اختي .. الموضوع متشعب نوعاً ما .. يعني اللي معاه فلوس شي طبيعي أنه بيعطي زوجته وعياله .. واذا زاد دخله شي طبيعي بيزيد عطاءه .. لكن المشكلة وين؟!

أنا بقول لك ليش الرجل يخفي دخله المادي .. أخوي طبيب جراح ..

راتبه 33 ألف .. تدرين لو تجيه اصابة تمنعه من العمل لا قدر الله كم يكون راتبه التقاعدي؟! 7800 ريال!!!!
ليش؟!

لأن الراتب التقاعدي جزء من الراتب الأساسي وهذا شي اعتقد الكل يعرفه .. والراتب الأساسي لأخوي حوالي 15580 ريال .. مع البدلات يوصل 33 ألف!! شايفه كيف الراتب الأساسي قليل؟؟ أكثر الوظايف اللي فيها رواتب عالية نفس النظام .. راتب اساسي قليل وبدلات عالية ..
والتقاعد المبكر يعطونه نصف الراتب الأساسي اللي وقف عليه ..

طيب سؤال.. كيف يحسب الراتب التقاعدي ؟!
الجواب: عدد سنوات الخدمة (مضروبة في)* 2.5%

طيب كم ممكن يوصل راتب أخوي بعد 20 سنة ..؟؟!
ممكن يوصل راتبه مع البدلات إلى 60 ألف ريال!!!

طيب ولو تقاعد بعد 20 سنة كم بيكون راتبه؟!
من 20 إلى 25 ألف!!!!!!!!!!!

شايفه كيف الفرق!!!

يعني معناه الرجل لازم يكون له دخل ثاني غير الراتب!! طيب الموظف الحكومي ما يقدر يفتح سجل تجاري ويأسس تجارة .. لكن فيه حلول أخرى .. مثل الأسهم والعقارات ..
العقار هو أضمن حل لكن عشان استثمر في العقار لازم يكون عندي راس مال كبير ..

سؤال؟! من وين أجيب رأس المال؟!
اسهل حلين: استثمر مبلغ مثل 200 الف في الاسهم بحيث يرجع لي بعد كم سنة ضعف المبلغ (400 الف) وبعدين يستثمر المبلغ اللي طلعه في مكان ثاني وهنا الواحد يبغى له يكون فاااااااااااااااهم في السوق زين .. مهب طاير مع العجة وبس لأن احتمال الخسارة وارد!!

الحل الثاني انه ياخذ قرض مثلاً .. ويشتري به ارض .. بعدين يبيع الأرض بعد فترة بسيطة بسعر أعلى .. وهنا المشكلة أنها تعتبر مجازفة بشكل أكبر!! لأن القرض اللي بياخذه ربوي وكل ما طول ما باعها زاد المبلغ (الفائدة) ..

المهم نرجع لموضوعنا حق الاستثمار .. نفرض انه دبر راس المال للمشروع .. هل بيدبره كله؟!
الغالب لا .. سعر العمارة مثلاً يكلف حوالي 3 مليون ريال.. تلقينه يكون معاه حوالي ثلثين قيمة المشروع والباقي يقترضة.. يعني يقترض مليون.. سؤال مهم .. كم تدخل لك العمارة سنوياً؟! على حسب عدد الشقق ومكان العمارة ومساحة الشقة.. بالعادة بين الـ 150 الف الى 300 الف ريال سنوياً ..

سؤال كم يبي له عشان يسدد القرض؟!
نفرض أن العمارة تدخل له 240 الف سنوياً معناها هو محتاج تقريباً ست سنوات حتى يسدد القرض + الفائدة (لان القرض ربوي +_+)

طيب بعد ما خلص هذا كله .. صار عنده دخل إضافي قوي ..
يعني لو تقاعد يكون راتبه التقاعدي بين 20 الى 25 الف ريال + 20 الف ريال من العمارة .. شهرياً!
شايفه كيف الفرق؟؟؟

طيب نرجع فوق .. انا قلت هالشي:

طيب من وين اجيب الـ 200 الف الاساس؟! صعب أقترض قرض (ربوي).. هنا يجي دور الزوج في جمع المال .. واللي ذكرته كان عن كيف يكون عند الرجل دخل ثاني فقط فيه باقي البيت ما تكلمت عنه لانه يبغى له نكرر نفس الخطوات تقريبا

طيب تخيلي نفسك في مكان أخوي .. في مرحلة جمع المال هذي .. وتجي زوجته وتطلب منه مبلغ وقدره عشان تشتري فستان .. غير المصروف العالي اللي تاخذه .. بالله عليك ماراح تخفين راتبك؟!

اعتذر للمشرفين على اني خرجت شوي عن الموضوع لكن انا بس حبيت أبين للعضوات هنا ليش الرجل يخفي دخله عن زوجته اذا كانت متطلبه ..

واسف على الاطالة ..