زوجي منان كثير اللوم والتذمر والشكوى متطلب ! - منتدى عالم الأسرة والمجتمع
logo

الملاحظات

المتزوجين مواضيع تهم المتزوجين من الرجال والنساء.

 
أدوات الموضوع
انواع عرض الموضوع
قديم 24-12-2009, 06:52 AM
  #1
سلسبيـل
عضو جديد
تاريخ التسجيل: Dec 2009
المشاركات: 18
سلسبيـل غير متصل  
زوجي منان كثير اللوم والتذمر والشكوى متطلب !

بفضفض عطوني مساحة ونوروني
بسرد حكاية معاناتي من اول زواجي لليوم



عمري 26 وزوجي 29
لي 11 شهر متزوجة
بداية زواجي عشت 7 شهور عذاب كنت اعاني من التشنج المهبلي...
واذا ما عندكم يا اعزائي خلفية بلخصها واقولكم كانت مشكلة تصير وقت الجماع
تتلخص في ان زوجي ما كان يتمكن من الايلاج المباشر بسبب خوفي وشد اعصابي وعضلاتي
كل شي متاح وممكن اتفاعل معاه الا الايلاج
وهي مشكلة -جنسية نفسية- معروفة ولا ارادية يعني ما تتحكم المرأة بردة الفعل وقتها بسبب الهلع من ايلاج اي شي داخل
المهبل ...
كانت هالسبعة شهور زي الكابوس اللي انتظره يعدّي ..شي فظيع ..نفسية زوجي التعبانة والتعيسة سخطه ولومه وهواشه
وخناقه وصراخه
ومعاملته لي زي لما اكون متعمده هالشي- مع انه يدري في قرارة نفسه انه امر خارج عن ارادتي ويشوف محاولاتي
وحزني وأسفي وبحثي في الموضوع واهتمامي.. أسأل دكتورات وأقرا وأبحث- بس برضو ما يرتاح الا لما يكيل لي كيل مو طبيعي
من الخناق واللوم والدق بالكلام اللي يبي يحسسني فيه بذنبي واني انا المسؤولة
بتقولون يمكن يحاول يدفعني للأمام عشان اجتهد..واتغلب على نفسي
بس لو كان هذا مرامه ما كسر مجاديفي وهو يردد علي انه يأس خلاص!!
واني من أسوأ لأسوأ!! وانه ما فيه اي تقدم قاعدين نحرزه..
ما فلحت محاولاتي المستميته لتهدئته وتذكيره بالله وتصبيره وبث شوية امل وتفاؤل بروحه
كان ساخط ومتذمر ويردد:

انتي ما عطيتيني حقي وانا ليش متزوج ؟

عند اي موضوع واي جلسه احاول إنا نكون فيها زوجين طبيعيين ونمارس حياتنا بشكل معقول
بعيد عن الهواش والكلام الغير واعي والغير مثمر في هالموضوع -من قبله-
كان يدوّر مدخل لهالموضوع بأي طريقة واذا ما لقى دلف
من غير مداخل عن طريق عزوه لأي شي أتكلم فيه لهالمشكلة
احاول جاهدة رغم اسلوبه المثبط اني اطبع اسلوبي بالاريحية والود والحب والتفاؤل
ومع كذا كان يحن ويزن ويئن حتى تضيق نفسي من اللي اشوفه وأسمعه ذرعا
ولما أشد معاه بالكلام شوي يرد:

شوفي كم لي متزوج المفروض تحطيني فوق راسك صابر عليك ..الشي اللي
متزوج عشانه ما أخذته ..المفروض تعوضيني
>>مع اني والله لا ادخر جهدا

كانت مأساة.. معاناة.. بكاء ..يخلق مشكلة من لا مشكلة .. زعل عند ادنى واتفه شي
عذبني ماراعى مشاعري
كنت اتعذب اكثر منه يكفي اني كنت احس بالذنب والتقصير والنقص لاني ما قدرت اعطيه هالشي زي باقي الحريم
كنت تحت ضغط هالمشكلة اللي مدري وشلون أحلها وهو ما ساعدني ولا تعاون معي و يزيدني ضغط
وكان عذره ان المشكله ضاغطة على اعصابه...
عذرته وصدقته لاني كنت اقرا فعلا عن تأثير المشاكل الجنسية على الحياة الزوجية وحاجة زي هذي جوهرية
وانعكاسها على نفسية ومزاج الرجل بيكون واضح وكبير
كنت استبيح له العذر على كل سلوك وتصرف يسئ لي فيه وكنت اراعيه واعدّي اللي يجيني منه بحكم ان السبب مني..
كنت احاول كثير امتص غضبه واللي يجيني منه واهديه واذكره بالله واقوله :
ادع معي واستغفر وصل بالليل وبيحلها الله ...وما كنت القى لكلامي في نفسه اي قبول

حاولت اطول بالي واغالب نفسي واثنيها عن كل ردة فعل ينفذ صبري معها

صح اني كنت افشل احيانا
وصح اني ممكن افقد اعصابي وتماسكي
وممكن اخرج عن طوري
لما يكون عيار اللوم والدق وعوار الراس فوق المستطاع
لما يستثير كل الم وتعب فيني وهو يهاجمني كأني قاصدة ومتعمدة
وارد عليه بشوية انفعال بكلام غالبا ما يكون مضمونه :انت عارف انه مو بيدي ليه تلومني في النازلة والطالعة
وهنا كان يجن جنونه ويقول لا ترفعين صوتك علي!

هددني بالانفصال وقال انه بيكلم اخواني...ويشرح لهم السبب والمسبب ويطلق ..
قال لي مرارا وتكرارا حياتنا بهالمشكلة ماراح تستمر
وللأمانة اني انا برضو طلبت الانفصال كذا مرة تأزم معي وضعي معاه حتى في حالات الهدوء برضو
تطرقت له وقلت له بهدوء وحب ! طلقني اذا الطلاق هو الحل
بس كان لما يجي الجد يتمسك فيني!
راحت الايام وجلست الرمضان كله عند اهلي ادعي ان الله يفرجها
اكلمه باستمرار ويرسل لي مسجات كلامه ومسجاته طبعا وغالبا ماكانت تخرج عن اطار :شوفي حل للموضوع - ترى نفسيتي اندمرت -اللوم-
وانسيني وبنساك- ومسجات حزن
ماكان متعاون ويبحث معي عن حل ...كان سلبي وحيله كله علي
قلت له بروح لدكتورة تعالج هالمشكلة مذكورة في النت ودني لها قال طيب
رحت ..برضو في العلاج ماكان متعاون مرة ..فيه شي رفضه سبّب شوية مناوشات بيني وبينه بس الحمد لله
بفضل من الله ورحمة فُرجت
كنت اسوي تمارين يومية وحلها ربي من غير ما اوصل المرحلة اللي كان رافضها
كنت متحفزة وكلي حماس للنتيجة
ابي اشوف الحياة الحقيقية الحين
الغمامة انقشعت والازمة اللي كانت عافسة الجو كله عدت
ابي اشوف نفسيته الطبيعية الحين
الاعصاب المضغوطة اكيد بتصير ريلاكس
وبعيش زي اي زوجة
وزي ما مناني هو وغيره من اللي كلمتهم بمشكلتي ان المشاكل الحين كلها بتتلاشى وان كل شي بيتغير 180درجة
بعيش الاستقرار خلاص
وبشوف السعادة اللي اسمع بها بعد النوم معاه بدال الانفعال والصراخ والهواش
بس للأسف
للأسف
لقيته يسوي اللي يبي ويقوم يغتسل!!
لقيته جاف بنفسية ما تفرق كثير عن اللي راح
وحاجات كثيرة كنت مأملة انها تتعدل وآسفني اني القاها زي ماهي ..روتينه السابق القاتل ..مزاجه العكر
مازال غير متفهم ..وما يتقبل اي عتاب
..واي نقاش معاه يحتد
اللي تغير هو الموال المزعج هو اللي انقطع بس
الحمد لله هذا شي بحد ذاته اعتبره نعمه بس وييين وليييش؟!
عشت وقت انبلاج الازمة ايام صعبة بدال الفرحة والاحساس بالميلاد الجديد
كنت ابكي بحرارة بنيت كل شي على هالفرج وتأملت كثير وتعشمت
كانت عيوني تدمع وانا احاول اكلمه وأسأله وشفيه ووش المشكله الحين وهو يتململ من دموعي
ويـتأفف ويتضجر ويقول كم مرة بكيتي اليوم ؟
صار اقسى من اول وأجف
حتى الرحمة اللي كانت تجي منه من وقت للثاني اختفت انعدمت وراحت
وتمسكه فيني اللي يظهر في بعض الاوقات ماله أثر خلاص!!
صار يقولي ما اعجبتك الحياة معي ؟ اطلقك؟
وكان بيطلقني بجد بليلة من الليالي لاني لحقته بعد ما دخل ينام وقلت له متضايقة مرة
وقال وشفيك وبكيت وبديت اشكي له منه
قام وهو متضايق بيطلع قلت له خلاص نام سامحني عالازعاج قال ابعدي طيرتي النوم
قربت منه بعتذر له وابعدني عنه وقال بعدي
طلعت للصالة وجلست ابكي ومر من عندي لابس ثوبه وقال لي انه بيستناني اضف عفشي لانه قرر يطلق!!
جلست اجمع ملابسي وهو جالس ينتظر مسك راسه وقال مصدع قلت له الصباح رباح ماراح نمشي الحين لاهلي
وانت تعبان وجلست جنبه...
بالاخير صارحني ان كشف مؤخرا عند طبيب وقال ان عنده اشتباه ورم في الكبد!!
عذرته واعتذرت له وعاهدت نفسي اني اكمل مسيرة المراعاة معاه
واداري خاطره وما الومه على شي خلاص وبوقف جنبه
وزعلت عشانه وبكيت
بس مع الايام تعبت
تعبت
خاطره مرة شين.. تضايقني منه تصرفات كثيرة
يشوف ان مراعاتي له شي واجب علي ويتنكر برضو لها...ويقول ما شفت منك شي!
ما يراعي -ولو على خفيف-خاطري المحروم من لحظة هنا من يوم ما تزوجنا
عند ادنى عتاب مُحبة بسيط باسلوب غاية في اللين
يتنرفز ويقوم ويهاوش
ويجيب طاري الطلاق!!! صار لازم وكل يوم ولابد يشئّر على حكاية الطلاق عالفاضي والمليان
يستهين بمشاعري وما يهتم بأمرها
تعبت وانا اتحامل واراعي وابلع
يتهيأ لي اني قبل اشتباه المرض كنت من ضمن متاع الدنيا حتى لو كنت مسببة له ذيك الازمة اظل مرغوبة
بس الحين رخصت الدنيا بعينه ومن ضمنها انا
ما عدت احس ان لي اي قدر او قيمة عنده..يقابل حبي وعطائي بوجه عابس
..يهيني !!احس بالاهانة احيانا وانا اداري خاطره لدرجة الاذلال ...
والقى نفسي تعز علي وما تعز عليه
مازال يلوم ويعاتب ويتذمر ويتشكى مني ويطلع لي كل مرة بسالفة
قال لي مرة وانا عند اهلي -كنت رايحة ازورهم واجلس عندهم كم يوم- ماراح ترجعين الا وانتي معدله نومك
وبالتغيير اللي انا ابيه >>كان نظام نومي مو عاجبه
قلت طيب بس مدامك شايف فيني اشياء مو عاجبتك وتبيني اعدلها من باب العدل والقسطاس
باقول اللي انا ابي بعد>>بروح حلوة ورب البيت
بس كانت ردة فعله عنيفة قالي من ضمنها:

لا تنسين اني انا اللي صبرت عليك وانا اللي عالجتك !!


زوجي منان يا جماعة
و ابعد ما يكون عن طولة البال
يظهر لي انه اناني جدا ويحس بفضله علي بكل شي يسويه لي
نكدي غير مرح - كثير اللوم والعتاب كثير التذمر والشكوى متطلب !
ما يعذر ولا يدمح الزلة ولا ينسى اللي راح مهما شرحت له عذري
يسئ الفهم احيانا يفهم غلط واذا شرحت له دوافعي ومبرراتي يستهزئ وهو يقول ملاك بسم الله عليك!
اهم ماعليه نفسه وراحته ما اشوف منه اي تنازلات وتقدير لراي او رغبة لشريكة حياته
افتقر معاه للاريحية بالسوالف والمرح والسبب انه سريع الزعل ويسئ الفهم ومتربي على موروث شرقي ينص على احترام
الزوج وتقديره والعمل على راحته
اذا طولت بالي عليه وحاولت اتقرب بالحنان القى تمنع وملامح عابسة ما تشجع اني اعطي المزيد
ردات فعله تكدر خاطري وتأثر في مزاجي وعطاي.. -وللعلم كل هالاشياء كنت اشوفها قبل وبعد واستشفيتها بعضها من ايام الملكة-
القلب يعطي ويبدع ويبذل كلما كان اروق واسعد بالمشاعر الحلوة
اللي يغمره بها الطرف الاخر
صعبة اجمّع واضغط على نفسي.. تصير الروح تعبانة ومشحونة ...
وشلون اتعامل معاه ارشدوني ......................................

التعديل الأخير تم بواسطة ماريا ; 24-12-2009 الساعة 03:55 PM السبب: توضيح العنوان
 

مواقع النشر


ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 03:00 AM.


images