[grade="008000 00008b 00bfff 00008b 008000"]مصدومة مذهولة مو قادرة اصدق مو عارفة ايش اسوي شوفولي حل ...ارجوكم
من فترة اكتشفت ان زوجة اخوي تكلم شاب والله العظيم انسكت الدنيا في وجهي وكان نفسي اعطيها كف وانا بطريقتي تاكدت وعلمت اختي على اساس اننا نتصرف ونشوف حل وفي الاخير اتفقنا اننا نواجها بكل اللي عرفناه لكنها انكرت ومسحت كل الارقام في الصادر والوارد والسجل وما بقت أي دليل كيف عرفت اننا بنواجهها مادري المهم بعد اخذ وعطى كلمناها ونصحناها وقلنا لها ان هذا مايجوز وحرام وان عندك عيال خافي الله فيهم وهي انكرت نهائيا وقالت عيب عليكم تشكوا فيني وانا ما اسوي كذا وانا احب زوجي وما امشي في الغلط و و و و ..
المهم نصحناها وقلنا لها ماراح نعلم اخونا عشان بيتك مايخترب بس انتي خليك حرمة وعاقلة ولا تخربي بيتك بايدك ...(طبعا الكلام هذا كان في الاجازة بعدين انا رجعت بيتي لاني ساكنة في مدينة غير مدينة اهلي )
وبعد صارت امي تشوف ان علاقتها باختي الصغيرة (للعلم اختي متزوجة وعندها بنت)بدات علاقتهم ببعض تقوى وصاروا دايما مع بعض ويناموا عند بعض (بحكم ان زوج اختي سفرياته كثيرة للعمل) وكمان دايما عالنت وامي بعد ماعرفت عن زوجة اخوية صارت خايفة على اختي فصارت تراقب تصرفاتهم فصاروا يتجنبوا يجلسوا معاها وغامضين في تصرفات كثيرة وامي تعلمني وانا اقول لها ماعليك اكيد يتسلوا في المنتديات او أي شي كذا ...
لكن الطامة ان جوا اهلي عندي زيارة هاليومين وحكت لي امي اللي يشيب الراس وقالت انها مرة دق جوال اختي وامي قريبة منه وكان رقم ردت امي عليه وسمعت انه كان رجال ونطق اسم اختي وامي كلمتني في هذا الموضوع واختي جالسة وسمعت كل الكلام لكنها انكرت هذا الشي وانكرت انها تعرف اللي متصل ...
انا بصراحة حسيت في نبرة صوتها خوف فما علقت على الموضوع نصحتها وحذرتها من الغلط لكن بعد فترة اخذت جوالها عشان ارسل منه بلوتوث فقلت لنفسي خليني اشوف المكالمات لكن لقيتها ماسحة كل المكالمات ..
بعدين فتحت السجل وشكلها نسيته وماجا على بالها فلقيت الطامة اللي الجمت لساني
لقيت رقم متكرر كثير صادر ووارد وبتواريخ مختلفة ...
فانا الحين مصدومة ومو قادرة اسوي شي وما واجهت اختي بشي اولا لانه ماعندي دليل لانها ممكن تمسحها زي ماسوت زوجة اخوي وثاني شي لانهم ضيوف عندي والحين سافروا وما علمت احد باللي شفته وقلت لازم الجا لكم تدلوني ويش اسوي .. بصراحة انا فكرت اعلم اخوي عن زوجته بس من غير مايعرف ان انا واذا عرفت اختي يمكن تخاف وتبطل ..راح تقولوا ليه بتعلمي على زوجة اخوك واختك لا ؟؟؟
لانها اختي اولا وثانيا لانها هي السبب اللي جرتها لهذا الطريق ...[/grade]



الإشراف/ عفواً تم تعديل العنوان ليتضح المضمون

نسيت اعلمكم اني اخذت الرقم من السجل ودقيت عليه وطلع رجااااااااااااااااااااااال ....

الله يعينك اختي والله بصراحه ماني عارفه ارد بس انا نصيحتي انه تقعدي مع اختك و تفهميها عن كل شي صار و انك اخذتي الرقم و كلمتي و طلع رجال و قوليلها انا اختك اقدر اساعدك بدون فضايح و قوليلها انه اذا انفضح الأمر ما حد رح يقدر يساعدها و رح تخسر كل شي اولهم زوجها و اهلها...شوفي وش النتيجه اذا ارتاحتلك رح تتلكم و بعدين شوفو حل لزوجه اخوك...
الله يهديهم...

__________________
اللهم يا مقلب القلوب ثبت قلبي على دينك

شوفي أختي

لا النصح ولا الأرشاد الحين يفيد الشيطان غالب عليهم .. وما خذتهم سكرة المعصية

يعني إذا المتزوجات يسوون كذا أجل وش نقول حق البنات الي ما دخلو دنيا

لكن التقوى في القلوب هي الي تردع

الحين انتي امسكي أختك .. وهدديها قولي لها أنك بتعلمين واحد من أخوانك مو زوج الغافله الثانية .. لا

واحد ثاني أو أبوك والشاهد أمك

قولي لها حتى لو كسرتي الجوال .. الشاهد امي ..

هذي اول نقطة ..

نفذيها .. إذا تعدلت كان بها واذا ما مشت عدل ذيك الساعد لها حل ثاني

سلام عليكم جميعا
انا اشوفة من المؤسف جدا انا نشوف هدي التصرفات من البنات العاقلات المتزوجات!!!
لكن اتوقع شيء اسباب كثيره تجر الى هالمواضيع والجميع يعرفها(نحن ما بصدد سردها هنا)
المهم انا متفق مع وجهة نظر الجورية الحمراءوبصراحة ماانصحك ابدا بتهديد لانة يزيد عناد وفرقه وافضل التقرب اكثر من اختك وزوجة اخوك حتى تكسبي ثقتهم واستخدمي اسلوب القصص لتوضيح وترهيبهن من الموضوع الحاصل لهم.
وبيني لهن اهداف الوحوش البشريه وطرقهم في اصطياد الفرائس.
ومن الافضل اخراج الوالدة العزيزه من الموضوع في الوقت الحاضر.
اتمنى ان تحافضوا على سرية الموضوع حفاظا على السمعة.
الموضوع يحتاج منك وقت لحلة اتمنى انك تتحلين بالصبر وعدم التسرع.

ودمتم في رعاية الباري

جناين يا جناين يا صاحبة الردود الرزينة *هل تاكدتي ان اختك تكلم هذا الرجل ليس مجرد انك سمعتي صوت رجل هذا يعني الخيانة تروي بالحكم يا جناين الورود *واذا كنتي متاكدة الحذر الحذر ان تحدثي اخوك بالموضوع عن زوجة اخوكي انصحيها فقط واتركيها فلعلها ترتدع من نفسها
اما هناك طريقة اخرى بعد فترة اختلقي انت واختك التي تعلم وامك قصة عن واحدة طلقها زوجها لانه تخونه قولي تخيلوا فقط كانت تتسلى لا اكثر ولا اقل وعلم من ناس وتجسس على هاتفها عن طريق الشركة لعل وعسى ان تخاف حاولي لكن اياكي ان تتسرس اتركي مجال للتوبة

ياقلبي انتي لا تنصدمين ولاشي انا انصدمت بوحدة من قرايبي تخيلي عندها ثلاث اطفال
وحامل في الساابع وتدخل شات صوتي وهاتك ياسوالف مع الشباب
ما ادري اشفيهم المتزوجات انهبلوووووو

انتي الان سيبي زوجة اخوك الين يصحى اخوك العزيز لأنة مو معقول ما يحس فيها
او الين يصحى ضميرها مع اني اشك لكن لا تقولي لاخوك ولاشي
وامسكي اختك واعطيها كلمتين وعلميها انة نهاية صداقتهم وحبهم لبعض
سيئة جدا لأنة لو وحدة انكشفت قالت الزبدة كلهااااااا ويمكن تتبلى على الثانية كمان
واجلسي وراها وراها الين تتوب
وان شاء الله خيرررررررر

الله يستتتتتر على كل مسلم

__________________

أستغفر الله العظيم...أستغفر الله العظيم...
مالذي يحدث للمتزوجين والمتزوجات...؟
أختي الفاضلة..لا تستخدمي أسلوب التهديد لأنه لا يفيد بل يجعل المذنب يزيد في غيه وعناده..
كانت لي صديقة مخطوبة...وكانت تحدث شابا معنا في الجامعة..وعلمت أنا بالأمر صدفة ووصل بها الموضوع الى الخروج معه!
لم أدر كيف أتصرف...وخصوصا أن خطيبها صديق لخطيبي (زوجي) وهو انسان طيب جدا ومحترم...
استبعدت فكرة اخبار خطيبها فالفتنة أشد من القتل...
سألت خطيبي (زوجي): كيف أستطيع نصح فتاة تخون شريك حياتها؟
خطيبي حفظه الله عاقل جدا...أعطاني وسيلة ناجحة جدا...
تكلمت مع الفتاة بهدوء وأخبرتها بأني أعرف ماتفعله...حاولت الإنكار في البداية لكنها استسلمت واعترفت...
سألتها في البداية عن أسباب ما تفعله...ثم صرت أقص عليها الأحاديث والروايات والذنب الكبير الذي تمارسه...خوفتها من عقاب الله...
ثم اتجهت الى الجانب الإجتماعي وسألتها: أتعتقدين أن هذا الشاب لن يخبر أصدقائه وزملائه عنكِ؟ وماذا عن سمعتك؟ أتعتقدين بأن خطيبك لن يعلم في النهاية؟
ثم طلبت منها ان تتخيل الموقف بالعكس بأنها هي من تتعرض للخيانة من خطيبها...
واذا بها تنهار بالبكاء...
ووعدتني ألا تعود لخياتنها...
عزيزتي استخدمي أسلوب اللين والنصح وان لم يفد ذلك معها فعند ذلك سيكون لكل حادث حديث...
تحياتي..

__________________