عقدة الخوف من الموت وعذاب سنين ساعدوني ..
السلام عليكم ورحمة الله وبركاته
انا متابعه للمنتدى من مدة طويلة لكن مااشارك اتابع بصمت وعارفه اغلب الاعضاء هنا واتمنى يساعدوني بمشكلتي لاني اتوسم فيهم الخير وفي المنتدى الرائع هذا ..
انا عمري 30 سنه ومتزوجه من 8 سنوات تقريبا وعندي ولدين الله يحفظهم لي وحامل الآن والحمد لله مرتاحه مع زوجي ومتفاهمين ومابيننا مشاكل رغم ان احوالنا الماديه سيئه وعايشين بايجار وعلينا ديون لكن راضين بحياتنا وقنوعين والحمد لله على كل شي ..
مشكلتي بدت تقريبا من 5 سنوات في احد الايام الكئيبه صحاني زوجي الصباح وصدمني لما قالي ان زوج اختي الكبيره توفى الله يرحمه فجأه وزوج اختي هذا كان طيب واجتماعي والكل يحبه وكانت وفاته صدمه للجميع اختي راحت لاهلي وتعذبت لان احوالهم كانت صعبه لكنها الحين عندها بيت و مرتاحه مع اولادها الحمدلله ، المشكلة فيني انا زوج اختي تقريبا كان اول شخص يموت في العايله وسبحان الله كنت اسمع بالموت واشوف ناس يموت احبابهم ويتعذبون لكن كأني كنت غافله عنه استغفر الله ولما شفت وشلون اختي حزنت على وفاة زوجها وتعذبت صحيت وصارت عندي عقدة من الموت على احبابي وفي المدة الاخيرة زادت عقدتي من الموت لما مات ولد اختي الثانيه وعمره ماتجاوز 10 سنوات الله يصبر اختي على فقده انا ماني خايفه من الموت على نفسي سبحان الله لو يقول لي احد بتموتين بعد دقايق عادي عندي ومستعدة للموت ومتقبلته لنفسي لكني دايما افكر بزوجي واولادي واخاف يصير لهم شي لدرجه كل صلاة ادعي ان يومي قبل يومهم ..
انا مؤمنه بالله الحمد لله وعارفه ان كل شي بقضاء وقدر وكل انسان له يومه واحاول اقرا القرآن دايما واقوي ايماني بالله لكن الوساوس والافكار اتعبتني لدرجه اتخيل اشياء بالمستقبل ماصارت واتخيل اني فقدت زوجي او احد ابنائي لا سمح الله واتخيل حتى الطريقه اعوذ بالله ثم اقعد ابكي واصيح لحدما تحمر عيوني من الصياح وكل يوم على نفس الموال رغم اني مااحاول ابين لزوجي عقدتي هذي لاني ما ابكي الا لما اكون لوحدي ..احيانا احس ان عندي اكتئاب رغم اني طبيعيه واجتماعيه الحمد لله واحيانا احس ان طفولتي هي السبب لاني عشت طفولة سيئه من قسوة الام وتحرشات الاخوان وماارتحت الا لما تزوجت واخاف يجي يوم وارجع لكابوس العيش مع الاهل خصوصا اننا عايشين بايجار واحوالنا الماديه سيئه الله يحفظ لي زوجي واولادي يا رب لكني تعبت فعلا طول اليوم اتأمل زوجي واولادي واتخيل وشلون بيصير وضعي لو صار لهم شي لا سمح الله وشلون اقدر اتحمل صدمة الموت خصوصا مع كثرة الحوادث والموت المفاجئ بالسكته استغفر الله العظيم نفسي ارتاح من وساوس الشيطان هذي واحيانا اقول ليش اضيع عمري بهم وتفكير اسود وتخيل احداث ماصارت ليش مااعيش بنفس راضيه مرتاحه مؤمنه بالقضاء والقدر الناس يبكون ويحزنون لما تصير لهم مصيبه وانا الحمد لله مرتاحه مع زوجي وعيالي عندي وصحتهم زينه الله يحفظهم لي ومع ذلك ذابحني التفكير والهم وتخيل المستقبل الاسود ساعدوني الله يعافيكم ابغى اترك الافكار السوداء هذي بس ماني قادره..
24-03-2010, 07:54 AM
ضوابط المشاركة
العرض الشجري