السلام عليكم ورحمة الله وبركاته
هذي اول مشاركة لي في المنتدى الطيب مع اني كنت من متابعيه كثيرا قبل الزواج وبعد الزواج ..
واليوم قررت ان اكتب لكم مشكلتي ..ربما البعض يراها عادية لكن ابحث لها عن حل لانها ستردي بي الى الهلاك وبعلاقتي الزوجية .

تزوجت زواجا تقليديا ..رأيت زوجي في النظرة الشرعية اعجب بها وبعدها تمت الخطوبة ..والملكة تخللتها زيارات ..يوم الملكة كحال كل المخطوبات تزينت وكنت بأبهى حلة وكحال البنات انتظر مغازلة زوجي لي ..
جلسنا 3 ساعات مع بعض ولم يقل لي اي كلمة اطلاقا ..
فقط يحاول الاقتراب ومنعته ..
وتكررت الزيارات وتكرر الصمت ..
وكنت بين الفينة والاخرى ازعل ..وكنت لا ارد على اتصالاته واهمله ولكن جوابه اني لا اعرف ان اعبر ..
تزوجنا ..انتظرت الكلام المعسول ..اي كلام حتى شكلج مجنني او ابهرتيني او اي كلام ..لم يصدر منه اي كلمة ..وحتى عندما حاول الاقتراب بكيت بكاء وجاتني حاله وانقطع نفسي من القهر ..

ما قدرت احبه لانه ما حببني في نفسه ..الاسبوع الاول كنت دايم ابكي وازعل واهو يراضيني ويعصب من نفسه ..
حاولت اتقبه واخبره باللي يزعجني .. وبحكم دوامتنا ما نتلاقي كثير المفروض بس يسولف عن كل شيء الا عنا وعن حبنا..

قبل لا ايي كل يوم اتزين له ولا مره حط تعليق او قالي كلام جميل ويطب خاطري ..صارحته وقلتله ما احب هالاسلوب ابيه يتغير يقولي ان شاء الله

اشتقت لج الكلمة الوحيدة ..احسها عادية جدا وتزعلني وقلتله انه اي حد يقدر يقولي هالكلمة اخواني اهلي ابي شيء منك خاص ... ولا درى عني


احسه قتل انوثتي ..قتل دلعي ... كنت اتجمل كثير بس تو عادي اذا تروقت لنفسي..ما يهمه البسله او لا ..
كنت اشتري ملابس نوم غاليه ورخيص واشكال والوان وعادي معه .. اي شيء اسويه عادي ..ويوم سالته قال انتي حلوة واشوفج حلوة باي شيء ..بس استغرب الرياييل يهمهم المظهر بس هوه عادي لو ريحتي بصل ..


اهملت نفسي كثييير وعادي معه ..ومرات ابكي واعصب عليه بدون سبب .. خاطري اسمع كلام حلو ..خاطري يدلعني بالكلام والرومانسيه ..


يقولي احبج وما اقدر استغني عنج بس انا احسني ما احبه اخاف في يوم احد يسمعني كلام وانجرف ..
هوه طيب وحنون ويحبني ..بس ابي احس اني انثى ابي احس اني ابهره واني احلا من شافت عيونه وانه متولع فيني


ارجوكم ابي حل لا تستهينوا بمشكلتي لاني يا اتركه يا اسمع كلام من غيره .. وانا ما ودي يجيني بس هالاحساس ابي اكمل طريقي باللي يرضي ربي .

يا عزيزتي

الرجال ليسوا سواء ... هناك من لا يحسن التعبير فعلاً.

يكفي أنكِ تدركين أنه يحبكِ .. فاتركي له اختيار أسلوب التعبير الذي يناسبه .. ولا تضغطي عليه لأن الكلام اللي ما يطلع من الخاطر ماله طعم.


وبصراحة يُحسَب لزوجكِ أنه هكذا منذ البداية .. غيره يتفنن أيام الملكة ثم يصاب بالخرس العاطفي بعد الزواج.

__________________


اللهم طِيبَ الأثر .. وحُسْنَ الرحيل.

ياليته تفنن ايام الملكة ..اريد اعرف كيف شافني وكيف حبني وكيف وكيف !
كذا تايهه كل شيء بطلبة تعبت جدا ..

مع الاخت مهره

اختي عيشي او تعايشي المجتمع هذا وضعه
زوجك واضح هذا طبعه

صعب تغيرينه حاولتي وبتحاولين لكن فعلا شي زي هذا يا يجي تلقاءي يا ماله طعم بعد طلبه
لانك بتحسين بالتكلف بكل كلمه ( الا ان كنتي تبغينه حتى لو بتكلف ) فهذا شي اخر

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

سبحان الله اختي السائلة تعلمين انه يحبك ومع ذلك لم ترضي لانه لم يعبر عن هذا الشعور
هل تعلمين ان هذه قدرات او سجايا فهناك من يحب ولا يجيد التعبير وهناك من لا يحب ولكنه يجيد التعبير بل يتفنن في ذلك لانه حلو لسان يملك حسن البيان
جعلت هذا مشكلة في زوجك وهي ليست مشكلة لمن وثقت في نفسها وزوجها
واحمدي الله ان احبك بطبيعتك ولم يشترط عليك في زينتك وأناقتك فهناك من يشك في أناقة زوجته وجمالها بل يطعن حتى في انوثتها ،،،،،،،، ان زوجك فطري وبطبيعته كان من باب أولى ان تكوني فرحة بذلك
اما كونك فكرت تركه لهذا السبب فاسمحي لاني ربما يكون من حظ غيرك اما الكلام المعسول من غيرها ربما تجديه ولكن لتعلمي ان المقابل لا يعوض باي ثمن

اختي اقري عن انماط الشخصيات من جد راح ترتاحي وتفهمين طبيعة زوجك ..

اعقتد والله اعلم انتي انسانه جنوبية وزوجك شمااالي الرجال الشمالي زي كده والله راح
تتعبي تدوري كلام حلو تعبيرهم بالافعال ..

زوجك عملي جدا ويشوفك حلوة ويفترض انك المفروض عارفة انك جميلة ومو شرط يصرح لك

أنا حاسة بكل الكلام اللي قلتيه

شعور غريب يمدحوك البعيدين

وزوجك اللي هو شي مهم وتستني منه كلمة، ما يعبر ولا يتكلم !

تقولي ما يهمه حتى لو ريحتك بصل بالضبط زي زوجي

اجي من الدوام ابغى اتتظف له ما يرضى

يقول زي ما انت بريحتك الطبيعية

انا اشوفه شي مقرف وهو يشوفه شي ثاني

حتى عطور يقول لا تحطي أحب ريحتك الطبيعية !
بس اذا حطيت عطر وصار له فترة وامتزج مع ريحة الجسم ينبسط

بس حبيت اقول لك فيه رجال يحبو الوحدة على طبيعتها وسيمبل في كل شي

انت استمري زي ما انت ولا تتغيري

والحمدلله انه يحبك وحنون

وكل مرة تلبسي او تتكشخي قولي له ها ايش رايك ؟

ووقتها حيتكلم ومع الأيام بالتدريج بتشوفي انه تعود وصار من نفسه يعبر بدون ما تسأليه


الله يوفقك

الكلام يولد احساس عالاقل تعرفي جمالج واناقتج لوين ماخذته .. بصراحة كلامج جميل لكن مر سنتين ع الزواج بدون الملكة الى متى ؟؟
مليت اتكشخ له ابي احس انه يلاحظ علي او يهمه اللي اسويه عشانه بس ما ادري

عشان تستوعبي الوضع

عادة أغلب الرجال ما يقدروا يزيفوا حقيقتهم أو يمثلوا طبع مو موجود فيهم

فاحتمال كبير وأنا أقول "احتمال" دام هذه بدايته،
فهو على الأغلب حيبقى كذا طول عمره الين تعجزوا وانتو طيبين وحلوين ، فأحسن لك تأقلمي مع الوضع

المفروض بأفعاله ورغبته فيك يكون وصلك الشعور اللي إنت محتاجة تعرفيه !

لا تطلبي شي منه ما يقدر يتصنعه وشوفي ايجابياته الحلوة وحاولي تضخميها في نظرك

واللي انت بتتكلمي عنه مو مشكلة هذا دلع بنات ;)

الكلام الي تبغيه راح وقته الحين انتم في مرحله الافعال ماراح تلاقين زوج يمدحك كل يوم ابدا اذا قال انتي حلوه فقط وحسيتي بصدقها تكفيك
ومانا شابف انها مشكله طالما انه ماجرحك ولاقصر معك ولاتغتري بكلام الناس وتعكسيه على زوجك اليوم انتي فاضيه وعندك وقت تلتفتي لنفسك ومضهرك بكره عندك اولاد ومسؤليات اجباريا راح تهملي نفسك وقتها زوجك فقط .............. < اكملو لها الفراغ لوسمحتو يااخوان

__________________
تمنيت حبـاً يدوم طويـلاً .. فـدام الحب وَ رحل الحبيب.