أنا بمووت من القهر يوم الأربعاء عند أهل زوجي عزيمه كبيره ... وانا قلت ما راح أضغط



على زوجي حبيبي وأقوله أبي لبس جديد حتى ما أزعجه بطلباتي قلت بدبر نفسي بأي لبس


وللعلم هي عزيمه كبيره جدا ومع ذلك قلت أنا عارفه الميزانيه هالشهر متدمرة ... ..



فقلت له بس أبيك توديني السوق انا وياك فقط أبي أشتري أكسسوار لي ,, قال لي:


ألبسي ذهب انا أكرهه ألبس ذهب أحس اني عجوز كبيره قلت له ما بي ذهب أبي اكسسوار


قال خلاص بس بشرط ما يتعدى ال100 ريال لأني الميزانيه مضروبه هالشهر ...


قلت خلاص 100 تكفي ..



اتفقنا وقام هو يماطل كل يوم يقول لي بكره كل يوم يقول لي بكره...


قلت معليش ياا بنت العزيمه يوم الأربعاء بيكفي الوقت... ويوم جا اليوم الأثنين قال لي خلاص الوعد بعد صلاه العشاء



نروح واشتري اللي تبين ..فرحت وطرت من الفرح ويوم جا المغرب قال لي وش رايك تروحين بيت أهلك.؟؟


قلت له والسوق قال خلاص والله ثم والله على وعدنا ان شاء الله


ورحت بيت اهلي وانتظره وانتظره جت الساعه 9 ونص والرجال لا حس ولا خبر هنا بدت العصبيه تطلع



وأتصل عليه الساعه 10 رد قال : (( هاه وش تبين ؟؟))


قلت وينك تاخرت ؟؟


قال (( أنا مشغول عندي اختبار في دورة اللغه في المعهد )) خلي السوق بكره ؟؟


قلت له (( طيب بكره بروح لبنت خالتي أعزيها بولدها وبعدين أروح لخالتي أعزيها بحفيدها ))


قال يكووون خيررررررررررررررررررررر



سكت وقلت الرجال مسكين عنده اختبار ؟؟








وجت الساعه 1 ونص وابوو الشباب لا اتصل ولا أرسل مسج ولا اي شي.. للعلم المعهد يسكر الساعه 10


المهم ..


جلست اتصل عليه وارسل له مسجات ولا يرد ..


انا خفت عليه ضاق صدري قلت وش جا الرجال ؟؟ بعدين اتصل طال عمره ,, قال انا كنت مع واحد من أصدقائي


استغربت للعلم ما يحب يطلع ولايحب أصدقاء ولا يحب جمعات الزملاء ولا اي شي من هذا القبيل..



قلت له وش فيك ما ترد علي خفت عليك قال كنت مشغول,,


اكتشفت بعدين انه ما راح المعهد ولا كان عنده اختبار ولا اي شي


والمشكله هالرجال اللي كان جالس معه من الساعه 8 الى الساعه 2 نص يكرهه زوجي كره فظيع ولايطيقه


ويقول ثقيل دم وحسود وسخيف يكره كره شديد


قلت له ليش تسفهني ولا ترد وليش لعبت علي وقلت بروح للمعهد وحرمتي من الروحه عشان أجيب لي الغرض اللي

أبيه من السوق



قام يضحك بكل بروود يقول خلاص لاتزعلين بكره وهو عارف بكره يومي كله مزحوم ؟؟ وبعده العزيمه


بعدين جا يستملح وما تذكر اني زوجته الا يوم جا ينوووم



بالله عليكم وش اسوي بهالرجال اللي يقهر يضحك وانا معصبه ويشووف كل شي بتفاهه


انا والله كنت ناويه أخرب عليه نومته وانكد عليه بس قلت ياا بنت اعقلي


واسكتي وادحري ابليس؟؟


انا اللي بستغربه كيف يقعد خارج البيت 7 ساعات وغير كذا مع شخص يكره وما يطيقه!!!


وحركاته اللي يوعدني بشي ويحلف ويقسم ثم يفشلني ويطيح وجهي ويقول بعدين


بدال مايقدر ويقول انها ما صجتني وطلبت لبس جديد وقالت ما أبي اخسره وانا عارفه ظروفه ولا أبي

أحرجه واخذ من أبوي الفلوس اللي عطاني اياها قلت له زوجي ماقصر كفى ووفا ومو مخلي علي قاصر




وش اسوي فيه جنني وكل شي يسويه يضحك ويكركر وأخر ما يشوف بالدنيا أنا ..


وش الحل معه

__________________

سبحان الله مشكلتك نفس مشكلتي زوجي ما عنده غير كلمتين من عيوووووووني و بكره إن شاء الله و بس ما اشوف منه شي في البداية كنت اولع و ابكي و الحين صار عندي شوية تبلد حسي و ياما ياما حطني في مواقف محرجة و سخيفه من ورى هالوعود و يا كثر ما يحلف و كل ما جا يوعدني اترجاه ما يحلف علشان ما يكسب ذنب لاني عارفه انه ما راح يوفي بوعوده ما اقول الا الله يصبرنا و يكون في عونك

__________________

اختي


عاشقه الليل شكلي بصير مثلك وأستسلم


بصراحه والله شي يقهر يوعد ويحلف بالله ويقسم وبالنهايه ينسى كل شي قاله لي ووعدني فيه









الله يصلحكم

__________________

أنا بمووت من القهر,,,,,,,,,,,,, والله أنا بموت من الضحك
أيه كلنا زي كذا نوعد ولا نوفي ,,, ههههه
شوفي انت تبين زوج مبرمج ومحترف يرضيك ؟؟ الحياة طويلة أن شاء الله وتعيشين معه ويرزقكم الله ذرية صالحة وتنسين حركات الشبابية
أبي أشتري أكسسوار لي ,, قال لي:ألبسي ذهب انا أكرهه ألبس ذهب أحس اني عجوز كبيرة
شوفي بقولك شي فيه ناس (انا مثلا) اذا حسيت ان زوجتي زعلانه عشان مشوار ما أهتم وأروح أقضي أشغالي
لا ولا أرضي أنها تسوي زيك تتصلين ومسجات ووينك , لا قايلها أذا ما رديت لا تتصلين مرة ثانية وطبعا هي تزعل وتقول

بالله عليكم وش اسوي بهالرجال اللي يقهر يضحك وانا معصبه ويشووف كل شي بتفاهه


انا والله كنت ناويه أخرب عليه نومته وانكد عليه بس قلت ياا بنت اعقلي


لكن أذا قالت زوجي ماجد حبيبي يوديني ونزلي السوق وما يقصر والله يا اختي أستحي لاني ادري انها تستهبل بس تحرجني وتشجعني أحرص على مشوارها ... تدرين ليه لأنها رفعت معنوياتي بكلامها ومدحتني وانا لازم أكون محترم وقد الكلام الي تقوله ,,, وأذا كانت طيبة ومحترمة وتحبني لازم أكون طيب ومحترم وأقدرها .

أما اذا كانت بكرة بتاخذ حقها بلسانها زي ما تفضلت وتنكدين علي نومتي بقول طز.......... فكري

__________________

ياا اخ ماجد والله اني

تعبت منه قلنا كلام حلو مانفع جالسه
احاول بالهدوووء مانفع


احاول بالخشونه ما نفع جنني والله من تزوجت طلعوا في راسي 5 شيبات من الحمق والعصبيه


مع اني توني مادخلت العشرين الله يعيني اذا دخلت ال30 شكل شعري كله بيطلع أبيض من بروده الزايد

__________________

هههههههههههه
حبيبتي ريم..
أحمدي ربج إنج قادرة تحسبين الشيبات اللي بشعرج..
أنا والله ما أقدر أعدهم من كثرهم.. وأصبغ شعري بين فترة والثانية عشان الشيب.. وعمري 23..
ولما أقول لزوجي شوف الشيب اللي طلع من العرس.. يعصب ومايرضى ويعمل مشكلة على الكلمة اللي قلتها..
بس أنا مايوز دايما أعيدها لأني واثقة مليون بالمية إن الشيب من هموم العرس.. ومن همه بمعنى أصح..

لما قريت عنوان موضوعك.. قلت هذي مشكلتي أنا ودخلت على طول..
ترى أنا مثل الأخت عاشقة الليل بديت أتعود..
وأصلا كيفت نفسي إنه لما يوعد ياخذني لمكان.. ماحط أمل بهالشي..
ولا أجهز نفسي إلا بآخر لحظة..
وتدرين حتى بآخر لحظة..ممكن يغير رايه.. وأكثر..
ممكن نركب السيارة ونمشي ونبتعد عن البيت ويرد يرجعني ويقول خلاص خليها بكرة..
كنت أزعل واسوي له سالفة ومشكلة كبيرة..
لكن شفت إنه عديم أحساس ولا يعتبر ولا يشوف نفسه غلط بشي..

((( إن حكينا ندمنا وإن سكتنا قهر )))


الأخ سلطان العجمي يقول: (((الله يعينا عليكم يالحريم))
حرااااام عليك بالعكس والله..
الله يعينا إحنا عليكم يالرياييل..

هلا ريم

وسعي صدرك ولا تعتمدين على السوق حاولي تدورين لك اكسسوار عندك ودبري عمرك بس لا تفقدين الامل انك

تروحين للسوق

بعدين الرجال كذا عندهم مشاغل وينسون كثير

خذي الامور ببساطة

وتأقلمي لا تكوني عصبية

وقولي له اذا انت مانت فاضي عادي بروح للسوق مع اهلي أنا ابي راحتك بس الله لا يهينك عطني الفلوس ( وجه فاهي

وبريء)

شكل معظم الرجال هكذا مع زوجاتهم لان زوجي هكذا

رهيبه يا اختي المحترمه ( وجه فاهي وبريء)

ضحتكيني يا خف دمك


المشكله أهلي عندهم سواق وامي ماراح تقصر لا هي ولا اخوي بيودوني مكان ما بي


بس ابو الشباب رافض يقول لاتركبين مع السواق !! لعلم أروح الجامعه مع السواق بس اذا اهتوى العناد عاند


واختي المثابره الله يعينا على رجالنا والله يعينهم علينا...

__________________