بسم الله الرحمن الرحيم

أتمنى من الجميع التوضيح لي وافادتي جزاكم الله خير

سبب كتابة مشكلتي هنا ماحب اقول لاهلي مشاكلي الزوجيه او صاحباتي حتى ماتطيح سمعة زوجي بنظرهم

المشكلة اعزائي ..

انا لي خمس سنوات متزوجة ولم يكتب لنا الله اطفال .. الحمدلله على قضاءه وقدرة

صفات زوجي الرائعة : يحبني الحمدلله , طيوب , حبوب , مرح , يحب الضحك , معطيني الحرية بالخروج والزيارات والسهرات ومايقول لا , والصفه الأجمل انه مايحب يتعبني واذا شافني تعبانة قال ناكل من برى عشان ماتتتعبين , رومنسي , اذا شافني متضايقه طلعني ومشاني , يحب يسافر معي وراعي سفريات معي فقط .. صفات رائعة ومغرية صح

الصفات السلبية : غير مسؤول , عصبي نوعا ما , بذيئ اللسان , كثير الشتم , سمين جدا مما يسبب التكاسل , متكاسل عن الصلاة , كسول دائما , متكاسل عن أغراض البيت , غير اجتماعي , احيانا مايعطيني مصروف ومرات ياخذ مني . وفبه سلبية بذكرها بعد شوي .

السلبيات الشكوى لله أغلب الأزواج عندهم سلبيات .. والحمدلله راضيه باغلب سلبياته

لكن فيه سلبية او نقول مشكله مضايقتني مره وابي اسألكم واشوف ارائكم عنها ..

زوجي دايم يقول انتي ماتغارين علي .. وانا كنت اجامل واقول واثقه فيك ليه اغار .. واحيانا اقول ماتوا الي يغارون .. ودايما يردد ابيك تغارين .. وانا والله بيني وبينكم الغيرة عندي ضعيفة يعني ما اهتم اذا صرنا بمستشفى وكلم النيرس او صرنا بالطياره ونادى المضيفه او مسافرين واستفسر من حرمه .. او تابعنا مسلسل وجت وحده حلوه ماقول شي اسكت .. احداث طبيعية ماتستاهل الغيرة .. لكن زوجي زودها
ليه ماتغارين يرضيك اكلم حرمه واتبسم لها عادي عندك ماتغارين وانا على وجهي اقول تتكلمون بادب مافيها شي .. الى انه بدى يسميني متبلدة الاحساس .. مدري وش الغيرة الي يبيني اسويها .. المهم مرت الايام والسنين واشوف زوجي بدا يسوء ويخربها كثير .. لدرجة اذا صار فيه فنانه او مطربه بالتلفزيون يبدا يتغزل بمفاتنها ويوصف مفاتنها .. واحيانا اذا صرنا نسولف فجأه يقول اااخ وينك يا فلانه اسم فنانة او وحده من صاحباتي مسك اسمها من سواليفي مع العلم اني اثق بزوجي واعرف انه مو راعي بنات ومكالمات واثقه فيه جدا عن عشره عشتها معه سبق وفتشت اغراضه وجواله ولاب توبه والحمدلله ماعنده هالحركات واصلا زوجي خواف ويخاف على نفسه وسمعته الزبده واثقه فيه .. المهم نرجع لموضوعنا .. وغالبا اذا شفته جالس على جواله اقوله وش تسوي يقول اسولف مع حبيبتي .. واذا صار بيننا سوء فهم مثل اي زوجين قال وينك يا فلانه (طبعا اسم بنت ايا كانت) تجين تشوفين الي صاير .. اشوفه صار يزودها مع خيالاته وبديت اتضايق واقول ليه ماتحترمني عيب عليك بلا قلة ادب وهو يقول امزح عشان تغارين علي وصرت الحين اكبر المواضيع اذا مرت اي حرمه اقول لا تطالع اغار عليك صرت انتبه على اشياء تافهه عشان اشبع غيرته لكن مانتهت المشكله صار يمدح مفاتن النساء بكثرة واذا زعلت يقول امزح بشوف غيرتك وحنا جالسين بالصاله ومقفلين التلفزيون مافيه مجال اني اغار ومرات اذا صار بيننا سوء فهم يقول وينك يازوجتي الثانيه تشوفين حالي .. صرت ازعل واعصب ويعتذر يقول امزح بس ابيك تغارين لكن المصيبه العظمى مره كان يبيني لاجل علاقة زوجية وكنت تعبانه جدا ومصدعه حيل واعتذرت له وتمنيت انه يتعذر لي لكن المصيبه قال لي خلاص روحي نامي خليني اتخيل العلاقة الزوجيه مع زوجتي الثانيه ..
انا هنا وصلت حدي لهادرجه وصلت فيه الاستهتار وقلة الادب وعدم الاحترام انه يسوي كذا طبعا زعلت زعل كبير ورحت بيت اهلي وما ارد على مكالماته طبعا اهلي مايدرون عن المشكله لين هديت واتصل يراضيني ويحلف انه مزح ومارح يعيدها واني انا حساسه واكبر المواضيع وكل هذا انه يستمتع يشوف غيرتي ورضيت ورجعت للبيت لكن المشكله انه بين كل فتره وفتره لازم يقلل ادبه ومايحترمني ويسوي من هالاشياء الي قلتها لكم .. للمعلومية رجلي يغار ويتضايق اذا كلمت رجال سواء بسوق او لاي غرض مره قلت بردها له وسويت مثله وقمت اتغزل بواحد من خيالي طلعت له اسم وعصب وزعل قلت شفت هالي حسيت فيه نفس احساسي كل يوم بس كان رده البايخ انا امزح معك من باب الضحك وانتي تقولينها صادقه عاجبك احد ماقلتي هالاسم الي فيه احد عاجبك استحقرت رده واستحقرت نفسي وصرت اسكت حتى ماتكبر المشاكل وللحين اعاني من مشكلة الخيالات النسائية من باب انه يبيني اغار لانه يستمتع بغيرتي ومدري وش اسوي صراحه مليت منه مره بديت اكره زوجي وامل من الجلسه معه واذا جاء ادور اي حجه عشان اقوم ولا اسمع مزحه البايخ واذا جاء البيت يتكدر يومي لانه عارفه ورا هالجلسه الحلوه او الطلعه الرومنسيه او السفريه الجميله بيكون فيه تجريج وعدم احترام بسبب انه يبي يشوف غيرتي ..
هالحدث الي يسويه زوجي طبيعي لو وحده من المتزوجات سوى زوجها كذا ايش التصرف الي بتسويه .؟
طبعا انتم قريتوا ايجابيات زوجي هذا الي مخليني ما اكبر المشكله وارضى بسرعه .

اسفه على الاطاله ورأيكم جزاكم الله خير ,