السلام عليكم ورحمة الله وبركاته ..
أنا مطلقه من سنتين ونصف وعندي ولدين ، مع انه مافي سبب واضح للطلاق بس مع اول مشكله طلقني !! صح يمكن أنا اللي بديت السالفه بس كنت أبي حقي ماحاول يتفاهم مع ان زواجنا دام 7 سنوات !! من اول جلسه بينا للتفاهم طلقني ، جالسه الوم نفسي يمكن انا اللي جنيت على نفسي بس ارجع واقول الطلاق بيده مو بيدي والله ماوضع القوامه بيد الرجل الا لانه يفكر بعقله صح والا لا ؟؟
والله العظيم تعبانه نفسيتي تعبانه كل ماشفت اولادي بكيت وقلت ياليتني ماطلبت ولا قلت ولا اشتكيت ، حاسه نفسي اني حرمتهم من بيت ابوهم ، حاسه نفسي ظلمتهم الوم نفسي كل شوي والله حتى النوم ماانام مثل الناس ،
ليش الرجال مايفكر باولاده قبل لا يطلق ؟؟
7سنوات زواج مو هينه ، بنيت فيها احلام وامال بس للاسف في لحظة غضب وتسرع انهدم كل شي كل شي ،
حاسه بحرقه وخيبة امل ..
احيان اقول ليته سوى مثل بعض الرجال وخلاني معلقه يمكن كانت بتنحل الامور وارجع ،واحيان اقول مايستاهلني فرط فيني من اول مشكله، واحيان اقول قضاء وقدر ، واحيان واحيان ....
اللي متعبني اللحين تانيب الضميروالله العظيم تعبني ذا الضمير أبي حل اذا احد يقدر يساعدني.

و عليكم السلام و رحمة الله و بركاته. .

الطﻻق ليس بيده يا عزيزتي .. الطﻻق نصيب قدره الخالق لك كالزواج تماماً

ﻻ يد لك فيه انما سيرت على ارادة الله عز وجل و مرحبا باقدار الله.

ﻻ تلغي نفسك يا أختي

و ليس الرجل بأفضل من المرأة في شيء بل ان هناك من النساء من تفوق مليون رجل

بعقلها و حكمتها و العكس أيضاً.

ﻻ تلومي نفسك كثيرا يا حبيبتي بل اهتمي بها و كوني لاولادك اما و أبا

ﻻ تبكي فاالبكاء ﻻ يقدم شيئا يفيدك بل انهضي و تناهضي بذريتك عالياً

أنا مطلقة و أتمنى لو أنني امتلكت حق تربية اولادي أي أنني انظر للنعم التي لديك

فكوني افضل مني و انظري لمن هو دونك مثلي و اعرفي نعمة الله عليك .

الوقت ليس عبث ﻻ تضيعي عمرك في شي ﻻ يد لك فيه

استغلي مرحلة الطﻻق بشيء يريحك وليس يجلب لك الاحزان .

أعانك الله و فرج همك

__________________

‏
الوعي هو الملاذ ..

أستغفر الله العظيم ؛
( الفردوس غايتي )

جزاك الله خيرا اختي ام خالد ..

حبيبتي المتفائله

ليش تحسين بحرقه وخيبة أمل ؟
هل تحترقين لأجل قضاء كتب لك من قبل ان تخلقي
وهل الأمل صك ملك باسم طليقك ولايوجد غيره ؟

الحياة كلها أمل وطموح اذا سقطتي مره انهضي واعيدي ترتيب طموحك وآمالك الدنيا ماتوقف على أحد
لوكانت كذلك لرأينا الصحابه توقفت حياتهم بعد موت الرسول عليه الصلاه والسلام وهو خير البرية
لرأينا أم سلمه توقفت حياتها بعد وفاة ابو سلمة ولم تتزوج الرسول ويكون لها شأن يخدم الاسلام والمسلمين

انظري لكل من فقد هل انتهت حياته ؟
كمثال،،
امي فقدت والدها وهي صغيره واستمرت بالحياة
فقدت امها واستمرت بالحياه
فقدت زوجها واستمرت بالحياة

لا أحد يموت على فقد أحد حتى لو كان يسوى عيونه وقلبه
فما بالك بطليقك اللي باعك لأول مشكله
هل لهذي الدرجه نفسك رخيصه عشان تفقدين طعم الحياة لاجله؟ هل هذا هو الهدف اللي انخلقتي لأجله هو العيش مع زوج لآخر العمر ؟
تقولين بنيتي احلام وآمال ابني غيرها ياقلبي مين مانعك تراها ببلااااش ولعل الامر خيره ان تتبدل طموحاتك بالحياه وتحققين ماينفع ذاتك واولادك بدلا من ينفع غيرك سواء كان طليق او غيرو

الحمدلله انتي تتقلبين بنعم غيرك يتحسر عليها
عندك بيت يأويك وطعام يشبعك واهل يسندونك وذريه حرم منها ملايين وصحه وعافيه وراحه نفسيه لااحد يمن عليك ولايقلق راحتك
الحمدلله حمدآ تطيب به الحياة
اذا اردتي من فضل الله أكثر اسأليه هو وسيعطيك لاتعلقي سعادتك برجل لاحول له ولاقوه
الدنيا مليااااانه رجال اسألي الله الافضل لك وتفاءلي

وحبي نفسك عشان الحياة تحبك

كلامك صح أختي احن لابي ..
لكن تعرفين ايش معنى عشره 7 سنين اواكثر وهذا أكثر شئ متعبني ، الحمدلله اعتبر نفسي انسانه قويه وكملت دراستي وباقي لي القليل واتخرج لكن تتعبني الذكريات من وقت لاخر .
و فيه أطفال بينا وانا ام افكر باطفالي حتى لوكانوا عايشين معي عند اهلي في الاخير بيت ابوهم احق فيهم ومن حقهم يعيشون عنده وهذا الشي كمان تاعبني .
واهم شئ ضميري يأنبني اخاف اكون انا اللي جنيت عليهم .
يعني مشكلتي كلها تأنيب الضمير وبس..

طيب يا أختي ما حاولتي ترجعين له

حاول يرجعني لكن الله ماكتب لنا الرجعه ، أبوي رفض لأنه تسرع في الطلاق قلت يالله خيره ، والامور تعقدت كثير بعد الطلاق ، وهو خلاص تزوج .

نصيحتي لك حاولي قدر المستطاع الرجوع له من أجل أولادك حتى لو كان تزوج ووضحي لوالدك ان هذي رغبتك

اعرف ايش معنى عشرة 7 سنين عادي ناس عاشو اكثر وانفصلو
واعرف ومجربه الطلاق برضو مرتين مره بدون سبب ومره بسبب بس مو معناته اجلس الوم نفسي على طول

ومافهمت نقطة عيالي بيت ابوهم احق فيهم
يعني قصدك انك وبسبب الطلاق حرمتيهم انهم يعيشون مع ابوهم ؟
طيب ايش ذنبك هو اللي طلقك !
لو كان مفتكر بعياله وشايل همهم زيك كان ماتسرع بالطلاق
لك فوق السنتين لو يبغى كان راجعك عالاقل عشان عياله
حبيبتي كل شي صار لك وبيصير لك هذا بأمر الله مالك علاقه فيه
لنفرض انك اخطأتي وندمتي وهو ماقبل ندمك ايش تسوين معقوله تضلين طول عمرك تأنبين نفسك؟
هذا ظلم بحقك

__________________
مع كل محطة من محطات حياتك …
تتغير نظرتك وعلاقتك بالأشياء والأشخاص…
وتعرف عن نفسك أمور لم تكن تعرفها من قبل !

مشكوره اختي على الرد ..
بالنسبة لموضوع الرجعه حاول يرجعني لكن الله ماكتب ، الطلاق مو بالسهوله طلق وبعدين رجع..
يمكن أنا في البداية اخطأت لكن مو ذاك الخطأ الكبير ويظل خطأه واستعجاله بالطلاق أكبر من خطأئي ، يمكن ندمانه على هذا الشئ؟ او يمكن أسأل نفسي ليش تطلقنا يعني السالفه كلها عناد ولحظة غضب ؟؟
او يمكن لاني حرمه تحكمني عاطفتي ..