هل في بيتك مريض نفسي؟؟
بصراحه كتبت هالموضوع بعد ماشفت كيف انتشرت الامراض النفسيه بشكل خيالي في مجتمعاتنا ولكننا مازلنا جاهلين نوعا ما..
يعني بالعربي ما يروح الشخص للطبيب النفسي الا اذا زادت الحاله عنده وانهار ووقتها العلاج يكون اصعب بكثير من لو انه راح ببداية الاعراض..
طبعا فيه عوامل وراثيه وفيه عوامل بيئيه وفيه عوامل اجتماعيه تسبب هالامراض او تزيد من حدتها..
الشي اللي غافلين عنه ان المصاب بمرض نفسي او حتى تشكون انه مريض يجب ان يعامل معاملة خاصه..
اعرف بنت كانت فيها بدايات مرض نفسي وهو منتشر جدا بصراحه مايحضرني الان اسم الحالة ولكن هو مرض يؤدي الا عصبية مفرطة بحيث انها ما تسيطر على نفسها اذا عصبت ممكن تضرب نفسها او تضرب والديها تقطع شعرها واذا هدت شعرت بالندم وقعدت تبكي لين ثاني يوم.. طبعا اهلها اعتبروها ( شيطانية وقوية وما يقواها الا اللي خلقها وعاقه ) فقط ما انتبهو انها مريضه نفسيا ولا يد لها فيما تفعله..
زاد المرض عبر السنين حتى صار اللي ينخاف منه حاولت الانتحار وبلعت كل الحبوب اللي في البيت واخذوها للمستشفى وبعد غسيل المعده عرضها المستشفى كاجراء لابد منه على طبيب نفسي وتحدث مع اهلها وبين لهم ان البنت مريضه نفسيا وكان بالامكان علاجها بكل سهوله لو جابوها قبل كم سنة وقعد يعالجها ثلاث سنوات والحين ما شاء الله طيبة وعاقله ومافيها الا العافيه مع بعض الادوية البسيطه ومعامله خاصه من قبل اهلها..
اخوها تردد معها على الطبيب وتعلم كيف يعاملها واهم نقطه قالها ان الطبيب قاله لازم تشعرها باهميتها وتتحدث معها عن مشاكلك وتسألها عن رايها وكانك تثق فيها وفي حكمتها لازم تناقشها في مواضيع متنوعه وتوافقها الرأي وتحسسها بانها على حق يعني الطبيب يقول انا اعالجها وانتم عليكم تعيدون بناء ثقتها بنفسها لانها محطمة كليا..
هذي نقطه من نقاط كثيرة وانا بصراحه احس باهمية هالشي ( كيفية معاملة المريض النفسي) يعني اتوقع الحين قلت البيوت الخالية من الامراض النفسيه فنحن لا نفهم ماذا يعني مرض نفسي فالعصبية الزائده والحقد المبالغ فيه والانطوائيه وكره الناس والغيرة الزائده عن حدهاوالشك الذي لا يطاق احيانا والكذب وتأليف القصص الخياليه والحساسية المفرطة كلها انواع امراض نفسية منتشرة جدا في المجتمع ولكن قل منهم من يعالج وقل من يصدق ان زوجه او ابنه مريض نفسي ويحتاج للعلاج..
المرض النفسي بنفس خطورة المرض العضوي ويزيد من الاهمال وقد يصل لحد يصبح العلاج معه صعبا جدا..
انا حابه اني اناقش هالموضوع لاني مستغربه من انتشار الامراض النفسيه بهالشكل الفظيع في وقتنا هذا هل السبب الضغوط النفسيه وكثرة طبقات المجتمع مما ولد الغيره والحسد والحقد وبالتالي امراض نفسيه واكتئاب وصرع وغيره؟؟
هل التكنلوجيا لها دور؟؟ يعني الناس اول طول اليوم مشغولين ومافيه وقت الواحد يفكر بنفسيته والحين كل شي يتحرك بضغطة زر يعني بالعربي الناس فضت وبدت تفكر كثير وتتعقد؟؟!!
هل السبب تغير التربيه وطريقة التعامل بين الناس ؟؟
يعني من الاخر حابه اعرف وش اللي خلى الامراض تنتشر بهالشكل وكيف ممكن الشخص يتعامل مع مريض نفسي قاعد يتعالج او مريض نفسي رافض فكرة انه مريض وهل عندكم اشخاص تشكون انهم مرضى نفسيين؟؟ وش الاعراض وكيف تتصرفون؟؟
__________________
11-02-2007, 03:30 AM
ضوابط المشاركة
العرض الشجري