ابوي .. وتعامله مع امي :(
السلام عليكم
لا ادري كيف يمكن البدء بكتابة شيء مثل هذا وشلون اقدر اوصل لكم الحرقه اللي فيني على امي
لكن بذكر لكم السالقه مختصره واتمنى منكم تساعدوني واشوف لها حل لانها بجد بدت تأثر على نفسياتنا
انا الحمدلله تربيت في بيت الكل كان يحسدني عليه من جو التفاهم اللي فيه وكبرت على هالشي ان امي وابوي بينهم علاقة حب واحترام وامي ماعمرها زعلته ولا رفضت له طلب حتى لو كان على حساب نفسها
لكن الشي هذا ما كان صحيح .. صحيح ان كان الهدوء كان يعم الوضع لكن لازم فيه بعض الاشياء حالهم حال اي زوجين وهالشي طبيعي لكن الشي اللي مو طبيعي اللي اكتشفته بعد ما وصلت سن العشرين .. القصه باختصار
امي ما تعودت ترفض لابوي شي او تواجهه وانا واخواني نفس الشي .. كنا نشوف ابوي شي ممنوع الاقتراب يعني ما نقدر نصارحه او نقول له شي هو طيب معانا لكنه شديد جدا ومحد فينا كان يقدر يرفع عينه بعين ابوي وهالشي كبرنا عليه لان ابوي طبيعته هادئ كثييييير يعني نادر نادر يتكلم وما يحب احد يناقشه في قراراته او اشياءه اللي يسويها ولا احنا نسوي اي شي بدون اذنه
المهم .. امي كانت لما يصير لها شي مع ابوي كانت ما تقدر تشكي الا لاخته واخته كانت تكلمه بطريقة ذكيه وتلين قلبه شوي وأمي كانت تراعي اخته وتسوي لها كل شي لانها كبيره وحتى امه ما تركتها يوم انها كانت بالمستشفى لحد ما توفت وكان قبل وفاتهم هم اللي كانوا يساندون امي ويوقفون معاها لو ابوي زعلها بشي او ثقل عليها وصلت مره انهم هددوه يطردونه من البيت لو ضرها لانهم يعرفون ان امي مسكينه وما تقدر تسوي شي
مو تفهمون من كلامي ان ابوي يضربها او يضربنا او كذا لا حرام بس كانت تصرفاته جافه معانا اوقات ومن النوع القديم اللي لازم كل شي يمشي حسب رايه وهالشي عقدنا واحنا نكبر حتى يمكن لو تسألوني الحين ماقدر اخذ قراري لحالي
ما اطول عليكم .. بعد ما توفوا جدتي وعمتي الله يرحمهم .. طلعت شخصيته وجاها بعد كم شهر يقولها انا ناوي اتزوج !!! بس كذا سبحان الله وبس قال لها هالكلمتين وسافر وخلاها في حال ما يعلم به الا رب العالمين
طيب هي في شنو قصرت معك ؟؟ سوت لك شي ؟؟ ليش تبي تتزوج ؟؟ وليش الحين بالذات ؟؟ محد كان يدري وامي مسكينه طبيعتها ما تتكلم لاحد ولولا انهم الله يرحمهم كانوا يصرون عليها كان ما تكلمت .. وحتى احنا ما قالت لنا وربي انا قلت خلاص امي بتروح فيها وما كنا عارفين شنو السبب وكلمنا الوالد وخليناه يرجع بس كانت الفكره بباله
بعدها لما شفت حالة امي تتدهور حلفت عليها الا تخبرني وخبرتني وياليتها ماخبرتني ما تعرفون شصار لي وقتها كيف اتصرف وشلون .. ادري بتقولون ان هالشي من حقه بس امي ما قصرت معاه وربي وحده غيره ما بتصبر على اطباعه وماقدر اوقف بوجهه لكن هذي امي !!!!
وظلت امي على هالحال والوالد مثل الصنم يطلع ويدخل لحد اللي رحم حالها وقال لها خلاص انا صرفت النظر عن الموضوع هذا بعد شهرين يمكن .. وشوي شوي رجعت الامور على ماهي عليه لكن مع بعض الحزازيات وعادت حياتنا شوي لوضعها الطبيعي
لكن اللي صار الحين من فتره جفاء بينهم مو طبيعي لدرجة انه يدخل ويطلع بس يسلم والسفره صار لها ايام ما يجلس معانا دايم بعدنا ويطلع ويدخل ولا يكلمها ولا كأنها موجوده بالبيت ومن شهرين قرر انه ياخذ اجازه ويسافر بدون سبب بس كذا راحه وتغيير جو مع ان احنا كنا نصر عليه نبي نسافر لكنه كل مره يتعذر بعذر وسافر وحتى ما كان يتصل لنا ولا يتطمن الا لما احنا نتصل له .. صحيح امي في البدايه اللي ابتعدت شوي لكن من حرقة قلبها على اللي صار وبعدها رجعت عادي .. ليش هو يسوي كل هذا
لدرجة انه يسوي اشياء يدري ان امي لازم تدري بالموضوع قبل لا يسويه وعادي يسويه بدون اهتمام وبدون لا يخبرها ع الاقل وحتى ما يخبرها لما يسويها .. بس تسمع بالاخبار من الغريب .. هذا واشياء كثيره يسويها من حركات الجفاء
وربي الوضع في البيت يزعل .. امي تعبانه حيييل والمشكله انها ما تتكلم لكن الشي والله كثير عليها انه تشوفه داخل وطالع ولا كأنها موجوده بالبيت .. ايام قبل كان يحكي لها كل شي صار معه من الصبح للظهر الحين زين نسمع صوته اذا سلم .. وربي تصرفاته جاااافه حيل معانا ومعاها .. امي اللي يشوفها ما يعرفها من اثار التعب والهم
والله انا تجيني اوقات اقول بوقف بوجهه وبكلمه لكن هذا ابوي وانا احترمه واخاف منه ولا عمري واجهته ولا كلمته بموضوع كذا .. ادري بتقولون اني كبيره وافهم لكن هالشي مؤرقني اخاف امي وابوي يقترقون بعد هالعمر وعندي اخوان صغار .. واخاف اخسر امي ،، انا ابي اسوي اي شي عشان امي ولا اشوف دمعتها ولا انكسارها
خبروني الله يجزاه خير اللي يساعدني .. وش اسوي وشلون اتصرف وشلون اخلي ابوي يحن قلبه عليها ويرجع بيتنا مثل قبل لان كل البيت تأثر
انا والله مالي الا ربي ثم انتوا
وما راح يخيب ظني فيكم
اعذروني على كلماتي المبعثره لكن والله مو عارفه شلون اكتب وشنو اكتب واكتب لكم وقلبي محترق على امي
11-09-2011, 01:42 AM
ضوابط المشاركة
العرض الشجري