خطيبتي لا تريد الخروج مع والدتي وإخواتي
بسم الله الرحمن الرحيم
أنا كنت من فترة طويلة منذ عدة شهور عن مشكلتي وهي أن والدي ووالدتي لم يكونوا موافقين على زواجي ولكنهم بعد عدة شهور من إصراري على الارتباط بهذه الفتاة وافقوا في النهاية 
ولكن بعد فترة طويلة من النقاش أدت في نهايتها إلى أن أترك البيت ثم عدت وحدثت بعض الأحداث الأخرى ولكن مش هو ده موضوعنا.
ودوله هم الموضوعين اللي كتبتهم في المنتدى في قسمين مختلفين والآراء كانت والحمد لله خير معين لي
http://www.66n.com/forums/showthread.php?t=121580
http://www.66n.com/forums/showthread.php?t=121562
على فكرة موضوع الزواج بدأ الكلام فيه من شهر 3 ولم يوافقوا إلا في شهر 11.
المهم إنهم الحمد لله وافقوا وذهبنا إلى أهل الفتاه والحمد لله البنت عجبتهم واتفقنا إن شاء الله إن الشبكة هاتكون في منتصف شهر واحد.
خللوا بالكم بقى من الحتة دي
لما طلبت أختي ووالدتي إنهم يخرجوا مع العروسة علشان يتعرفوا عليها هم لم يمانعوا ووافقوا ولكن بعد أن تأتي أختها الكبيرة من السفر لأنها عند خالتها لمدة 3 أو أربع أيام لأنها بتتكسف إنها تتكلم مع حد غريب لوحدها وبعدها يخرجوا مع بعض وأبلغت أهلي بهذا ثم لم تأتي أختها الكبيرة وتأخرت في السفر وأجلنا الموعد مرة أخرى ومرة ثالثة وبعد المرة الثالثة أنا بصراحة إتضايقت ... أسبوعين علشان أهلي يشوفوا العروسة أظن ده كتير أوي أوي... وياريتهم ردوا بالموافقة دي أختها قالت لأختي أنا هاقول لوالدي وبعدين أرد عليكي.
أنا عارف إن عندهم حق في إنهم يزعلوا من موقف والدي ووالدتي ولكنهم في بداية الموضوع قالوا إحنا هاننسى كل حاجة ثم إنهم لو هم زعلانين أنا مش مشكلة بالنسبة لي هما إنشاء الله لم يلاقوا بنتهم مستريحة معايا هايفرحوا لها لكن المشكلة إنهم حطوا العروسة في موقف إنها معاهم وإنها بتساندهم وأنا ماقبلش إن زوجتي تكون على خلافات مع والدي أو والدتي...
كل الناس عندها ظروف واحنا بنقدر لكن المفروض إنه كان يبقى فيه حرص شوية وخصوصاً بعد اللي كان حاصل قبل كده.
وخصوصاً هما كانوا عايزين يخرجوا مع العروسة مش مع أختها, يقربوا من العروسة مش من أختها, هما كانوا عايزين ينهوا أي خلاف كان قبل كده.
بس أهلها ماكانش عندهم حماس
مع إن عريس أختها وأهله لما بييجوا عندهم بيبقى فيه معسكر في البيت قبلها بيومين.
أنا مش عايزهم يضربوا لأهلي تعظيم سلام بس كان لازم يبقى فيه حرص شوية عن كدة.
أنا عارف إن العروسة فعلاً بتتكسف وبتتكسف جامد كمان وده نادر عندنا في مصر. إحنا عندنا في مصر والحمد لله بنات متدينة كتير وأخلاقهم عالية بس بالكسوف ده بيكون قليل قوي وأنا لو قلت لأهلي إنها بتتكسف تخرج معاهم لوحديها يفتكروني باستهبل وللا عبيط.
هما ما اتكلموش في الموضوع معايا بس أنا حاسس بيهم وحاسس إنهم زعلانين.
هي آه بتتكسف بس كانت ممكن تقولي خليهم ييجوا عندنا البيت أو أخرج أنا وواحدة من قريباتي معاهم ومش لازم أختها.
على فكرة أنا ماقولتلهمش إني زعلان لكن هما حاسين بكدة وكل كلامي مع أم العروسة أو أختها لأنها بتتكسف تتكلم معايا.
أنا خايف إن يكون ده زعل مش كسوف ويستمر بعد الجواز.
وأنا ماقدرش أزعل مع أهلي أو أقاطعهم علشان خاطرها.
ومش عارف أتكلم معاها في الموضوع لأنها مابتتكلمش معايا لأنها بتتكسف.
ومش هاينفع أتكلم مع أختها في الموضوع لأنها أكيد هاتنكر وهاتقول إن السبب إنها كانت مسافرة.
أنا زعلان بجد ومتضايق ومش عارف أعمل إيه.
أفهمها ازاي إن ممكن أقبل كسوفها في أي حاجه في الدنيا إلا في معاملاتها مع والدي ووالدتي
أفهمها إزاي إن والدي ووالدتي حاجه كبيرة بالنسبة لي وإن مافيش حد هايقدر يزعلنا من بعض أبدا.
أفهمها إزاي إن ما ينفعش إن هي تبقى في كفة وهم في كفه.
أنا عايزها تعرف إن هما الإثنين في كفة واحدة.
ماينفعش أستغنى عن حد بسبب التاني.
ماينفعش أستغنى عن أهلي علشانها ولا أستغنى عنها علشان أهلي
أفهمهما ده كله إزاي وهي مش بتكلمني؟؟؟؟؟؟؟؟؟؟؟؟؟؟؟
التعديل الأخير تم بواسطة star_tamer_1980 ; 20-12-2007 الساعة 01:48 PM
السبب: تعديل العنوان لأنه لا يشجع على الدخول عليه
20-12-2007, 01:21 PM
ضوابط المشاركة
العرض الشجري