[align=center]السلام عليكم و رحمة الله و بركاته ..

بداية ترددت كثير قبل لا اكتب موضوعي .. خصوصا انه ما جا في بالي بيوم من الايام اني بكتب مشكلة في منتدى المتزوجين .. و اللي ما جا في بالي أكثر .. انه بهذي السرعة بعد زواجي

لكن شفت مواضيع الناس هنا و شفت كيف تفاعل الاعضاء معها حتى مع كون العضو صاحب المشكلة مو معروف لهم .. بصراحة تكونوا له اكثر من اخوان

و من هنا انا ارتحت اني اصارحكم مشكلتي و اطلب منكم المشورة

_ ترا الموضوع جدا طويل .. ما اكتشفت انه طويل الا لما خلصت .. و قلت ياااااااه كل هذا كان بقلبي هههه _ سامحوني

اممم طبعا من العنوان انا عروسة .. صار لي شهر واحد من تزوجت بس

بس احس اني كارهة حياتي و اللحين في بيت أهلي .. و مدري شنو النهاية ..

عشان تكونوا بالصورة من البداية

أنا : عمري 24 .. طالبة متخرجة حديثا
زوجي : 30 .. صيدلي

زوجي اللي انا اشوفه منه .. طيب بس مو مرة , كريم واجد , صادق

لكن بعد الزواج شفت منه امور كثيرة ما ترضيني ..

هو لا حنون و لا رومانسي مثل ما توقعته قبل الزواج , يعني اشوف منه الحب و الاحضان و الكلمات الحلوة اذا يبي مني شي بعلاقتنا اقصد .. و لا بالاوقات الثانية عادي يعني كأني زميل وياه بنفس الشقة ..

بعد الزواج اكتشفت ان اهتماماته بالنسبة لي سخيفة .. يعني يحب الموسيقى لدرجة قاتلة يعرف مين اللي عزف هالموسيقى و وشو الآداة اللي استخدمها و و متى عزفها و مين متزوج و شلون ماتت امه و ايش اسم شغالتهم .. حياتنا كلها موسيقى .. اعرف البعض يقول وش تبين .. بس لو سمحتوا حتى و هو معصب يسمع موسيقى ! كمان يحب يطالع الأفلام .. و لو تخلونه مليون ساعة عند التلفزيون ماعنده مانع .. عاد أنا ما احب التلفزيون ابد .. يحب الطبخ و دابل مرارتي لأني بصراحة ما اعرف اطبخ توني اتعلم , يعني حتى لما احاول اصير مرة سنعة و اجلس اخربط بالمطبخ .. يكسرني و يحبطني .. لأنه مررررة كويس بالطبخ فينتقد اللي اسويه و ما يعجبه .. فصرت أخاف اجرب شي في شقتي و ما اتشجع اطبخ .. صرت اروح بيت ابوي اطبخ لأخواني بس عشان اثبت لنفسي و له اني اطبخ كويس .. حتى لو ما عجبه .. صرت حتى لما اسوي شي ما اسأله وش رايه اصلا .. عجبه ياكل و هو ساكت .. و اذا ما عجبه لا ياكل و هو ساكت برضو

بعد الزواج .. اكتشفت اني ما احب جسمه .. المشكلة انه حده واثق من نفسه .. عنده من السمنة زوائد في جسمه و كمان هو مو رياضي .. اقول له روح الصالة مع اخوي سوو رياضة .. يقول لي انا جسمي مو مهيء يشيل حديد و عضلات .. اتعب , كمان لاحظت عنده مشكلة التثدي بدون سبب مرضي .. بس مضايقتني حيل لدرجة صراحة احيانا اكره اناظر فيه .. اقل له خلينا نروح عند دكتور يسوي عملية شفط ما تاخذ شي و بنج موضعي .. بس مو راضي يخاف على عمره يموت !!
ادري بتقولون شفتيه وقت الملكة .. اي شفته .. بس هو زاد وزنه شوي بعد الزواج و بالتالي زادت المشكلة و الشي الثاني اني بعد الزواج صرت اشوفه بدون ......

بعد الزواج .. اكتشفت انه يبغى يطلع من السعودية بأي شكل من الأشكال و انه مو عاجبه الوضع هنا .. و دايم يتحلطم و ينتقد .. هو دارس الماجستير بالخارج .. هو يقول لي من قبل انا ما بجبرك تكملين دراستك او تشتغلين بالخارج بس افضل برا عشان نطلع من هالمكان المتخلف و الناس المتخلفين .. انا كنت اعتقد ان بالفعل القرار بيدي .. لأني بصراحة ما افضل اني اطلع برا .. لكن هو صار يقول لي أنا مو قادر اتحمل اكثر , انا بطلع و انتي كيفك تبين تجلسين بالسعودية اجلسي .. تبين تلحقيني الحقيني .. انا جدا متوترة من هالسالفة .. ان طلع و تركني خلعته ههههه
بس اللي موترني اني الى اللحين مو لاقية جهة تقبلني كدراسة أو عمل بعد التخرج مع اني متفوقة بالدراسة بس هنا للاسف اذا ما عندك واسطة مكانك سر و هذا الشي قاهرني .. و بالتالي انا بكون مضطرة اني اعتمد عليه .. بس لو انقبلت راح اكون مستقلة عنه .. يعني لو بيطلع و أنا ما ابغى .. ما يأثر علي .. اقدر استقل عنه و حتى افسخه << وحدة تبي الفكة هههه


بعد الزواج .. اكتشفت ان لغته بالحوار لما يعصب جداً بذيئة .. يعني كفاية لا حب و لا حنان و لا رومانسية و لا وسامة إلا بعد تسب <<< وحدة عصبت
انا ما اعتقد ان في زوجين ما يتخانقون أو يختلفون .. لكن زوجي من نختلف على طووووول يثور و يقول كلام جارح و يسب ..
المشكلة انه ما يعتذر .. و لا يعتقد انه غلطان أصلا .. دايم يقول انتي اللي تخليني اعصب .. طيب هذا نقاش و ان كان حاد .. فكل زوجين في الحياة تمر عليهم اوقات يختلفون و يعصبون و يتخانقون .. بس مافي احد محترم يجلس يسب مرته .. لأنه ببساطة بعدين بيتراضون .. بس الجرح ما يختفي

بالبداية كتمت في نفسي و اصلا ما ارد عليه .. و لما يصفى الجو اقول له اني تضايقت منه و ان هذا الكلام ينحفر في القلب .. حتى اذا تصافينا و رجعنا يظل قلبي شايل عليك .. و يعتذر و يقول ما بعيدها و يعيدها

طبعا يتعذر و يقول هالكلام اذا كان له رغبة فيني .. بس غير هالوقت لو اموووت ما اعتذر .. و اذا فتحت معاه الموضوع ما يزيدني الا انسب مرة ثانية ..

يعني مثلا من الاشياء اللي يقولها لي ( طبعا بس لما يكون معصب و في مشكلة و لا غير هالوقت ما يقول ) ..

* الله يلعن يوم الزواج و الساعة اللي تزوجتك فيها يا حمارة
*مرة كان يصارخ و يسب و يقول لي لو رديتي و لا سمعت لك نفس و الله اكون ولد قحـ .. اذا ما اوديك بيت اهلك و اطلقك
*انتي قليلة ادب
*ما تستحين على وجهك
*غبية
*متخلفة
و غيرها ..

بصراحة انا وقت ما يقول لي هالكلام . أسكت و ما ارد عليه , اصلا اخاف منه لأنه معصب و أخاف يجيني اكثر ..

آخر مرة , كنا بنروح نتغدى بيت أهله , و كنت رايحة مرة من قبل و تأخرت أنا بصراحة شوي .. فهالمرة قلت ما بتأخر عشان ما يعصب , و جهزت نفسي بدري و جهزت ملابسه , في هالأثناء كان هو جالس يرتب الصالة و يكنسها _ هو عادي يساعدني بشغل البيت و حتى يطبخ لأنه يحب الطبخ _ و كان طبعا طبعا يسمع موسيقى .. فجاة طالع الساعة و حس انه متأخر على بيت اهله و قال يللا يا حلاوة بسرعة .. بسرعة .. يللا .. يللا بسرعة ( طبعا لازم يحرقني كل مرة يبي يمشي ) .. مع ان دايما احنا اول ناس نروح !

أنا قلت له طيييييب دقيقة . المهم لبست بسرعة و طلعت معه .. المهم قلت شدعووووة حارقنا كذا .. هذا و انت اللي متأخر أنا خالصة من بدري .. قال لي لاااااا انتي
المهم أنا قلت : و اذا تأخرنا خمس دقايق , البيت الأبيض مثلا ً ..


انا قلت كذا و ما بغيت الا روحي .. شفته طالعني بنظرة حقد .. و قال لي احترمي نفسك لا تغلطين على أهلي و لو بيت ابوك قصر الوليد مو هذا حدك .. و انتي ما تستحين على وجهك

انا فار دمي .. طبعا مع فوران حرارة جونا الجميل و كوني آردي شايلة عليه من قبل .. المهم قلت له انت اللي ما تستحي على وجهك

قال لي قليلة ادب .. قلت له انت اللي قليل ادب و احترم نفسك تراني سكت عنك من قبل مو لأني ما اقدر ارد عليك .. بس قلت احترمك كأنك تستاهل <<< لاحظتوا الانفجار !

طبعا انا بهالوقت احس طلعت اللي بقلبي .. شااااايلة عليه اهانات و سب شهووور .. احس قلت هالكلام برد قلبي شوي .. بس بعد لسه باقي بس سكت و قمت اصيييييييح

هو حسيت انقلبت نبرته و قال لي يا حلاوة خلاص هدي طيب .. بس أنا ما في فايدة دمي فااااار و كملت الصياح و راحت كشخة العروس اللي كنت كاشختها ع اساس بروح بيت اهله

المهم وصلنا بيت اهله و أنا في حالة يرثى لها .. نزل هو و قال لي نزلي .. أنا رفضت .. لأن وجهي صراحة بعد الصياح صعبة يشوفوني كذا و انا ينقال لي عروس مالت علي .. ما رضيت انزل ..

سكر علي السيارة و راح لأهله .. تخيلوا مع هالجو الحارق ما شغل المكيف .. أنا حقدت و رحت دقيت له هرن السيارة .. طبعا فضيحة <<< حسيت اني بزر و انا اسوي هالحركة بس والله قمت اضحك و انا اسويها خخخخخ

المهم جا و هو معصب .. أنا قلت في خاطري .. استعدي يا حلاوة تصدين يده .. لأني توقعت يجيني كف ماشي 120 <<< ادري مصطلحات شباب بس مشوا حالكم هههه

المهم انه ما سوى شي .. قال لي تبين ارجعك الشقة ؟ قلت اي ..

رجعني الشقة و قفل علي و طلع راح بيت اهله تغدى .. أنا بهالوقت كانت اعصابي خلاااااااص منتهية .. رحت رتبت كم غرض لي عشان بروح بيت اهلي .. طقت كبدي من سخافاته و اهاناته .. يا ليت على شي يستاهل .. لا حب و لا رومانسية و لا حنان ولا بعد وسامة

بس قلت ما بدق على اخوي ياخذني .. انتظرته لين جا و قلت له ودني بيت اهلي و هو ما كذب خبر اخذني و وداني و طول الطريق ساكتين

المهم ان اللحين صار لي ببيت اهلي يومين .. ما فكر حتى يجي يسأل عني أو يعتذر أو يطلب مني أني اجي معه ..

أول أمس .. اتصل قال لي : حلاوة تبين أجيك ؟ .. قلت برجع لبيتك اذا لي مكانة و احترام هناك .. قال اجل يللا سلام !!!!!!!!!!!!!!!!!!! ههههه ادري مو صاحي زوجي

امس كنت ابغى شي من الشقة عشان الدوام و قلت له يجيبه .. جابة امس و ما كان احد بالبيت لا اخواني و لا ابوي .. دق علي قال خلي احد من اخوانك يطلع ياخذه .. قلت له مافي احد . قال كذابة , قلت والله مافي احد .. قال طيب انزلي انتي خذيه و اذا تبين تجين معي تعالي .. و لا جلسي فيت اهلك اسبوع شهر سنة ما تفرق ..
انا سويت روحي ما سمعت .. قلت طيب .. جا حتى ما دخل و لا سلم علي .. مد يده من الباب عطاني الكيس و مشى ..

آسفة والله طولت عليكم بالهذرة .. بس احس قلبي مليااااااااااااااان .. و ابغى احد افضفض له و ما لقيت غيركم ..

المهم اللي حاصل اللحين .. هو دايم يقول لأهلي و أهله ان مافي شي و ان حلاوة تبغى ترتاح شوي .. و احنا نعرف نحل امورنا بيننا .. و لكن في الواقع بيني و بينه ما يبغى يحل الأمور .. يقول لي اذا انتي مرتاحة في بيت اهلك خلك , أنا بعد مبسوط !!

لكن أنا .. قررت اني اوقفه عند حده .. مو ملطشة له أنا .. لأنني ببساطة عندي كرامة .. و أنا لا حمارة و لا متخلفة و لا غبية ..
و هو الحمار و المتخلف و الغبي <<< امنيتي اقول له هالكلام في وجهه عشان يبرد قلبي بس أخاف صراحة منه
أنا مستاءة جدا للمستوى المنحط اللي وصلنا له .. ما كنت اتمنى اوصله ابد .. لكن بسببه وصلنا ..
ما أحس يحبني .. بالرغم انه يقول انه يحبني بس على قولته بطريقته .. يعني اقول له اشتهي اسمعه يمدحني بشي قلته و لا سويته , احب يقول لي كلام حلو بدون ما أبادر أنا , احب يمدحني قدام اهلي و أهله , أحب يسأل عني و يهتم فيني , احب يفاجأني بشي و لا هدية .. مع ان زوجي كريم بس ما يؤمن بالهدايا يحس انها سخافات .. اذا قلت له كذا يقول لي حلاوة انا احبك بس لأنك انتي بنت و أنا رجال يختلف تعبير الحب عندي .. !!

ما احس يهتم فيني و يحبني .. لدرجة بعد الزواج تقريبا بخمس أيام صر لي نوبة صداع الشقيقة .. انا معي من زمان و دايم يجي لي اذا ازعل او اتضايق , المهم جاتني النوبة بالليل و ما قدرت أنام أبدا من الألم .. والله والله و لا تحرك من مكانه و لا حتى جاب لي كاس ماي .. أنا بموت من الألم و الصياح و هو حده التفت علي مرة و قال حلاوة هدي نفسك و لا ترا بيزيد الألم و التفت على الجهة الثانية و نام ..
و كمان مع موجة الغبار اللي جات الشرقية انا تعبت مرررررة .. و كمان و لا كلف نفسه يسوي شي .. غير انه قال لي حلاوة اعتقد ان اللي معاك مو بس حساسية .. يمكن معاك pneumonia و تحتاجي azithromycin مدري كم غرام لمدة 3 ايام ( بحكم انه صيدلي ) .. و بس ما شفت منه شي و انا كنت تعبانة مرررة .. أنا بذيك الساعة تمنيت أشيل اكبر شي بالغرفة و ألوحه عليه عشان ما يقوم من مكانه من قهر الدنيا اللي صار بداخلي عليه

لما سألته بعدين .. قال حلاوة انا قلبي كان يتقطع عليك .. بس وش اسوي لك ..
نسى لما كان حلقه يعوره ما خليت شي ما سويته له بس عشان يطيب بسرعة و ما يعاني .. لانه بعد اذا يتعب يخاااااف على روحه مرررررة يصير كأنه بزر و يحوم كبدي
أنا حقدت و حلفت اني لو اشوفه قدامي يموت .. و لا اتحرك

ادري قصيت قصة حياتي كلها و قلت اشياااء واااااااااااجد و كأني متزوجته سنين مو شهر ..

بس من جد بصراحة كرهته .. احس مو طايقته ..
لا حب .. لا حنان .. لا اهتمام .. لا رومناسية .. و فوق هذا سب
احس بالتعاسة من تزوجت والله .. احنا بعد الزواج ما سافرنا شهر العسل لأن كانت الظروف المادية مو مرة و هو تكلف واجد بالزواج .. فجلسنا .. انا مليت و زهقت حياتي كله فيسي في فيسه .. على اساس ماخذين اجازة شهر بعد الزواج .. بس أنا من الزهق رجعت الدوام بعد اسبوعين من الزواج
انا كان عندي عادي ان وضعه المادي صعب بعد الزواج .. فهو أكبر فيني أني قنوعة و ما ثقلت عليه بالطلبات وقت الأزمة .. بس مع الراتب و الزيادة اللي جاته .. و الله و لافكر يشتري لي هدية و لا يطلعني مطعم على الأقل .. حتى عيد ميلادي كان قبل اسبوع .. و الله انه ما سوى ولا شي و لا جاب شي .. جاب كيكة هو نفسه فيها من زمان .. و الهدية قال بعدين يا حلاوة احنا لسه عندنا مسؤوليات كثير اللحين .. اذا جبت لك هدية بألفين و لا ثلاثة وش يبقى من الراتب .. و انتي ناسية القرض اللي ماخذينه .. سكت و ما قلت شي غير الهدية بمعناها .. و جاه بعدها دبل الراتب .. و كمان ما شفنا شي ..
ما احس اني عروس حالي حال عرايس خلق الله .. والله لما الحرام كان انتحرت و افتكيت من حياتي التعيسة و طز بأهله و فيه هو و في المجتمع كلهم ..



المشكلة القائمة الى الوقت هذا ..

أنا في بيت أهلي و مصرة أكبر المشكلة و اخليها فضيحة <<< وحدة مو .....ابد هههه
المهم اني ابغاه يوقف عند حده .. يعني مو كفاية متحمله شكله و قل اهتمامه و حنانه .. الا بعد مسبة و اهانات ..
هو راكب راسه و لا حتى يجي يراضيني و لا معترف اصلا انه غلطان .. معصب مني ليه اخلي الناس يدرون عن المشكلة و خصوصا ابوي و امي و امه ..

انا احس اني بالفعل مالي قيمة و لا احترام و لا حتى يحبني .. احس اني شي محطوط مجرد يفرغ شهوته فيه . احس بالفعل بحقارتي ..

انا بالفعل ما ادري وش ممكن يصير .. يجوز نتطلق .. لأني ما احس ان بيننا ارتباط كبير .. يعني احس من ناحيته انه ممكن يتخلى عني بسهولة .. و من ناحيتي أنا كارهته من كثر ما يجرح فيني .. انا سهلة ان الواحد يكسب محبتي مثلي مثل أي بنت .. كلام حلو و هدايا و خرابيط .. كل البنات كذا .. لكن من منطق رجولته الوضع مختلف ! مدري شلون يفهم الحب حضرته .. و بالتالي ما كسبني .. و بالنهاية ارتباطنا ضعيف

في ملاحظات بقولها .. يمكن تقلب راي الأخوة القراء من معي الى ضدي .. لكن بقولها عشان تكونوا معي بالصورة .. لاني بجد تعبت
اول شي انا كنت مخطوبة قبل زوجي هذا .. و انفصلت بطلب مني لبخله و رزالته معي .. لكن كان وسيم و كمان كان يحبني اعرف و متأكدة من هالشي .. لأن اللي يحب ينعرف .. مع مشاكلي مع زوجي صايرة افكر واجد بخطيبي السابق .. ما اقدر اقول متحسفة .. لكن اقول على الأقل على بساطة مواصفاته الثانية مقارنة مع زوجي الا انه كان يحبني و يموت فيني .. لكني انا اللي رفضته .. صايرة افكر فيه واجد و اعرف ان هالشي غلط بس مو قادرة امنع نفسي .. لأني بالفعل افتقد الحب و الحنان و الاهتمام

الشي الثاني .. و ارجوكم خذوني بحلمكم و ارجوا ان الله يشملني بعفوه
صراحة انا كنت اعرف واحد قبل زواجي لمدة ثلاث سنوات .. لكن من قبل زواجي بشهرين تقريبا انقطعت عن مكالماته تماما و هو كمان انقطع لأنه يعرف بزواجي .. هو انسان كثير محترم و مثل الأخو الكبير لي .. اشاوره و احترم رايه ..
في هالمشكلة اللي حصلت بيني و بين زوجي .. دقيت على زوجي البارحة حسيت اشتقت له شوي مع انه قاهرني بس قلت يللا اجي على نفسي شوي و اكلمه .. قلت له شخبارك .. قال بخير و مبسوط بعدين قال وش تبين .. قلت محتاجة اتكلم مع أي أحد .. ظل ساكت .. بعدين قال .. يللا اذا عندك موضوع قوليه و لا ترا انا بقوم أنام .. أنا مرررررة انقهرت و حسيت بالاهانة .. قلت له تصبح على خير .. و سكرت
و دايركت كلمت هذا الشخص اللي اعرفه و انا بصراحة ارتاح له كثير .. بعد السؤال عن الأحوال قلت له مشكلتي مع زوجي لأنه استغرب اني اكلمه .. فقال : انه ما يأيد اني طلعت من البيت و ان الافضل اني احلها و انا موجودة عنده .. .. الخ
اعرف هالشي من اكبر الأخطاء اللي ممكن تدمر حياتي الزوجية .. لكن و ما ابرر لنفسي .. زوجي هو اللي حدني اسوي كذا .. انا ما دورت عنده حب و لا حنان .. مع اني افتقد الحب و الحنان من زوجي .. لكن لقيت عنده ان احد يسمعني بفكر راقي و محترم و حتى لما نختلف يبقى الاحترام موجود على طول 3 سنوات الماضية..

اعرف قضيتي متشابكة جدا ..
لكني ارجو منكم ابداء آرائكم .. و محاولة فك خيوط مشكلتي المتشابكة لأنكم خارجها .. ربما يكون تفكيك خيوطها اسهل عليكم مني أنا اللي في قلب المشكلة و الدوامة

في انتظاركم [/align]

حبيت اعقب على كلام بس

بصراحه اختي هذا وضعك طبيعي لانك في بداية الزواج

ولختلاف الاوضاع من الخطوبه الرجل يتعامل مع خطيبته كالملاك ويحسسها انها اميرة زمانها وبعد الزواج يتقلب كل شئ

والله اختي ياما شفت في بدايه زواجي بلاوي مالها اول ولا تالي وصبرنا وبنات كمان صارت معهم كذا وصبرو الى ان يتاقلمو مع الجو ويصير الزوج والزوجه يتعدلو مع بعض الى ان يصبح العلاقه الزوجيه اللي يسودها التفاهم وبعدين صدقيني قلما تختلفو

ولكن الان في البدايه فقط

مايصير تحطي في بالك بس نقد الرجال فمهما كان لا بد له مميزات وانت لابد تحسسين بها مو كله نقد فيه

انتو عرايس عيشو حياتكم ولا تفكري بالخلع او الفسخ او الطلاق حرام ولو كل وحده تزوجت وفكرت مثل تفكيرك كان كل البنات مطلقات ليه؟؟؟؟؟؟؟؟؟؟؟؟

لابد الصبر ثم الصبر ثم الصبر انا فعلا اشجع عدم الانجاب في بداية الزواج حتى تعرفي معدن الرجل حتى لو كان من اهلك ولكم مو معنى ذالك تفكيرك بالطلاق

صبري اختي ولا تتشائمي توك في بدايه الطريق والله يسعدك

مرحبا ..

ذكرى اشكرك كونك أول الموجودين ..

ذكرى أنا اعرف انو طبيعي الاختلاف و أني اكون مو متعودة على جوه .. بس فرق في نوعية الاشياء اللي مختلفة علي و مو متعودة عليها ..

انه يسبني و ما يحترمني .. ما اعتقد ان فيه احد في الحياة يبغى يتعود على المهانة ..

قولي لي يا ذكرى كيف احبه و اتعلق فيه .. مع فقدي للحب و الاحترام و الاهتمام و الحنان بجانبه

كيف احبه و اعيش وياه .. و هو ما يحبني اصلا

انا لو اني وحدي في الحياة .. و ماي مجتمع راح يتكلمون عني و ماعندي اهل لهم سمعتهم بين الناس

كان تطلقت منه و لا فكرت فيه .. بس خايفة .. و بنفس الوقت تعبانة ..

عزيزتي سأحاول الرد عليك لا حقا لكن استوقفني ما ذكرتيه هنا :لا تطلبي الطلاق من أجل المجتمع .. بل تذكري عزيزتي أن الزواج رباط مقدس لا يهدمه الإنسان إلا بعد استنفاذ كل الطرق ..

حفظك الله ورعاك ..

__________________
{ اللهم صلي وسلم على محمد وآله وصحبه تسليما كثيرا }

الود والمحبة من الرحمن..والبغض من الشيطان

إذا كان متعلق إلى هذي الدرجة في الموسيقى..كيف صلاته ودينه..

وأنتي بعد كيف دينك ؟؟

اتقوا الله وتقربوا له..وعينيه انه يبعد عن الموسيقى بالتدرج وراح تكبر المودة بينكم..

بالتوفيق..

والله أنا امنية حياتي انه يفك عن الموسيقى ..

هو من الناحية الدينية كويس .. محافظ على الصلاة .. بس بصراحة ألاحظه مو كثير يهتم ان الصلاة على وقتها و كذا ..

انا يألمني هالشي .. مرة تعرضت للهواش منه .. بسبب اني صحيته لصلاة الفجر و هو كان نعسان مرة .. مع اني والله صحيته برقة و نعومة عشان يقوم .. بس مافي فايدة ..

بصراحة كنت اتمنى ان مستوى تدين زوجي أكثر من كذا .. لكن الله يهديه و يصلحه .. هو ما يفوت صلاة لكن عاد الله يهديه على التوقيت ..

و لا أزكي نفسي ..

انا بعد .. أحافظ على صلواتي في أوقاتها ان شاء الله و صيامي .. لكن ما اعتبر نفسي متدينة ..

عشان كذا كنت اتمنى زوجي على نسبة أعلى من التدين عشان يساعدني .. لكن شكلي أنا اللي بساعده . الله المستعان ..

لكن بس بقول نقطة ..

هو شكله من طوووول موضوعي ضاعت القضية ..

سؤالي اللحين مو كيف اخلص زوجي من الموسيقى مع ان هالشي منرفزني فيه ..

سؤالي أني جالسة في بيت أهلي و مهددة بالطلاق .. و كل واحد فينا معند .. و السبب سبه و اهاناته لي .. فما رأيكم

وش اسوي عشان اطلع من هالمشكلة ؟؟

اختي الكريمة ارى انك الغلطانه في عدة امور:
1- علاقاتك السابقة قبل الزواج ومقارنتك لزوجك بهم يجب عليك ان تتقي الله وتقطعي هذه العلاقات وتحمدي الله على هذا الرجل فهم متعلم ومثقف هل تسمين الاهتمام بالموسيقى تفاهات الموسيقى فن راقي اعلم انه محرم سماعها ولكن اهتمام الشخص بها دليل على ذوقه الرفيع .
2- انت تنظرين لزوجك باحتقار فدائما تصيفنه بالبدين وانه غير وسيم - لايعيب الرجل سوى اخلاقه ودينه
3 - ردة افعالك العنيفة تجاهه فكما ذكرت هو يكنس الصاله وانت تتجهزين وفي النهاية تردين الجميل بانك لاتذهبين معه لبيت اهله وتسخرين منهم .
اختي الكريم سامحيني لقسوتي عليك فانا اتمنى لك الخير والسعاده انت من بيدك اسعاد نفسك اوجلب التعاسه لبيتك حرام عيلك اللي تسوينه في نفسك وزوجك .
اجلسي مع نفسك جلسة صادقة واكتبي حسنات زوجك وسيئاته وكوني عادله وقارني والله راح تشوفي انه حسناته اكثر
اكتبي حسناتك وسيائتك وقارني بينهم وكوني صادقه ايضا.
قفي امام المرآه وتخيل حديث بينك وبين زوجك تخيليه امامك واديري الحوار بينكما (كوني قبلها في حالة ااسترخاء تام وتنفسي بعمق من انفك واخرجي الهواء من فمك على دفعات وبهدوء رددي كلمة الحمدلله كرري التمرين حتى تصلي لمرحلة الهدوء التام) تذكري ان زوجك نعمه وليس نقمة
عامليه بحب ولاتستعجلي النتائج كوني صادقة مع نفسك اجعلي معاملتك لزوجك مع الله وبالله.
بادري بطلب الحب والحنان منه اقتربي منه فهو زوجك وحبيبك وليس لك احد سواه رددي دائما في نفسك هذا الشخص حبيبي صديقي روح قلبي ولن ارضى برجل سواه .
لاتدمري حياتك من اجل اشياء بسيطة تقدرين على تجاوزها.
اتصلي على زوجك وعودي لمملكتك ولحبيبك ولا تجعليه يفكر بالزواج من اخرى فانت احق امرأه به .
اطلبي المساعده من مستشار اسري ابحثي بصدق واعقدي العزم على الذهاب له وخذي بنصيحته .
انالااعتقد انك فقط الضحية فربما هو الآخر يعاني يكفيك انه لم يخبر اهله بما يدور بينكما ويريد اصلاح الامور بنفسه.
رأي في شخصية زوجك أنه انسان متعلم- مثقف - واعي - طموح- صبور .

للمرة الاخيره اقولك ارجعي لبيتك ترى والله اخذ طياره من جده واسحبك على بيتك هاهاهااه

تمنياتي لك بالسعاده وآآآسفه على قسوتي عليك ... اختك غاده

ان لله وانا اليه راجعون ,, وش سالفة هالعرسان مع ازواجهم لازم يمر طاري الطلاق عليهم..

عادي يا قلبي بلحظات الهواش تمر انواع الالفاظ من الزوج المصون (حيوانه \ كولي ..../ ) مرات نطنش ومرات نتحلطم
ومرات نرجع الكره علشان يعرف ان الله حق ..

جلوسك عند أهلك ماله داعي ارجعي للبيت قولي والله اشتقت لغرفتي الجميلة خخخخخخ , اشتقت لمملكتي الحلوه ..

الحل ياقلبي بالاستغفار والدعاء بان يجعلك قرة عين له وتكوني قرة عين له , وان يديم الله بينكم المودة والرحمه

طلبك للطلاق مال امه داعي طالما محافظ على فروضه ..
وباستطاعتك تغيرين زوجك الى انسان عاشق هيمان بانسانه لقبها حلاوه , خليه ما يقادر يفارقك , خليه يموت فيك حبا وعشقا ..

اي شئ تسوينه له انويه تقربا لله مو علشانه, يعني وانتم جالسين بلحظات فضاوه قولي وش رايك حبيبي نستغفر سوى او تجيبين المصحف تقرونه او تحفظونه وتسمعونه لبعض ..

اذا تهاوشتوا وقالك ياحماره قولي الحماره وش تبي تتزوج بالله ؟؟ اكيد حمار زيها هاهاها هاها,,عادي يابنت الحلال وسعي صدرك ..
اقلبي الهوشه الى ضحك ونكت وتعليق عليه وبنفس الوقت بردتي قلبك ..وخلاص تنسين السالفه ,,بعده سولفي طبيعي

بس هو من النوع اللي يكابر ومايبين حبه لك ..

[

اقتباس:

اذا تبين تجين معي تعالي .. و لا جلسي فيت اهلك اسبوع شهر سنة ما تفرق]

يبيك تجين بس يكابر

مع اني ماشوف مشكلتك ذيك المشكله ,

برجع اكمل هذرتي لاخلصت شغلي ,,اهم شئ انتي روقي واستانسي ولاتخلين احد يكدر خاطرك ..[/COL

حبيبتي عارفه انه غلطاان بالاهانات ميه بالميه وحاولي تتفاهمي معه على انه يبطل هالكلام واذا مانفع كلمي اهلك يكلمونه

والحب يجي مع التعود والعشره

الله يسعدك اتمنى من كل قلبي تنحل كل مشاكلك