السلام عليكم ورحمة الله وبركاتة

انا متزوجة لي سنة و سبعه شهور وعندي ابن حمدلله بعمر سبعه شهور
بداية مشكلتي من زوجي انسان كتوم وبارد عنده لامبالاه فظيعه من ايام الملكة وكنت الاحظ انة غير الباقين ماقد حسيت انه مهتم او يحبني صدق يتشرط علي من البداية عدد الزيارات انها تكون مرتين خلال مدة ملكتنا اللي كانت بحدود خمس شهور وكم حاولت ابين لازم تكون اكثر عشان اقدر اتفهمة واتعود علية حتى مكالماتة يبغاها بعدد معين بلاسبوع وكنت كثير ازعل من ذي الناحية المفروض الواحد مايحدد اتصال او زيارة هاذي امور عندي مربوطة بالمشاعر وقت الانسان يشتاق او احتاج الطرف الثاني يسال عنة مايحتاج مواعيد

عدت ايام الملكة وكنت اقول يمكن هوه انسان يستحي او يتغير بعد الزواج وجت ايام الزواج الاولى من اول اسبوع مشاكل ماقد حسيت اني عروسة بس نايم طول الوقت ولو خرجنا لفينا ساعتين ورجعنا متخاصمين
وهادا من اسبوع بعدها بدا دوامة ومرت الايام عادي طبعا كنا بمنطقة غير منطقة اهله واهلي

طبعا زوجي ماعنده الا تريقة ودايم يستفزني بمدح الحريم يعرف اني ماحب طريقة كلامة عن الحريم انا انسانة غيورة وهوه مسكها على الطالعة والنازلة يستغزني يحب يشوفني اعصب وازعل ماانكر زوجي طيب ومحافظ على صلاتة حمدلله
بس المشكله كلها لما كشفتة مرة يراسل واحد ويتكلمون عن صورة بنت ويطلب رقمها هنا انا انصدمت لدرجة رجفت وماقدرت اتمالك نفسي من الصدمة وهادا مامر على زواجنا الا 4 شهور وكشفتة بالصدفة ماكنت ناوية اشوف رسايلة او افتش لاني ماقد شكيت فية من كلامة عن نفسة انه مايعرف دي الاشياء
طبعا هديت واستغفرت وتمالكت نفسي وواجهتة بدون عصبية وكلمتة بمنطق ديني وتاثر وحلف على القران انه مايعيدها وانه اصلا كان يستهبل مع صاحبة ومشت الايام وعدت
بعدها بشهرين يمكن برمضان كشفتة ووكمان دي المرة صدفة ويشهد علي الله يكلم وحدة ويحاول يتعرف عليها ومتكلم معاها بادب لولا ان البنت ردتة ولا كمل معاها المشكلة اني كشفتة بنفس اليوم طبعا هنا صدمتي اقوى لاني كشفتة يبغى يتعرف بوسط رمضان وبعد ماحلف على القران
صراحة انهرت وتمالكت نفسي وكلمته بهدوء وهوه بقمة البرود يضحك ويقول ايش تبغين وحلفت لة على القران لو كشفتة مرة ثانية لاروح لاهلي ومرت الايام ومشت الحياة ماانكر اني بس سرت شاكة فية وكل مرة افتش جوالة طبعا مايخلو الامر اني القى مقاطع فيديو ومسخرة بجوالة ودايم اتمشكل معاه بسببها
المهم جلس له يمكن فترة شهور الا ان صار يجي لزوجي ازعاجات باسمة مع الايام اكتشفنا انه اسم مذيع شاب وكل ابلنات طايحين فية جلس زوجي فترة مايرد عليهم الين كشفته مرة رد على وحدة بمزح وسوالف عديتها له لانها كلمتين وقلت مشيها دي المرة بعدها زوجي قفل جواله برقم سري ولما طلبتة يفتحه يقول امور خاصة بالرجال انا قلت لة لو تسوي شي ربي بيكشفك وبيفضحك من غير ماتعب نفسي وحتشوف ومشيت وضعي وانا شاكة طبعا دي الفترة نقلنا عند اهلة من مدة وكااان طول الوقت عندهم وعذرة الشبكة اقوى وكان يصحى من النوم يروح عندهم الظهر المغرب العصر مايجي الاقبل النوم وانا اترجاه يقعد معي ويتكلم وادا قلت شي قال انتي نكدية ووالله اني مامدح نفسي والله حتى تريقتة اخذها بروح مرحة بس مش دايم
المهم قبل يومين برمضان هادا هادا ربي اراد اني اكشفة وجااااااني الجوال لحد عندي مفتوح وصراحه لقيتها فرصة ودخلت لقيت اللي شاكة فية بالعكس ادهى وامر كلام فاحش مع البنات وهوه رجع يتعرف على كل البنات اللي راسلوه
انا طلبت انه يوديني اهلي وهوه كل همة ان الامر موبصالحنا ادا كبر صراحة خرجت كل طاقتي فية من تهزي ونصايح ماعاد اتحمل اللي يجيني وهو بس يقول مابغى اخسرك قلت لو ماتبغى ماكان سويت اللي سويت وحافظت على سمعتك بنفسك
انا ودي اروح عند اهلي ببالي اني محقول لهم بس ابغاه يتادب ويخاف
ماعند احد خبر الا اختي وواحد من اخواني لانه انسان عاقل وفاهم واختي من باب الفضفضة لها
قولولي انصحوني ايش اسوي
الحين يماطل مايوديني لاهلي اهلي بمنطقة ثانية ودوبه تخاصمنا على دا الشي لين رميت جواله قام اخد جواله وجوالي وخرج من البيت

زوجي عمره تسعه وعشرين الامانة زوجي طيب وحنون على الاطفال وعلى الحيوانات يمكن يقضي الوقت مع اولاد اخوانة والقطط اكثر من وقتة معاية
وحنين معاية بس اسلوبة ينرفزني منة لاخرجات ولا كلام حب الانادر وامكانياتنا ضعيفة مع انه راتبة كويس بس يتريق ويمدح الحريم عندي على باله كذا المزح ولو ناقشتة وتكلمت معاه يقول نكدية وزعولة
هادا غير خياناته

انا عمري 27
افيدوني ايش اعمل في مساله الخيانات الحين هوه يحاول يرضيني بس انا مصممة انه يغير رقمة مو راضي يقول صعبة بس وافق يفتحة بدون رقم سري

حبيت استفيد من ارائكم ماشاءالله هاذا المنتدى انا من متابعينة وفيه عقول راجحة استفدت كثير من المشكلات اللي تنعرض هنا

فحبيت تفيدوني بمشكلتي

خلاص انا شرطت على زوجي يفتح جواله عندي بدون رقم وحلفتة علىى الطلاق اذا كررها مرة ثانية بس لسة احس اني تعبانة من هادا الموضوع واحس قلبي من جوا نار لدرجة ادعي ربي ياخد حقي منة

اتمنى تعطوني رايكم بقراري

مارديت عشان اخاف اخبب امراءة على زوجها

لكن لو مكانك .. لازم يغير رقم جواله و تتخذي ردة فعل جادة

لانه الرجال ماعندهم غير الوعود
و هو وعدك كم مرة و كل مرة يرجع

يغير رقم جواله
ويصير بدون رقم سري
شوفي ابقولك شى ترى الرجال اذا بغى يخون والله لو تقفلي عليه بقفص
انتي حاولي تشيلي هالغيرة قدامه
ادري صعب عليك بالبداية بس عشان لا يسغلها فيك
لا تروحي بيت اهلك الامر مايستاهل مرة بس يغير الرقم وتغيري شوي عليه
بكرة يعقل توه صغير 29
لا تخلي غيرتك عنده نقطة ضعف عشان لا يقعد يلعب عليها
اعكسي الصورة وخليك واثقة من نفسك

__________________
أقّسَمتِ مِرآراً وُتِكٌرآراً أنَ لآ مكَآنْ للّرحِيل بيَننا وُلكِنْ الرّحيلْ كٌآنْ أصَدقْ ...

شكرا لكل اللي ردوا انا حاولت يغير رقمة رافض بس قال بفتحة لك قدامك دايم وحلفتة انة حيقع علية الطلاق ان كلم بنات مرة ثانية

مادري كيف اخلية يغير الرقم يتعذر انة دفع فية مبلغ عشان يكون مميز ودوبة طلعه والحين عيد ومدري ايش
وقال خلاص انا حلفت بكلمة كبيرة محرجع
بس شكلي بحاول اكثر انة يغيرة


روح الطير كثير كنت اقرا مشاكلك وكنت احس زوجي قريب من شخصية زوجك سبحان الله

شوفي يامنو
الوعود ماتقدم ولا تأخر وحطي تحت هذه العبارة عشرة خطوط
تدرين ليش؟
ﻷن اللي مايردعه ربه ونفسه اللوامة عن الحرام ،، أنت ماتردعينه ولا ألف وعد يردعه،،
أول شي تقربي لربك أكثر،،
ان كنت ممن يستمعون للغناء ويتفرجون على اﻷفلام والمسلسلات فاتركيها لله لأنها محرمة،
انظري إلى حجابك هل هو شرعي أم لا،،
صححي علاقتك بالله ومسار حياتك واجعليها كلها بما يرضي الله
ثم
اشتغلي على تقوية الوازع الديني في زوجك،،وقربيه من ربه،،واجعلوا حياتكم كلها في طاعة الله ومايرضيه..
اجعلوا ورد من القرآن تقرؤونه سويا يوميا،،
اجعلي لنفسك عادة وهي أنك كل يوم تقرئي شرح آية وتفسريها لزوجك،،ويوم آخر اقرئي شرح حديث ووضحيه لزوجك
يوم آخر اقرئي في سيرة الرسول عليه السلام وألقيها عل مسامعه
ويوم عن الصحابة أو التابعين وهكذا،،،،
ملي وقته فيما يرضي الله،،،
وأشبعي رغباته وملي عليه حياته لا تجعلي عنده وقت فراغ لهذه التفاهات،،

اجتهدي وابذلي اﻷسباب وادعي ربك فهو المعين،،ومغير اﻷحوال.

وبالنسبة لتغيير الرقم أراه لا يجدي اطلاقا. هو حل مؤقت ،،يعني بنج ...وأنت أبصر.

جزاك الله خبر مكلومة
حبيت ارد عليك الجانب الديني كثييير احاول انمية مع زوجي المشكلة قبل رمضان او يمكن بفترة خيانتة كان مسجل بتحفيظ وجلس فيها فترة وانا اشجعه واحفظة كتاب الله بعدين بطل وقد قلت لة ربي مايسرلك الحفظ انتبة من اللي تسوية ماانكر اني مقصرة في بعض النواحي بس الحمدلله
وصلاة الفجر دايم احاول اقومة لها
البيت مانشغل الا قناه القران الكريم لان انا ماحب برامج التلفزيون واكتفي بالنت وهوه بس اخبار
بس ادا انا مو بالبيت مادري ايش يشوف
المشكلة مايقعد بالبيت عندي كثير يامشغول ياقاعد مع اهلة يا ينشغل بشي نادر يجلس بالبيت وادا جلس وجيت اتكلم معاه يسكتني يبغى يسمع التلفزيون طيب متى اتكلم معاه وادا جاء البيت قبل النوم واتكلم معاه يقول اخلصي ابغى انام
اكثر شي يقهر لما كان يطلب مني اروح عند اهلي ويقعدني اسبوع او ايام دايم ارفض واقول انا ارتاح ببيتي
يعني صراحة احسة دايم يصرفني
انا احس انة مايحبني يوديني عند اهلي ويوعدني يجي يوم ولما ادق اقول يلة يقعد يماطل لما اجلس عندهم اسبوع احس يدور الفكة مني
يعني صراحة زوجي شخصيتة غريبة مااعرف ايش يبغى انا اتجمل له دايم واحاول ارضية

انا دايم مومنة اني اعزز الجانب الديني عندة لان هي الطريق الوحيد اللي يبعده عن هادا الطريق

رح أتابع الردود ، عندي نفس المشكلة ، و الله حاسه فيكي ، زوجي الان 34 سنة رحماك يا رب

اختي عليك بالدعاء والاستغفار .. والله ان لها اثر كبير ..

اسأل الله لك الفرج العاجل القريب

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

قال رسول الله "صلى الله عليه وسلم" " استوصوا بالنساء خيرا "
فهل هذه وصية رسول الله (صلى الله عليه وسلم) ؟؟
المفروض ان يكرم الرجل زوجته من كافة النواحي و ان كان لا يحبها