السلام عليكم ورحمة الله وبركاته ،،،

اولا كل عام وانتم بخير اعاده الله عليكم جميعا بالصحة والخير وهدوء البال

ويارب العيد القادم تكون كل احلامكم متحققة

بداية طبعا أحببت استشارتكم في هالموضوع

مع اني اتحدث فيه مع امي وابي ويفيدوني بآراء حكيمة

لكن طبعا لا يمكن الاستغناء عن هذا المنتدى الرائع

الحقيقة هية مش مشكلة

بس موضوع ،،،يتعلق بأهل خطيبي(معقود قراننـا)

وخطيبي سافر من 7شهور

والقصة هي ان خطيبي هوة الاكبر في اخوته

واخوته ماشاءالله عليهم كتار

وهوة اكيد بتفهمو انو عليه مسؤوليات مادية

وهوة والله العظيم حافظ جميل اهلو فوق راسو

وبيعمل جدهو لارضائهم

والحمدلله هوة انسان وفي جدا ومخلص

فمن ليس لديه خير في اهله لمن ليه الخير؟؟؟

خطيبي لماسافر ماكان معو ولاقرش

كان ظرفو المادي صعب جدا..

وكان طبعا عليه التزامات لازم يوفيها

وهية تكاليف المهر والعرس..

والبيت و ملحقاتة

هوة مضغوط جداماديا

يحرم نفسو من كتير أشياء عشان يخلص مسؤليات الزواج

وهوة فعلا مضغوط

وما بيقصر ابدا مع اهلو بس بشكل محدود حسب امكانياتو المحدودة

هوة بيقلي كل اشي والله وانا اسدقو

ماادافع عنو

لكنه فعلا عقدر المستطاع بيأدي الواجب

وحاسس هوة بمسؤولية تجاههم

وحامل همهم

وناوي يعمل الهم كل اشي

بس لمايتزوج الاول لانو الأولوية حاليا هية الزواج

صارلنا 10شهور خاطبين وهالمدة تعتبر طويلة جدا

واكتر من سنة حيصير شيئ مش مقبول والكل حيحط علامات استفهام

لهذا هوة بدو يرتاح ونتزوج

لانو كمان تعبان جدا من الغربة بدوني

المهم انو أبوه الله يحفظ ويخليه

موعاجبو شي

قبل فترة كلمو خطيبي

أبوه حكا معاه بجفاف وبيقلو(انت مفكر ماعندك مسؤوليات ماعندك اهل؟؟؟خلص مش مفكر الا بحالك؟
بس انا ساكت وصابر عليك عشان تجمد حالك شوي وتتزوج بعد هيك بصير خير)!!!!

كانو خطيبي قاعد على بنك ومليونير وغني ومتنكر لأهلو

المهم هوة قال لأبوه انا مش ناسي اهلي انا متكفل بكل اشي

بس انتو شايفين الي انا فيه

وفيه ناس عليه التزامات الهم

وانا بدي ارتاح واتزوج واستقر

ومن هالكلام..

وضلهم يحكو هيك

لغاية ماخلص الكرت الدولي

اتصل بعدها مباشرة فية وكان خطيبي جدا مدايق ومقهور

وحاسس بالظلم

لأنو مابيحب أحد يتهمو بشيء هوة لم يقوم بعمله

فكلام أبوه يدل انه ميسور الحال ومقتدر

لكنه متنكر لأهله والحقيقة عكس ذلك تماما

طبعا انا واسيته وحكتلو انو هادا ابوك ولازم تعذرو وووووو

يعني هديتو كتير من ناحية ابوه

انا اشفق كثيرا على خطيبي

يعني بالعامية مش عارف يلاحق على شو او شو

من كتر الالتزامات الي عليه

وهوة على قدرته وامكانياته بيساعد اهلو

مؤقتا حتى نتزوج ونستقر ونبدأ حياة جديدة

خطيبي عصامي بدرجة كبيرة جدا

في الزواج والمهر والتكاليف

دفع كل قرش منه هوة

ولم يساعده اهله كون وضعهم المادي لايساعدهم كثيرا

وانا هنا لست لائمة بالعكس سعيدة انه عصامي معتمد على نفسه

لكن لماذا تحت كل هذا الضغط يلقى هذا العتاب؟؟؟

انا مقدرة انو ابوه محتاج مساعدت ابنه نظرا لكثرة عددهم

ودخول اخوه الجامعة

ومن هذا القبيل

انا ابدا لاانكر حق اهله عليه بأن يساعدهم ويصرف على اخوته وان يلتزم معهم ماديا ومعنويا

انا لست من اولئك النساء اللاتي يكرهن اهل الزوج او يزعلو لو قالو كلام متل هادا

انا مقدرة الظروف ولو ان خطيبي متنكر لهم لكنت تألمت جدا لانو اهله اولى به

الحمدلله هو ليس كذلك ماشاء الله عليه

وانا دوما احاول احثه على برهم بزيادة

وانا اتصل بهم كل فترة واسال عنهم

المشكلة ماعندهم تلفون ماعندهم الا جوالات لاخوته الشباب

فانا حقا اخجل ان اكثر الاتصال
...
عموما ليست هنا المشكلة

لكن كنت اتمنى لو عندهم هاتف كنت اتصلت كل يوم لاهتم بهم اكثر

الي حدث ان امس شريت كرت جوال خصوصي عشان اعيد عليهم قبل كل الناس

اتصلت على جوال اخوه وكان بالسوق وليس بالبيت فتحدتث معه قليلا وسالته عن دراسته ووو من هذا القبيل

وقد قال لي ( .... اتصل فيكي صح؟)
قلت له: لا والله لم يتصل

قال: اااه اكيد بعتلك العيدية وصلتك انت اول الناس صح؟

قالها بمزح

لم ارد ضحكت

فقال : طبعا انتي هلأ اهم الناس عاد

(ايضا كان كلام مزح)
قلت له : لا لكن اهلو اهم من كل الناس اكيد

فقال: لااااااا بس برضو اكيد انتي اهم

قلت له : لالالا انتو الخير والبركة واهم من كل الناس والعين ماتعلاش عالحاجب انتو الاصل برضو واهلي انا كمان

قال: لا انت هلأ اهم انسانة عندو وبحبك اكتر اشي اكيد وانت اهم من الاهل
صار هوة يضحك

كملت المكالمة بالسؤال عنو وعن اهلو والتعييد عليهم
المهم سكرت

واليوم كلمت خالتو ( ام خطيبي)

ثم قلتلها بدي اكلم عمو

وهنا احسست بديق

حيث كان يحكي معي بجفاء قليلا ومن غير نفس
(بشكل عام هوة طريقتو هكذا)

لكن لاادري شعرت انه زعلان منَّا

المهم شعرت انه بدو ينهي المكالمة بسرعة

استغربت

قلت ماجرى لماما قالت لي اها اكيد كلام اخوه وكلامو تلميح انهم زعلانين من ابنهم

قلتلها: وانا شووووودخلي طيب؟؟
قالتلي: كيف شو دخلك؟اهل الزوج كل اشي بيحطوه بظهر زوجة الابن
وانو انا الي بحثو عالخير او بحرضو عالشر
!!!!!

استغربت معقول فكرو هيك؟؟؟

او يمكن قالو(هاي اجت واخدت ابنا وفلوسو)

او يمكن فكرو انو انا خطفت ابنهم منو

خاصة انو لماخطبني كان ميت علية وكان بالرغم انو ماديا ماكان قادر يتزوج ابدا بس مع هيك عمل المستحيل

وضغط عحالو عشان يخطبني

كان حاببني وبدو اياني وكان بدو انو يخطبني باي وسيلة

واهلو كانو فرحانين وماعارضو ومبسوطين جدا مني ومن نسبهم مع اهلي

وخاصة انو قبل ميسافر كان كتير يجي علية ويروح متأخر

حتى ليلة السفر قعد عندي لل12بالليل

مع اني والله كنت اقلو روح بدري عشان اهلك

بس هوة قلي انا حروح اسهر معاهم للصبح

المهم هي الي صار اليوم العيد الصبح

مش عارفة حاسة اني خطافة وحارمة الاهل من ابنهم

او يمكن انا مهيئ لي؟
انا والله العظيم احاول اتقرب الهم

لكن متل ماحكيت مافيه تلفون ووماباجي كتير عليهم بسبب ظروف الشغل

لكن لمااكلمهم بحسسهم انو خطيبي كتير بيسال عنهم وانهم هما الاهم وفوق الراس
بحاول

عفكرة اهلو كتيييييييييير طيبين ومش زي اهل الزوج الي بيكونو هيك اشرار او حقودين او الهم افعال سيئة

يعني والله مافيه زيهم

وحماتي حنونة لابعد درجة وتموووت موت علية

وعمي ابو زوجي كتير طيب لكن طبعو شوي ساكت او بيحكي بطريقة غريبة احيانا

واخوتو والله كلهم زي الفل ومافيه الا الود والرحمة بينا والاحترام

لكن انا مش عارفة

تعتقدو ليش حكو معو اليوم هيك بجفاء ؟؟

يمكن انا مش فاهمة منيح؟؟؟

يمكن مجرد صدفة

يمكن ابو زوجي مدايق لانو حاليا الوضع المادي لكل الناس في البلد سيئ بسبب قضية الرواتب ووووو

(لو عارفين اخبار فلسطين تفهمو)

يمكن حاسس بالزعل لانو ماديا مش كتير مقتدر بهالعيد وانو ظروفو مش ممتازة؟؟

يمكن كان نفسو يكون معاه مادة اكتر من هيك فلما اجا العيد كان ملان زهقان ومدايق شوي؟؟؟

خاصة انو دايما هيك مو عاجبو حال البلد والوضع

وامو الله يخليها الي يارب

كان برضو يأسانة

بقلها كيف العيد خالتو؟

قالت : هينا زي هالناس

شعرت انهم مش مبسوطين

كل مرة اكلمهم تكون خالتو مبسوطة اكتر من هيك ومتحمسة للحكي معي

انا مقدرة شعورها هية حنونة جدا ومااعتقد زعلانة مني بشي

لكن زعلني عمو ليش زعلان هيك؟؟؟

عفكرة العيدية بعتها خطيبي الي وبعت معي كمان عيديات اهلو كلهم

هوة لاقا انو يبعتها الي اسهل مما يبعتها لاهلو مباشرة لانو كلهم مشغولين

وهما مابزعلو

بس انا حرصا عمشاعرهم رحت لاختو المتزوجة وعطيتها الفلوس وقلتلها تعطيها لاخوها التاني وتقلو انو يحكي

لاهلو انو خطيبي بعت لاخوه الفلوس مباشرة .... وما يقلهم انها عن طريقي

(حرصا مني عمشاعرهم ومع انهم مابزعلو وما بدقو عهيك اشي بس انا صممت اعمل هيك)

عشان مشاعرهم ومايزعلوو

مع انو كان ممكن مااعمل هيك ومايزعلو اصلا
بس انا حريصة عليهم متل اهلي

محتارة وخايفة لمايجيو يعيدو علية اكون محرجة قدام ابوه مش عارفة

هما طيبين والله مابلقى متلهم

وصدقوني خطيبي والله ابن بار جدا وبيحرص عليهم وعرضاهم وبحبهم وفوق الراس هما

بس مش قادر يساعدهم كتير لانو تعرفو مصاريف الزواج

شواعمل؟؟؟

عفكرة انا ناوية بعد العيد ازورهم لحالي واخد معي الهم شي هيك كعك او اشي

واقعد معهم كاني وحدة منهم عادي

وانا وحدة منهم فعلا

بس بدي اقرب الهم اكتر

بس هلأ صرت خايفة او خجلانة اروح

المهم انا طولت كثيرا عليكم

لكن ارجو ان تقولو رايكم بالموضوع

وانا قلت الصدق صدقوني

ولا يوجد شيئ سيئ خطيبي يعمله

وهوة مو مقصر ابدا

ارجو تحكولي اراءكو

وعلى فكرة انا مش زعلانة من ابوه لانو اعتبرو اب لي انا ايضا

انا فقط مااريد يكون ماخد عخاطرو منا

انا بدي مشاعرو ماتكون متأثرة بشي

بديش يكون زعلان منا او من ابنو

بدي احافظ عمشاعرو

جازاكم الله خير واسفة جدا عالاطالة

__________________