أخي الكريم
قريت رسالتك و كانك تصف لي بيت أحد خوالي ... الابناء يعيشون تحت سقف واحد ولكن بلا تواصل و لا محبة ... و الحين كل واحد بصوب و للاسف مقطوع بينهم التواصل الا في الاعياد عند التجمع العائلي
افهم مدي ضيقك من الوضع ولكن ما خربتها الايام و السنين صعبة تغيره في فترة بسيطه
نصيحتي لك كأخت: أبدا بنفسك اولا ... أنسي الماضي و حاول ما يكون في قلبك شي من الخواطر السيئه
حاول تعاشر الناس السعيدين و الناجحين في حياتهم الاجتماعية عشان تتعلم منهم ما لم تقدر تتعلم من اهلك
استثمر في نفسك و في علاقتك مع زوجة المستقبل
حاول قدر الامكان ان لا تتكرر غلطه الوالد مع زوجتك و عيالك (جدي كان هكذا و خالي اخذ الطباع السيئه منه)
لو هل بعاد يخليك تكون سعيد و ناجح خليك بعيد بس حاول تواصل معاهم بالتليفون .. اكيد في البداية ما راح يتجاوبون معاك بس لا تزعل ... حاول مرة و مرتين و ثلاثه .. و لا تنسي ان كله في ميزان حسناتك
أخي لا تتوقع منهم ابد الحب او الاهتمام .. لان لو توقع هل شي فساعتها راح تتعب من ردة فعلهم الجاف و البارد .. بس لو قلت بينك و بين نفسك : انا ما يهمني تصرفهم بس انا راح اكون زين .. ساعتها ما يهمك اللي يسوونه معاك
لا تخلي حد يستغلك عاطفيا ... لان اللي ما شاف حب و حنان في صغره سهل ان لما يكبر حد يستغله عاطفيا
أتمني زوجه المستقبل ما تعرف عن ماضيك و ماضي اهلك لان ساعات الحرمة تستغل نقطه ضعف الزوج
انت ناجح و الدليل علي هل شي انك برغم وضع اهلك و قسوتهم قدرت تنجح بامتياز و تحصل مركز مرموق و هذه نعمه من اللة لازم تشكرة
حاول تعيش حياتك بالطول و العرض و لا تفكر في الماضي لان اللي فات مات و انت عن قريب راح تكون صاحب زوجة و عيال و مستقبل باهر ان شاللة فكر في ان كيف تسعد نفسك و زوجتك و عيالك
لا تنسي الدعاء ... ربك كان يحبك عشان كذا ساعدك تشوف الطريق الصح
تحياتي لك