مشكلتي مع زوجي وطبخ والدته.. - الصفحة 5 - منتدى عالم الأسرة والمجتمع

06-12-2009, 08:03 AM

#41

لقافه

عضو نشيط

تاريخ التسجيل: Nov 2005

المشاركات: 148

اقتباس:

المشاركة الأصلية كتبت بواسطة بنت مكة2008

من جد حرام عليكم لو كل واحده حطت نفسها مكانها ماكان كتبتوا كده ممكن الاسلوب غلط بس معها حق والله لو شخص يدوا تلمع وياكل بيدوا من الطبيق الرئسي مااكل ولا اذوق حتى في شي اسمو ملاعق ولاتقولوا دلع كل واحد حسب مااتربى واتعود شكلو في فروق طبيقيه بينكم بس الاهم لازم تتعالج حاولى تعرضي مشكلتها على طبيبه نفسيه وشوفى علاج انتى وزوجك مسكينة لازم تتعالج الله يشفيها ويعافيها ولا يبتلينا الاعضاء فكروا في المراءه العجوز فقط وماحسوا بيكي عشان كده مالقيتى حل لازم نشوف المشكله من جميع الجوانب مو من جانب واحد

الله يعينيك

محد جبرها تاخذ من هالعيله الي تاكل بيدها وماظن في فروق طبقيه بالاكل وين احنا وصلنا للاكل وصار في طبقات

اما انت الي مستقرف من يدها ومستقرف تاكل بدون ملعقه بسالك سؤال
هاليد مو ربة الزوج الي ماخذتو !!!!!!اشوفو مامات ولاصارفيه شئ وكبر وتزوج وحده مثلك وجاب وحده
تستقرف من يد امو وتستقرف انو ماتاكل بملعقه .
الله لايبلانا ويرفع عنك تفكيرك

06-12-2009, 01:22 PM

#42

قمـر 14

عضو جديد

تاريخ التسجيل: Dec 2009

المشاركات: 17

ماعليه اخواني واخواتي انا اعتذرت لزوجي والحمد لله قبل اعتذاري بعد ما تدخل بينا زوج اختي واهو اللي ردنا لبعض .. الحين احنا مثل العسل واشكر كل الاعضاء اللي عطوني الحلول وساعدوني واللي فهمني وحط نفسه بمكاني واللي اتهمني وسواني كأني مجرمه عالعموم الله يسامح اللي ما فهمني

صح انا اسلوبي ماكان كويس بالكلام لكن هذا اللي صار وانا ما كنت حابه اكذب عليكم أو أزيد شي وإلا اغير بالكلام قلت بكتب اللي صار بالحرف ...

عالعموم بقول لكم وش اللي صار

يوم ثاني من اللي صار رحت عند اهلي لأني متعوده كل اسبوع اروح انام عندهم بهاليوم لأن زوجي يحب يسهر مع ربعه فأخليه بهاليوم ياخذ راحته وانا عشان ما اقعد بروحي اروح عند اهلي انام عندهم واغير جو ..

الموهم يوم ثاني الصبح اهو اتصل لأمي وقال لها كل السالفه .. طبعاً امي عصبت ما ترضى بالغلط " تربيتها ما تبيها تروح بلاش " تركت طباخها وجت لي تركض والشرار طالع من عيونها وهي تناديني يافلانه صج الكلام اللي سمعته ؟؟

انا ما كنت اعرف عن شنو اهي تتكلم .. قلت لها وش فيك ماما ؟؟ قالت لي زوجك اتصل علي وخبرني بإللي صار وقال لي انك ما تحترمين امه وقلتي عنها كلام ما ينقال وكذا ..

بس انا صرت ابكي لأني وايد وايد حساااااااااااسه لدرجه انكم ما تتوقعون لأي درجه .. كنت اقول بيني وبين نفسي ليش يقول لأهلي بإللي صار المفروض يكلمني مباشره ويحط حل او حد لهالمشكله .. رغم اني غلطانه بس بقول لكم لأن كلام الصج ما ينزعل منه لازم يحط حد لأن مهما يكون هذي امه

فكنت اقول لازم ما يقول لأحد ويعطيني فرصه اتكلم واقول اللي عندي واهو بعد يقول اللي عنده وانا اسمعه واذا ما انحلت المشكله بعدين يقدر يفتح السالفه مو على طول يخبرهم اليوم اللي بعده

طبعاً جت وهزئتني وما سمعتني رغم انها تعرف اطباعي .. انا كنت ساكته ما تكلمت لأني صج غلطانه وبنفس الوقت احس بشي قاعد على صدري .. بعدها خليتها تهدأ وقلت دامه فتح معاها الموضوع انا بقول لها ليش اقرف وبصراحه .. يوم هدأت قلت لها كل شي .. اهي قالت لي من حقج تقرفين لأني انا شفت ايها مو طبيعيه والله يا ناس لو مو عيب كان صورت ايدها ووريتكم اياها بس تربيتي ما تسمح لي اسوي هالشي ..

اهي فهمتني وقالت لي لازم تعتذري لزوجك لأن مهما يكون هذي امه وانتي اللي قلتيه مو عدل اسلوبك خلاه يطفش

المهم بعدين رحت اتصل له بس اهو ما قام يرد على اتصالاتي ارسلت له مسجات اعتذار بعد ما كان يرد .. من الصبح الى الليل وانا احاول بس بدون فايده .. اخذت السياره ورحت لبيتهم بس ما شفته .. عاد اخذت الورقه القلم وكتبت له كم بيت شعر عن الاعتذار " طبعاً من النت سرقتهم " هع هع .. وكتبتهم له بورقه وطبعت عليهم بوسه من الروج الزهري الكشخه مو اي لون طبعاً "" من الغالي "" هههه .. امزح معاكم .. وكتبت له انتظرك بالمطعم الفلاني والساعه .. عشان نتقابل ويكون الجو هادي وبروحنا بعيدين عن الاهالي ..

عالعوم .. انتظرت لليل ما رد علي نفس الشي ولا كأني مسويه شي ورجعت البيت وانا مكسور قلبي عليه وكانت فيني العبره والغصه وعيوني مليانه دموع كأني نفس اللي بالرسوم ..

بعدها قلت بنفسي يمكن يبي ياخذ راحته ويفكر شوي مابي اضغط عليه بخليه شوي براحته .. انتظرت لليوم الثاني ما اتصل ولا رد علي .. عاد هنا انا طفشششششششششت قلت بس خلاص ما اتحمل وخاصه انه عودني كل يوم يسمعني صوته ويسولف معاي ونحش شوي بالناس اللي معانا بالدوام يعني عن مزح بس بطرق جونان طبعاً ..

يعني حز بخاطري وكنت متضايقه وايد .. بس ماعرف ليش سكرت جوالي وقلت خلاص اهو ما يبيني واكيد ورقه طلاقي بتوصلني دام انه ما يرد علي وكذا حتى ولدي خليته عند امي ما ادري عنه مسكين .. حالتي كانت مأساه .. اهو بالفتره يوم جوالي كان مسكر زوجي كان يتصل علي بس الجوال مسكر يوم كامل .. قام واتصل على زوج اختي وخبره بالسالفه اهو بنفس سن زوج اختي يعني متفاهمين بعدين طلبني زوج اختي وصار يكلمني بالموضوع ويقول لي هذا زوجك وانتي لا تتدلعين كثير اهو يحبك وكذا وخلاني اشتاق لزوجي موووت حتى من كثر شوقي قلت له انا ما عندي مانع اكلمه اصلاً انا كنت اتصل له وابيه يكلمني بس اهو ما يبي يعطيني فرصه ياريت لو يكلمني ...

بعدها اهو ابتسم وقال لي فتحي جوالك اهو يبي يكلمك .. عاد وين تلقوني ذاك الوقت .. طاااااااااايره من الفرحه وما صدقت خبر .. على طوووووول طرررت للجوال وفتحته بس اقول بنفسي ما بتصل بخليه اهو اللي يتصل عشان اهو اللي يبادر بالكلام بالاول .. بس اشوفه تأخر .. وانا متوتره اقول متى يتصل متى يتصل .. وظليت نص ساعه ما شفت شي .. وبعد ما مرت نص ساعه رن الجوال بإيدي .. مين المتصل ؟؟؟

حبيب قلبي وروحي وعمري زوجي الغالي وااااااااااااااي كان قلبي يق ذاك الوقت يوم شفت " القلب الحنون يتصل بك " واااااااي على طول اقول له .. الو حبيبي مع اسم الدلع حقه .. مع تساقط الدموع والقلب يدق بسرعه ومو مصدقه انه اتصل لي ومع التوتر .. وكأن أول مره اكلمه .. صار تحتي بحور وانهار من كثر لدموع .... ههههههه طبعاً امزح ... بس اعبر لكم فرحتي .. واهو كان هادئ ويضحك معاي ويسولف وتبادلنا كلمات الحب والغزل وتصالحنا وزارني في البيت وخذاني طبعاً الولد خليناه ما افتكرنا فيه واحنا طرنا بالسياره رحنا تعشينا ودلعنا بعض وفرحنا وآخر شي اخذنا الولد ورحنا عالبيت واحنا مبسوطين ولا كأن شي صار ...

هذي هي السالفه كلها والحمد لله ان زوجي رد لي وتفاهمنا على كل شي

كأن اطفال وربي الكل يقول عنا كذا حتى احياناً اقول اخاف من الحسد من كثر ما يقولون عنا كذا ما نزعل بسرعه ونرضى بسرعه

الحمد لله رب العالمين

06-12-2009, 02:48 PM

#43

بنت سليمانية

عضو نشيط

تاريخ التسجيل: Jul 2009

المشاركات: 178

الله يعينج شي مقزز
حاولي ماتخليها تطبخ وانتي اطبخي مكانها بس بدون ماتحسسيها بمرضها

__________________
اموت على حبيبي مسوري

06-12-2009, 03:11 PM

#44

روح الطير

كبار شخصيات المنتدى

تاريخ التسجيل: May 2005

المشاركات: 12,052

أختي الغالية

ماشاء الله يمكن اللي صار ( خلاكم تعرفوا معزة بعضكم لبعض ) و قربتكم من بعض

و رب ضارة نافعة ، الحمد لله إنه الأمور انحلت ما بينكم و ماشاء الله أمك باين عليها انسانة عاقلة

و أم زوجك حاولي بيوم تجيبي لها كريم ، المهم بأي طريقة

و لو إنك مانت عايشة معهم ، كنت قلت لك تحملي مرة أو 2 في الأسبوع أو كلي طبق تاني

و بالتوفيق لك يارب

06-12-2009, 04:51 PM

#45

ام لؤي34

عضو نشيط جدا

تاريخ التسجيل: Feb 2009

المشاركات: 1,616

الحين مو المشكلة بوزوجك المهم انتي مع حماتك ايش سويتي عملتي بنصايحي

__________________

06-12-2009, 05:11 PM

#46

قمـر 14

عضو جديد

تاريخ التسجيل: Dec 2009

المشاركات: 17

ام لؤي حبيبتي

انا بعدي ما شفتها بس خطرت في بالي فكره

اقول بسوي اللي قلتي لي عليه بس لو ما تقبلت مني اي شي وانا اعرف انها ما ترضى بأي شي لأني حاولت معاها وايد قبل لا اكتب لكم المشكله بس لقيت ان الكلام معاها ما منه فايده .. لأن اهي عنيده

بس اقول لو ما استجابت بحط لي شوي من الاكل اللي تطبخه وبعدين بعطيه الهندي اللي ينظف السياره اهو ولد فقير وعلى قده بيفرح فيه .. أو آخذه انا وارميه .. ومحد يدري واسوي نفسي اني اكلت منه بس خايفه من هالنقطه ان الله يعاقبني على هالفعله ليش ان اكو ناس جوعانين ما عندهم ياكلون وناس ترمي الاكل ... محتاره شوي "" بعده قيد التفكير "" ...

ما اقدر اسوي شي اشوف ان هذا هو الحل المناسب لأن اهي ما تقتنع بأي شي ابد ابد وبحاول افهم زوجي بطريقتي وبختار اسلوب حلو ومناسب انه ياخذ امه ويعالجها يحاول معاها بأي طريقه والله يوفقني ويقدرني ان شاء الله

وما عليك يالغاليه بخبرك بكل شي أول بأول افا عليك بس انا كم ام لؤي عندي ..

06-12-2009, 05:29 PM

#47

بنت مكة2008

كبار شخصيات المنتدى

تاريخ التسجيل: Apr 2009

المشاركات: 7,516

اقتباس:

محد جبرها تاخذ من هالعيله الي تاكل بيدها وماظن في فروق طبقيه بالاكل وين احنا وصلنا للاكل وصار في طبقات

لقافه

اكيد انتى مافهمتى انا اقصد ولا فهمتى معنى كلامى وجيتى طيران تردى

الا اقصدوا انها ممكن تكون اتربت في بيتها بي طريقه معينة وعاداتهم في طريقة الاكل غير
واهل زوجها متعودين على شي اخر

وفي الاخر كل واحد حر في طريقتوا الا تريحووا

بس مااحب احد يتسرع ويفهمنى غلط

اخت قمر14

اتمنالك التوفيق مع زوجك والله يبعد عنكم كل شر يارب ويوفقك وان شاء الله دايما مبسوطة

__________________
ياررب ارح قلبي وعوضني خير

07-12-2009, 12:18 AM

#48

لقافه

عضو نشيط

تاريخ التسجيل: Nov 2005

المشاركات: 148

[quote=بنت مكة2008;2296244]

لقافه
هلا اختي
اكيد انتى مافهمتى انا اقصد ولا فهمتى معنى كلامى وجيتى طيران تردى
لا فهمت كلامك وقريت كل ردود ورديت ع كلمة طبقي ليش اجي طيران بيني وبينك شئ نقاش
انت تحسست لو رجعت قريت ردي اسال في فروق طبقيه بالاكل!!طيب لنفرض فيه ماتوصل لهنا
الا اقصدوا انها ممكن تكون اتربت في بيتها بي طريقه معينة وعاداتهم في طريقة الاكل غير
واهل زوجها متعودين على شي اخر
متفهمه هالشئ بس هي اظن لما وافقت ع اهل الزوج وتعيش معهم اكيد حيكون في فروقات بامور كثير ه فتراعي هالشئ .بس ماتوصل الدرجه ذي
من الاستقراف وتخاف ع ابنها ماعجبها الاكل لاتاكل منو تحكي اي حجه تجلس مع زوجها اكراما لو ومراعاة للحرمه الكبيره ولا عشان عجوز يعني ماحتنتبه !!!ماتعرف تحكي ياعمه انا مسوي رجيم
واي حجه .هي تربت بيت اهلها غير بس هي الان مو بيت اهلها بيت اهل زوجها.وبعدين مرض الي بيدها مرض وحتى لو حكت هي للحرمه يودوها للمستشفى صعب اقناع الناس الكبار بالعمر بس ذا مايخليني احكي كذا .
لو فكرت انو هالحرمه الكبيره امك او جدتك صدقيني
حتنقهري ويكون تفكيرك واسلوبك بالكلامك غير مليون مره .
بس مااحب احد يتسرع ويفهمنى غلط
ان شالله مايكون في سؤء فهم

وبعدين الحمدلله مشكلتها انحلت

07-12-2009, 01:52 PM

#49

عاشق الجواهر

عضو متألق

تاريخ التسجيل: Nov 2007

المشاركات: 646

اقتباس:

المشاركة الأصلية كتبت بواسطة قمـر 14

.. أو آخذه انا وارميه .. ومحد يدري واسوي نفسي اني اكلت منه بس خايفه من هالنقطه ان الله يعاقبني على هالفعله ليش ان اكو ناس جوعانين ما عندهم ياكلون وناس ترمي الاكل ... محتاره شوي "" بعده قيد التفكير "" ...

خلاص يا اختي الكريمة المره هذي زوجك من كثر ما هو معصب عليك مارضي يكلمك وكلم أمك وخبرها

المره الجايه اللي تفتحين معاه هالموضوع بيوديك لأهلك وماراح يكلم امك ويقولها انك كررتي الغلطه

بيلحقك بشنطتك ويخليك عند اهلك

انا ما اوافقك على هالنقطة تعطين الأكل للعامل اللي يغسل السيارات بعلم زوجك ايوه اما من وراه وهو ما يدري انتي بتناولي الصحن للعامل يد بيد او بتحطينه عند الباب ؟

لو يشوفك احد من الجيران بيطلع عليك كلام ومو حلوة يدري زوجك

اذا تبين نصيحتي وانا انصحك من باب اني رجل واعرف كيف يفكر الرجل

وخصوصاً ان عندي ام وزوجتي وانا نسكن فوقهم

ألزم ماعلي امي لو تقول زوجتي ماودي انزل عند امك بس ماودها مو متقرفه او متضايقه من صفات امي او شئ مزعجها فيها

حبستها بالبيت ونزلت انا عندهم وتركتها بالأسبوع والاسبوعين

عقل الرجل يتعطل اذا تعلق الأمر بأبوه او أمه مهما حاولتي تقولين له انا مو متقبله منظر اليد وهي تطبخ

ماراح يتقبلها عقله الباطن لأنها امه

لكن لو فرضنا انه وقف عند مطعم وشاف يد العامل مقشره ومنظرها مو حلو بيكنسل الطلب صح ولا لا

خلونا واقعيين لكن من يد امه احلى من العسل وهذا واقع خلاص ما راح يتغير عاش عمره كله ياكل من هاليد

ويتغسل من هاليد ويقبل هذه اليد وهي بالنسبه له انعم من الحرير

وتفاجأ انك قلتي عنها هالكلام بينصدم منك فنصيحه

حاولي تتقبلين الموضوع قد ما تقدرين لاني مثل ما ذكرت زوجك اصبح حساس من هالناحية وبيراقب رداة فعلك

او تعذري انك مريضه وعندك مشاكل بالمعدة وماتقدري تاكلي الان

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه