ايه صح نسيت سؤالك عن الحليب

اول شي انصح برضاعه كااااااااااامله أول 4-6 شهور حتى بدون رضعه صناعيه وحده
و استعيني بالمضخه و حاولي في بعض الأيام اللي تحسي انه حليبك مليان انك تخزنيه في الفريزر
و اذا فعلا فعلا فعلا (شوفي كم فعلا قلت لأني جاده) احتجتي للصناعي حولي ما تستخدميه يوميا او حتى يومين ورى بعض

لأنه المعروف انه حليب الصدر يكثر مع الرضاعه و المص المستمر و حتى مجرد تفكيرك بالرضاعه راح يكون عامل مهم لدر الحليب
و تعرفي ان الرضاعه الصناعيه أسهل لأنه ما تاخذ منك مجهود و وقت و ألم و يشبع الطفل و ينام لساعات اطول
و أنتي بكده بتكوني ارسلتي اشاره لجسمك بإقاف در الحليب و يوم بعد يوم راح يقل حليبك و كل ما قل كل ما راح تستعملي الصناعي اكثر و هكذا

شخصيا رضعت بنتي كامل بدون ولا رضعه صناعيه الين 6 شهور و اضطريت اني ابدأ لها بأكل حسب تعليمات الطبيب ولا كنت رضعت للأبد
أما بأبني رضعت كامل ل4 أشهر و اضطريت ابدأ له أكل مش صناعي لأنه صار مزعج و يبكي كثير و وزنه بدأ يقل شوي
الدكتور قال لي الأولاد اصعب من البنات لأنه بحكم فيسولوجيا بيكون عظمهم أكبر و يحتاجوا لحليب أكثر

المهم لما بدأت استخدم الصناعي كان Nan و في منه Nan1,2,3 لمراحل عمريه مختلفه
nan1 من الولاده الى 4 شهور, و nan2 من 4 الى 9 شهور و nan3 من 9 الى السنه

و أرجع و أقولك استبعدي الصناعي و لا حتى تفكري فيه من دلحين


مسألة النوم:
أنا كنت أنيمه عندي و ابو الشباب ينام مع البنت في الغرفه الثانيه و السبب كان
انه بالبدايه كان ينام مع اخته في الغرفه الثانيه و لما يبكي محسوبتك أثقل من نومها مافي و المونتر على الفاضي
و لازم زوجي يصحيني لأن نومه جدا خفيف و أقوم جري زي المجنونه أحس انه كان يبكي طوووووول و أنا بسابع نومه
حزنت عليه و على بنتي و على زوجي و قلت خلاص ما يصير كده

فقررت انيمه عندنا و ما ضبطت لأنه زوجي نومه خفيف و هو من النوع اللي اذا ما ارتاح بنومه ينقلب يومه نكد في نكد
و كمان اخته بدأت غيره و كل شوي تصحا تبكي بنص الليل و تقول بنام معاكم ما ابغى لحالي قطعت قلبي و حزنت عليها ثاني
و رجعت غيرت النظام و خليت زوجي و بنتي يناموا بالغرفه و هو يتكفل فيها اذا صحت او عطشت او احتاجت الحمام و انتم بكرامه و أنا الحمدلله ارتحت علي الطريقه هذه

الحين لما كبر و وقف رضاعه و بدأ ينام طول الليل و نظامه استقر رجعته ينام مع اخته و ابو الشباب رجع على سريره

طبعا في شي مزعجنا و هو صعب انيمهم سوى في نفس الوقت
لأنه هو يبدأ يلعب شوي و تقوم بنتي تاخذ دور الأم و تقوله خلاص بطل لعب لازم تنام و و و و هو يسمع صوتها و يقلبها لعب و شقاواه و تسمعي أصوات و لا على البال
فأظطر اني ادخله هو أول شي و بعد نص ساعه يكون نام ادخل اخته و بكذا كل واحد يهدا و ينام

بالله لا تذكريني توني بديت آخذ نفس و أرتاح بنومي و كل شي بدأ يضبط الحمدلله