الأخ ساري
اللي تمر فيه وضع طبيعي من مشاعر ملخبطه يوم بتحس انك تكرهها ويوم بتحس انك تحبها ومشتاق لها
لا تأخذ قرار نهائي الحين حول مشاعرك تجاهها لأنك بتتغير مع الوقت إلين تستقر مشاعرك تجاهها إما شوق وحب وإما نفور
اقرا كلام الأخ تحملتك كفايه زين واستوعبه وطبقه .. كلامه سليم جدا
لا تخلي حكاية دق الخشوم والتأديب هدفك الرئيسي ولكن سوي اللي فيه مصلحتك ومصلحة عيالك .


الأخ تحملتك كفايه
أتذكر مواضيعك القديمه زين واذكر لك بالتحديد موضوع بقسم ساعدني واذكر المكابرة الكبيره لطليقتك وشوفة نفسها عليك وما أقول إلا سبحان من غير احوالها .

__________________

اهم شي تهدا وتستوعب التغيير الحادث في حياتك

اقترح انك تاخذ اجازة وتسافر حتى تبعد عن الضغوط

[QUOTE=ساري الليييل;3500274]الأخ العضو / تحملتك كفايه ، اشهد بالله بكلامك انشرح خاطري ، ولكن انا من يوم استلمت صورة العقد كرهتها كره العمى وأكتب الآن من غيظ ، ومسألة قولتي بعد 6 شهور بوافق على رجوعها في حالة ندمت وتبغى ترجع ، فأنا عند كلمتي ولن اتراجع ابد ابد ، وانت نبهتني كلمه صدقت فيها وراح اعدل كلامي خلال هاليومين ، وهو كلمتي لاخواني اذا هي ندمت وتبغى ترجع فراح اراجعها بعد 6 شهور ، فأنا راح اقول حاليا كارهها واعطوني فرصه افكر وأتهيأ نفسيا ، والله يكتب بما فيه الخير ،،، وأنا بصراحه محترق قلبي وبالفعل والله ثم والله ان هي ندمت وارادت الرجوع فأقسم بالله لأحرق قلبها واكسر عينها وقلبها واخليها تبكي صح من قلبها ، واعطيها درس تموت ماتنساه ،، لحد يقول ام عيالك ، الآن هي اسمها المطلقه واتشرف باولادي ولا اتشرف بها ، سبحان الله ، سبحان من غير الاحوال ، اقسم بالله ياجماعة الخير لنزل بقلبي لها كره ، وحتى رقمها حذفته من جوالي ، وجالس اتهيأ نفسيا وبكره بروح اسجل بوقت اللياقه وخليني اعيش ياعم وأعمل لنفسي تحديث ، وحتى ان هدأت اموري فأنا لازلت عند كلمتي ، والله ثم والله ان ندمت واردت الرجوع فأنا اقول لنفسي بعد 6 شهور راح اراجعها ان شاء الله ، واللي بيسألني ، بقول كرهتها وهذا هو الحاصل وبقول لهم الله يكتب بما فيه الخير والحين مالي نفس فيها ،، عندي ملاحظه/ اولادي عندها بالبيت وا موافق على ذلك ، الولد ثالث ابتدائي عشر سنوات وبنت 5 سنوات وبنت 4 سنوات هم في الروضه ويداومون مع جدهم اللي هو ابو المطلقه ، وبزورهم بالشهر مره وباخذهم بسيارتي امشيهم ونتعشى سوا وارجعهم




استغفر الله العظيم ،،وش ذا الكلام،،عمر الطلاق ماكان عيب،،يعني انت الان تنعتها بالمطلقة سخريه بها ام انتصار لنفسك،،هل قرأت آيات الطلاق في سورة البقرة وهل قرأت كيف أمر الله كل من طلق زوجته بالإحسان اليها،،الله جلَّ جلاله أنزل آيات تتلى إلى يوم القيامه تتكلم عن المطلقات وكيفية التعامل معهن ،، ان قرأتها ستجد في طياتها الرحمة واللطف بهذه المطلقة وتذكير الزوج بحقها وتذكيره بفضلها وأن لا يجعل الغضب يتصاعد فيغطي على فضلها ثم يأمر بأن يمتعها الزوج بالمال مع انه قد طلقها ولكن تتطيبا لخاطرها فقال الرحيم الودود وللمطلقات متاع بالمعروف حقا على المتقين)

ارجو منك ان تهدأ وتراجع نفسك،،ولا تظن ان جرح المشاعر سهل فربما يكون قلبها قد انكسر من كلماتك الجارحة ،،وانت تعلم ان الشيء ان انكسر لايعود كما كان،،او ربما زوجتك تمر بأزمه نفسيه أو روحيه لاتعلم مايحدث حولها بل هي بحاجة من يأخذ بيدها ويدعي لها،،،ولا داعي لأن تتوعدها بأن تكسر عينها ،،فقد فعلت من قبل ،،وان كرهتها فإما إمساك بمعروف أو تسريح بإحسان لا تفكر ارجعاها لتنتقم
أصلح الله شأنك وهدانا إلى الطريق المستقيم

أولادك جب لهم جوال عشان يكلمونك وتكلمهم براحتك متى ما بغيت وبغوا
وحدد لهم نفقه ثابته تتناسب مع دخلك وأرسلها كل شهر بانتظام على الحساب البنكي لطليقتك عشان يكون في شي رسمي يثبت انك ترسل النفقه
وخذ عيالك كل ويكند عندك للبيت يباتون عندك ورجعهم ليلة الأحد
وتمشى وانبسط انت وياهم عشان يحسون انك قريب منهم وانهم قريبين منك ولا تجافيهم وما تشوفهم إلا بالشهر مره .. كذا بيجفلون منك

__________________

مكانه الانسب

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

تتشرف باولادك و لا تتشرف بها !!

اولادك من جابهم ؟ مو هذي اللي ما تتشرف بها

كل شي يقدر الواحد يتحمله الا الاسلوب

و انت بان اسلوبك معها و ما تنلام

__________________

كلامك عن طليقتك مقذع ولاذع ومؤذي كأنها ارتكتبت جريمة شرف ولا سوت شي لا يغتفر
اهدأ الله يرضى عليك وامسك لسانك .. من جد وش اللي ما اتشرف فيها !!
تراها أم عيالك اللي شرفها من شرفك وسمعتها من سمعتك واللي يمسها يمسك من يوم ما عقدت عليها إلين ماتطلع من عدة الطلاق
أما بعد ما تنتهي العدة خلاص ينتهي كل شي بينكم لكن تبقى هي شرف عيالك وسمعتهم ويبقى كلامك هذا في غير محله وما له داعي

بصراحه اذا كنت تتكلم معها كذا يوم كانت زوجتك ما ألومها على هروبها منك

__________________

يا اخ ساري لايجوز هالكلام انت مقهور لانك تريد الصلح وكنت تتوقع الصلح ولم يحدث

انت رميت بكل اوراق الصلح وماقصرت ومتأثر لانك تشوفها باعت والسبب مش مقنع ولا قوي لذلك لاتريد مسامحتها وانت مجروح

مع ذلك لايجوز ان تسميها المطلقة وابوها تقول عنه ابو المطلقة

ابوها ياساري جد اولادك وهو شايلهم الان بالمشاوير والمدارس وتعبان معهم تتوقع مبسوط بس وش يسوي الله يعينه

اذكر الله وادعي ان الله يهديها صدقني لو تحس ام عيالك وتندم وترجع هي تتعلم وانت تتعلم وتعيشون حياة طيبه باذن الله لاتصير متسرع ولا تقول كرهتها قول مالي رغبه حاليا ولا تقول كرهت ترا حتى لو تفكر ترجع اول ماتسمع كلمة كرهتها بتخاف وتقول حاقد علي ولو رجعت بيهيني ويذلني خلك متسامح ووص عيالك على امهم والله اني اجي اخذ عيالي ارجعهم يحبون راس امهم وجدهم وجدتهم
ولا احد يقدر يقول تحملتك مسكنا عليه الغلطه الفلانية وجهي ابيض ورايتي بيضاء والحمدلله

وكل الاعضاء يوافقون ان الجرح وكسر الراس وهالامور تعقد الوضع اكثر ماهي بمصلحتك ولا زوجتك ولا عيالك

وانا اوافق الاخ سلطان لسانك حاد ويجرح احنا تضايقنا منه

تزين الامور ان شاء الله بس اكثر من الاستغفار وخذ مساحتك بالتفكير

اخواني الاعضاء ، سلطان ، شواقه ، تحملتك كفايه ، دكتور او دكتوره روعه وغيرهم ، بالنسبه للعشره للسنوات الماضيه اللي كانت بيني وبينها اقسم بالله العظيم ماكنت اهينها حتى تقولو والله انها ماتنلام من اسلوبك ، انا اعطيكم الهرجه كامله ، اذا تزاعلنا ، كنت اقولها والله لااتزوج عليك ، انتي اخس الحريم ، انتي مافيك خير ، انتي عاطله مايستفاد منك ، ايضا بعض الاحيان اذا انا جيت من العمل هي تعرف نظامي ، اجي والاقي القهوه امامي والرطب لاني شريب قهوه ، وبعض الاحيان اثناء رجوعي من العمل وجالس اتقهوى وباقي ماني راااايق جاي تعبان مااصدق على الله ارتاح وتجي وتقول انا ابغاك تغير مثلا فرشة المقلط ، انا ابغى كذا وكذا ، وتبغى تسولف معي وانا ماني رايق ، طبعا ماهو على طول ، وانا اقول خليني ارتاح والله اني مصدع خلي الطلبات بوقت اخر ، وهي تفكرني اتجاهلها وتبدأ المشكله ومن الطبيعي راح اتنرفز واقول لها انتم يالحريم ثرثارات ، ياجماعة هذا كل مابالموضوع وليس اكثر ، من كذا ، ياجماعة الخير بعض الزوجات ذكيات فعلا ، اذا شافت زوجها رااااايق تذكر له طلباته وتشوف الوقت المناسب وتتناقش فيه ، ماتجي الوحده مدرعمه امام زوجها وهو متضايق وجاي تعبان من العمل ، هذا اللي حاب اذكره ، فهي بالغت جدا جدا بزعلها ، ولذلك حصل الطلاق ويمكن هي ارادة الله سبحانه
،،، اخواني الاعضاء ، الشاهد الله انتم مثل اخواني والمسلم لايخذل اخوه المسلم ، بل يوقف معاه بقدر المستطاع ، انا اعتذر ان ذكرت شي بخصوص زوجتي ، انا مااقصد اهانتها ، لا والله ، ولكن من الغيض اللي بقلبي لها ، يااخي قهر ، انا انقهرت حاولت وحاولت في الاصلاح ومافاد ، والحمدلله ، انا معاكم في النصح والارشاد ، والله يسامحها دنيا واخره ، واعوذ بالله من الشيطان الرجيم ، ولكن حاليا انا كارهها ، وانا معاكم اذا ندمت وارادت الرجوع فبقول حاليا مالي رغبه فيها وليس كارهها ، انا معاكم باللي تشوفونه ، والاخت اللي تقول انا مطلقه ، انا اعتذر ولكن اقسم بالله مااقصد المطلقات عامه ، انا اقصد اللي تطلب الطلاق بدون شي مقنع ، هذا اللي انا اقصده عشان اصحح واوضح لكم المعلومه ، فهذا دين ومانعترض على شرع الله ، فيه مطلقات زوجها ليس كفو لها بسبب سوء العشره او بخله او سكران ومخدرات ، فلاوالله ان تطلقت بسبب ذلك فالله يعوضها باحسن منه ، ولكن كلمتي اللي اقول خلو زوجتي تعيش حياة المطلقات ، الشاهد الله انا اقصد المطلقات اللي تطلقو بدون شي مقنع ، وانما دلع ، زي زوجتي ، مافيه شي مقنع ، يااااخوان عم زوجتي يقول لزوجتي اقسم بالله ان كان فيه شي يعيب زوجك فهو يعيبني ولاارى مايعيبه ، قالت والله ياعم انا ابغى اتطلق منه وقال لي والله لاتزوج عليك وانتي عاطله وانتي اخس الحريم ، وجالسه تذكر السلبيات القديمه ، عموما اللي صار صار
واللي يكتبه الله سبحانه فحياه الله