السلام عليكم
انا انسان متزوج حديثا 7 اشهر تقريبا
عمري 27 وزوجتي 22
علاقتي مع زوجتي جداا ممتازه
لامشاكل ولا هموم بيننا
حمدت الله ان الله رزقني بزوجه كهذه اخلاقها وجمالها وطبخها ماينقصها شي والكامل سبحانه لكن فيه اشياء مخبيها لي الزمن
حسيت بشي من ثاني اسبوع ان زوجتي تخوني مع شخص(اللي حسيته ولاحظته مثل ..يجيها رقم غريب ودخلته بالنمبر بوك وطلع اسم شخص تتابعه بالتويتر وتعمل ريتويت للي يكتبه تقريبا اخر مره عملت له ريتويت قبل زواجي ـ او اراسالها من رقمي الثاني حق العمل وهي ماتعرفه ع الواتس تقول لي انت فلان تقصد اللي تتابعه بالتويتر ـ ومره سالتها قلت لو جانا ولد ابسميه انا ولو بنت انتي سميها قالت لا اذا ولد انا وقالت ابسميه فلان اللي تتابعه بالتويتر _ والشي اللي عجزت اتحمله انو جتني متابعه بالتويتر من نفس الشخص اللي يراسلها ذا الشي اللي خلاني اوسوس انو هي قايله له عني وعن اسمي وانو مازالت تحبه لان كيف عرف اسمي)
وبعد مالاحظت ذا الاشياء قلت لازم اواجهها باللي لاحظته
وواجهت زوجتي وقلت لها عن الاشياء اللي مالاحظها عليها وعلمتها بكل اللي ملاحظه عليها لما قلت لها انكرت كل شي وبعد ما حلفتها وعطيتها الميثاق انو ماراح اضرك وراح اساعدك بس علميني انا قلت ذا اعتقدت اللي بينها فقط حب ماتوقعت ابتزاز بعد ما سمعت ذا الكلام مني انهارت ولم تتمالك نفسها
واعترفت لي بكل شي الاعتراف انو لها علاقه سابقه مع شخص وارسلت له صورها وجهها والصدر واشياء استحي ان اقولها
بعدها جاء نصيبها بالزواج وبتتوب وقالت للشخص اللي تكلمه انها بتتوب عشان انها بتتزوج اهو مارضى قال والحب اللي بينا قالت خلاص اهلي بيزوجوني علما انو صعب تتزوجه لان اهي سعوديه وهو مو من السعوديه وغير فارق العمر قال لها اذا تركتيني راح انشر صورك تزوجت وهي ع علاقه ع خفيف معه ولازالت معه حتى وهي في بيتي عشان ماينشر صورها.

بعد ماقالت لي الاعتراف حاولت بي بشتى الطرق انو انسى كل شي واسامحها لان كانت تقول انت تبي بنت نظيفه ومالها ماضي لكن تفاجأـ بي وتقول ترا مسامحتك لو تسالني او تشك بي تقول من حقك لكن لاتتطلقني قلت لها مستحيل نعيش وفيه شي انفقد الثقه كيف بترجع وقلت لها اطلبي كل شي ماعدا جلوسك ببيتي .
بعد ماسمعت اعترافها اقسم بالله ياكرهتها وعفتها بعد ما كنت اشتاق لها اه بس الله لايسامح الممبتز وجعل حياته كلها عذاب وهم وغم وجعله يعيش حياه مظلمه وحيااه بائسه وجعله لجميع امراض الدنيا وجعل يشتاق للموت ولا يقدر من الامراض اللي فيه وجعله يمر بجميع مستشفيات العالم ولايحصل العلاج فرق بيني وبين من شفت فيها سعادتي وانسي لابارك الله فيه ولا من كان السبب وبكل دعوه ادعي عليه انه يشوف هموم الدنيا امام عينه واتمنى يموت بالسرطااااااان اللي يهتك بجميع اجزاء جسده
هذا الاعتراف اللي قالته لي وماحبيت اعرف اكثر لان بعد ماعرفت تمالكت نفسي طلعت برا البيت وقفلت جوالي عشان ما ارتكب بذا المسكينه ذنب ولجات الى الله
وبعد ماهدت نفسي رجعت لها وانا ناوي ع شي واحد خاصه انو مابيننا اولاد وهو الطلاق

لكن قبل الانفصال حبيت اعرف منها اشياء سالتها كم من سؤال واستحلفتها بالله تجاوب بصراحه بدون خوف
.حبيتيه من قلب اولا ؟قالت ايه حب صبياني يعني مو ذاك الحب
.وسالتها مقصر بشي معك ؟قالت لا
.واستحلفتها بالله تكلمتي معه بامور الجنس؟قالت ايه .
.وسالتها من دلتك عليه قالت بنت عمي لابارك الله فيها ولا في الكلب.
وسالتها اطلبي مني شي واحد غير انو تبقي معي قالت تستر علي .
وحلفت لها انو ماحد راح يعرف سبب الانفصال الا انا ونتي ولازم واحد من اهلك يعرف قالت لا قلت ماراح يتركوني قالت خلاص ابقول لاخوي الكبير وانا قلت لاهلي انو سبب الانفصال مالي نفس فيها وشي احتفظ فيه لنفسي حاولوا بي لكن ماعرفوا الشي الاكيد شاكين انو سبب الانفصال ذنب كبير من زوجتي

هذي قصتي باختصار علما انو فيه اشياء كثيرررره بس حبيت اعطيكم المختصر
اللي مضيقني انو اانا خربت عليها حياتها زود لان ما حد متقدم لها الا شخص كبير بالسن اوانسان معدد او انسان مطلق احس انو انا مذنب
حياتي من بعدها احس اظلمت وما احس بلذة الحياه علما اني انسان مؤمن بالله ولاني راعي سفريات ولا استراحات ولله الحمد اموري الماديه فوق الممتاز لكن مع ذالك مازلت احس بهم والضيق
انتهئ...

و ليه ما ترجعها و تفتحوا صفحة جديدة ؟
بعد ما تستخير ..

اتوقع الطلاق خلاص خلاها تتوب و تتعلم

بعدين انت وعدتها و هي كانت صريحة و واضحة

والثقه كيف بترجع. هي ما علمتني برضاها انا اللي كشفتها ....لو هي اللي قالت لي صح ممكن اقول تابت صدددق

السلام عليكم أخي

انت قلت انو الثقة انفقدت ما بينكم
لانها هي خدعتك لظروف حطت راسها فيها بنفسها
يعني الوحدة ما يصير لها تبعث صورها او تتحدث مع أغراب في الامور الخاصة
الله يغفر لها و يعوضها خير

المهم انت حاولت تطلعها من حياتك فانساها اذن

الارزاق بيد الله و انت مو ذنبك مين اجاها هذا بيتشمى النصيب
و الله كريم
فانت ادعي معاها الله يستر عليها و يرقها من واسع رزقه

جزاك الله خير يا اخي

ليه طلقتها هي تابت
والرجل حقير والمراه ترى ضعيفه
رجعها وافتحو صفحه جديده
والمبتز ماعنده الا الكلام
وساعدها تتخلص منه
الموضوع ادري صعب بس استعجلت بطلاقها

هي لو بادرت وقالت لي انو فيه واحد يبتزها ممكن راح اسامحها لكن انا اللي قلت لها ملاحظاتي عليها وانكرت وبعدين قالت كل شي

وساعدتها باشياء مثل خليتها تحذف جميع حساباتها بالتويتر ،الانستغرام, الفيسبوك.الواتس اب .غير رقمها وطلعت لها رقم جديد كل ذا عشاان مايرجع لها

وعليك السلام ورحمة الله وبركاته

1- اسأل الله أن يعينك ويعينها ويخفف مصابكما

2- راح أكلمك كلام عقلاني ومنطقي بعيداً عن حالتك النفسية المتأثرة حالياً وهو : على إفتراض أن الرجل قام بنشر الصور مهما كانت سيئة وخليعة... نحن ندرك الآن أننا في زمن التقنية والفوتوشوب... فهناك إحتمالين... الأول أن يرى الصور أحد يعرفها.. فيمكن عندها الإنكار وأن الصور لاتخصها وربما تشابه أو مركبه خصوصاً بعد فترة ومع تقدم العمر ستختلف ملامح الوجه .... الثاني أن لايراها أحد يعرفها وسيضيع البحث عن الصور مع مرور الزمن.

الإحتمال الثاني أنه لن ينشر الصور وذلك بسبب دعائكم بالستر ... فالله سبحانه وتعالى قادر على كل شئ

3- زوجتك لاشك أنها ضحية التقنية الحديثة الآن والتي أطاحت بكثير من الفتيات في براثن برامج التواصل وغيرها... وقد تكون الفتاة طيبة وضعيفة تقع مع من يلعب على عواطفها وأنوثتها... ولكن هذا لا يعني أن الفتاة سيئة وغير جيدة .

4- لاألومك في مشاعرك وعدم تقبلك للأمر... ولكن حاول أن تخرج من دائرة الصدمة وتفكر بهدوء.

5- تأكد أن الله سبحانه وتعالى لن يضيعكما... فكلاكما ستكون له حياة... إن لم يقدر الله أن تعودا لبعض... فقدر الله ماض

6- حاول أن لاتقيس حجم مشكلتك على المقياس المتعارف عليه من الفكر الإجتماعي مقدماً ... ولكن قيس من خلال حكم الشرع وسماحته بالمقام الأول وبمقياس رغبتك الشخصية بالمقام الثاني... ثم بالفكر الإجتماعي المتعارف إذا كان مما يسبب لك الضرر.


أعانك الله

جزاك الله خير وكلامك ريحني كثييير وكنت مفكر بالنقطه الثانيه من كلامك لان ممكن لو نشر صورتها محد عارفها او تغير شكلها لكن عجززت استحمممل

هي غلطت واعترفت بغلطها وندمت وانت اعطيتها الثقه لازم تكون قدها وتخلصها من الذي مازال يبتزها بدل ما تطلقها وتخليها تحت رحمته ويمكن يتجاوز ويستغل. صورها في أشياء ثانيه الله يسامحك انت ساعدت المبتزعلى مبتغاه بتطليقها وتركها له وفتح المجال له بااكمال ابتزازه هي غلطت وندمت والله يسامح ويغفر وانت لاتسامح أتق الله وساعدها ورجعها انت زوجها لولا أنها ماوثقت فيك وتبغى هي تتخلص من المبتزماكان اعترفت لك هي تبغى تتخلص منه وانت تخلصت منها وتركتها له ليعمل مايحلوله فيها وكثير بنات وشباب يغلطوا وهذا يكون في لحظة ضعف وهذا استغلها بتهديدها بصورها استرعليهايسترالله عليك دنيا وآخره