أولا ً جزاك الله خير أخوي على الموضوع
ملاحظة : اللي يبي يقرا ردي يقراه كامل ولا لا يقراه .
بالنسبة للحكم الشرعي للسفر خارج المملكة سواء للدول العربية أو الكافرة ما أعرف الحكم الشرعي ، بس أتوقع أنه فيه خلاف .. خاصة للي يروح للسياحة وفي نفس الوقت يدعو للإسلام .
لكن اللي يقهر هو التساهل في السفر للخارج .. للأسف كثير من الناس يسافر للخارج يصيف ويسفر عياله عشان ياخذوا لغة ولا يفكر في الدين ، يعني حتى لو كان السفر فيه خلاف وحتى ولو كان السفر للخارج حلال .. لازم الواحد يفكر هل هذا السفر ممكن يضره أو يضر عياله ويسأل ، يعني في ناس يرسلوا عيالهم ياخذوا لغة حتى مايستخيروا أنه يروح ولا لا ..يرسله بدون إستخارة ، معروف طبعا ً أن الواحد مايدري وين الخير .. أحيانا ً السفر للخارج يكون فيه خير ، يعني أنا أعرف واحد أخوي خوويي (صاحبي) .. كان إنسان عادي يعني يصلي بس ماكان متلزم .. سبحان الله راح أمريكا رجع ملتزم .ولحيته طويله رجع لهم إنسان ثاني .. يوم شاف حياتهم كيف .. ألتزم بدينه أكثر < يمكن في أسباب ثانيه ماأدري يمكن لقى رفقاء صالحين ماأدري .. بس والله أنه راح أمريكا ورجع ملتزم ومات الله يرحمه وهو ملتزم ، قصة ثانية ولد أختي سافر أستراليا .. ماكان يصلي وسكن معه واحد ماشاء الله عليه عنده أسلوب في النصيحه وماشاء الله الحين صار محافظ على الصلاة .. غير كذا خوييه (صاحبه ) حتى كان ينصحه على الدراسه ويشجعه عليها وماشاء جاب درجات حلوة جاب b < ومن طقتها .. ماكان يجيبها يوم كان في السعودية ، لكن في نفس الوقت في صاحب لي كان ملتزم (مطوع ) وراح مع أخته صيفيه أمريكا وأنتكس والحين ما يصلي والمصيبة والطامة أنه حتى ماصار يغار على أخته أو بالأصح عادي أخته تكلم شباب وتتعرف تأثر كثير بالكفار وبحياتهم وبأفكارهم .. يقول لي خويي (صاحبي) أنه متصور مع أخته وحاط صورته مع أخته في الفيس بوك وحاط رابط صفحة أخته على الفيس بوك .. والله أني ماني مصدق كيف كان هذا الإنسان ملتزم ومن خيرة الناس والحين كيف صار .. لاحول ولا قوة إلا بالله .. يامقلب القلوب والأبصار ثبت قلوبنا على دينك .. يعني السالفة ماهي ببسيطة وكثير راحوا برى وأنتكسوا أو ضعف إيمانهم وماصاروا يغضوا أبصارهم .
تفكيري أني أسافر برى السعودية :
بالنسبة لي أحيانا ً أفكر أني إذا تزوجت ممكن أسافر برى .. ممكن لدول تكون إسلاميه وممكن لغيرها مثل الهند طبيعتها حلوة وفيها كثير ماهم مسلمين .. المهم أني قبل لا أسافر أخذ كتب تعريفية عن الإسلام وإذا لقيت واحد ماهو مسلم أعطيه أنا كتاب يعرفه بالإسلام وإذا لقينا وحده ماهي مسلمة زوجتي تعطيها الكتاب .. طبعا ً أنا مستحيل أسافر برى بدون إستخارة .. وطبعا ً الخيرة في ما أختاره الله .
تفكيري أني ماأسافر برى السعودية :
تجيني فترات أفكر وأقول ماراح أطلع برى السعودية لأني ولله الحمد أكره الفتن ، وأقول عادي إذا تزوجت إن شاء الله أروح المدينة المنورة << الله يامحلا المدينة المنورة .. وأتحدى تلاقي مدينة في العالم غير مكة تلاقي فيها راحه نفسيه مثل المدينة المنورة وفنادقها ماشاء الله حلوة غير كذا فيها مطاعم حلوة .. ( يكفي أن فيها البيك ) .. أما برى فكل اللي راحوا برى يقولوا أن أكلهم الله يكرم النعمة ، عموما في السعوديه في فنادق حلوة وفي شاليهات فيها مسبح خاص وفي أماكن حلوة في الطايف والباحه والنماص وتنومة وأبها .. الخ ، باختصار اللي يبي يدور سياحة حلوة ويبي ينبسط في السعودية راح يلاقي أماكن حلوة وراح ينسبط وأنا أعرف أماكن كثير حلوة في السعودية ، طبعا ً كنت أفكر أني أسافر برى وأدعو الناس للإسلام ، لكن قلت لنفسي ليه ماأبذل جهدي هنا وأدعو الناس للإسلام .. وكانت الصدمة قويه لي صرت إذا جاء مطعم يوصل لي الطلب أساله وش ديانتك وأكثر من واحد طلع مسيحي والله كثير اللي أسئلهم ويقولوا أنهم مسحيين .. طبعا ً أنا ما أقول هذا رياء إذا عرفت أنه مو مسلم أعطيه عشره ريال زياده < طبعا ً يفرح كثير ويستغرب من هذا الشيء واكلمه عن الإسلام أو أقول له الإسلام كويس أقرا عنه ، للأسف أنا مقصر كان المفروض أخذ كتيبات من الجاليات أو من الأماكن اللي توفر هذي الكتب وأوزعها عليهم < لأن الكتب لها تأثير كبير ، لكن إن شاء الله قريب أشتريها ، يعني ببسطة كل شي تقدر تسويه في السعودية حتى الدعوة إلى الإسلام .
بالنسبة للسفر للخارج أنا ماراح أسافر إلا بإستخارة أول شيء ثاني شيء ماني مسافر إلا وزوجتي معي لأن الزواج كما قال الرسول صلى الله عليه وسلم ( أغض للبصر وأحصن للفرج ) .. والله يقدر لي اللي فيه الخير .
مشكلة تفكير بعض الناس :
بعض الناس يحسب أن لازم يطلع برى السعودية ، وأن السعادة محصورة في السفر برى والتمتع بالطبيعة والمنتزهات والملاهي .. الخ ،وأن اللي ماسافر برى المملكة مسكين ..
أقول لمثل هؤلاء رحم الله الشافعي الذي قال .. ولست أرى السعادة جمع مالا ً ولكن التقي هو السعيد ، السعادة في تقوى الله وفي الإكثار من ذكره قال تعالى (ألا بِذِكْرِ اللَّهِ تَطْمَئِنُّ الْقُلُوبُ) .. السعادة في البعد عن المعاصي وفي التمتع بالمباحات وفي الحياة الوسطية وعدم التشدد .
مشكور أخوي شاطئ المحبة على الموضوع وجزاك الله خير .
أسف على الإطالة .
التعديل الأخير تم بواسطة بآرد ; 01-06-2010 الساعة 01:11 AM
01-06-2010, 01:03 AM
ضوابط المشاركة
العرض الشجري