بسم الله الرحمن الرحيم
السلام عليكم ورحمة الله وبركاته ..

شاركت في المنتدى وعرضت مشكلتي بعنوان "زواجي سينهار والسبب تدخل أم زوجتي".

وللعلم أن أغلبية أعضاء المنتدى وكل من له علم بمشكلتي خارج المنتدى ومن ضمنهم والدي على يقين بأنني لست على خطأ ..

الحين بعد مرور حوالي 3 شهور و عشرة أيام من يوم ما تركت زوجتي البيت وبعد ما قررت الزواج من أخرى .. كلمني والدي وطلب مني أن أعود وأرجع أحضر زوجتي من بيت أهلها من أجل خاطر بنتي ..

بصراحة أستفزني طلبه وقلت له: أنت عارف بالتفصيل أنه أنا ما غلطت عشان أرجعها وهذي مو بأول مرة تسويها وتخرج من البيت وقراري ما راح أغيره.

ٌقالي: ياولدي والله عارف إنه زوجتك غلطانه ولكن بنتكم مقطعة قلبي وإذا زوجتك غشيمة (غير ناضجة) خلك أنت العاقل وتحملها عشان بنتك.


قلت له: والله لو تستاهل كنت قلتلك من عيوني .. لكن صدقني ما تستاهل أنحملها أكثر من كذا خلاص طفح الكيل .. وبنتي ما راح أتركها والحمد لله ما عندي منها إلا بنت وحدة.


قالي: ياولدي كفاية عناد ترى بنتكم هي الضحية .. طيب عشاني أرجع ورح خذ زوجتك من بيت أهلها وأمسحها في وجهي هالمرة!


قلت له: ياأبوي والله لو تطلب عيوني ما قلت لا .. لكن أسمح لي إلا هالطلب ما أقدر أطيعك فيه ..لا تزعل مني لكن بصراحة إنت لو يصير معاك إنت وأمي أصغر مشكلة صارت بيني وبين زوجتي .. كانت الدنيا قامت وقعدت .. والحين تقولي عناد. أنت كلمتها من وراي 3 مرات ووصلني هالكلام ووصلني أنك ترجيت فيها ترجع لدرجة إنك قلت لها كلام ينزل من قدري وقيمتي أنت متأكد مليون في المية إنه غير صحيح .. لكنك كنت تبيها ترجع بأي طريقة وما ضربت حساب لكرامتي .. وفي الأخير سمعت كلامك عني وأستانست وقالت لك: ما أبي أرجع أبي الطلاق.
أنا تنازلت بما فيه الكفاية خلاص مافيني أتنازل كل مرة هي تخطي وأنا أراضي!

قالي: ياولدي أنا عارف أنه اللي قلته عنك غير صحيح لكن كان غرضي أني أطيب خاطرها قلت ممكن ترجع .. المهم يعني ما بتجبر خاطري وتتنازل هالمرة عشان أبوك وبنتك!

قلت له: والله ما أقدر أرجوك لا تلح علي لأن رضاك عندي انت وأمي بالدنيا كلها لكن هذي حياتي وأنت على عيني ورأسي من فوق ... ووالله لو زوج ثاني كان تاركها من زمان وأنت عارف بالضبط كم تحملت منها ومن أهلها لكن أنا حاولت بما فيه الكفاية!


قالي: أجل رح الله يحرقك إنت و زوجتك ..

وأنهى المكالمة!


الرجاء التعليق فقط هل أعتبر عصيت والدي؟

أما مسألة أني أنفذ طلبه خلوها على جنب لأني لو تنطبق السماء على الأرض ما غيرت رائي.

شكرا.

يا اخي انت هصيت والدك لانك ماطعت امره حتى لو رايك هو الصح وراي ابوك خطأ

عشان تحل المشكله وعشان الله يوفقك اذا تزوجت ثانيه وعشان ابوك يرضى عنك قول لابوك انا بروح ارجعها عشانك فقط ولا انا مو مقتنع

وروح بيتها وقول لابوها انا مالي نبيه ارجع بنتك ولا انا مسامحها لكن الوالد اصر عليي عشان بنتي فاذا بنتكم لها نيه الرجوع عشان بنتها نرجع واذا مالها نبيه انا راح اتزوج قريب .. بهالطريه راح تذل اهل زوجتك وراح
تحسسهم انك ماتبيها وهذي كسرة خشم لها .. وبنفس الوقت زوجتك راح تفكر جديا لانها شافت المسأله وصلت لي زواج من أخرى فراح تخاف وتفكر عدل

وبكل الحالات انت ارضيت والدك وذليت البنت وأهلها بكلامك وسويت الي عليك


الله يهديكم يارب

السلام عليكم و رحمه الله و بركاته



لقد اطلعت على مشكلتك من البدايه و كنت دوما اسالك

و النتيجه ما ذا ستكون


هل ستبقى زوجتك معلقه ،،،، لم تجب

هل سترجعها،،،،، لم تجب

والدك ،،،، بالفعل انت عاصي له و انا لو كنت مكان والدك لكنت غضبت منك غضبا شديدا
و بعدها ترده هذا الرد


حاول الحلول المنطقيه
لا المستحيله


و استفد من تجارب والدك في الحياه

__________________

اللهم أنت ربي ، لا إله إلا أنت ، خلقتني وأنا عبدك ، وأنا على عهدك ووعدك ما استطعت ، أبوء لك بنعمتك ، وأبوء لك بذنبي فاغفر لي ، فإنه لا يغفر الذنوب إلا أنت ، أعوذ بك من شر ما صنعت(البخاري)

الأخ ادميني ..

شكرا على تعليقك .. هذا هو رأي بالتمام!


الأخ سماء قطر ..

مشكلتي طويلة وزوجتي والدها متوفي ولا يوجد رجل عاقل للتخاطب معه! عالعموم أنا حبيت أستفسر فقط عل عصيت والدي أم لا؟


الأخت أم أثير ..

صحيح والدي الله يطول في عمره له تجارب في الحياة .. لكن أقسم بالله لو أنه هو مكاني كان مطلق زوجتي من زمان أنا أعرف والدي وأعرف طبعه ..

فكيف يطلب مني شيء هو بنفسه مستحيل يعمله لو كان مكاني.


أما بالنسبة لزوجتي فمتى ما حبت ترجع .. أفتح لها بيت وتربي بنتنا على أن أكون أنا متزوج بأخرى.
إذا تبي الطلاق وراحت محكمة ما عندي أي مانع تاخذ ورقتها ولكن بعد أن تثبت حقوقي الشرعية على الورق في المحكمة لأن لا أثق في وعودهم .


وشكرا

على فكرة .. حتى لا تلتبس الأمور قصدي حقوقي الشرعية في زيارة بنتي فقط لا غير!


الأخت فدن ..

بصراحة نبرة صوتي كانت مرتفعة بعض الشيء ولكن والله ما قليت أدبي معاه ..

والدي في مدينة ثانية غير مدينتي .. اتصلت عليه مرتين ما يرد يقفل في وجهي، عالعموم هذي هي طريقة والدي في فرض وجهة نظره ولكن عندما يختلي بنفسه ويراجع موقفي ويتأكد أني على حق راح يتصل فيني

أما أنا فوالله أني متضايق من نفسي لأنه زعل علي .. لكن شسوي مافي أمل ألبي طلبه!

طيب انا ابااقول رأيي بس لاتزعل مني

من نقاشك مع الوالد حسيت انك معصب وتخيلتك وانت تكلمه رافع صوتك

اتمنى انك تعتذر من أبوك وتروح لمه وتفهمه بالهدوء وتطيب خاطره وتنهي الموضوع وتقنعه لانه لومااقتنع
راح يفتح الموضوع مره ثانيه وثالثه.........
(((مهما كان هذا ابوك ورضى الله من رضا الوالدين)))

وراح يرضا وماراح تكون عصيته باذن الله

__________________

اخوي فيصل اولا اقول لك الله يساعدك ويحل مشكلتك المساله مو مسالة عصيان بس ابوك اكبر منك ووعارف بامور الحياه والله



ان الطلاق بعمره مشكله ماتعرف شكثر يحطم من نفسية الاطفال انا اقول روح للمره الاخيره لاهل زوجتك وسو الي نصحتك




فيه سماء قطر والله يسوي الي فيه الخير ان رجعت زين واذا مارجعت هي الخسرانه



تفاحه

يا جماعة مشكلتي ما تنحل بأني أروح لزوجتي وأقولها نفس الكلام على حسب أقتراح سماء قطر ..

ما أبغي أخوض في تفاصيل مشكلتي لأنها عرضت من قبل ولكن زوجتي وهي عندي في البيت لو أقولها كلمتين مثل الكلام اللي أقترحته سماء قطر ... قسم بالله تروح بيت أهلها

أجل لو أروح أقولها ذا الكلام عاد تصوروا ردها أنتم!!

المهم أنا أستفساري عن موقف والدي وزعله مني الان!

هل وصل زوجتك و اهلها هذا الكلام

__________________

اللهم أنت ربي ، لا إله إلا أنت ، خلقتني وأنا عبدك ، وأنا على عهدك ووعدك ما استطعت ، أبوء لك بنعمتك ، وأبوء لك بذنبي فاغفر لي ، فإنه لا يغفر الذنوب إلا أنت ، أعوذ بك من شر ما صنعت(البخاري)