بسم الله الرحمن الرحيم
اخواتي والله ربي عالم بحالتي الي انا فيها الحين
قبل الكلام انا حسيت انا هذا المنتدى الي انتوا فية اسم على مسمى يعني اسرة وحده
اخواتي مشكلتي غريبه ماادري كيف ابد أفيها والله ماادري من فين ابدأ
اخواتي واخواني اعضاء المنتدى انا بوضع مايعلم فيه الا الله واكتب وانا نفسيتي ربي اعلم فيها
بدخل بالموضوع
مشكلتي تكمن با اكثر من مشكله
انا لدي صديقه وانا لا اقول صديقه بل اقول اختي التي لم تلدها امي احبها جدا انسانه جدا خلوقه لو اوصف ماانتهي,علاقتنا لاتوصف مع بعض ماشاءالله والله كل يوم اتكلم معاها واسولف معاها يعني اخوات واكثر من خوات الي بقلبي بقلبها بالمختصر انا وياها قلبين بقلب واحد
المشكله مو هنا بالمختصر انا فتاه عمري 20
انا انسانه حساسه جدا جدا جدا خوافه وعنياتي بالمره راكزة مني مخفوفه بشهادة الجميع مع العلم اني
جميله جدا جدا جدا الحمدالله وهذه نعمه من الله وبشهاده الجميع حسنتا المظهر بس فيني طبع الاطفال كثير يعني دلوعه بالمختصر حسنتا الكلام كل مواصفات الانثى الجميله املكها والله الحمد ومن عائله جدا محافضه , بعض زميلاتي يستغربوا اني مااكلم شباب والله ياعالم عمري ماكلمت انسان مااعرفه يعني مو محرم لي وهذه نعمه من الله ان ربي اعطاني العقل لان والله انا اترفع عن هذه السخافات
,,,ياعالم مشكلتي ان صديقتي الي كلمتكم عنها عندها اخ اكبر منها خطبتي له وبعدين عمتها شافتني مره وخطبتني له وقالت لصديقتي كلميها وقولي لها ايش ردها ( انتو اكيد تستغربوا تقولوا وين امه ) امه موجوده بس هم عايشين بيت واحد وعماته هم الي ربوه يعني عادي عندهم يخطبوله
المهم قالت لي صديقتي ايش رايك من خجلي ياناس ماعرفت ارد وربي اني مااعرف ايش اقول لها
يعني مااعطيت لها رد بس هي ماادري ايش فهمت بس انا ماقلت لها لا
هذا الكلام كان قبل سنه والحين اخوها يدرس خارج المملكه يكمل تعليمه هو عمرهالحين يمكن 25 والله ياناس دايم تذكرلي مواصفاته دايم تذكره بالخير وكل شي زين, حنون , رزين , ماعنده لف ودوران
هي تحبه بالمره ,اخواني انا انسانه زي ماقلت لكم حساسه خجوله, ياناس انا ماقلت لها لا بس يمكن هي فهمت اني مارديت بأيه ولا لا يمكن قالت اني ماابيه, اخواني ماادري ليش تعلقت فيه مع العلم اني بس شفته بالصوره وعمري ماسمعت صوته ولا عمري التقيت فيه وجه لوجه والله ياعالم ماادري ليش تعلقت فيه يمكن لاني خوافه وعرفت مواصفاته وارتحت له ولا يمكن لانهي اعرفها واعرف اهلها ومااخاف من اي شي بعدين لاني اعرفهم والله يابشر انا مني فاهمه نفسي , والله ياناس ماابي اقول احبه لاني ماابي اضيع مستقبلي وبعدين ياخذ وحده غيري واضلم الي يعيش معي والله ماابي اسوي كذا بس ماادري ليش تعلقت فيه
حسيت اني لو اخذته وتزوجته راح اعيش احلى عيشه معاه , اخواتي واخواني ودي احد يقولي ايش الي انا فيه اخاف يفوتني القطار وانا انتظره , وبعد الانتظار هذا كله يمكن ياخذ وحده ثانيه غيري ,
الحين وبهذه الايام اتقدم لي ولد عمره 26 سنه كل المواصفات فيه زينه ,
انا اخاف لو وافقت عليه اضلمه معاي ويكون قلبي متعلق بالي تعلقت فيه والله ماابي كذا مع اني والله عمري ماسويت شئ يغضب ربي, بحب وغباء واشياء مالها داعي والله اني ماشيه على الصراط المستقيم زي مايقولوا , اخواني اخواتي ماادري هل انتضر الي تعلق قلبي فيه واستنى ولا ايش العمل والله انا استحي اتكلم مع امي الله يحفضها بامور زي كذا ومحد داري اني متعلقه بالولد هذا ولا احد داري انه خطبني حتى امي مااتدري ماقلت لها , يا ناس ودي احد يرشدني ايش العمل والله ماادري ايش اسوي
انا من خلال كلامي لصديقتي وضحت اني متعلقه بأخوها بس ماادري هي فهمت ولا لا والله ودي اعرف هي داريه اني متعلقه فيه ولا لا , مع العلم اني انا ويها مانخبي شئ عن بعض يعني كل الي بقلبها بقلبي والعكس صحيح بس انا مني جريئه عشان اقولها والله انا احب اخوكي من,,, جد بايخه ,,,
ماادري ايش اسوي اخاف يخطب وحده غيري وانا اتندم اني احتريته ,وانا الوقت يفوتني بالزواج
ماابي غيره ولا ابي احد غيره , انا تعلقت فيه وهذه المشكله , ايش الحل ودي بحل لمشكلتي الي انا فيها وللمعلوميه صديقتي ودها اخذه بس ماادري ايش الي يخليها تسكت انا اقول يمكن ماتبي تضغط علي والله ماادري
انتضر ردودكم واي سؤال انا موجودة ان شاءالله ابي

انا ماشوف انهم خطبوك خطبة رسمية؟؟؟

نسيت شئ...
انت تقولين انة يدرس برا
طيب انا انصحك انك ماتتعلقين فية كثيييييييييير...
واذا الله اراد وخطب منكم خطبة رسمية اسالوا عنة زييييييييييييييين......واهم شئ الصلاة

أختى الصغيرة : غزالة مزيونة..

إسمحى لى .. المشكلة بسيطة جداا ماتشعرين به من تعلق بالشاب الاول ..هو إحساس طبيعى جدا فانت ألفتيه بسبب قرابته من صديقتك العزيزة على قلبك .. وماوصفته لك عن مزايا .. وانت تشعرين نتيجة حبك لصديقتك انك لابد أن ترتبطى بهذا الشاب..
لكنه إعجاب سطحى ..فأنت لم تجلسى معه ولم تعرفى حتى صوته ... ونتيجة لصغر سنك وقلة تجربتك ..تعتقدين أنه حب..لا اختى:
لابد أن تفكرى بعقلك .. فالغالب زواج الأقارب او بين معارف الأصدقاء لاينجح دائما ..بل قد يدمر الصداقات والقرابة ..وكون الشاب يدرس بالخارج هذا سيجعله يتاخر بالزواج ..وقد يدخل فى تجارب أخرى..
لذلك أنصحك بالتفكير فى الشاب الثانى ولو كان جاهز وإرتاح قلبك له فتوكلى على الله ولاتأخرى الفرح ....صدقينى هذا أفضل..
بالنسبة لصديقتك ..لاعيب فى المصارحة .. قولى لها أنك تشعرين بالإحراج ... ولاتريدين ان تخسريها كصديقة ..لو كانت هنالك علاقة مصاهرة..
دعواتى لكى بالتوفيق,,

انتي لا تحكمي قلبك بل حكمي عقلك..
انظري للجانب الاجابي لكل واحد منهم .. انظري مين افضل من الاخر من ناحيه(الدين , الخلق , والوضيفه , الحسب والنسب) ولا تنظري لجانب تعلق قلبك له ..
وانا ارى ان صديقتك سكتت عن الموضوع بسبب ان اخاها سافر لدراسه ولا يريد الزواج بالوقت الحاضر لذالك هي خطبتك كلاميا وليس رسميا .. وانتي تفكرينه فيه وهو من الممكن ان لايفكر فيك ..اذا كنتي خائفه انك تظلمين ولد الناس الذي خطبك فلا تخافي فهذي هواجيس انتي تتوقعينها قبل الملكة . ما عليك فعله هو الاستخاره وربي يحلها ... ربي يوفقك

انا انسانه جدا ماتحب التغيير وخوافه يعني اخاف من اي احد مااعرفه وبحكم الولد الي خطبني رسمي راح نسكن مو بنفس المدينه الي فيها اهلي وهذا الي مخوفني اني مراح اتعود عليه وغير كذا مزال قلبي متعلق بأيها الي كل يوم تتكلم عليه , ابي كمان ردود منكم ايتها الاسرة الواحدة

السلام عليكم

اختي كم باقي على دراسة اخو صديقتك ..؟؟

انا مع اللي قبلي
فكري بعقلك لاتفكري بقلبك
واستخير الله كثير
وادعي انه اخو صديقتك اذا مالك خير معه انه يخرجه من قلبك

وربي يوفقك مع اللي يسعدك

غاليتي
اللي انتي فيه مو مشكلة ابد
طبيعي فتاة رقيقة مثلك يحكى لها عن مواصفات زينة في اي شاب راح تتعلق فيه بدون اي ترتيب
ومن الطبيعي ان البنت تشكر اخوها و تمدح فيه و تذكرلك كل المواصفات الزينة اللي فيه
لكن هل ذكرت لك عيوبه في يوم من الايام ؟؟؟؟اكيد لاء
ام انه خالي تماما من العيوب ...!
اللي حصل لك يا اختي حصل لغيرك كثيرات جدا
وطالما انك قاعدة تشوفي الجانب الحسن فيه فانتي راح تتعلقي فيه حتى ولو هو ما يبيك
طيب تعالي خطوة خطوة ...
في عدة احتمالات لسكوت صديقتك اما انها فهمت سكوتك انه رفض
او ان والدته رفضت
او ان الولد نفسه رفض او يبي وحدة ثانية
او انهم شافو وحدة غيرك انسب له
نصيحتي لك وانتي مثل اختي الصغيرة ..
فكري بالشاب اللي تقدم لخطبتك ولو تزوجتيه اكيد راح ترتاحي معه وتحبيه ..
لا تخلي نفسك مستسلمة للاوهام وفكري بواقعية اكثر
يمكنك اخبار صديقتك بالشاب اللي تقدم لك من باب المشورة و شوفي ردة فعلها
استخيري وفكري واخبري والدتك واللي فيه الخير راح يكتبه لك الله و طمنيني عنك

__________________

ربنا هب لنا من ازواجنا و ذرياتنا قرة اعين و اجعلنا للمتقين اماما

ماادري بس هي تقول يعني من كلامها راح يتزوج ويسافر ويكمل دراسه ,,,,,,
هذا الي فهمته من كلامها
يعني مراح يستنى يعني ودها يتزوج بدري