ولدي بعد شهر راح يكمل سنتين
من شهر و نص ولدي ما ياكل، اذا اكل ربع توست بركه
من 4 ايام اعتدل اكله الحمد لله
امس زوجي اخذ ولدي معاه للمجلس و قال لي في اولاد اصغر من ولدي هناك
انا اطمنت قلت اكيد بيستانس و بيلعب معاهم
لما رجع زوجي ندمت اني خليت ولدي يروح لان الرياييل سووا مقارنات بين ولدي و باقي الاولاد و طلع ولدي اصغر واحد بينهم بس اطول واحد وامتن واحد (يعني مليان) و ابيض واحد
انا كنت متوقعه انهم راح يتكلمون عن طوله بس نسيت اوصي زوجي يكبره 6 شهور
لاني متعوده اكبر عيالي

ولدي مو ابيض وايد يعني بياضه عادي بس قعدوا يسمونه اللبناني الاشقر و اللي يقول ابيض من الثلج
انا خايفه ترد الاكزيما في وجهه مسكين جسمه كله اكزيما ما صدقت تروح من وجهه
و الاكل قلت لكم من كم يوم اعتدل بس من الساعة 12 بالليل لين 4 و نص و هو يرجع توه نايم

ما اعرف شاسوي انا متأكده لو قلت لزوجي لا تاخذه معاك راح يرفض لان كل الرياييل يودون عيالهم و كانوا كل مره يسألونه عن ولده
و حتى لو اقتنع زوجي لين متى راح اخبي ولدي؟
انا كل ليله اقرا على عيالي آية الكرسي و المعوذات و الفاتحه
اذا ممكن تكتبون لي الادعيه اللتي تحفظ من العين اكون شاكره
الله يحفظكم و يحفظ عيالكم من العين

__________________