أول شي ألف مبروك و عقبال الواع و الويع 
... البنات و البنين قصدي 
..
اذا حابة تروحي على سورية أهم شي فيها انك تزوري العاصمة دمشق و تشوفي المتاحف اللي فيها أسواق دمشق القديمة و المسجد الأموي سوق الحميدية و المطاعم التي بنيت في البيوت العربية القديمة طرازهم و أكلهم كتير حلو دمشق جيدة من أجل التسوق (اذا لازمكم تسوق)
انزلوا بفندق فينيسيا رخيص نوعاً ما مقارنة بخدمتهم و أكله طيب بقدم فطور كل يوم و لا تنسوا ما يثبت الزواج لأنهم ما بقبلوا تباتوا عندهم من دون عقد الزواج
بعد دمشق اتجهوا للشمال عندكم مشتى الحلو -قريب من حمص- مكان حلو على طبيعة حلوة و فيه كتير فنادق و شقق للايجار
من مصلحتكم تاخدوا فندق لأنكم 2 فقط
لو كنتو أكتر كانت الشقق أوفر
الفنادق كتيرة و فيها الغالي و الرخيص و يعتمد السعر على عدد النجوم طبعاً و على موضوع انه الفندق نفسه جايب مطرب يغني في مطعمه و لا لأ
لذلك انتو روحوا للفندق اللي مو جايب مطرب (من كل النواحي أفضل )
نسيت اسم الفندق اللي نزلنا فيه آخر مرة بسألك اخواتي و برجع بكتبلك الاسم ان شاء الله
لكن مو صعب تبحثو عن مكان للمبيت لأنه كل المشتى شارعين و كله فنادق و مطاعم بجنب بعض ما بضيع 
مطاعمه اكلهم لذيذ اطلبو فيها مشاوي (دجاج مشوي عالفحم و كباب لا تفوتوها 
) و قعداتهم حلوة كتير إطلالتها على الجبال و الخضار
و في مغارة هناك اسمها مغارة الضوايات الدخول لها بسعر رمزي جداً لأنها صغيرة لكنها تستحق المشاهدة
ممكن تباتوا في المشتى بضعة أيام اذا حبيتو و تزوروا في اليوم التاني الكفرون قريب جدا حوالي 2 كم من المشتى كله مطاعم (معظمها فيها مطرب بصرخ بصوت عالي لكن ممكن تبحثوا عن مطعم يناسبكم)
بعد مشتى الحلو ممكن تتجهوا للساحل و أقرب شي للمشتى هي مدينة طرطوس
ممكن تروحوا طرطوس و ممكن اللاذقية
اذا رحتو للاذقية لازم تروحوا مطعم View مرتب و كبير و قعدته عالبحر مباشرة كتير حلوة اسعاره غالية في الطعام لكن ممكن تاكلوا السمك في مطعم أبو كمال و بعدها تتحلو او تشربوا قهوة في مطعم فيو بتوفي معكم أكتر 
أو ممكن تقعدوا في القسم الايطالي من المطعم أسعاره مقبولة أكتر من باقي الاقسام
و لا تنسوا تزوروا المناطق الجبلية القريبة من اللاذقية عندكم مدينة صلنفة حلوة كتير لكن ممكن تكون برد متل هالوقت
هي باردة و حلوة بالصيف كتير
فيها مطاعم كتيرة و قعداتها حلوة كمان المشاوي فيها طيبة
و قريب من اللاذقية مدينة كسب اللي عندها الحدود التركية ممكن تروحوا منها لتركية
أو تروحوا لمنطقة الحدود التانية عند باب الهوى و هي عند مدينة سرمدا في الداخل من سورية يعني شرق الساحل خدوا طريق حلب أو ادلب بياخدكم باتجاهها
اذا رحتوا من حدود باب الهوى لا تنسوا تزوروا السوق الحرة اذا حبيتو فيها المكياج و العطور أسعارهم رخيصة و فيها كل انواع الشوكولا اللذيذة و أشياء كتيرة و يفضل يكون معكم دولار اذا اشتريتوا شي لأنهم ما بقبلوا كل العملات و ممكن يصرفوا العملة التانية بسعر غالي
نسيت لبنان
ممكن تروحوا للبنان بعد مشتى الحلو لأنه المشتى قريب من الحدود اللبنانية
و لبنان بصراحة حلوة كتير و خسارة ما تشوفوها
فيها اولاً زحلة ممكن تعملوا فيها الصباح و بعدها تروحوا مغارة جعيتا الشهيرة و بيروت روحوا كلو فيها أكل بحري
و لا تنسوا تروحوا على قلعة موسى لها قصة جميلة و شوفتها مو خسارة أبداً
بالنسبة للفنادق انا رحت للبنان مرة و كنا مع كروب سياحي و نمنا في فندق سافوي savoy أعتقد انه خمس نجوم
أكله لذيذ و بقدم فطور و عشاء كله عبارة عن أكل لبناني لذيذ
شبيه جداً بالأكل المقدم في الفنادق السورية (زيتون بأنواعه مربيات جبن أنواع لبنة و كروسان و خبز لبناني و سمون و غيرها)
بالنسبة لتركية ممكن يفيدك فيها الأخ مجاهد انا ما رحتلها من عام 1998 بروح فقط لمناطق الاسنكدون القريبة من سورية بزور اقاربي هناك لكن المناطق السياحية و استانبول من زمان ما رحتها
أي سؤال انا حاضرة
و تروحوا و ترجعو بالسلامة يا رب
__________________
.
.
استودعتك أهلي في سوريا يا من لا تضيع ودائعه
التعديل الأخير تم بواسطة ماريا ; 07-04-2009 الساعة 10:27 AM
07-04-2009, 10:18 AM
ضوابط المشاركة
العرض الشجري