إنتي العسل ياعسل

طايحين غزل في بعضنا .. بس لايسمعوا أزواجنا

حبيبتي ليش الجنة تحت أقدام الأمهات ؟ من قليل صارت لنا الجنة ؟

دايماً أقول لزوجي إنه الأم تتعب في الحمل والولادة والرضاعة والتربية تعب مايعادله

تعبكم برا البيت ولا تقدر حتى تتخيله .. فلازم تحفظ لمامتك جميلها

فمعليش حبيبتي اتحملي شوية الدنيا كلها تعب بس كله مرفوع عند ربنا ويوم

الحساب نحتاج لأقل حاجة ترفع ميزاننا فاحتسبي الأجر عند الله

أما بالنسبة للرضاعة لاتاخديها بحساسية مرة .. تخافي صدرك يبان ؟

أنا أقولك ايش تسوي ..

ارفعي البلوزة من تحت .. والبنطلون اللي لابسته ارفعيه لفوق بحيث يغطي بطنك لما

ترفعي البلوزة .. ورضعي .. كدا مايبان صدرك من فوق .. ولا تشغلي بالك ترى محد

حولك ولا أحد حيطالع فيكي .. احنا بس نوسوس

هذا عند أهلك طبعاً .. أما برا في الشارع مثلاً أو قدام ناس أجانب فالأفضل إنك

تسحبي من صدرك وتحطيه في الرضاعة وتعطيه هو

الغي الصناعي تماماً عشان لا تجيله غازات أكثر

أجل احسبيها بالوقت .. لو عدا عليه أكثر من ثلاثة ساعات لا تستني .. حاولي حتى

إذا رفض عيدي المحاولة .. أحيان اللعب واكتشاف الأشياء الجديدة يلهيهم عن

الرضاعة .. وحاولي إنك تطالعي فيه وتكلميه بحب وحنان وإنتي ترضعيه صدقيني

حيستجيب لك حتى لو مارضع ترى رزقه يجيه .. ويكفي إحساس الحنان اللي يحسن

نفسيته ويريحها

أكيد النعناع مرة مفيد .. أعطيه كل يوم رضعة في الليل قبل ماينام

وإذا عنده قبض أعطيه يانسون مع شمر

وإذا عنده إسهال أعطيه كراوية

وإذا بطنه تمام لا قبض ولا إسهال أعطيه الثلاثة مع بعض شمر ويانسون وكراوية يومياً

قبل لا ينام .. مرة كويسة هذي الأعشاب تخليه يرتااااح

يعني يوم إيوة ويوم لا تقريباً .. والتمر عموماً مفيد أعرف أمهات من يوم ماينولد الطفل

يعطوله هو يومياً .. بس أنا ماشية بمبدأ إنه الرضاعة تكفي الطفل مدة ستة شهور

من عمره .. فخليت التمر من يوم صار عمرها خمسة شهور عشان أعودها على الأكل

صراحة ما أعطيتها شي غير الحليب والنعناع والأعشاب لين صار عمرها خمسة

شهور دخلت لها التمر والسيريلاك مع الحليب في الرضاعة

ياقلبي عليه قطعتيلي قلبي والله

الطفل مايبكي إلا بسبب

إما جوع .. أو إنه موسخ نفسه فيبغاك تغيري له الحفاظة .. أو متألم من حاجة ..

يابطنه فيها غازات تألمه .. أو مسخن .. أو جاله برد ..

لما يصير له كدا .. اتأكدي إنه مو جيعان .. بعد كدا غيري له الحفاظة .. وفصخي له

ملابسه كلها وجيبي زيت سمسم ومرخيه .. ترى الأطفال أجسامهم مرة حساسة

يمكن يكون اتمشع ولا حاجة وإنتي ما انتبهت .. فلما تمرخيه لاحظي جسمه إذا نقز

من منطقة معينة معناته ممشوع منها .. أو اتقصع .. أنا بنتي دايماً لمن تنام تقصع

ظهرها ولما امرخ صدرها وظهرها كل يوم تنقز ياقلبي عليها .. وبالذات انتبهي

لمنطقة أعلى الفخذ إذا نقز منها معناته دحومي حبيبي ممشوع .. انتبهي له ولا

تخلي أي أحد ماعنده خبرة يشيله ..

وانتبهي لا تبكي معاه .. ترى الطفل حساااااااس يحس بأمه .. وراح يزيد ألمه لو حس

إنك قاعدة تبكي .. ياعمررري عالحساسين ..