السلام عليكم و رحمة الله

كل عام و انتم بخير و أعاد الله رمضان علينا أعوام مديده.

أخواني بصراحة انا ما ادري شنو ابغى المهم راح أتكلم عن زوجتي و لبغى تقولون لي رايكم اذا هي مقصرة او لا ؟

الأشياء اللي اتمناها من زوجتي هي التالي:

-اولاً البيت يكون نظيف و مراتب "تنظفي عادي جداً مو ضروري كل شي يلمع"
-ثانياً لما ارجع من الدوام تكون مبتسمة تضحك و تسولف علي تنسيني تعب الدوام.
-ثالثاً أحصل اكل يفتح النفس و أكل.
-أذا جاني ضيوف أو أهلي تقوم بالواجب.

بالمقابل:
-أعاملها بكل حب و أحترام ابداً ما ارفع صوتي عليها
-أعطيها مصروف كافي جداً بس بدون بذخ كبير حالتي متوسطة
-اسافر معاها كل سنة للخارج "أنا بطبعي أحب السفر"
-أطلع معها تمشيات على الأقل ثلاث مرات بالاسبوع.
-أخليها تروح لأهلها كثير "أهلها بمدينة أخرى 5 ساعات تقريباً" مع ذالك هي شهرياُ تروح لهم يومين و بالجازات الصيفية تجلس أسبوعين ماعندي مانع.
-أهلي حطينها فوق راسهم و هي بالمقابل تحترمهم.


هل أنا عادل معاها ؟



المشكلة كالتالي:

أجي مرات للبيت أحصل وجهها معفوس كأنها متضايقة من شي. طبعاً اسلها تقول لا مافيني شي ؟ و هو فعلاً بدون سبب ! و طبعاً بدون ابتسامه و يصير البيت ملل و هي ساكته لازم انا اللي أتكلم و فعلاً ابدا افتح المواضيع و هي جالسه تسمع و طبعاً بعدها اسكت خلاص هي ما تناقش او تسال علشان اكمل كلام. و أذا تابعت التلفزيون او مسكت جوالي تتضايق و مرات تعاتبني انه ليش ماسك جوالك و انا جالسه او او او

أجي مرات أحصلها ما طبخت و العذر والله تعبانه !!! مرة او مرتين بالاسبوع عادي عندي ؟ بس تقريباً 3 أو اربع مرات بالاسبوع!!

أجي و أحصل البيت معفوس محيوس ؟ صح ما وصل درجة الوساخه لكن غير مرتب ابداً
المطبخ و ما ادراك ما المطبخ !!! الأيام اللي تطبخ فيها مستحيل تنظف المطبخ بفس اليوم الصحون و الاكل يجلس الى اليوم الثاني و أنواع الوساخة !!!

يعني يوم تطبخ فيه و يوم تنظف المطبخ نادراً تسوي هالاثنين مع بعض !!!
طبخها مقبول بس ما يوصل لدرجة انه فعلاً حلو ويفتح النفس بالعكس يوم الملح زايد و يوم ناقص و يوم الزيت كثير و و و و فيه أيام يكون الاكل حلو!!!

ترتيب غرفة النوم و غسيل الملابس كلها فيها اهمال !!!


ليش انا ساكت و متحمل الى اليوم و ابداً ما قلت لها اني متضايق منها ؟

الصباح أول ما تصحى من النوم تضبط كل شي ملابسي و فطوري و قهوتي و بعدين تصحيني وهذه الشي الوحيد اللي يخليني أظن لحد الان أنها مهتمه أو تحاول بس بعد ما اطلع للدوام و ارجع ما ادري شنو يصير فيها !!!

أحسها مسكينه و ضعيفة ما احد يهتم فيها و لا عندها أصدقاء ومعتمدة علي وعلشان كذا ارحمها جداً و اسكت و اتغاضى عن اخطاها و أقول أن شاء الله تتحسن.

الظاهر لي وأيضاً حسب ما تقول أنها تحبني جداً جداً !!!

هي ما ادري كسولة و فيها خمول او أن جسمها ضعيفة دايماً تعبانه و تبغى تنسدح و تنام ؟
و هذا هو اللي مسبب كل مشاكلنا اللي فوق كسلها او ضعفها !! أو أنها تتدلع و تبغى تعودني على هذا الوضع ؟ يعني مثل سوالف الحريم اللي نسمع عنها !!!

عندها ضعف إرادة عجيب ما تحب تحاول ابداً اذا حاولت تسوي شي و ما عرفت خلاص انا فاشله انا غبية انا انا و جلد بنفسها و يخرب مزاجها و انا اللي ادفع الثمن !!!
تعتني بنفسها بنفسها و بجسمها بس مو مرة يعني نص و نص و بعد هذا من كسلها !!! تشتري زيوت و كريمات و لا تستخدمها يعني الله يستر بعد كم سنة و بعد الولادة ووو

صح عندها دوام بالجامعة بس عندها وقت كبير تنام و ترتاح و بعدين تشتغل.... و ايضاً حتى ايام العطلة نفس الكسل و الخمول ووو

و الأيام اللي تسوي كل شي فيه أيام قليلة جداً جداً أوصل للبيت احصلها خلاص تعبانه و يبين على وجهها و تصير معصبه و متضايقة و وقتها اكره التنظيف و الطبخ لاني احسها تصير بدون نفس !!!

مرة وحدة فقط عتبتها عتاب بسيط جداً عن تنظيف البيت ؟ تحمست يومين و تنظف ووو بس بالغت جداً بالتنظيف و النتيجة يومين و تعبت و رجعت لعادتها القديمة و السبب هو ضعف جسمها او كسلها و ضعف ارادتها....

مع اني كثير جداً اساعدها بشغل البيت....



الان لنا سنة متزوجين و هي لها شهرين حامل و الإهمال بعد الحمل زاد و مرات صرت انا اللي انظف البيت كامل خصوصاً اذا كان فيه ضيوف بالطريق !!!!




صراحة انا صبري بداء ينفذ و خلاص انا كل يوم اتعوذ من ابليس و اتحمل و أقول ان شاء الله تتعدل بس مع الأسف صبري خلاص انتهى و أسأل نفسي الأسئلة هذه ؟

1-لو كنت شاد عليها و هواش على الطالعة و النازلة كان تتمنى يوم تشوفني راضي عليها و تسوي كل شي ابغاه !!

2- ليش كل خواتها مهتمين ببيوتهم و في ازاجهم كثير و انا اعرف ازاجهم كل واحد اسوى من الثاني و ما عندهم دلع ابداً !!! و بالمقابل انا عايش كذا ؟

و صراحة انا جالس اتعب كثير و ضغوط علي كثير خلاص تعبت و بحاول قدر الإمكان أنتظر الى ينتهي الحمل و بعدها اغير كل شي انقلب لو يخرب كل شي في حياتي !!!

عطوني رايكم يا ناس هذا و حنا تونا عرسان الوضع كذا كيف مع الاطفال بعدين !!!

نوروني عطوني اراكم وجهوني طبعاً مستحيل اخلي احد من اقاربي يطلع على مشاكل بيتي ما عندي الا الله ثم انتم ؟

توضيح بيت اهلها و جميع خواتها قمة بالنظافة و الترتيب و كل شي تمام ؟؟

يعني العيب مو من اهلها ممكن لانها دايم كذا تسوي نفسها تعبانه و كذا خواتها كان يشيلون عنها الشغل و الطبخ و الظاهر تعودة على كذا ؟ و صارت معتمدة عليهم بكل شي؟

هذا واحد من التفسيرات اللي عندي!!

كنت أحلم بعائلة و بيت مليان حب و احترام و كل شخص قائم بواجبه على اكمل وجه و تضحيات ووو

و الظاهر انها كلها احلام و الواقع مع اللي مثل زوجتي لازم حزم و قلة احترام !!!

ألحين شدخل الحب والاحترام في اهمال برأيي بسيط من وصفك ..؟

ايش عرفك بأخواتها انهم قمة بالنظافة والترتيب وكل شي تمام ؟!

__________________

الحل موجود ما دام أهلها نظيفين ومرتبين
انصحك تتصل على أمها وخليها تجي فجاة تشوف البيت
اكيد ما رح ترضى عن اهمال بنتها ببيتها
وكل الكلام الي قلته هنا يا ريت تقوله لامها علشان تنبهها
واضح زوجتك من النوع الاتكالي وتحتاج انك تنبهها باستمرار
الله يصلح احوالكم

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

رمضان كريم
_ اشوف المنتدى هذا اليومين كثرت مواضيع اهمال الزوجه في بيتها ونظافتها ووووو طيب يأخوان انتو عرفتو السبب ايش ممكن يكون قبل ماتجي تشتكي ؟!
_ عملت لها تحاليل شامله عرفت سبب الكسل والخمول من وين جاي ؟'
يمكن عندها نقص بالفيتامينات وخاصه فيتامين D >> اذا نقص هذا الفيتامين يسبب كسل وتعب وخمول بالجسم وعصبيه
_ وكمان تقول انها حامل >> لازم تراعيها الحمل متعب جداً وتحتاج تنام وترتاح انت راعيها بهذه الفتره وحرام تضغط عليها
باين من كلامك هي انسانه واعيه وفاهمه وخاصه تصحيك الصباح بروح حلوه وتجهز فطورك
وكسلها هذه الايام اسبابه من الحمل هي فتره وتعدي
والله يقومها بالسلامه

__________________

مشكلتي من اول يوم زواج لمدة 10 اشهر كاملة بعدها صار الحمل

لو التغير صار بعد الحمل كان حطيتها فوق راسي !!!

موضوع صادف انه فيه كم موضوع بنفس المشكلة بس انا مشكلتي مو بس بالنظافة لا حتى طفشها و مللها الدائم ووو و بالمقابل انا ما قصرت و لا بأي شي أبداً أبداً و الله العالم،،،

هلا و غلا يا I'm over it كل عام و انت بخير

اولا معك كل الحق في شكوتك لكن لا تنسى انتم عرسان و الزوجة تحتاج الى وقت كافي

عشان تتأقلم مع حياتها الزوجية

ثانيا انت لا بد عليك ان تصبر عليها هي عندها رغبة لكن ينقصها الاراده

ثاثا شجعها اذا شفت منه شي يعجبك شجعها بكلمة حلو و بهدية عشان يكون لها محفز

الله يسخر لك زوجتك و يهديها لك و يسعدك فيها

طيب مافكرت في الخادمة ؟؟
اذا ظروفك الماديه تسمح
خاصة هيا دحين حاااامل وتعبانة
وبعد الولادة حتنشغل بالطفل اكثر واكثر

__________________
الناس يمحون ماضيك الجميل مقابل آخر موقف سيء منك ، و الله سبحانه يمحو ماضيك السيء مقابل توبة منك ، فأيهم أحق بطلب الرضى ؟