلاق بس ماقدر اتمل سفراته

اختي
والله حاس من كلامك وفاهمك انك حريصة على بيتك وتحبيه وتحبي بيتك وعيالك ومستعدة تضحي اكتر
طولي بالك
خليكي صبورة وكله باجره
لا تتعبي نفسك وتجري وراه وتزعلي في نفسك
حاولي معاه تسوو طلعات خرجات تماشي تشغليه بعمله وبيكي
لو ما بطل
اصبري لا تحدي الموقف لانه ما بقيلك الا طلقة
وبعدها البيت يخرب وهو متهور ولا هو حاس الا بعد ما يطيح الفاس في الراس
طولي بالك واشغلي نفسك
ادري صعب وكيف شعورك
بس اصبري واصبري واصبري
وراح تلاقيها جبل في موازين حسناتك بالاخرة
لا تتهوري معاه وتازمي الموقف خديه بالكلمة الطيبة
حسسيه انه هذا البيت تعبتوا فيه وحرام بيضيع
وخذيها مني مو كل شيء الواحد يلقاه في الدنيا
ومافي احد منا يبغا يجلس بدون زوج او زوجة
عشان كذا بقلك اصبري ولا تحطي في بالك خرابيطه بيجي يوم ويتعب ويمل ويندم ويرجعلك ويحس بيقيمتك وببيته بس الصبر
من كل قلبي اقول ربنا يهديه

كلامك فعلا مريح لكن انا قلت له طلقني خلاص مايمديني ارجع بكلامي

وانا عارفة ماراح يطلقني لانه متحسف على الطلاق الاول ويعتبرها غلطة مايكررها

بس اللحين بيحاول يقلب الموضوع على راسي ويبي يعاقبني كيف اتجراء عليه

لانه متعود مني السمع والطاعة

باقي يومين على سفرته واحنا مانتكلم مع بعض بس ننام بنفس الغرفة
بس باقي اليوم كل واحد جالس في مكان

انا بالعادة يبين علي اني منهارة
ماعاد اطلع ولا اكل واصير حزينة
المرة هذي كذا بس امثل اني عايشة حياتي وماهمني




و

أختي انتي لك عقلك وتحكمين عقلك
أنتي غلطتي سكتي له من البدايه وبينتي له ضعفك وساعدتيه علي الغلط بسكوتك

تعرفين عقوبه الزنا ؟!
الزاني مايزني وهو مؤمن
وأنا مره قريت فتوي مايجوز تجلسين مع زوج راعي فواحش إذا ماتاب

أنا ماادري والأخوان يفيدونك أكثر مني

لكن لاسمح الله حصل الطلاق تأكدي أنك مو خسرانه
ولاتكونين ضعيفه والدنيا فانيه والله يعين زوجك علي المعاصي والذنوب
مسكين غرته الدنيا

أسمحيلي أقول موقف صار لي امس بعيد عن مشكلتك
صار موقف والله شفت الموت كنت أشوف الله حولي نظره مودعه
بس الحمدالله صحيت ويمكن إنذار لي أقول لك صار لي موقف طحت وكذا وشفت أهلي حولي يبكون وأنا مااقدر أحرك جسدي
ولا أتنفس عرفت ضعف الإنسان وحقارة الدنيا

أختي لاتهتمين زوجك يطلق كثر ماتتمسكين بكرامتك وعيالك تربينهم تربيه صالحه وتعملين للأخره أحتسبي لو بقيتي مع زوجك أنك راح تصلحين حاله مو تساعدينه بسكوتك ولو أنفصلتي أنك تركتيه إحتساب لوجه الله وأنه زاني وديني أهم
وراح اربي عيالي عشان يخدمون الدين يكونون عيال صالحين ويدعون لي بعد وفاتي

عموما ياليت تشوفين فتوي البقاء مع زوج زاني


الله يصلح حالك ويهدي زوجك وييوفقك للي فيه خير وصالح دينك ودنياك

__________________

على فكرة في نقطة حبيت اوضحها
زوجي صار له اربع سنين مايطلع من البيت الا للدوام فقط
بالويكند بيت اهله ساعة ويرجع يعني علاقات هنا متاكدة مافيه لاني عمري مافقدته
ولايكلم بالجوال الا بالنادر

من كلامك فهمت انه لمن يسافر يلعب
طيب معاملته معاكي كيف
صلاته
مع ابناءه

الصلاة يصلي ولله الحمد
وكويس مع اولاده بس انا اتحمل مسؤوليتهم اكثر منه