السلام عليكم ورحمة الله وبركاته












خاطري اصيح .. خاطري اروح امسكه واخنقه .. نفسي افتح مخه اشوف كيف متركب

نفسي امسك البلا اللي فيه ويخليه يفكر فيني كذا واشيله







يمكن بعضكم مايعرفني لكن لي مشاكل ازليه مع زوجي وكلها بسبب الشك اللي وصل للتخوين في العرض

وبسبب افكاره وصلنا للطلاق مره وحده ... و محاولة الطلاق مره ثانيه وعلى اساس انه نهائي وظليت سنه ونص عند اهلي على هالاساس لكن سبحان الله رجعنا








من لما رجعنا لي سنتين وشوي





خلال هالسنتين لمحت فيه ملامح شك


بسيطه جدا


كنت احيانا اطنشها واقول الحمد لله على نعمة العقل


ومرات كنت المح له اني فهمت و اطمنه انه مافيه شي يستدعي الشك



ومرات هو كان يتراجع ويستحي على نفسه وهذي ياكثرها











لكن امس .. الظهر

تفاجأت فيه يجي من دوامه لأن عنده شغله في مدرسة ولدي بيروح يعملها

.. وانا كنت نايمه ..


المهم قبل لا انام قعدت شويه اطقطق ع النت .. وزهقت لأن النت تحت .. والشغاله جت تكنس على راسي

فما اعجبني الجو ... قمت اخذت جوالي وسماعة الكمبيوتر لأن سماعة الجوال بعيده عني ومتكاسله اجيبها ... وطلعت غرفتي وقفلت على نفسي الباب


علشان لا اسمع المكنسه
وعلشان كمان البسه لا تدخل علي و تقعد تلعب على راسي وانا نايمه وتخرب علي نومتي


وامعانا مني في عدم سماع صوت المكنسه حطيت السماعات على اذني وانسدحت وشغلت الاستوديو في الجوال وقعدت اتسلى عليه .. نعست ونمت

صحيت على صوت الدق ع الباب

قلت مين ما رد علي ... قلت عشان لو الشغاله والا اخوي يبوني ارد عليهم وانا في فراشي ما اقوم واضيع الدفا ..وتخرب النومه

قلت مين مره ثانيه قال انا انا

طلع زوجي

فزيت فتحت له.. قال وش عندك نايمه هنا و مقفله الباب؟ ( يعني ايه غلط والا حرام والا لازم اعطيك خبر؟
طبعا هو متعود برضو اني ما انام في غرفتي واقفل على نفسي الباب في الصباح .. العاده في الصباح اذا حبيت انام ..انام تحت في المجلس علشان اكون قريبه من التلفون ومن الباب لا يجي ولدي وانا ما ادري عنه)

اول مادخل .. لمح الجوال والسماعه مشبوكه فيه قال وش هذا؟

انا على طول دخلت مكاني مره ثانيه انام ولا رديت عليه لأنه واضح انها السماعه والجوال .... قال وش هذا الاسود الكبير؟( واضح انها سماعه .. بديت اشك انه يعتقد انها جهاز غريب وغالبا تجسس)


التفت عليه محل ما يأشر ضحكت انا قلت سماعة الكمبيوتر


قال ليش شكلها كذا؟ ( يعني كيف المفروض شكلها؟)وليش مشبوكه في الجوال؟


قلت وش فيها ؟

غير ملابسه وهو يتأفف .. انا حسيته مو طبيعي ... التفت عليه .. الا رجع مره ثانيه يقلب الجوال والسماعه ويصغر عيونه يقول اش هذا؟ ايش هذا؟

( ياربي والله السماعه والجوال )

اشفيها كذا مشبوكه وليش شابكتها؟ قلت اشفيها يعني؟
( انا هنا بديت اشك انه فاهم اني مشبكه ع الكمبيوتر من الجوال .. واني جالسه اكلم اي رجل بس تعوذت من الشيطان .. بتقولون السماعه مالها خص في الكمبيوتر .. اقول لكم هو مخه مركب كذا )



طنشني وعطاني ظهره قال


حركه مريبه

( هنا انا تأكدت فعلا انه شاكك في مكالمه و تجسس كمبيوتر)



انا ماتحملت

ارسلت له رساله ع الجوال حقه


( مريب يعني لغويا مثير للشك... ايش الغريب في سماعة كمبيوتر مشبوكه في جوال ؟ يا جيمس بوند والا رجعنا لخرابيط اول؟

عموما ثاني مره انتقي الفاظك .. واذا شاكك في شي تحقق منه بنفسك بس لا عاد اسمع اسطوانات مشروخه )



ولا رد علي ابدااااااااااااااااااااااااااااااااااااااااااااااا اااااااا الى هذي اللحظه


ولا عاد حطيت عيني بعينه ولا اكلت معاه ولا جلست ولا سولفت ولا شي

هو في جهه وانا في جهه .. ومحد في البيت حاسس بشي بيني وبينه ابدا

جا اخر الليل امس قال قومي نامي .. والا حابه تسهرين؟

قلت بأسهر اكمل شغل الجامعه روح الله يستر عليك

وانا صادقه جالسه اذاكر

حاول يفتح كم سالفه وانا عيني في الشاشه والمحاضرات وارد عليه بكلمه والا ثنتين

قال لي قومي نامي احسن لك .. وظل واقف شوي ولا رديت عليه وطنشته وكملت شغلي

انحرج وطلع ينام

بعده بساعتين تقريبا انا طلعت .. طبعا هو قصده تعالي اراضيك .. بيضحك علي بكلمتين .. وبعدين ياخذ غرضه .. يفكرني خبله والا عبيطه والا بأسامح عادي جدا .. كان كذا ايام اول وانا ما استوعبت الا بعدين


حز في خاطري انه يطلبني شي وانا ارده بس انا اكره اسلوب الجرايم في النهار والعشق اخر الليل وبدون اي اسف حقيقي او نقاش

الصبح لما رنت الساعه المنبهه شافني جنبه فحاول يتقرب .. قمت انا فزيت قلت يووووووووووه تأخرت على الولد ومدرسته وانا قصدي اوخر عنه لا يقربني وبدون ما احرجه زياده
لأنه قصده وانا اعرفه .. انه يضيع الحق .. وخلاص انسي السالفه



جا العصر ومعاه اكل .. قال تعالي كلي معاي قلت عليك بالعافيه وانا ما اطالع فيه ابدا

وهذا هو نايم زعلان وانا زعلانه عليه

بموت شوق عليه .. ومن امس ماطاحت عيني عليه لأني زعلانه عليه واشتقت له
ابي اجلس معاه واسولف معاه واقرب منه

بس لما اتذكر كلمته ........... اكش وابعد واعصب وازعل


بعضكم الحين بيتسائل كذا تساؤل

ليش هو مستنكر من السماعه حقت الكمبيوتر في الجوال

وانا بقول لكم لأنه جته فتره متهمني اني زرعت اجهزة تجسس في كل متعلقاته وخصوصا الكمبيوتر .. حتى في اطارات الابواب !!!!!!!!!!!!!!!!!!!!!!!!!!!!!!!!!!!! يفكرني اتجسس عليه ياحسره على ايه ؟


وسبق اتهمني اني حطيت جهاز تجسس ونسيته ع الكومدينه .. يوم قلت له وين هالجهاز ليه مامسكته لماشفته ؟ قال ماجا في بالي بس خلاص انا شفته

تدرون وش شاف؟ ساعه مكسوره من الساعات التحف ..كنت حاطتها ع الكومدينه وانكسرت علي فأفتكرها جهاز تجسس... انا متأكده انه ما استوعب شكل السماعه بالأول وحسبها من هالاجهزه اللي كان متهمني فيها ......... ياحسرة قلبي

بتقولون ممكن انا فاهمه غلط ؟ لا فاهمته صح سنين وانا معاه خلاص خابزته وعاجنته

بتقولون يمكن رسالتي خلته يصد ومايحب يتأسف

وانا بقول لكم لا .. انا لما اكون فاهمه غلط من يوم ما رجعنا .. يجي يفهمني الصح ويتأسف اني زعلت منه بالغلط وانه مايقصد وانه قصده كذا كذا كذا وانه مظلوم ومسكين وانا اللي استعجلت وووو

لكن هالمره زي ماتقولون هرب .. ولا رد علي .. ولما يجي يحب يصالحني اخر الليل هذا اكبر اثبات لي انه فعلا غلطان مليون بالميه بس متفشل مو عارف كيف يواجهني خصوصا اذا المسأله متعلقه بالشك



انا الحين من جد انكتمت

لي فتره ماعاد تزاعلت معاه زعل جامد كذا

ولا عاد اتحمل انا هالحركات منه .. واعصابي ماهي زي اول بسرعه اتنرفز واتضايق

تجاهل .. خلاص استفذه من ايام اول

تغاضي تسامح كله راح ... وممكن يرجع في اي شي الا الشك ..


معليش ادوشتكم و طولت عليكم

بس ابي اتكلم وارتاح ... اهلي ما اقدر اشتكي لهم ولا قصدي اصلا اعلمهم بيقولون ياليتك مارجعتي

وهو مابي اكسر صورته قدامهم لأني خلاص قلت لهم والله تغير وانا صادقه



ما اقدر اسامحه صراحه ................ ولا هو جا يتسامح مع اني متأكده اني بأنهار اذا جا لأني بديت اتذكر الايام السودا اياها


يووووووووووووووووووووووه متنكده

حسبي الله ونعم الوكيل وبس