رأي ان تنقطع عنها لفتره اتركها بدون اي مسج او اتصال فقط أرسل لها مصروفها و شوف عيالك عن طريق اخوانها او اختك ولا تكلمها نهائيا


يمكن المساله تحتاج منك ابتعاد عشان تحس انك وحشتها ويحتاج قلبها والله يهديها

الله يصلح الحال

الحين مريت وسلمت على ولدي وبناتي الثنتين الصغار وانا خارج بيتهم ، ومادخلت بيت اهلها ولاقابلت احد من اهلها سوا اخوها الكبير الله يذكره بالخير وعزمني ادخل للقهوه وتعذرت ،
ومع العلم الزوجه جالسه عند اهلها ، فأنا مع نصيحتكم وبمشي فيها ، وكل بعد اسبوعين اسلم على اولادي عند الباب ولاادخل عندهم ابد ، ومصروفهم ماشي شهريا ، والمدارس يروحون مع ابوها ويوصلهم المدارس ، وخلاص القرار ثابت من قبل اسبوعين معاد اتصل بها ولاعاد اراسلها حتى الله يفرجها ، فهذا اللي حبيت اذكره لكم ، وإن استجد شي جديد ، فبعطيكم خبر ، وانتم اهل المشوره ولانستغني عنكم ، وأنا بمشي على هذا الموال حتى الله يفرجها
والله يكتب بما فيه الخير

اخوي نصيحتي لك لاعاد تعتذر ابد ولو حصل نقاش خل شخصيتك قويه وقل انا اعتذرت واخطائي مو كبيره لهاالدرجه
ومابعتذر منك تبين الطلاق طلقتك تبين بيتك واولادك حياك

نصيحتي لك لاتهدر كرامتك وصدقني كل ماتقربت منها كل مانفرت اكثر .. اثقل

واللي مكتوب بيصير سواء طلاق او استمرار

لاتخليها تحس ان حياتك واقفه عليها ارفع نفسك

اقول لك الكلام هذا من واقع تجربه اهدرت كرامتي وكانت النهايه طلاق

الله يوفقك ويكتب لك الخير

قرأت لك بعض الردود

يااخي خف على نفسك اخطاءك بسيطه جدا بعض الرجال يضرب الحرمه وماتجيب سيرة الطلاق لأنها متمسكه فيه

ادعس على قلبك قبل تندعس كرامتك وانت محشوم

انت قلبك طيب ونقي

تذكرني بنفسي وكانوا الاقارب يقولون لي اتركها ماتستاهلك ماكنت اسمع احد

كنت في وضع مؤلم جدا ً ومستبعد فكرة الطلاق رغم تلميحها واسلوبها السيء كنت متمسك فيها

ظلمت نفسي كثير لكن صدقني بعد طلقتها ارتحت من ذاك الكابوس

ماتدري يمكن الطلاق راحه لك ولها

ومسألة انها تبكي يوم يكلمونها بالموضوع لاتتوقع انها تبكي عشانك

هي تبكي تبي الطلاق

معليش لو كنت قاسي عليك بس ابي اوضح لك قبل تنصدم

والله ان قلبي متألم من وضعك

وحط في بالك البنات كثير والبيوت مليانه بتلقى اللي تعوضك عنها وتنساها

وبترجع تلوم نفسك انك تمسكت فيها

الله يكتب لك الخير حيث كان

الله يكتب اللي فيه الخير

لاتجلس عند الباب تسلم على عيالك وتمشي كأنها اداء واجب ومهمه

خذ اولادك لبيتك وخلهم يلعبون بالعابهم هناك واجلس معاهم اليوم كله واطلع معهم مطعم وتعشوا وسولفوا واذا سألوك قولهم ماما تعبانه شوي وترتاح

وانت راجع اشتر لهم مايحبون ايسكريم او غيره وخلهم يدخلون على امهم ويسولفون لها عن اللي فاتها

خلها تنقرص وتحس وش راح تخسر وبترجع ان شاء الله

بس اذا كلمتك وقالت احبك لاتفز وتقول وانا بعد اموت فيك وبصبر وانا شاريك وانا وانا وانا لا ابعد عن هالموال

كلمتك قولها والنهاية بتخربين بيتك علشان غلطات صغيرة

احبك وتبكي وعايفتك لاتاخذ وتعطي بهالموال خلاص

والقلوب يقلبها الله كما يشاء اليوم عايفتك بكرة تموت فيك ويمكن العكس

الخلاصة اصبر وشوف وش بيصير ان كتب الله لها رجعه فالحمدلله ان ظلت تطلب الطلاق انا ارى تسرحها وتتركها تراجع نفسها وقت العده وراجعها يمكن تندم او تصحى لنفسها

وصدقني كثير اعرفهم أخطأوا اكبر من كذا وطلبوا حريمهم الطلاق وحاولوا يرجعونهم ورافضات الرجعه وبعد الطلاق يرفضون الرجعة وبعد مايخطبون تبدأ مراسلات الندم

والاغلبية اكملوا زواجاتهم وانا منهم والاغلبية تعلموا من اخطائهم وفازت بالتعدل الزوجة الجديدة لان الرجل تعلم من اخطائه

مع هذا الرد اصبر

__________________
يا رب خاتمة حســنة ، وزلفى ، وحسن مآب ..

اتصل بي المحامي اليوم ، وزوجتي راحت المحكمه تطلب الخلع ، وكلمني ، وقال انا حبيت اتصل بك واعطيك خبر قبل مايجيك الخطاب الرسمي لعملك وانت بمنصب حكومي وماهي حلوه بحقك ، وقال انا حاولت فيها ان ترجع بكلامها ، وذكرت السلبيات الماضيه ، ومن ضمن كلامها تقول انا عفته ، قال المحامي هل هو محافظ عالصلاه ، هل ، وهل ، وهل ،قالت كل شي ممتاز فيه ، ولكن السلبيات هي كذا وكذا وكذا وقهرني فيها ، وقالت خلاص نصيب وانقطع ومعاد اقدر ارجعله ،قلت والله ياحضرت المحامي انا نادم على كل شي مما بدر مني ، وأنا اعطيتها فرصه ولازلت اعطيها الفرص ان تراجع حساباتها وهي عند اهلها منذ 3 شهور ورافضه الرجوع ، وكنت ابغاها تهدأ عند اهلها وهي معنده وتبغى الطلاق ، وقلت ياحضرت المحامي ماهي حلوه بحقي تشتكيني زوجتي للمحكمه وبعد يومين يجيني استدعاء من المحكمه ، فأنت بعد اذنك اخررررج من الموضوع لو سمحت ، وأنا بكره بروح بنفسي للمحكمه واعطيها طلقه ، فإن ندمت خلال الثلاث الاشهر وارادت الرجوع فخير ربركه ، وان تعدت الثلاث الاشهر وارادت الرجوع فمعروف يحتاج لها عقد جديد ،
ملاحظه اخواني واخواتي الاعضاء /
الموضوع مافيه رجعه ابد ، انا اللي بروح بنفسي اروح المحكمه واعطيها طلقه من عند القاضي ، ولااجلس انتظر استدعاء من المحكمه وهي ماهي حلوه بحقي
وخلااااص هذا نصيب ، وأنا وكلت امري إلى الله ، واليوم بعد العصر كلمت اخوها الكبير الله يذكره بالخير ، وقال انا وابوي وامي وجميع الاسره حاولنا فيها وقالت اذا ماطلقني بروح المحكمه ، واخوها قال برتب لك الموضوع خلال هاليومين ، وإن رجعت فخير وبركه وان مارجعت فأعطها طلقه
وقال اخوها اذا طلقتها ، فلك مني ارتب لك الرجعه ، قلت متى ماتبغى ترجع فالله يحييها ، فهي ام عيالي وعندي ولد 10 سنوات وعندي بنت 5 سنوات وعندي بنت 4 سنوات ، فالحياه يحتاج لها تضحيه وتنازلات ، فإن ندمت ورجعت فأنا اقبل برجوعها وخاصه انا اللي سبقتها وطلقتها ، فلو هي سبقتني وخلعتني ، فوالله والله ماارجعها وعزة النفس عندي وكرامتي ماتسمح لي ، ،،،، اخواني واخواني الاعضاء ، اخواني المشرفين ، اخواتي المشرفات ، بهذي الدنيا ماتآخذ الا نصيبك ، والله هو اللي يسهل الامور ، اخوها الكبير صار بينه وبين زوجته خلافات مثلي ، وزوجته هي بنت خاله ، وحاول وحاول وحاول ان ترجع فرفضت فكانت معنده وتبغى الطلاق ، فراح نسيبي هذا اللي هو اخو زوجتي واعطاها طلقه وبعد شهر ونصف ندمت ورغبت بالرجوع ، فأرجعها له ، وحياتهم الآن زي العسل ، انا وانتم ماتدرون ، هو نصيب ، وقلوب العباد بين يدي الله يقلبها كيف يشاء ، فقررت قرار بكره اروح المحكمه واعطيها طلقه ، قبل هي ماتكمل الاجراء مع المحامي ، لاني قلت للمحامي اللي هي كلمته ،قلت له انت ابعد عن الموضوع وأنا اللي بأنهي الإجراء بنفسي ، وقال ابشر
،،، والله يكتب بما فيه الخير

انت سبق وقلت ان اهلها معك وقلت لك
لايكون بوجهك معك وبقفاك معها وبررت ذلك والان اخوها يقولك عطها طلقة ونا رجعها لك هو مارجعها لبيتك وهي على ذمتك بيرجعها لطلقتها انا اشوف دامها وصلت للخلع والمحامي و المحاكم قرارك سليم
ولعلها خيرة ماتدري والحمدالله ما نت ضايع انت وعيالك وبنسبة لزواج والله البيوت مليانة
عسى الله يوفق الجميع

__________________
سبحان الله وبحمده سبحان الله العظيم