استكمالا لوعدى معاكم بكمل الحلقة دي كمان عن المشاكل اللي ممكن تصيب بشرتك وتخليكِ تتضايقي..

المشاكل دي زي شحوب البشرة والإجهاد والاصفرار وحاجات تانية كمان...

والمشاكل دي هنقول لك أسبابها وازاي تعالجيها بالطرق الطبيعية...



أسباب المشاكل دي كلها


الحقيقة لو بصيتم للمشاكل اللي معانا المرة دي في الملف هتلاقوها كلها مرتبطة ببعض؛ يعني أسباب الإجهاد زيها زي أسباب الشحوب وأسباب الاصفرار والتجاعيد والجفاف. ونبدأ بأول سبب.

التدخين



مش شرط تكوني إنتِ اللي بتدخني.. كفاية إنك تقعدي في مكان واحد مع ناس بتدخن، فبشرتك بتتشبع بالدخان والنيكوتين اللي طالع من السجاير واللي إنتِ مابتشوفيهوش.. بشرتك بتمتصه وتخزنه كمان وبيبان عليها في هيئة جفاف وشحوب وإجهاد.


التغذية




لازم تعرفي إن البشرة بتتغذى من جوه الجسم مش من براه يعني الكريمات والماسكات دي حاجات لتحسين شكل البشرة لكن الغذا الحقيقي بتاخده البشرة من أكلك إنتِ، من الآخر من اختياراتك إنتِ في الأكل.. يعني لو عاوزة بشرة مثالية لازم تبعدي عن الأكل اللي مش صحي وتكتري من الخضروات والفاكهة في أكلك، وزي ما بتبعدي عن الأكلات الدسمة اوعي تفكري في الريجيمات القاسية.


تغير الجو



تغير الجو وتقلباته من العوامل المؤثرة بشدة في البشرة. يعني أثناء تغير الفصول والمواسم من الحر للبرد والعكس البشرة بتحتاج عناية خاصة جدا بيها، ودي لازم توفريها ليها عن طريق تغذيتها والعناية بيها



الماكياج



كمان الماكياج على الرغم من إنه المفترض بيجمل البشرة ويبرز جمالها فكثرة استعماله وتركه لمدة فترة طويلة من الوقت على بشرتك وعدم تنظيفه جيدا قبل النوم بيسبب تدمير خلايا البشرة وجفافها وشحوبها، يعني بيعمل بالظبط عكس اللي مفروض يعمله.



النوم

من العوامل اللازمة جدا لجمال بشرتك هي النوم لساعات معقولة بعمق.. يعني ممكن تنامي كتير بس مش بعمق، فاللي يحصل إنك تقومي مجهدة وبشرتك كمان مجهدة.. يعني لو عاوزة تحافظي على بشرتك لازم ماتسهريش كتير وتنامي ساعات كافية.



أسباب صحية

فيه كمان بعض الأسباب الصحية –بعد الشر عنكم كلكم- بتؤدي للإجهاد والشحوب والمشاكل دي كلها زي الأنيميا ونزلات البرد ومشاكل تانية كتير.. علشان كده بننصحكم إنكم تحاولوا تشوفوا لو -بعد الشر- فيه مشكلة من دول، قبل ما تعملوا ماسكات وتحطوا كريمات من غير فايدة.


البشرة المجهدة

كتير بيقولوا إن بشرتهم مجهدة جدا وعايزين يرجعوها لطبيعتها ومش عارفين.

هقول لكم ازاي ترجعوها لطبيعتها بطرق طبيعية طبعا..



ماسك الشعير



المكونات:

2 شعير مطحون.
2 ورق نعناع طازة مفروم.
2 عسل.
2 حليب.

الطريقة:

قلبي الشعير والعسل مع النعناع باستخدام الشوكة، وبعدين حطي الحليب وسيبي الماسك على بشرتك لمدة ثلاثين دقيقة، وبعدين اغسلي وشك بالمية الباردة.


ماسك الخيار


المكونات:

نصف فنجان خيار مبشور.
بياض بيضة.
2 معلقة صغيرة من اللبن البودرة.



الطريقة:

اخلطي المكونات دي كلها مع بعضها لغاية ما تبقى عجينة لينة وحطيها على وشك، وبعد مرور 20 دقيقة اشطفي وشك بالماء الدافئ، وبعد شوية اشطفيه بالمية الباردة. جربي الماسك ده مرتين في الأسبوع وإنتِ تشوفي النتيجة بنفسك.

[line]
البشرة الشاحبة والمصفرة


بعد ما عرفتِ الأسباب اللي ممكن إنها تؤدي لشحوب وإصفرار البشرة فيه شوية ماسكات ممكن إنك تجربيها ومن الماسكات دي:


ماسك الخميرة البيرة



المكونات:

1 معلقة صغيرة من خميرة البيرة.
2 صفار بيضة.
2 معلقة كبيرة عسل نحل.
2 معلقة كبيرة من القشطة.
نصف معلقة صغيرة من خل التفاح.
2 معلقة كبيرة زيت زيتون أو زيت سمسم.
لبن وماء.

الطريقة:

اخلطي الخميرة البيرة وصفار البيضة وعسل النحل والقشطة وخل التفاح مع بعضه. بعد كده ادهني طبقة من زيت اللوز أو "زيت السمسم" على وشك بس طبعا مع تجنب المنطقة اللي حوالين العينين. وبعد كده حطي القناع، وبعد مرور 20 دقيقة اغسلي وشك باللبن المخفف بالمية ونشفي وشك بفوطة ناعمة. والماسك ده بيفيد البشرة المجهدة قوي وده علشان الخميرة البيرة بتعمل على تنشيط الدورة الدموية. واعملي الماسك ده مرة كل أسبوع.


لخدود بلون الورد



على فكرة خبراء التجميل بينصحوا بالمية علشان المية بتخلي الوجه بيبرق، وكمان بتخلي فيه نضارة طبيعية وده لأنه بيعمل على زيادة الإمداد الدمـوي لمنطقة الوجه.
الطريقة:

1. حطي حوالي عشرة مكعبات من التلج في إناء وسيبيهم لغاية ما التلج يذوب.

2. حطي كريم مرطب على وشك بس خلي بالك إن الكريم ده يكون مناسب لنوع بشرتك، وده فايدته إنه بيكون زي عازل لتنجب ملامسة الماء البارد لوجهك مباشرة.


3. بعد كده غطسي وشك في المية الباردة، بس خلي بالّك من إن نفسك يكون مكتوم، وممكن تظلي على الوضع ده لمدة 20 ثانية.


4. كرري الغطس في المية حوالي 4 مرات وبعد كده استخدمي فوطة ناعمة علشان تنشفي وشك وتشيلي أي أثر للكريم.

5. ممكن بعد كده إنك تحطي كريم مرطب على وشك.

لو كانت بشرتك من النوع الدهني ممكن إنك تضيفي روح النعناع للمية الباردة.



ماسك البرتقال المنعش للبشرة




والماسك ده فايدته في إنه بينعش البشرة وممكن إنك تجربيه 4 مرات في الأسبوع، وعلى فكرة كمان الماسك ده مناسب لكل أنواع البشرة.


المكونات:

عصير نصف برتقالة.
3 معالق عسل.

الطريقة:

سخني العسل مع عصير البرتقال على نار هادئة لغاية ما تلاقي العسل داب، بعد كده شيليه من على النار وسيبيه شوية لغاية ما تلاقيه برد. حطيه على وشك لمدة ربع ساعة وبعد كده امسحي وشك بقطنة مبلولة بالمية الفاترة. وهتشوفي نتيجة وانتعاش مالهمش مثيل.


[line]


التجاعيد

للأسف دي مشكلة منتشرة اليومين دول بين البنات اللي لسه سنهم صغير. وده يظهر لنا إن التجاعيد مرتبطة بعوامل كتير غير عامل السن زي التعرض للأشعة الضارة للشمس والطقس البارد والتغذية السيئة..


كريم لمكافحة للتجاعيد



والكريم ده بيعتبر من أحسن أنواع الكريمات اللي بتكافح ظهور التجاعيد وممكن إنك تجربيه بصفة يومية وهتشوفي الفرق..

المكونات:

4 معالق كبيرة لبن.
2 معلقة صغيرة عسل أبيض.
4 معالق كبيرة كريم أساس.
صفار بيضة واحدة.
4 نقط زيت مر (من عند العطار).

الطريقة:

اخلطي العسل مع اللبن ودفيهم على النار، بعد كده ضيفي ليهم باقي المكونات واخلطيهم مع بعض وسيبيهم في التلاجة لمدة 3 دقائق، وبعد كده حطي الماسك على وشك واشطفي وشك بالمية الفاترة بعد ربع ساعة.




ماسك الموز



وطبعا علشان الموز من الفاكهة الغنية بالفيتامينات بنلاقيه بيكافح ظهور التجاعيد بالإضافة إلى إنه بيكسب البشرة نعومة وحيوية.
المكونات:

موزة.
ثلاث معالق لبن.

الطريقة:

اهرسي الموزة واخلطيها مع اللبن ووزعيها على البشرة مع التركيز على الأماكن اللي فيها التجاعيد، ويترك لمدة 15 دقيقة، ثم اشطفي الوجه بالمية الفاترة.


الماسك الفرنساوي



والقناع ده بقى يجنن لأن النساء الفرنسيات كانت بتستعمله، وهو بيمنع ظهور التجاعيد نهائيا، وبيعطي إشراق ونضارة للبشرة.

المكونات:

تفاحة.
فنجان صغير لبن حليب.
معلقة ضغيرة زيت لوز.

الطريقة:

قشري التفاحة وقطعيها قطع مربعات صغيرة، وبعد كده حطيها في حلة وحطي معاها فنجان اللبن وحطيهم على نار هادئة لغاية ما تشعري إن الخليط شكله بقى زي القشطة السميكة، وشيليه من على النار، وسيبيه لغاية ما يبرد.. بعد كده ضيفي له معلقة صغيرة زيت لوز واخلطيهم مع بعض كويس. بعد كده حطي القناع على وشك لمدة 20 دقيقة واغسلي وشك بس بمية تكون باردة وإنت تشوفي النتيجة. وممكن تجربي الماسك ده يوميا.

جفاف البشرة

طبعا احنا في الشتاء دلوقتي وكتير مننا بيعانوا من المشكلة دي وهي إنهم بيلاحظوا إن جلد اليدين والرجلين والوجه بيكون خشن شوية.

وده ممكن يحصل نتيجة حساسية الجلد الزيادة وتأثرها الشديد ببرودة الجو وجفافه؛ علشان كده بنقول لك على الكام وصفة دي اللي ممكن إنك تجربيها وإن شاء الله هتجيب نتيجة.


دهان عصير الليمون



على فكرة الوصفة دي مافيش أسهل منها وهي عبارة عن إنك تعصري نصف ليمونة على باطن إيدك وبعد كده تاخدي العصير ده وتحطيه على الأماكن المصابة بالقشف. وبعد مرور 10 دقائق ممكن إنك تشطفي وشك بالمية الفاترة. كرري العملية دي مرتين في الأسبوع وهتشوفي النتيجة إن بشرتك رجعت ليها النعومة وأصبحت ناعمة زي الحرير.



دهان زيت القرفة



والدهان ده بالذات حلو قوي قوي لأنه بيعالج الجلد المتشقق خصوصا تشقق الكوعين والرجلين، ويرجع لهم جمالهم ونعومتهم اللي كانوا عليها.

المكونات:

3 نقط زيت قرفة (من عند العطار).
8 معالق كبيرة زيت مشمش (من عند العطار).

الطريقة:

حطي المكونات السابقة مع بعضها في زجاجة واقفليها كويس ورجي الزجاجة دي كويس علشان المقادير دي تتخلط مع بعضها.
بعد كده ممكن إنك تاخدي المكونات دي وتدهني بيها الأماكن اللي مصابة بالجفاف والتشقق.. اغسلي الأماكن اللي دهنتيها بالدهان ده بالماء الفاتر كويس بعد مرور 20 دقيقة.



ده كان عددنا المرة دي وانتظرونى العدد الجاي مع عدد تفتيح البشرة وتقشيرها بالكامل

شكرا لك

الله يعطيك العافية

الله يعطيك العافيه

اطروحاتك رائعه جداً

المشاركة الأصلية كتبت بواسطة مسموسي الله يعطيك العافيه اطروحاتك رائعه جداً

المشاركة الأصلية كتبت بواسطة ملاااك شكرا لك الله يعطيك العافية

المشاركة الأصلية كتبت بواسطة أم اليمان الله يعطيك العافية ويجزيك كل خير

المشاركة الأصلية كتبت بواسطة سنترافيش ألف ألف شكر حبيبتي برنسيس اسأل الله أن يوفقك و يرزقك خير الدنيا و الأخرة