صدق من قال (دوام الحال من المحال)
بسم الله الرحمن الرحيم
السلام عليكم ورحمة الله وبركاته
أنا اليوم جايتكم بمشكلتين أو بالأصح بهمين
الأول:
أمي وأبوي
كنا صغار وكان أبوي يحضر درسات عليا
كبرنا وهو غارق أكثر يومه بمكتبته
أمي تحملت جزء كبير من المسؤولية
خصوصا مع انشغال ابوي بدراسته والدراسة اول أصعب بكثير من الحين تاخذ من العمر سنوات
كنت أحس أننا أسعد ناس
لأن فيه نقطة ممتازة عند امي وابوي مستحيل مستحيل يتخاصمون قدامنا
أخذ ابوي أعلى الشهادات وتفوق بمجال دراسته وصار شخص جدا مهم
أمي تنازلت عن أشياء كثيرة وكثيرة جدا
واللي زوجها يحضر دراسات عليا بتفهم قصدي
لأن أبوي دائما مشغول
مرت السنوات
الحين كبرنا وتزوجنا
وباقي بعض أخواني صغار
أبوي صار مايمر أسبوعين أو شهر ألا مسافر طبعا مؤتمرات ومحاضرات وورش عمل وشغلات كثيرة
وأمي تجلس بالبيت لأن أخواني الصغار يدرسون، ولو صار بالبيت أغلب وقته مشغول لنشاطاته وإلا يتصفح النت
طبعا هالوضع جدا جدا صعب على أمي
واللي زاد الأمر سوء أخواني المتزوجين كل واحد له مطالبه الخاصة وكلها تصير بوجه أمي
وإن ماصارت بوجهها ، يوصل لها دخانها..
وصار عليها ضغط كبير جدا
يعني لاأول حياتها ولا الحين مبسوطة
أنا أتألم كل ماشفت الوضع
كانت صابرة تنتظر أبوي يخلص ويتفرغ لها
طلع لأبوي مشاغله اللي أشد من الدراسة
هم ماتشيله جبال ياقلبي عليها
وهي بطبها ضعيفة وحساسة
يعني ماديا الحمد لله ماقصر بس نفسيا وعاطفيا منشغل تماما
أنا أنحرج من أبوي أكلمه بالموضوع
صعبة تكون البنت بصف امها الموضوع نوعا ما حساس
خصوصا انه هو عليه ايضا ضغوط
وهو تاج راسي ماأتحمل يصير بيننا شيء
أمس أول مرة بحياتي يرفع صوته على لاجل مزحة بسيطة
والله أسودت الدنيا بوجهي
بس أمي بعد وضعها مرة صعب
محتاجة أبوي كأي زوجة بالعالم
الثاني:
زوجي
فيه صفات عجزت أبلعها،وماقدرت أتعايش معها على العشرة اللي صارت بيننا:
عصبي
ولأتفه سبب ممكن يثور
وهالشيء مرة متعب
أنا دائما أسكت وابلعها بس مليـــــت
المنة
لو طلبت منه طلب يذلني فيه ولازم يرمي له كلمة أو كلمتين يحسسني مرمية عنده، ودايم اقوله قل لا أحب على ألف مرة من انك تسويها بهالأسلوب>>مو دائما بس أحيانا
الميانة بغير محلها
ممكن يتصرف معي تصرفات مالها داعي بحجة انه انا زوجته
يعني ماعنده سالفة الاحترام الا للغريب
تبذير المال
دائما نجلس أخر الشهر بدون شيء
عنده قاعدة أنفق مابالجيب يجيك مابالغيب
المراعاة
ماعنده ناحية انه يعذرني بمرضي والا بحملي
أنا الحمد لله كنت شهر وأنا اعاني من بوادر الاجهاض
وكانت الحركة تأثر علي
وكان يقولي ليه ماتسوين كذا والا حامل!!
حتى الدوام يقولي ليه ماتروحين تدومين!!أي دوام وانا لاطلعت الدرج أتأثر
أنا مستغربة خاطري أحد يفهمني هو شلون يفكر؟؟والله مااقولها استخاف انا فعلا خاطري أعرف
البنات
مايتحمل حركات طفولتهم ابدا
لو ترمي رضاعتها بالارض والا تلعب بالعابها يعصب ويهاوشها
وفيه شيئين مااحب اقولهم هنا
المهم
الحين انا سقطت اليوم الفجر الحمد لله
واليوم صار موقف كملها
وأفكر جديا بالخلع
هو فيه صفات حلوة ماانكر
وماهو بسيء لدرجة طلب الطلاق
بس انا ماقدرت اتحمل
إذا حتى الحمل اللي مزعجني عليه ماتفهم وضعي فيه
وحتى العام الماضي تعبت وكان موقفه بنفس الطريقة ماانكر يتحمل مسؤولية المشاوير والمستشفيات باللي يقدر عليه
بس يبيني حصان 24 ساعة يعني يعاملني كأني أمثل
أنا أحبه وحاولت أكثر من مرة أتعايش مع طباعه
بس كل مرة أوصل لهالمرحلة الصعبة
للعلم عمره 33 وانا 28 ولنا 7سنوات زواج وعندنا بنتين 6،3سنوات
12-04-2010, 02:43 PM
ضوابط المشاركة
العرض الشجري