السلام عليكم
عندي إستفسار بسيط و أتمني ألقى جواب منك والدنا الفاضل رجل الرجال
راح أسافر لوحدي و أغيب 20 يوم تقريباً بمناسبة زواجات و ظروف عائليه أخرى
ما أقدر أخذ أطفالي معي و راح أخليهم مع أبوهم و جدتهم و عمتهم. و أنا واثقه فيهم تماماً و الحمدلله
بنتي عمرها 4 سنوات،،، غبت عنها لما كانت 10 شهور لمدة 5 أيام و ما حست ولا إتأثرت و كانت جداً عاديه لما رجعت
الحين أنا ما أعرف كيف أهيئها على غيابي كل هذه المده خاصة أنها متعلقه فيني جداً جداً، و هي الحين تستوعب كل شي و تتكلم و تفهم إللي يصير حولها
أخوها الصغير عمره سنه و 4 أشهر، و لسه صغير و ما أضن أنه حيحس بغيابي أو أنه يتأثر
قلتلها أمس اني راح أسافر و أخذ الطياره لوحدي و أنها و أخوها راح يبقوا مع بابا، و أني راح أشتري لها ألعاب و فساتين حلوه
بكت و قالت لا تتركيني، أبغى أروح معاكي، فهدأتها وقلت لها ما راح أغيب كثير و أني راح أكلمها في التلفون كل يوم إن شاء الله
سألتني ليش راح أسافر و ليش ما أخذها معي؟ فقلت لها أنا رايحه مكان للكبار بس و ما يسمحوا بالأطفال هناك،
فقالت أنا كبيره كمان، أنا أكبر من فلان (أخوها) فقلتلها صح أنتي أكبر منه بس انتي مو كبيره زي ماما و بابا، و لما تكبري و تصيري زيي راح أخذك معاي
فقتنعت شوي و قالت طيب راح أبقى مع بابا و جدتي و العب كثير معاهم
ولكن اليوم في الصباح. قالت ماما لا تروحي و تخليني، أنا أحبك يا ماما ليش ما تاخذيني معاكي؟
فما أدري إذا أنا خوفتها ولا هي بس حبت الكلام إللي قلتلها و حابه تعيده، لأنها تحب تسأل و تعيد في الكلام كثير
السؤال الحين
هل كلامي معاها كان صحيح؟ هل خوفتها؟
ايش أسوي عشان ما تخاف و تتأثر بغيابي؟
متخوفه إني راح أخليهم، أفكاري انحصرت في الأسوأ مثل انهم يطيحوا و ينجرحوا أو أشياء مثل كده
كيف اتخلص من الأفكار هذه؟
اشكرك مقدما
24-06-2011, 02:36 PM
ضوابط المشاركة
العرض الشجري