اخواني وخواتي

زوجي راتبه تقريبا 12000 وماعليه اي اقساط عندي خادمه وحده
واحنا ساكنين مع اهله يعني مافي الا مصاريف عاديه واحنا ماانروح الجمعيه الا كل شهر والفاتوره ماتتعدى ال 600 ريال تقريبا ... زوجي سيارته موديل 97 وناوي يشتر له وحده جديده ... الحمد لله مقتدر يشارك في اي اكتتاب ويشتري له هو ولبنتي وولدي وانا

انا من سنه تقريبا اشتغلت ومن يوم مااشتغلت انا اللي اصرف على نفسي وعلى اعيالي وانا مشتركه في جمعيه عشان اوفر من راتبي اللي مايتعدى 5500 .... هدايا الزواج علي وهدايا الولاده علي يعني هو كلش ماله خص فيني

المهم
امس بالليل انا وزوجي انخطط اندخل بنتنا في مدرسه خاصه واتفاجات منه يطلب مني ان نتعاون احنا الاثنين وانجمع لدراسة بنتي وكل شهلر انا ادفع النص وهو يدفع النص والمبلغ اللي يدفعه كل واحد في كل شهر مايتعدى 350
انا الصراحه قلت له اسفه وكنت جاده لكنه هو يتوقع اني امزح وقال لي ليش احنا لازم نتعاون

قلت له اني ابغي اوفر وانا ادري ان عنده ... قال لي انتي كم تصرفين كل شهر قلت له 3000 قال لي وايد قلت له انا اصرف على العيال وغير المناسبات اللي تطلع كل شهر من ولاده وزواج حتى لو كان من صوب اهله
.... قال لي انا قلت لج اذا دفعتي للعيال قوليلي وانا بعطيج... لكن انا مااقدر .... احس اني طراره ... هو يكون معاي بالسوق وما يدفع او يدري اني تسوقت للعيال وما يعطيني ... ومره من المرات شريت لبنتي غرض وكنت امزح معاه وقلت له عطني افلوس .... فقال لي انتي الحين تشتغلين ادفعي .... كان يبي يمزح بس انا ادري انه جاد لاني اعرف اسلوبه ... انا سكت وبعدين هو قال انتي صايره ماديه هالايام .... لهالسبب انا مااقدر اطلب منه افلوس وراتبي عندي لان المفروض هو يعرف انه حتى انا من حقي انه يصرف علي

وانا ابغي اشتري لي سياره ان شاء الله لاني اسوق وماعندي سياره ... سياره وحده بيننا الاثنين وطبعا الاقساط بتكون علي وما راح يبقى شي من راتبي لي

وهو اذا قلت له ان خاطري في ساعه او ذهب بيقول لي انا الحين ماعندي لان حاط افلوسه معظمها في الاسهم وانا مااحب اكرر طلبي

الجمعيه اللي انا مشتركه فيها عشان اوفر قال لي خليها حق مصروفجفي السفره الجايه في الاجازه ... انا قلت له اسفه عن جد بس ادري في لحظتها غصب علي بصرف على نفسي ... اصلا قلت له انا ماابي اسلفر لهالسبب

يا ترى اشلون اتصرف مع زوجي ..؟؟ انا احس اني في موقف محرج ؟؟؟؟ مااقدر اقول لا ؟؟؟ ومتضايقه لاقصى حد ... انا ادري ان عنده بس هو يبي يوفر له وللمستقبل بس انا بعد اتعب وابي اوفر واخذ اللي افخاطري

كرهت الشغل بسبة الراتب وبسبة زوجي

ساعدوني لان اليوم اكيد بيناقشني في هالموضوع ومش عارفه اشلون ارد عليه
قولولي انا غلطانه ؟؟؟؟ والا هو ؟؟؟ اشلون افهمه من غير احراج لي او له ؟؟؟
ساعدوني ارجوكم

هلابك اختي :

من خلقة الدنيا واللى عرفناه من ديننا الكريم الزوجة لها حق الكسوة من زوجها وذلك حسب امكانياته حتى لو كانت على وظيفة يجب ان يخرج كسوتها لها وذلك هو اللى حثنا على ديننا الكريم لتقريب الانفس والالفة بينها وهو حق من حقوقها مهما كانت الاسباب حتى لو انها على وظيفة وراتبها عال يجب عليه حق النفقة عليها وعلى ابنائها ....

هذا من المنظور الديني اما من الجانب الشخصي وبكل اسف انا استحقر الرجل اللي ينظر لراتب زوجته ؟؟ نظرة استحقار

عيب والله ................... المفروض الرجل يزيد زوجته ما ينقصها اذا كذا اصبح زواج تجارة وليس استقرار ومودة للاسف

كيف بتكون نظرتها لزوجها ؟؟ طماع ؟؟ بشع ؟؟ اناني ؟؟ اذا اصبح الرجل بهذه الصفات لدى زوجته اجل وش يترجى من باقي البشر ؟؟؟؟؟

شووفي اختي اذا المسالة كذا اختلقي الاعذار وتحججي بان والدتك محتاجه فلوس وانك راح تمشين لها مبلغ معين كل شهر وباقي الراتب سوف تقضين به امورك الخاصه فمن الواجب ان يتكفل بشؤؤن ابنته وابنه ؟

لانه وبكل صراحه واكون معك صادق لو تعود على هالحاجه وعودتيه انتي بجد راح يستمر بهذا الشكل ؟؟

ما اقولك لا تعطين زوجك لا والله في نساء لا شافتك زوجها في ضيقة مالية والله توقف معه وقفه ما يوقفها رجال وتعطيه من طيب خاطر ........ وانتي ان شاء الله منهم

اما مسالة ان الله معطيه خير ويستغلك ؟؟ هذا شي ثاني

انا ما ابغى اتدخل في شؤونك وشؤون زوجك اخاف لا تتازم الامور على اشياء تافه لكنها تخرب البيوت فحاولي ان تجدي الطريقة المناسبة من الان لكي ترتاحي مستقبلا


اتمنى اني قدرت اوضح لك بعض الاشياء وصدقيني اختي لو لقيت اي مفر لك في هالسالفه لن اتاخر عنك





اعذب التحايا

ابوريمـــــــــــــاس

اختي نجمة عشق انا بقول لك رائيي لو انا مكانك بصراحه بكون صريحه معه واقول اللي بخاطري وبكيفه يزعل ولا يرضا بس باسلوب بدون تجريح لان شكل زوجك اسمحي لي اقولها مايستحي على وجهه يعني راتبه دبل راتبك ومع ذلك عينه على راتبك فاذا تنازلتي هالمره راح تكرر المرات والمرات وبيوم تلاقين نفسك انك مهتمه بكل شيء وهو بنفسه بس وهذا رائي وانتي حره والله يخلصها على خير وانصحك اذا واجهتك اي مشكله اكثري الاستغفار نشوفك على خير

كلام صحيح ,وأنا اعرف ناس في مثل حالك بل اصعب حتى زوجها يطلب منها ان تشتري له اغراضه من راتبها والسبب انها تهاونت معه في هذه الامور (يعني تصرف على بيتها واولادها ونفسها والأخ مريح نفسه ويجمع على حسابها وزيادة على هذا يريدها تصرف عليه هو ايضا ) فلا تسمحي اختي ان تصلي الى هذا الحد وعلى فكرة هذا أحد اسباب رفضي للوظيفة رغم اني حاصلة على شهادة البكالريوس . ارجو من الله العلي القدير ان يوفقك لما يحب ويرضى

اختي الغالية بالنسبة لرايي الشخصي انصحك بالمصارحة معه وقوليله انا مااقدر ادفع لبنتك وعلي التزامات شخصية ولا تفتحين الباب على نفسك لانه اذا انفتح مراح يتسكر ولكنننننن باسلوب مؤدب وذكي ،ولكن اذكر ان من حقوق زوجك عليك السكنى وعدم الخروج من البيت ولكن قوليله حق طلعتي من البيت بعض المصاريف اللي ادفعها للبيت وانت ماتدري

رأيي من رأي السابقون



لكن ما يزيدها ...........صراحة

الصراحه انا هالمره بحاول قد مااقدر اني ماادفع لدراسة بنتي وانا امس قلت له اذا هاي الحل الوحيد ممكن اتدخلها في اي مدرسه ثلنيه ارخص او حكوميه

صدقوني لو كان زوجي مش امقصر معاي في الهدايا او المصروف كنت ساعدته ومن غير اي تردد ... هو يقول لازم يكون فيه تعاون بيننا .... انا ادري ان مو بهالطريقه
صدقوني لا فيه هدايا ولاده ولا عيد ولا تخرج وانا مو امقصره معاه في الهدايا واقول معليش يمكن هالمره بيجيب لي
اربع سنسن زواج وما شفت منه الا خاتم واحد ذهب وكان في اول عيد
احيانا اقول له ببيع ذهبي عشان اشتري لي عقد الماس فيقول لي على رحاتج ... بعت ذهبي وشريت لي عقد الماس .... وبعد مااشتغلت ووفرت لي مبلغ محترم وطار في السفره قلت باخذ سلفه من الشغل واخذت ولا قال لي انا بعطيج

من شهر قلت لهانا محتاجه الفين لين ينزل الراتب قال ترى انا ماعندي هالايام لانه كان حاط اللي عنده في الاسهم
انا دايما مااطلب بس المح وخاطري مره يقول لي حاضر دايما يتعلل ... يقول ماعندي وبعدين يقول ان شاء الله وانا بعدها اسكت

انا هالمره لازم اعاند واتحجج

انصحوني اكثر ارجوكم

لازم مصاريف البيت والعيال تكون على زوجج مو عليج

والسفر بعد اتوقع ان الرجال هو المسئول عنها

والله لمن اسمع مشاكل المصاريف لمن تكون المره موظفه احمد ربي اني ما لقيت وظيفه

الله يعينج ويفرج همج

__________________
اللهم إني تصدقت بعِرضي على الناس وعفوت عمن ظلمني
وأسألك في ذلك بلوغ مراتب المحسنين
ربنا هب لنا من ازواجناوذرياتناقره اعين واجعلنا للمتقين اماما
رب اجعلني مقيم الصلاه ومن ذريتي
اللهم اني اسالك لذريتي صحبه الاخيار وتوكل الاطيار
اللهم الف بين قلوبهم وبلغني فيهم غايه املي ومناي بحولك وقوتك
اللهم اسعدني ببرهم في حياتي وبدعواتهم بعد مماتي

يا ام خالد والله لما كنت ادرس كنت اتمنى اليوم اللي اتخرج فيه واشتغل ويكون لي راتب عشان مااطلب من زوجي لان كان في خاطري وايد اشياء وما كنت اطلبها وبس كنت اكتفي بالمصروف
والحين انا متحسفه لاني اشتغل

وترى زوجي احيانا يقول لي اذا ماتبين تشتغلين كيفج يعني عادي عنده بس انا مااقدر اعيش وانا حاسه اني اقل من الناس مع ان الله منعم علينا

اختي الحبيبه



اولا وقبل كل شيء اؤيد كلام الاخوان والاخوات اللي سبقوني....

ثانيا......خلينا نتكلم بعيد عن زوجك وعن انانيته........الحين زوجك راتبه ماشاء الله قوي....ليش تتوظفين؟؟؟.......لا تقولين لي يضيق صدري بالبيت........انا اشوف يضيق صدرك بالبيت ولا تصير بينك وبين زوجك مشاكل ماديه انتوا بغنى عنها......
وبصرااااحه متناهيه.......انتي الغلطانه لانك عودتيه على نظام غلط......اللي اعرفه شرعا....الرجل ملزوم يصرف على زوجته لو كانت مليونيره......بس للاسف انتي خليتي كل شيء على راسك حتى مصاريف عيالكم.......



الحل....




1-.....لاتصرفين على عيالك......مو نحاسة فيهم.....بل بالعكس عشان زوجك يحس ويصرف عليهم.....وانتي اطلبي منه المصروف لاتقولين احس انها طراره.....مافي بين الازواج كرامه.....بعدين زوجك قاعد يطلبك منك بكل جراه ولا قال احس انها طراره.........!!!!!واذا سألك وين راتبك.....تفاديا للمشاكل والحزازيات.......قوليله امي محتاجه وعطيتها....او اختي.....او اي احد.....بس يكون العذر مقبول.....





2- اذا دخلتي مع زوجك باي نقاش تحسين انه اخرته مشاكل على الفلوس......حاولي تنهين هالنقاش وتتملصين من المصاريف بالاعذار اللي ذكرتهم.....


3- نصيييييحه لوجه الله........مدام زوجك راتبه ممتاز......واشوف انكم مو بحاجه لراتبك.....ومو جايب لكم الا المشاكل.....استقيلي......والعذر....احساسك انك مقصره مع عيالك وبيتك.......و......و.......و......










والله يعينك.....


والله اني قمت اخااااف من الوظيفه بسبب المشاكل اللي اقراها......
















اختك

دووووووووت

__________________