بسم الله الرحمن الرحيم
انا قصتي وذوقي وشخصيتي والوثبات الانتقالية الفجائية لشخصيتي في حياتي المفروض تدرس من قبل جامعة او جامعتين ..
وصل عمري 30 سنة واستطعت إني امتلك بيت في الرياض ووظيفتي مرموقة ومرتبي يفوق مرتبات 95% من الشعب ولله الحمد والمنّة... رغم انه كان هناك موسم أسود في حياتي تنبأ الجميع كلهم لي بالفشل والبطالة ولم يقف معي سوى شخص واحد لله دره ...الخلاصة هي انني اظطريت ان استخدم العنف واقوم بعملية فورمات كامل لعقلي وتثبيت نظام جديد شرس ضد من ظلمني او يريد ان يظلمني .. ووضعت قصاصي وقبره على المحك او أخذ حقي والحمد لله اني اخذت حقي بالقوة وتخرجت رغما عنه وبدأت عيني تبصر الشمس لأول مرة منذ سنين
بديت اسمع صوت العصافير الصباح
اصبحت انام ل8 ساعات متواصلة بعد ماكنت انام نوم مقطّع .
قبل هذا كله ومنذ ابصر مخي النور وانا اجد ذوقي مختلف تماما عن الاخرين
فأنا لايمكن ان اقبل بفتاة نحيفة ’ ريانة العود’ رويانة , إلخ هذي المصطلحات ان تكون زوجتي
لابد ان تكون من الرخويات.... ولحبي الشديد للرياضات استنتجت المعادلة التي تحسب الحد الادنى او الأقل من الوزن الذي اقبل به وهي كالاتي:
اقل وزن=(الطول بالـ سم - 100) + 45)
مثال : غزالٌُ جميل طوله 160 سم.. عندئذ لن تقبل معاملته إلا اذا كان الوزن
(160 - 100) + 45 = 105 كيلو.
لماذا ؟؟ والله لست اعلم لكن الفتاة السمينة أحس أنها تزأر بالحنان والحب والإخلاص.
وفوق هذا كله ,, قليل من ينظرون لزوجتك نظرة شهوانية . .. اذا هذه الزوجة تصبح لك لوحدك ولايشاركك فيها احد.. وطبعا تصلي وبيضاء ... غير ذلك لن يقدم ولن يؤخر في اي شي.

لكــن عندما تكون انت من صلب طبيب غدد والرحم الذي حملك رحم اخصائية تغذية فأعلم انك لوحدك ستقاتل رتلا كاملا كلهم يريدون عكس ماتريد تماما..
الحل؟ نحوّل الموضوع الى قضية دينية ونرضخ بأنه براَّ بالوالدين لن نتزوج من سمينة غالبا ستصاب بالسكري وذريتك سيكونون حلوين كالدببة في محلات الهدايا.
رضيت بالعنوس (الذكر من العنوسة) .. وبديت ابحث عن شي مفيد نقضي فيه اوقات الفراغ
لااحب السفر ولا المطاعم ولا البر ولا اللهو بالاسترحات ولا لعب الورق ولا البلوت ولا شيء من المعطيات
المتوفرة في بيئتي .. قررت اغير زملائي .... وفعلا استبدلتهم بزملاء ن الفلبين (الا 3 هؤلاء نخبة الشباب لاافرط بهم)... وعاشرت اخواننا الفلبيينين .. منهم مسلم ومنهي من يعبد بوذا إلخ .. انا يهمني في الشخص اسلوب تعامله معي واحترامه لمعتقداتي الدينية .. وكانو فيهم احترام وادب في الكلام ماتلقاه في ربعنا. وكلهم ريحتهم نفس ريحة الكريم,, ويتكلمون انقليزي وشعورهم ناعمه ونظيفين,. تس انه طقم واحد سبحان الله... فوق كذا لمن يكون الكلام كله بالانقليزية وهي ليست لغتك الأم وتأكل بأعواد خشب.. يبدأ مخك يتلذذ بالنعمة وتستطعم كل شيء فكنت أحس بنوع من الفخامة او ال ماعرف كيف اوصف... لكن ريحة منازلهم بسبب الكلاب الاليفة شي ماستطعت أتحمله حاولت اقتعم بالقطط لكنهم يعشقون الكلاب.. بالاضافة الى الرهاب من الكلاب
فكان هذا نهاية ذلك المسلسل اللطيف في حياتي ...
رجعت للبيت حيث لم يبقى احد ماتزوج سوى انا واختي الصغيرة الي بصف اول متوسط مدري ثالث.
قلت لنفسي : خلني اعطي وقتي كله لأختي الصغيرة ... لكني احسست بأني في موضع شك وأن هناك أعينا تراقبني وكأنني شرُُ او ذئب مفترس ... ومع من ؟؟ اختي..!!
تألمت كثيرا إن احد ينظرلي هكذا وانا سجلي ولله الحمد خال من هالحركات... ولو بخرب "اعوذ بالله" لن اخرب في بيتنا ...
وش الحل وش السواة ..؟؟ المسألة مستحيلة الحل في س.
سمعت ان في هناك اشخاص في احد مناطق المملكة تزوجو بفتيات من الجن,, الفكرة لاقت تهتيف كبير وتعالى صياح الجماهير في مخي لهذه الفكرة.. سألت اقرب 3 شفتهم ملتزمين : هل هناك شي في القران او السنة يحرّم الزواج من فتيات الجن؟
مالقيت .. انبسطت .. وبديت أتخيل الحياة مع زوجة جنية .. ستكون خالية من الكذب لأنه مايمديك تكذب . ثانيا الجن يتمثلون باشكال متعددة.. يعني ممكن زوجتي كل يوم تكون شكل معين (لكن يبقى نفس الصوت).. واذكر اني سمعت شيخ في شريط يقول إن أذكى أذكياء الجن ذكاؤه لايتعدى ذكاء طفل في التاسعة من العمر. يعني ماراح يكون هناك فيه قروشة وقلق وسوق وإلخ.. كلها كرتون حلاو وشريط كرتون ليدي ليدي او ساندي بل وتصبح العلاقات روعة.. لكني صدمت بأن الزواج من الجن مافيه الا شخص واد في تلك القرية والي كل القرية يعرفون ويقرون بأن أمه من الجن وأبوه من الإنس ,, ولكن كيف استطاع يكون كذا ... ماقدرت اعرف .. : (
لااريد أن اكون إمعة وأقلّد الناس
لو بتزوج انسية زواجي لن يكون الا في بيتي وذبيحة وحدة فقط
وكم نسمة من اهلها وكم نسمة من أهلي وباقي الفلوس نسافر فيها أحلى اسابيع العمر... لكن انا متمسك برأيي والوالدين متشبثين بأرائهم..
طبعا اخواتي وعددهن 5 , كلهن خريجات تفيظ القران والاخيرة لم تتزوج
وكلهن ينظرن الى ودة من بنات العم التي في نفس عمري والي لم يأتيها نصيبها بعد ... كل أخواتي يتمنون اننا نعقد القران على بعض..
سبق ان طر هذا الموضوع من وحدة منهن فرديت وقلت هي اذكرها من يوم كانت صغيرة
واذكر كل البنات وكل الحريم .. صور منحوته في مخي .. لكنها كانت نحيفة .. وزنها ول 65 .. وبشرتها حنطية...وهذي مخي لايقبلها ابدا ك أنثى... ليس تقليلا من قدرها لا والله
لكن هكذا مخي وهذا انا ولا ابغى اتغير ولا ابي غير الي بمخي والجواب نهائي.
هالموضوع اصبح يحوم على جمعاتنا وعزائمنا..
ودائما اكبر خواتي هي التي تشعل ثقاب الموضوع
مسكتها وهي اصغر مني ب سنتين وأم ل 4 أطفال وفهمتها ان ربي خلق مخي بهذا الشكل وإني لو تزوجت بنت عمي لن يكون هناك ذرية وإني أكره هذي الاجسام ولا استشعر فيها اي حبيبات انوثة وفهمتها اني اكبر منها واننا لازم نترم اراء الغيير وان من حسن اسلام المرء تركه مالا يعنيه ... كانت مخاضرتي والله درر المفروض تدرس في الجامعات.
الخلاصه هي مركبة قفل ماركة yale على مخهــا ,, وتبي بنت عمي تصير اقرب لنا ,, عشان تكثر شوفاتهم لها ويسوون الي يسوون,, والمشكلة لو امرني ابوي أو امي بالزواج ماراح اعقهم وارفض لكن بعلم أهلها اني مغصوب,,,
وبدت أختي تنفيذ مشروعها باساليب متعددة وطرق ادخال بينات لمخ امي وأبوي
تى جاني ابوي قالي مثل مادري وشو بالظبط لكن كأنه يقول بنت الجادة وبنت العم ولو باقت او باضت.. شي ي كذا..
عرفت ا الموضوع ربع استواء بمخ ابوي ..
رحت لمها قلت لها ليش ماتعقلين أنتي؟؟ سوت فيه تبحث عن الأجر واني المفروض اشوف والتمس التوفيق من الله عشاني باساعدها .. عرفت أن أختي "القرص محمي ضد للكتابة"
وش اسوي؟؟ لماذا الكل ضدي ؟ حياتي ويخطط لها غيري وكأني دمية .. الا يكفيني المواسم السوداء الي عشتها في الجامعة..
قررت إني استخدم هذي المتدخلة في حياتي كــ كبش فداء .. وعظة وعبرة لكل واحد يقرب لي او مايقرب لي ..
دقيت على نسيبي (زوجهــا) وهو يعمل في جهاز الشكاوي والمحاكم والقضايا .. وقد شاب نص رأسه المسكين من هول مايشوف , ومن التعب في العمل ,وكثرة اتصالات زوجة للمشاوير البايخة مثل اميريكان تشيز كيك فاكتوري, ودنكن دونات, واسواق الهودج .. فجيته من باب الحياة هذه انها هبة من الله
واننا المفروض نستطعمها ونستلذها الى قطرة بالحلال .. ولا نقتر على انفسنا عشان تشتري بيت ملك.. اخواننا في سوريا ينحرون ومجازر يوميه الله يكون في عونهم ونحن نمرض ونهّم انفسنا بالرفاهية والبذخ.
قان يتكلم عن قضية عنده ومعاناة ناس وقعد يقول لي الحياة هذي ممكن في لحظة تروح وتلقى نفسك في كفن و و و .. وكان وقتها ضعيفا .
قلت له وش رايك بكرة تجيني الدوام (طبعا انا المكتب الي جنبي كله طاقم نسائي مكون من 6 بنات مختلفات الجنسيات.. منهن وحدة الجميع في العمل يصفونها بملكة الجمال لكن انا اشوفها عادية ونحيفة .. ومحجبة .. لكنها بنت تاجر ملياردير ومع ذلك بيتهم عادي وسيارتهم عادية ومتواضعين ولا عندهم بذخ.. وهي الحق يقال .. الوحيدة الي دائما اشوف معها مصحف .. واذا تكلمت تكلمت بأدب وتستمع للكلام وترد بردود تخاطب العقل ... وتقدم لها كثير من الي في العمل لكنها ترفضهم . . تبي واحد مسلم بتصرفاته ومتعلم تعليم عالي.. حتى لو كانت زوجة رابعة مايهمها حتى لو كان عقيم مايهمها .. لكن يهمها معدن زوجها واهم شي متعلم .. وكل هذي المواصفات في نسيبي فهو باااررد ..وهو الي الجأ له في الاستشارة ودائما ردوده تطربني وعنده بعد نظر.. وقلت باضبط الموقف بينهم أول مرة باشوف الأرواح تأتلف ولا لأ .. وفعلا جاني من اليوم الثاني وكان عندنا معاملة فيها مشكلة قانونية فاتصلت بمكبتها وقلت لها ممكن لو سمحت 5 قايق من وقتك مع المعاملة .. وجت علطول وعرفتهــا على نسيبي ووظيفته وعرفته عليها وهي عملها في التدقيق. . وقلت لها هذا نسيبي جبته والاستشارة مجانية ولك ساعتين من الوقت .. حاولو تحلو لنا الاشكال الموجود في المعاملة.
صار بيهم نقاش لطيــف وعميق وتألق نسيبي في اسلوبه وردوده واستشهاداته من السنة والقران العقلانية
وهي انسجمت في النقاش وحست إنه إنسان يفكر بعقل ويبحث عن اسهل الحلول العقلانية الي ماتسبب مشاكل..
واضح انهم يصلحون لبعض .. مرة سبحان الله شكلهم متناغم
راحت هي وطلعت انا واياه بيروح يشيك على بند من البنود قبل يعطي رأيه النهائي
لكنه مايقدر يسألني عنها لأني أخو زوجتــه
لكن انا قلت له : تصدق اني لو اعز صديق او قريب لي بيتزوج ويسألني اذا اعرف أحد والله ما أدلّه على هذي البنت.. وقعدت اقول المميزات الي فيها والي هي كلها صدق..والامانة الي فيها واذا تأخرت عن الدوام توقع بوقت الوصول المتأخر و و و . وهي بنت التاجر فلان ... لكنها تجي بسواق هي تدفع راتبه وسيارة صغيرة عادية هي شاريتها بالتقسيط لأنها تبي تكافح وتبي تصرف على نفسها طالما انها تقدر وتبي تتحمل مسؤلية .. وقلت له تبي زوج معتدل لو كانت رابعة او كان عقيم مو مهم .. اهم شي تبي تجي للبيت عشان ترتاح وتروق .. ماتبي القلق والمشاكل .. وتدعو الله انها ترزق بزوج متعلم تعليم عالي "دكتوراه" مثل نسيبي ويعاملها بلطف ورّقة ويحن عليها وتعيش معه من عمرها قد ماتقدر من لحظات حلوة.
وقلت له ابوها التاجر فلاان .. ونسيبي قد تلاقى مع ابوها في قضية مقابل اجر مالي كبير.
قال لي مازحــا : شكلي لو بأتزوج بأروح لأبوها أخطبها ..
قلت له : اقسم بالله مايدفع مهرك وتذكرة شهر العسل حقتك انت وعروسي غيري .. لو يوصل الموضوع للدم... بس انت اجزم,
هو استغرب مرررة نسيبي من كلامي .. فيحسب اني بختبره او انه شك بالوضع .. قال طيب ترضى تسوي في أختك كذا .. قلت له اولا ماسويت شيء غلط ولا ساعدت الا في الخير ... ثانيا أنتم عائلتكم اغلبهم متزوجين على ثنتين وثلاث وهذي تمشي في جيناتك.. والمفروض اختي تجي تشكرني إني إخترت لها أحسن ضرة .. مارا تشوف منها الا كل خير وطيبة... ليش تبيني احس اني أخطيت,, اذا اختي بتزعل علي لأني نفذت تشريع سماوي جاء من الله من فوق 7 سماوات وهي دارسة قران وحافظته ..المفروض انها ترجع للأحكام الشرعية وتطبقها وتتمسك بالي يمليه الدين وليس النفس..

طبعــا وصلت الخبر لأختي اليوم بالتلفون .. .... وعلمتهــا إني نذرت للله نذر مادخل على بنت عمي إلا بعد ما أدخل نسيبي عليها.
صار مسلسل هندي وجاني كلام يوجع ,,, قلت لها انت السبب.. الكلام معك مافاد... يالله روحي لم بنت عمي خليها تلقى لك حل .. واعرفي اني لو ابيع الأرض الي عندي او البيت الي أملك واستلف ديون كلها عشان ازوج رجلك بهذيك البنت .. وباصرفها بنفس زكية وفرحة ,, وباكبر قصر وكروت بتروح لكل وحدة تقرب لنا لو انها في كون اخر غير هذا الكون الي حنا فيه.
طبعا يمكن انطرد من البيت اليوم .... لكن انسان مؤمن وأحب لنسيبي ما أحب لنفسي وابيه يتمتع بحياته عشان يروّق ويصير رايق في تعامله مع أختي
ولن اتزوج نحيفة ....
ف سبحانك يارب كيف خلقت هذي الدنيا .... غريبة
وحدة سمينة تنتظر زوج وواحد يتمناها ولا يطولها.
.
.

وأمانٍِ تحقيقهــــا تعذيبُ