السلام عليكم ورحمة الله وبركاتة

اول شيء ترى بتكلم عامي لان تسبدي تفوح = تشتعل معدتي
= حرقان بالمعدة ( لغير الناطقين)
ومالي خلق انمق الفاظي
المهم
بغض النظر عن عيوب خطيبي الكثيرة اللي المجال لايسمح لذكرها
لكني اكتشفت ان الاخ وكالة انباء
كيف؟
اي شيء اقوله له يرررركض يقوله لأهله
في البداية كنت شاكة لانه الوحيد بين خواته (شقيقهم الوحيد) وعندهم اخوان غير اشقاء تواصلهم معهم مو ذاك الزود
المهم كنت شاكة, بس قلت لا اكيد انه مستوعب اني زوجته وبلا...بلا....
بس الاخ خيب ظنوني
كل ماسولفت معه بشيء صار بينا اكتشفت انه قايله لاهله؟ والطامة اليوم اسولف معه بشيء واطلب منه يسويه قال اوك بدق على اختي يمكن تقدر تدبره بسعر ارخص
بغض النظر عن كلمته الخالية من الذوق , بس انا ماهبل فيني الا يوم قال ادق على اختي ؟ ياناس شيء خااااص
طبعا كنت محتقنة وعطيته ياها صريحه قلتله لاتدق على اختك ولاتقول لاحد اللي بيني وبينك
قام يضحك ويرقع , وقال خلاص مانيب قايل , بس بقول لأمي ـــ<< لاياشيخ ؟
ليتك ساكت بس
اشق هدومي انا ولا اشق هدومي
شكل اهله قاطين معه ؟ يحسبون انهم معرسين علي هم وولدهم ؟؟
ياخوفي باكر كل ماصار شيء بيني وبينه لقيت اهله يسولفون فيه

المطلوب الان
وش الحل مع الرجال اللي من هالنوعية
وشلون اخليه يتعلم مايتكلم فينا او في خصوصياتنا ؟ لابخير ولا بشر
ابيه يتعلم يرد بهالعبارات اذا انسأل اسالة شخصية
حنا تمام , بخير , مادري , ايه , لأ , امورنا طيبة
اوما يقعد يقول سواليفنا وعلومنا تقل حرمة قاعدة بجلسة ضحوية ؟؟ وش السالفة ؟؟
انا طبعا اقدر بطريقتي اشفر اكبر قدر من معلوماتي وسوالفي عشان ماينقلها لاهله
لكن ذي مب حياة ؟؟ مب عيشة اني اصير معه تقل غريبة ؟
الشيء الثاني انا اشوف هالخصلة عيب كبير بالمرأة فما بالك بالرجل ؟
ومابيه يطيح من عيني الصراحة
خصوصا اني جاية من بيئة تقدر الخصوصية ؟ لي شهرين ونص اكلمه عمر احد من اهلي ماقالي وش بينكم او وشتقولون او اي شيء
مع اننا قريبين من بعض جداً
كل اللي يقولونه , مبسوطة معه ؟ مرتاحة؟ وبس
وه بس
مازالت تسبدي تفوح

وعليك السلام ورحمة الله وبركاته

خطيبك كان بيعلم أخته بس

بس إنتِ علمتي المنتدى كله

شوفي ياأختي
بإعتبار أن خطيبك ماله إلا أمه وخواته
فهو يعتبرهم مصدر الأمان والفضفضة بالنسبة له
وأنهم ثقة في أنه يخبرهم بكل شئ
لأنه ربما هذه عادتهم
أمه ربته على إنه يقول لها كل شئ وياخذ رأيها .

بس الآن هو بيتزوجك إن شاء الله
فلا بد أن يتغير
وعشان يتغير لابد من توجيه
وعشان يتوجه لابد من قناعة بأن الذي يسويه غلط
وهنا دورك الآن ..
علميه ووجيه واقنعيه
بأنك لا ترضين أن أي أحد يعرف عن حياتك شئ بشكل خاص
وعن حياتكما بشكل عام .


أعانك الله

ايه علمت المنتدى وياليتهم يردون بعد بس يقرون ويوسعون صدورهم ويمشون
بالنسبة لردك
هنا المشكلة
وشلون اعلمه
بما انك رجل
علمني وشلون اعلمه مايعلم اهله بعلومنا ـــ<< كيف

قد لمحتله قبل وما من تغيير
يوم لمحتله سوا انه يقدر الخصوصية و خصوصياتنا لايدري فيها احد لاويقولي انتبهي لاتعلمين اهلك عن خصوصياتنا شكله يحب التنكيت صح

وييييه ذكرتيني بااياامي التعيسه ومشاكلي على هالشي والله انه كااااان حتى الاشياء الخااصه يقول لأمه<< يااااكرهي له

حلوة القفشة هذه
( خصوصياتنا لايدري فيها احد )
أمسكي عليها وردديها على مسامعه كثير

ولا تنسين في لحظة مناسبة
إذا حصل وعرفتي أنه علم أهله بشئ من خصوصياتك
أزعلي ..
وخذي موقف صارم
وبلغيه أن هذه الصفة الوحيدة التي لا تحبينها فيه

أعانك الله

عزيزتي .. مستقبل غامض

صراحة أسلوبك عجبني .. فرفوشة ودمك خفيف
وخليتني أضحك وابتسم الله يسعدك..

جربي معاه بأسلوبك هذا توصليله المعلومة..
أو ممكن تقوليله موقف عن صديقتك وخطيبها ( طبعا من تأليفك) هههههههه
وانها اتضايقت من أسلوب زوجها ..
قوليله تخيييييّل صديقتي مسكينة زوجها يقول لأهله..إلخ
لا أنا الحمدلله أهلي مايتدخلو في شي ولا يسألوني.. أحلى شي الخصوصية بين الأزواج
بكرة تصير مشكلة بسيطة .. والزوجين ينسوها والأهل ماينسوها..( عملتلك سيناريو وحوار)..

يعني حاولي من خلال مكالماتك اليومية .. تقنعيه .. وأعطيه ايحاء انه هو فعلاً مايتكلم لأحد..

أتمنى أكون ساعدتك ولو بقدر بسيط ..

__________________

>> لا إله إلا أنت سبحانك إني كنت من الظالمين <<

الله يجبر بخاطرك , اي والله فرفوشة وش زيني على شوية قشارة عشان ما امدح نفسي
بالنسبة لإقتراحك , تراي مألفة مجلد اسمه ( صديقاتي وازواجهم ) وعلى اجزاء بعد من كبره , مابقى الا أطبعه في دور النشر
جربت هالطريقة , كثير واستهلكتها لما قلت بس , ولا نتيجة

انا مشكلتي مع زوجي انه
شخصيته راعي سواليف بقوة + الرجل الوحيد في بيتهم + متعود يقول لأهله كل شيء عن حياته من قبل مايتزوجني اصلاً
والنتيجة كوكتيل صعب التعديل
ما ادري احس التلميح ماينفع مع هالتركيبة الجهنمية
ماينفع الا تصريح ووضع النقاط على الحروف
شكلي بدخل في مواجهة قوية قريباً
والله يستر

غلاتي مستقبل غامض

إن شاء الله يكون مستقبل باهر وجميل باذن الله تعالى
اتصور ما تقدرين تاثرين بخطيبك الا اذا كسبتيه
لازم تاثيرك عليه يكون اقوى عشان يكون كلامك مقنع له
لو انك تشبعينه اهتمام وثقة واحترام من خلال المواقف
بيصير اطوع لك - ومنها تقدرين تقنعينه بشكل غير مباشر وودي
انك لا تحبين اخبارك اهلك بمايخص حياتكم لانها خاصة بكم
وملك لكم - ومنها يفهم مقصدك ويتقبل فكرتك

بعض الامور لا نستطيع الحصول عليها بشكل مباشر
فمن الحكمة ان نحاول بشكل غير مباشر

__________________



احيانا يجب ان نفقد ذواتنا كاملة لكي نستعيدها كاملة ...

كلامك صحيح , مشكلتي حادة واخذ موقف , واضحة وينقصني الدهاء الانثوي

طبيعة شخصيتي اقدم واعطي بشكل لامحدود , عاطفياً وجسدياً وغيره , في حال كنت مرتاحة مع الشخص ومافيه منغصات او ع الاقل المنغصات ليست مصيرية
اما اذا وجدت صفة سلبية ودائمة او مستمرة اشعر كأنها تضغط علي, احس بإنزعاج شديد و انفر + ما اقدم أو اعطي + ادخل في مواجهة مع الطرف الثاني وما ارتاح او ارجع لطبيعتي لحد مايتغير الوضع ويصير زي ما ابي

طبعا كون شخصيتي بهالتركيبة فهي تتيح لي الموجود اصلاً , ولا تمكني من الحصول على غير الموجود

بمعنى مثل هالصفة او غيرها تخليني انفر وما اشبعه اهتمام وثقة واحترام على قولتك , بالعكس ممكن اقصر بشكل كثير في هالنواحي , وممكن على النقيض اعامله بالعكس , لاشعورياً مني , كتعبير عن عدم رضاي
بينما لو كنت مرتاحة اقدم واعطي حب واهتمام بشكل لامحدود, بشكل لايمكن تتخيلينه

عموماً انا احاول اسيطر على نفسي من بداية خطبتي , لاني اخترت ان استمر بالخطوبة
والله يعين

_


هلآ ـآأختتي
بصرـآأحة الله يعينك ..
بس تعرفين يبيلك تذكرينه كل بعد سالفه قلتيهـآأ انو لازم تكون بينكم ولا تطلع
بس مو مبـآأشره
( يعني مثلآ تقولي السـآألفةةة .. وكدا وكدا .. اختميهـآأ بمثلآ حبيبي انا مااحب افضفض الا لك
مع انه هالشي ماقلته لأختي المقربه مني لاني مااحب احد يسمعه مني الا انت ) = طبعـآأ ع حسب الموضوع

اتمنى اني افدتك , والله يوفقك حبيبتي