صباح الخير يا بنات

يا رب تكونو كلكم بخير


حلومة حبيبتى وحشانى جدا جدا
و الاستاذ الصغير باعتلك 2 كيلو بوس ليكى و للاستاذ الصغير
و مش مرميس بس اللى تديكى امل
ربنا يديكى امل لانه موجود و ان شاء الله حيفرح قلبك و قلب كل البنات ياااااااااااااا رب



الزرافة معلش انى اتأخرت فى قصة ولادتى بس النت كان وحش قوى و كان على طول بيقطع

حقولك قصتى يا سيتى

انا صحيت يوم الاربع الصبح و فطرت و بعدين حاسة بافرازات بتنزل منى
بس حاسة بيها قوى
قلت دى الافرازات بتاعة الحمل العادية
كلمت ماما فى التليفون و رغيت معاها و بعديها عمتى و عادى جدا
و بعدين عاوزة ادخل الحمام لقيت الفوطة اللى بحطها مبلولة حبتين زيادة
فروحت لجوزى اقوله فى الحمام التانى و انا واقفة لقيتنى بنقط فى الارض
و كان الدكتور قايلى ان ماية البيبى بيكون كأنى بعمل تواليت بس مش عارفة امسك نفسى بس نقط نقط كبيرة شوية
و بعدين كلمت دكتورى قالى اطلع على المستشفى على طول عشان النائب بتاعه يكشف عليا و يقول اذا كانت ولادة ولا لأ
فروحت على طول على هناك و الدكتور هناك حاول يكشف عليا و بعدين قال انه فعلا ماية البيبى بتنزل بس عنق الرحم مفتحش
و بعدين الدكتور بتاعى كتبلى على حقنتين واحدة مضاد حيوى عشان الماية اللى بتنزل متعملش انفكشن للبيبى و كمان حقنة كورتيزن عشان الرئة تشتغل
و كل دا و مافيش طلق
و كانت كدة الساعة 5 المغرب و قالى حنستنى لحد 9 بالليل و اذا مجاش طلق يبقى حولد قيصرى
بالظبط الساعة 9 الا خمس دقايق ابتدى الوجع
و دخلت الحمام نزلت بتاعة كدة فيها دم تقريبا اللى سادة عنق الرحم و ابتدى الطلق
كل تلت ساعة و بعدين كان طلطيش بقى ورا بعض ورا بعض و عنق الرحم مفتحش و الدكور جه يكشف عليا معرفش مدتلوش فرصة من كتر الوجع
و بابايا حبيبى مكانش مستحمل انى بتوجع خرج برا اوضتى و قعد يعيط عشانى
و قلت اخد حقنة الظهر قالى تاخديخها و تستنى لحد الصبح و نشوف اذا فتح تولدى و اذا مفتحش يبقى قيصرى
فالمهم نزلت اوضة العمليات عشان اخد ابرة الظهر و كان فى واحدة بيدوهالها قبلى و واحدة حتولد قيصرى فالمهم استنيت دورى و الطلق بقى طلطيش فيا المهم المرضو الابرة تتاخد لما مبكونش فى طلق
فطبعا الموضوع دا اخد وقت طويل لان الطلق بقى ورا بعض كل 5 دقايق
المهم اخدت الابرة و الدكتور جه يكشف
لقى ان عنق الرحم برضو مفتحش و ان كريم حبيبى منزلش فى عنق الرحم اصلا
فقالى اذا استنينا لحد الصبح ممكن برضو البيبى مينزلش فى عنق الرحم و لما نيجى نولد ممكن نشد الراس فاحسن قيصرى قلتله ماشى اندهلى جوزى بقى
و الوقت دا كله طبعا اهلى حيتجننو لنى نازلة اخد حقنة بنج و لقونى اتأخرت لانى نزلت الساعة 12 و ندهو جوزى الساعة واحدة و نص و ندهو جوزى عشان يحضر معايا العملية
المهم قالولى تحبى تتبنجى النص التحتانى بس عشان تشوفى ابنك و هو خارج للدنيا
قلتلهم لأ انا قلبى ميستحملش احضر العملية معاكو
بنجونى و اشتغلو انتو
قعدو يقنعونى انى مش حشوف حاجة و انها لحظة جميلة
بس انا جبانة فازاى اقعد و ابقى متوقعة ان الدكتور ماسك المشرط ولا بيخيطنى فاصريت على انى اتبنج كلى
و دخل جوزى و هدانى عشان حولد خلاص
و جاب معاه كاميرا الفيديو عشان يصور اللحظة التاريخية
و ادونى البنج و بخ
صحيت على وجع فى بطنى و قعدت اقولهم "عاوزة مسكن" ، "عاوزة مسكن" و ودونى الاوضة
الكل بيباركلى و انا على نغمة واحدة "عاوزة مسكن" ادونى المسكن و سامعة صوت صاحبتى بيقول
اتريقتى على بنتى و فى الاخر جبتى برص
عشان كريم نزل حجمه صغير و بعدين روحت تانى من البنج
و دا كان الساعة 3 الا ربع
و فوقت تانى على 4 و نص جوزى وراهونى على الكاميرا و نمت تانى و شوفته الساعة 7 و نص الصبح
بس كنت تعبانة مش عارفة اشيله ولا اعمل حاجة
و فضل موضوع احساس الامومة دا مهنج معايا لحد اسبوع من الولادة
بس كان حاجة جميلة
ربنا ميحرم حد من الاحساس دا
يا رب


دا كل اللى حصل

و الحمد لله انها عدت على خير

و عقبالكم كلكم يااااااااااااااااا رب
ان شاء اله ربنا يفرح قلبكم كلكم و قلبى معاكم بيكم و بيا يا رب


رب لا تذرنا فردا و انت خير الوارثين

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة