السلام عليكم ورحمة الله وبركاته

ما اعرف ايش اكتب .. بس ابغى أفضفض واطلع الي في قلبي ...
وابغى أحد يرد علي .. ومر بمثل تجربتي ..

انا مطلقه وعندي بنتين .. تطلقت من سنتين ... يعني من عمر بنتي الصغيرة ..
اليوم جاء طليقي وزوجته وابنته الجديده ... واخذو بناتي للزياره ..

اليوم اول مره بناتي الثنتين يروحو معاه عادة بس الكبيرة ...

احس اني مخنوقة .. وفيني ضيم .. وحسيت بوحدة .. صعب اوصف الي احس فيه ..

سبب طلبي الطلاق لان طليقي كان يرميني عند اهلي بالشهور .. ويزعل فيها لاشياء تافهه .. لدرجة اهله يستحون من الكلام الي يقوله .. مثلا علبة الهيل مو مسكرة زين ... واشياء كثير ..
المره الاولى الي تطلقت فيها كنت بالنفاس .. طلقني بدون سبب .. انفجعت من رسالته ... وكيف وايش صار .. وليه .. ما ادري .. ترجيته .. وذليت نفسي له .. وانا بس في بالي البنت الي بيدي .. كيف بتعيش بدون ابوها .. من بداية حياتها .. تو عمرها .. كم يوم ...
رجعت .. ورماني مره ثانية بعد ثماني شهور عند اهلي ... وبدون سبب .. ينزلني زياره ... ويغيب ..
ضليت 3 شهور .. بعدا رجعت له على امل احاول اكثر أرضيه .. وفعلا .. صار تقريبا ما يلاقى علي اي ملاحظه .. لكن الأمان بقلبي ما عاد له وجود ...
والبيت الي ساكنه فيه مالي اي ارتباط فيه .. عشت حاسه أني بطلع منه ..
خلال هالوقت .. احنا حياتنا هادئة .. ما نتخانق .. ولا بينا مشاكل كبيرة .. لكن بنفس الوقت كل واحد بقلبه اشياء ومشاعر مخبيها عن الثاني . ..
حملت بعدها ببنتي الثانية ...
كنت اعيش بغربة .. بعيد عن أهلي .. وتقريبا بوسط صحراء ووحام .. ومريضه اربعة شهور .. كان ياكل برا .. وكأنه كايش لحاله .. ما كان واقف جنبي .. وكانت نظراته كلها لوم .. بالرغم من مرضي وضعفي .. الي ما كنت اقدر اتحكم فيه .. شي بداخلي .. قالي اني لازم اوقف على رجولي .. وأعيش مستقله .. وأكون قوية .. عشان لو رماني المره الجاية .. ما اكون ضعيفة .. وأنهار ..
سجلت درسات عليا .. وأختبرت أمتحانات القبول .. وانقبلت بالجامعة ..
اصر اني ما ادراس .. ولا اشتغل .. بالرغم من شروطي بعقد الزواج ..
وأنا حاولت أقنعه بكل الطرق ... لكن دون جدوى ..
عشت شهر ونص هجرني فيها بسبب رغبتي بالدرسة ..
وقتها كنا مثل الغريبين في البيت .. نا كل على سفره وحده بدون ولا كلمة
وننام على نفس السرير بدون اي كلمة ..
اراسله ولا يرد علي .. ولما اكلمه يرد علي بكل برود .. وعدم إكتراث ..
عمري ما بكيت قدام أحد .. وقتها بكيت .. بسبب كلامه ..
أتذكر مره قلت تعال بكلمك بموضوعنا ..
عاجبك وضعنا .. قالي بكل برود وبأبتسامه .. عاجبني ومرتاح
ما هميته
ولا همه حزني
ولا همه الي كنت أحس فيه
ولا همه بناته
تعبت وتعبت وتعبت .. طلبت ازور اهلي نرتاح شوي من هالوضع سافرنا ..
وتركني عند أهلي .. وكانت هاذي المره الأخيره ..
تركني ست شهور
بدون حتى ما يشوف بناته .. بعدها طلبت الطلاق .. لانه كان يدور له على عروس
وأنا كنت الاسبير .. او زي ما يقولو أحتياط ..
تزوج على طول بعد طلاقي بفتره بسيطه ..
انعدمت الثقه فيه للأبد ..
صور عرسه .. وشهر العرس كان تنحط على الواتس ..
حروف اسم زوجته .. وعبارات الحب .. كلها على الواتس..
هنا اصريت .. على الطللاق وطلبت الصك ..
وصدمتي بالصك .. طلاقي .. كان بنفس الوقت الي نزلني فيه عند أهلي ..

والحين .. ما اعاد اثق بأحد .. حتى بنفسي ..
كل شي أنهار بحياتي .. مع أني عند أهلي وعندي اخت حاسه فيني .. بس ما اقدر ابين لها ضعفي ..
أشتغلت .. بس اعاني لأني تحت ضغط كبير.. التربية .. والنفقات والمصاريف ..
أحمد الله كثير واعرف اني بنعمه ..
واعرف اني حاولت مع هذا الرجل .. قد ما اقدر .. ودست على نفسي كثير عشان اصلح وضعنا ..
لكني من داخي أعيش كأبة ... وحزن عميق ما يعرف فيه غير الله ..
ما اعرف ايش ابغى .. بس ابغى ارتاح ..
من زمان ما ارتحت .. وحطيت راسي بدون هموم ..

لا اله الا انت سبحانك أني كنت من الظالمين .

الله يعينك حبيبتي الله يصبرك ويصبرنا صدقي اذا انت مظلومه غير ربنا ياخد حقك لان الله عادل
ان الله يمهل ولا يهمل
وانا طليقي خطب وحط صورته على الفيس عشان يقهرني بس عندي يقين بالله انه راح ينصرني ان شاء الله لاني مظلومه
مو شطاره ان الرجل يستقوى على المرأه ويظلمها
تقريبا انا نفسك كان يتركني عند اهلي بالاسابيع والشهور من غير سبب مقنع
الله يعوضك ويعوضني خير قريبا وعاجلا يارب

__________________
رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ
لا إله إلا أنت سبحانك إني كنت من الظالمين
اللهم اكفني بحلالك عن حرامك وأغنني بفضلك عمن سواك

جزاك الله خير ..

مو لاقيه له عذر .. بكل الي سواه
وما اقدر استوعب كيف يأذيني .. وانا عمري ما اذيته حتى بكلمه من وراه ..

ربي يفرج همك اختي وينصرك على من ظلمك

اختي رددي <حسبي الله ونعم الوكيل > لها تاثير على النفس كثير وراحه عجيبه

وكلي امرك لله وهو حسيبك

عيشي حياتك لا تخلي اللي صار يأثر على دراستك ومستقبلك ووظيفتك

ربي يخلي لك بناتك ويعوضك على صبرك

جزاك الله خيرا يا.... خجل
أحاول ..وبظل أحاول ..
بس انا تعبانه .. ما ادري اذا هذا طبيعي ..ولا ..لا
مرت سنتين .. وكل شي يذكرني بطليقي الى الان ..
أحيانا احمد الله اني مظلومه .. بطلاقي ..
والحقيقة أنا ما عرفت ضعفي وحاجتي لله .. الا بعد ما تطلقت..
قبل طلاقي قويت علاقتي بالله وكلت امري له واستخرت كثير..
وبعد الطلاق ما زلت .. اتذبذب في الاجتهاد بالتقرب من الله ..
أعرف أن هو الوحيد الي يفرج كربتي وهمي ..
وأخجل لما اقلل من العبادات . .. مع معرفتي بالاشياء الي انعم الله فيها علي ..
اللهم لك الحمد اللهم لك الحمد ..
لكن هذا الحزن بيخيم على قلبي طول حياتي .. وما اضن بينشال حتى لو اصيب طليقي بمثل ما ابتلاني به ..
مع كل ما انعم الله علي .... أحس اني فقدت حياتي ...

ما ادري ايش فيني يارب اغفر لي ..

المؤمن القوي وخير وأحب عند الله من المؤمن الضعيف.. كوني قوية وصديقة لنفسك لا عدوة لها تبقين حبيسة ماض انتهى من عامين.. ارحمي نفسك ارحميها.. واطلبي الله العوض لك ولبناتك واكثري من الدعاء والاستغفار..

تعبت .. انا وصلت لمرحله ما اقدر اصدق نفسي لما اقول
.. بكره بيكون أحسن .. لان الدنيا مليئة بالابتلاءات والاحزان والهموم ..
طلاقي ما كان اوول الاحزان ولا بيكون اخرها ...
ملامح وجهي تغيرت.. من الحزن .. وكل شي حولي مؤلم ..
ليتنى اقدر اقول كانت تجربة وانتهت
ليتني اقدر احس بالنعمه الي الله فضلني على كثير من الناس واعطاني اياها .. والله خايفه الله يغضب علي ..
...
الله يجزاكم كل خير ويفرج عنكم همومكم ..

فإن مع العسر يسرا،،إن مع العسر يسرا....لاتخافين حبيبتي الايام الجايه بتكون افضل واجمل باذن الله اللي يصبر لازم ينول ..الحمدلله درستي وان شاءالله انك موظفه او تتوظفين قريب ويرزقك الله بالزوج الصالح اللي ينسيك همك،،فوضي امرك لله

جزاك الله خير اختي زهرة الجاردينيا

ياقلبي انسي وطنشي وعيشي حياتك ،، لا تهتمي بأخباره وامسحي رقمه من جوالك ولا تحاولي تتابعيه في الواتس وغيره ،، حبي نفسك واشغلي ببناتك وعملك ودراستك وحياتك ،، ترى الحياة لا تتوقف عشان رجل