[align=right]السلام عليكم ورحمة الله وبركاته
حبيت اذكر لكم معلومات مبدئية ممكن تساعدكم في تصور الموقف وانكم تتعايشون معي
البيانات الشخصية
العمر:20
الجنس: آنثى
الجو الأسري في البيت ( العلاقه بين الاب والام ) : ...........................الحمدلله كويسه
مستوى التعليم .. ادرس سنة 2 بالجامعة ولله الحمد ماشية اموري ..
اولا حابه اشكر الاعضاء واشكر القائمين على هذا القسم الرائع بعد تردد كبير قررت اضع مشكلتي
و بحاول اختصرها ان شاء الله .
الحمد لله ربي انا على قدر من الجمال ومقتنعه بشكلي وراضيه عنه وبفضل من ربي اول ماصرت بسن زواج من دخلت الثانوي والخطآب صايرين طوابير على بيتنا بس انا كنت متمسكة بمبدأ (ان الدراسة اهم على الاقل اخلص من الثانوي )وصرت أرد كل الخطاب اللي يتقدمون لي ولمن عقلت شوي ودخلت الجامعة وصرت اسمع خوياتي اللي ملكت واللي تزوجت واللي جاها ولد يعني مثل ماتقولون تحمست اجرب شي جديد ..وقلت اول مايتقدم لي شخص هالمرة على طول بوافق ودعيت ربي يرزقني بالزوج الصالح وسبحان الله بنفس الشهر يتقدم لي حول10 اشخاص _وربي من غير مبالغه_ 3 منهم جاهم الرد سريع رفض ولكل شخص سببه والباقي بدايةً كان ولد صديقة ماما وزميلتها بالعمل والله شاهد اني احبها واعتبرها مثل خالتي وولدها مايعيبه شي لكن الوالد الله يحفظة جلس يطلع اعذار سوالف النسب والحالة الاجتماعية والاقتصاديه ومن هالكلام ...) وبنفس الاسبووع كان استقبال اختي وحضروا ضيوف ووحدة منهم خطبتني لأخوها وانا اول ماعرفت نوعا ما انبسطت قلت فرجت وفعلا جو الأهل وشافوني والحمد لله عجبتهم والولد برضو موافق على مواصفاتي بااااقي الحين الوالد كل مافاتحوه بالموضوع ينرفز ويقوم من المجلس وبرضو بعد 3 شهوور رفضت الخطبة هذي بعد حتى اهل الولد عصبو واخذو موقف وصلني كلام انهم كانو ناوين يفضون الخطبة ويقولون خلاص مانبي بنتكم .. ومااخفيكم ان الموضوع اثر فيني .بس الحمد لله ايماني بربي كبير ومااحب استسلم للإحباط ..وتقدم لي شخص بعدها وردوه اهلي برضو عشان سالفه هالنسب اللي عقدني وبيوم الجمعة بعد الصلاة مباشرة يرن التلفون وارد طلعت مرة تبي تكلم ماما وصوتها غريب اول مرة يمر علي سألت ماما قالت لي خطاب جدد وصاارت نفس المراسييم اللي قبل وسبحان الله ربي ماكتب شي مع ان كل شي كان متيسر بس بكل مرة اذا جيت ابوافق على شخص واوصل لأخر خطوة اتوقف ويطلع لي شي جديد ...نجي عاااد للطامة الكبرى والشي اللي ماتوقعته وللحين منصدمة منه ولد عمي تققدم لي انا اول ماسمعت الخبر انصعقت لاني ابد ماحسيت انه حاطني بباله او ناوي يتقدم لي وحنا من النوع اللي علاقتنا بأهل بابا قوية يعني مانسافر الا مع بعض ولا نطلع بر او بحر الا معهم بس ولامرة حسيت بشي اتجاهه او تلميح على الأقل وعاد ماما سألت مرت عمي قالت لها ليش ماتقدم من زمان البنت تتخطب لو يبيها كان حجزها من قبل قالت انا كنت مقررة اني اكلمك بس قلت البنت شكلها بتخلص دراستها وعلى مايستقر الولد ويكون نفسه ويكون جاهز ...وآكدت ان هذا اختياره من غير اجبار ولمن فاتحوه اهله بموضوع الزواج قال انا ابي بنت عمي
نجي للعقدة الحين ..
موضوع الزواج والخوف من المستقبل انا اتردد كثير لما انخطب واحس ان الزواج شيء مرة يخوف
ومآخذه فكرة مو كويسة عن زواج الأقارب ومرت على تجارب من اللي حولي مانجحو بحياتهم وتقاطعو الأهل بسبه العيال ومشاكلهم وانا مابي يصير لي كذا لاسمح الله
الشي الثاني :: عشان اكون صريحة معكم الولد مستقيم وماعليه كلام والكل يثني عليه بس انا مااشوف نفسي اميل له لانه شكله مو من النوع اللي يعجبني او يناسبني ولاتقولين لي مومهم الشكل اهم شي الأخلاق انا عارفه ان الاخلاق هي اللي تدووم بس اذا ماصار في قبول بالشكل كيف بقدر احبه واتأقلم معه وعيالي ماودي يطلعون يشبهونه واظلمهم
الشي الثالث: دآيم اسمع امه كله تقول فلانه <<اللي هي بنت عمي لولدها انا حاجزتها وحتى البنت عايشة ان هو ميت فيها ويبغاها بس هي دايم تقول لو تقدم لي مرآح اوافق
الشي الرابع :: اخووه اللي اصغر منه تقريبا بنفس سني يحبني <<على غفله العشق الممنوع
الشي الخامس :: بنت خاله سامعه انها تحبه ومتعلقه فييه وهي كبيرة للحين ماتزوجت
وانا لهالأسباب قررت اني ارفض الكل ..لان عندي قناعه انه ماجاني الشخص الي يناسبني بس مشكلتي مع امي وكلام الناس الي يضيق الصدر انا من النوع الي مايهمني الناس ابدا بس امي تتاثر وخصوصا اذا انتشر بين الناس اني ارد كل الخطاب بعدها مرآح يقربون مني وبشبع عنووسة غير كذا اخاف تتغير علاقتنا بعمي ومرته
السؤال هنا :: انا استخرت وماطلع معي شي ومااحس بالراحة لحد معين عشان كذا قررت اني ارفض الكل بس خايفة بعدها محد يتقدم لي واتندم على اني تشررطت ورفضت ولد عمي عشان هالأسباب وبالتالي اضطر اني اتنازل واقبل بأي حد وممكن انه يكون مو زين لانه دايم اسمع ان البنت بهالسن هي اللي تتشرط وتبي وماتبي بس بعدها اذا كبرت الرجال هم اللي يتشرطون عليها ويصيرون كأنهم متكرمين عليها انهم خطبوهاا .. فشرااايكم باللي حصل معي اوافق على ولد عمي او انتظر لمن يجي الشخص اللي رسمته في خيالي
نسيت اقولكم ان كانت لي علاقة مع ولد خالي بأيآم المراهقة بدأت بسوالف عاديه بعدها حبني بس انا ماكنت اميل له كنت اسولف معه فقط لانه افكاره قريبه من افكاري بس مع الايام شفت نفسي تعلقت فيه بس الحمد لله ماطولنا قطعت علاقتي فيه ..وللحين يوصلني سلام من اخته ويآكد لي انه يحبني بجنون ولالخظة تمر عليه مايفكر فيني
بس انا ابدا شايلته من بالي لانه بين العائلتين مشاكل وهو بعد لسى ماخلص دارسته .. تتوقعون له دخل في اني ارفض كل اللي يتقدم لي؟
اللي يعدي على هالصفحه ومايبي يعلق ياليت يريحني بدعوة والله يفرج همومكم يارب[/align]

صح يا طوابير ،، لا تكونين فوال و الدنيا رمضان و احنا ما ندري

إذا ما تبين من الاقارب خلي الوالدة بطريقة مباشرة أو غير مباشرة تبلغ قرايبكم بها الشئ

"يعني مثل ماتقولون تحمست اجرب شي جديد" أختي الله يرضى عليك هذا مب سبب كافي للزواج
جربي لبس جديد ،، أكل جديد ،، صديقات لكن الزواج ما فيه باجرب

و إذا الشخص الي رسمتيه في خيالك واعدك بخير انتظريه

و الله يدلك على الخير و يرزقك الصالح

دام استخرتي وارتحتي ليه ترفضيه؟؟؟؟؟؟؟
انتبهي اختي لايعاقبك ربي ويجيك بعده شخص مايخاف الله
دام الرجال مستقيم وماعليه كلام توكلي على الله ...والله نادرا بهالزمن تحصلين واحد يحميك ويخاف ربي فيك
الزواج انك تحصلين رجال كفووو ويحافظ عليك عشرة عمر.الزواج مو يوم ولايومين ولا هولعبه
اذا انتي مو مقتنعه فيه نهائي عطيهم رفضك لاتعلقين الناس خليه يشوف نصيبه كذا ترددك وتذبذبك بيدمرك
اقتنعي بالي الله كاتبه لك ولاتجلسين تقولي شكل وخايفه .ياما بنات اخذوا ملوك جمال وبالنهايه كانت حياتهم خيانه وتعيسه
وياما بنات اخذوا اشكال مقبوله وعاشوا اسعد حياه
لاتنظرين لهذي الامور ..انظري لسمعته ورجولته وصلاته اذا كانت هذي موجوده فيه توكلي على الله وخليك حازمه بأمرك
الله يكتب لك الي فيه الخير

ولك مثله يارب ~
وشكرآ للتعقيب

[align=center]كلامممك بالصميم
احتاج لـ أشخاص مثلك يرشدوني للصواب ويعرفوني اذا اللي سويته صح او انا غلطانة
والله انا ياآختي مثل ماقلت من قبل بالاستخارة ماحسيت برآحة لشخص عشان كذا فضلت اني ارد كل المتقدمين هذا السبب الوحيد وولد عمي صدق شخص مستقيم واعرف اهله
وفيه مميزات بس والله مااحس اني متقبله شكله
تتوقعين مع الايام وبعد العشرة اتعود عليه..؟
الله يجزاك بالخير ويفك حيرتك يارب [/align]

فيه تفاصيل كثيره مالها داعي تسبب تشويش للقارئ ! ,
استخيري الله في قريبك مرتين وثلاث حتى تحصل الخيره ان شاء الله .. بالنسبه لشكله اهم شئ يكون مقبول ,
بالمناسبه ابي اوضح لك ان الاستخاره تكون على ثلاثة اشكال ,
- اما ان تشعرين بالأرتياح لهذا الشخص
- اما ان تشعرين بعدم ارتياح
- او لا يحصل لك لا ارتياح ولا عدم ارتياح ويكون الشعور عادي في هذه الحاله الخيره هي التي تحصل
بمعنى لو تزوجتي هذا الرجل فهي الخيره ان شاء الله , وان حصل العكس فهي الخيره . اتمنى وصلت المعلومه !
اسأل الله لك التوفيق والسداد ..

بهذي الدنيا مافيه فارس احلاام ولا خيل ولا بطيخ لا توهمين نفسك كثير

فيه رجاال رااكب احمار هع هع

ياابنت ولد العم اخير لك من اي واحد

وحلات الثوب رقعته منه وفيه

واذا رفض ابوك بالنسب هذا شي طبيعي لان النسب ليس لابيك وحد وانما لجماعته والي حوله

الله يهديك استخيري وهيئي نفسك زين قبل تندمين والعمر يمشي مثل البرق

والي يطق بابك مره مارايح يطقه مره ثانيه

بالتووفيق