أبلة جرين حبيبتي

ليه التشاؤم و الإحباط ..؟؟؟
إنت أكثر وحدة لازم نتعلم منها

و ولدك حسن ، بس فترة إن شاء الله و بيرجع لك أحسن من قبل ^_^

...................................

عطر الحياة

عملت نفس الطريقة اللي قلتي عنها ،.
حتى إني أعارض الضرب و أدور عن أي عقاب يناسب ( الفعل )
بشرط إنه يكون فاهم ( إيش الغلط اللي غلطه ؟ )

أول مرة أفهمه و أشرح له .. لا تعمل كذا ، عشان كذا و كذا و أشرح له حبة حبة على قد سنه ..

ثاني مرة ، أناديه و أخليه يشوف إيش عمل ..
و أقول له ( شوف إيش عملت ؟؟؟ عشانك ماسمعت كلامي و أنا مو قلت لك قبل شوي ... إلخ )
فينزل راسه و يبتسم ابتسامة خبيثة ( يعني عارف نفسه غلطان )

ثالث مرة ، أعطيه ضربة على يده أو كتفه أو أقرصه بشوييييش ( بس تراه مو ضرب و لا قرص )
مو عشان كذا زوجي يقول ( ما بيسمع كلامك لإنك ما تضربيه ضرب حقيقي )

.
.

و هذاك اليوم خليته يجمع القطع الكبيرة للخبز - زي ما قلتي - بس قمت و عملت نفسي أساعده
لإنها كانت مرة كثيرة ، و ما عطيته العصير إلا بعد ما خلصنا

بس شفتي كيف ؟ بعد ما جبت المكنسة و كنست الفتافيت الباقية و اللي صعب تتجمع ..
رجع فتفت العيش فوق سريره
عشان كذا أكل ( ضربة ) من جدددددد ..


و ترى كنت مثلك قبل ، ضد الضرب و حتى أولاد أخواتي و أخواني يحبوني مرة و بزورة أهل زوجي
بس كانت أختي تقول : يوم ولدك يكبر .. بيتغير الشئ هذا

عشان كذا أمسك نفسي دايما و أعد مليون مرة قبل لا أعاقبه ..

وحدة من أخواتي انفجعت يوم شفتها كيف تعاقب أولادها ؟؟؟
تضربهم بالسلك و لا كف من قلب قلبها و من غير ما تتفاهم معهم ، مين الغلطان أو أي شئ

و الثانية من أخواتي ، تدلعهم دلعععععععععععععع مو طبيعي و ببس يقولوا ( اه ) على طوووول تجري
و تعمل لهم اللي يبغوه و دحين ولدها الكبير صار يرد عليها و تسكت له

.
.

هذا اللي مزعلني في ولدي .. مو عارف قيمة اللي أعمله عشانه
و قلت استفيد منكم .. و أخاف عليه من نفسي ، إني أبدأ أقسى عليه و أتغير معاه من غير ما أحس

كل شئئئئئئئ تتخيليه ، عملت له و إذا من دحين بدأ يعاند ، كيف إذا كبر شوي
سجلته في حضانة و أبوه كان رافض ، و بأدفع له مبالغ عشان بس يستفيد و يتعلم و تتطور مواهبه
و أسجله في أنشطة كل شوي عشان يعتمد على نفسه من صغره ..
جهزت له غرفته من كل شئ و أبوه يقول لي ( ما كان لازم ) ..

أفضي حالي مرات عشانه و أحضنه و أكلمه و أجلسه على حضني ..
و وحدة من أخوات زوجي تقول ( عمري ما حضنت بنتي و لا بستها ) ..